soqoni ni sakaramede

28 ni Okosita–3 ni Sepiteba

1 Korinica 8–13

“Koi Kemudou na Yago i Karisito”

Ni o wilika ena masumasu na 1 Korinica 8–13, ena rawa ni vosa vei iko na Yalo Tabu ena sala cecere (raica na 1 Tui 19:11–12). Na volai ni veika o vakila ena vukei iko mo vakananuma mai na veika o a vakila ka vakasamataka ena gauna o vuli-ka tiko kina.

Vola na Veika o Vakauqeti Kina

Ena gauna i Paula, o Korinica a dua na vanua ni veivoli vutuniyau ka ra vakaitikotiko kina o ira mai na Matanitu o Roma. Na levu ni mataqali tovo vakavanua kei na veimatalotu ena loma ni siti, era sasaga vakaukauwa na lewe ni Lotu e Korinica mera duavata tiko, a qai saga o Paula me vukei ira mera kunea na duavata ena nodra vakabauta na Karisito. Na duavata oqo me a uasivi cake mai na tiko vakacegu walega; o Paula a sega walega ni kerei ira mera dauvosota na nodra veiduidui eso. Ia, e vakatavulica o koya ni gauna era lewena kina na Lotu i Jisu Karisito, era sa “papitaisotaki ga ki na yago e duabau ga,” ka sa gadrevi na veitikini yago kecega (1 Korinica 12:13). Ni yali e dua na lewenilotu, e sa vaka ni sa yali e dua na tiki ni yago, ka sa malumalumu kina na yago. Ni sotava na mosi e dua na lewe ni lotu, e dodonu meda vakila kece ka veivuke me vakavinakataki. Ena mataqali duavata vakaoqo, na duidui e sega walega ni kilai ia e vakamareqeti, baleta ni kevaka e sega na tikina yadua kei na nodra isolisoli kei na taledi duidui, ena sega ni rawaka vinaka sara na yago. Kevaka o sa vakila tu ni vaka ga o logalogavinaka ena Lotu se raica ni o lomatarotarotaka se o okati dina kina, na itukutuku nei Paula vei iko sai koya ni duavata e sega ni da na tautauvata. O na gadrevi ira na wekamu Yalododonu, ka o na gadrevi mai vei ira na wekamu Yalododonu.

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

1 Korinica 10:1–13

E dau vakarautaka na Kalou na sala meda drotataka na veitemaki.

Na veika e vakilai vakayalo, o koya mada ga e veivakurabuitaki, ena sega ni vakuwai keda mai na veitemaki sa “vorata rawa na tamata” (1 Korinica 10:13). Oqori e rairai dua beka na vuna a vola kina o Paula na nodra a sasaga dredre mai na veitemaki na Isireli ena gauna nei Mosese, e dina ga ni ra vakadinadinataka na cakamana veivakurabuitaki eso (raica na Lako Yani 13:21; 14:13–31). Ni o wilika na 1 Korinica 10:1–13, na veivakaroti cava ena veika era sotava na Isireli e rawa ni yaga vei iko? Na mataqali “idrodro“ cava mai na veitemaki sa vakarautaka vei iko na Tamada Vakalomalagi? (raica talega na Alama 13:27–30; 3 Nifai 18:18–19).

1 Korinica 10:16–17; 11:16–30

Na sakaramede ena vakaduavatataki keda na lewe ni Lotu i Karisito.

E dina ga ni oka ena sakaramede e dua na yalayala ni tamata yadua vei iko kei na Turaga, sa dua talega na kena mo wasea vei ira na tamata. E voleka ni da dau vakaivotavota vata ena sakaramede, me vaka e dua na yago ni Yalododonu. Wilika na veika e vakatavulica o Paula me baleta na sakaramede, ka vakasamataka ena rawa vakacava ni vukea e “lewe vuqa” na cakacaka tabu vakalotu oqo me ra “dua bau” vei Karisito (1 Korinica 10:17). E vukei iko vakacava na vakaivotavota ena sakaramede mo voleka cake vei Karisito kei ira na vakabauta tale eso? E veivakauqeti vakacava na veitikina oqo ki na nomu nanuma me baleta na sakaramede kei na sala o vakavakarau kina?

1 Korinica 11:11

Ena ituvatuva ni Kalou, era na veilomani na tagane kei na yalewa.

Ena 1 Korinica 11:4–15, e tukuna kina o Paula na itovo vakavanua eda sa sega ni muria nikua. Ia, a vakavulica talega o Paula e dua na dina bibi e yaga tawamudu, e kunei ena tikina e 11. Na cava o nanuma e kena ibalebale na tikina oqo, kei na cava na vuna e bibi kina? E vakatavulica o Elder David A. Bednar, “Na tagane kei na yalewa e kena inaki me rau vuli mai, veivaqaqacotaki, veivakalougatataki, ka veivakataucokotaki vakairau” (“Eda Vakabauta na Tiko Savasava,” Liaona, Me 2013, 42). E rawa vakacava ki na dina oqo me vakauqeta e dua na vakamau? Ena rawa vakacava ki na kila oqo me veisautaka na sala ni noda veiqaravi ena Lotu?

Raica talega na Jean B. Bingham, “Duavata ena Vakayacori ni Cakacaka ni Kalou,” Liaona, Me 2020, 60–63.

1 Korinica 12–13

Na isolisoli vakayalo e soli me yaga vei ira kece na luvena na Tamada Vakalomalagi.

Na veisolisoli vakayalo e volai tu ena 1 Korinica 12–13 e sega ni takiveiyaga. Ia e vanua vinaka me tekivutaki kina na nomu kila mai ka vakasamataka vakatitobu na veisolisoli vakayalo e solia mai vei iko na Tamada Vakalomalagi. Na itukutuku “iSolisoli Vakayalo” ena Ulutaga Vakosipeli (topics.ChurchofJesusChrist.org) ena rawa ni vukei iko mo kila vakavinaka cake na isolisoli oqo. Ni o wilika na lisi ni isolisoli nei Paula, o na rawa ni vakuria eso o sa raica vei ira eso, vei iko, se vei ira na tamata ena ivolanikalou. Kevaka e tiko nomu veivakalougatataki vakapeteriaki, ena rawa talega ni tukuni kina eso na nomu isolisoli vakayalo. E vukei iko vakacava na veisolisoli oqo mo vakalougatataki ira kina eso? Vakasamataka na veika o na rawa ni cakava mo vakasaqara kina “vakalevu na veisolisoli vinaka sara” (1 Korinica 12:31).

Raica talega na 1 Korinica 14; Moronai 10:8–21, 30; Vunau kei na Veiyalayalati 46:8–26; Yavu ni Vakabauta 1:7.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

1 Korinica 9:24–27.Me vaka ni vakatauvatana o Paula na bulataki ni kosipeli ki na veitaucici, e rawa ni dou veitaucici vakamatavuvale me vakamatatataka na nona ivakamacala. Vakaicocovitaka e dua na i salavakatui vei ira kece era vakacavara na veitaucici, ka veitalanoataka ni ra na winitaka na icocovi “sega ni ca rawarawa” o ira era sa yalodina ena vakamuri Jisu Karisito ena bula oqo (1 Korinica 9:25; raica talega na 2 Timoci 4:7–8). Na cava e dau cakava e dua na daucici me vakavakarau ki na veitaucici? Na cava eda rawa ni cakava meda vakavakarau meda lesu vua na Tamada Vakalomalagi?

o ira era veitaucici tiko

E vakatauvatataka o Paula na bulataki ni kosipeli ki na dua na veitaucici.

1 Korinica 12:1–11.Ni wiliki oti vata na veitikina oqo, sa rawa mo veisoliyaka e dua na tiki ni pepa vei ira yadua ka me volai toka e cake na yacana e dua tale na lewe ni vuvale. Kerei ira kece me ra vola na veisolisoli vakayalo era raica ni tiko vei koya na tamata oya. Mo qai solia wavoki yani na veitiki ni pepa ena loma ni wirini me yacova ni sa vola na tamata yadua ka pasitaka na pepa ena dua na wirini vei ira kece me yacova ni ra sa vola kece kina na isolisoli ni lewe ni vuvale yadua.

1 Korinica 12:3.Na cava e gadrevi kina na Yalo Tabu me rawa ni rawati kina e dua nai vakadinadina baleti Jisu Karisito? Na cava eda rawa ni cakava me sureta na Yalo Tabu me vaqaqacotaka na noda ivakadinadina baleti Koya?

1 Korinica 12:12–27.Na vosa vakaibalebale nei Paula me baleta na yago ena rawa ni dua na sala ivakananumi me veitalanoataki kina na duavata vakavuvale. Me ivakaraitaki, ena rawa ni droinitaka na lewe ni vuvale e dua na yago ka tu ga na matana kei na daligana (raica na tikina 17). Na cava e vakatura na veitikina oqo me baleta na noda ivakarau vei ira na lewe ni vuvale yadua?

1 Korinica 13:4–8.Na ivakamacala nei Paula me baleta na loloma vakalou ena rawa ni dua na iulutaga veivakauqeti ni nomu vuvale. Ena rawa ni o lesia na lewe ni vuvale yadua me vulica e dua na malanivosa ena tikina e 4–8 ka vakatavulica na vo ni vuvale na cava e kena ibalebale me vakayagataki na ivakamacala, ivakaraitaki, kei na veika e sotava na tamata yadua. E ivakaraitaki vakacava ni itovo vakaoqo na iVakabula? Ena rawa ni dou cakava vata na ivola kabi ni veimalanivosa yadua oqo ka valiliga ena veivanua taucoko ena nomu vale. Mo dau vakasama vovou!

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Vosa ni Loloma,” iVolanisere ni Gonelalai, 102.

Vakatorocaketaki Noda Veivakavulici

Vakaraitaka e dua na ivolanikalou. Vakabira e dua na tikina e vakaibalebale vei iko ena vanua era na raica vakawasoma kina na lewe ni vuvale. Sureti ira tale eso na lewe ni vuvale me ra vakaitavi kece ena kena digitaki e dua na ivolanikalou me vakaraitaki tiko.

soqoni ni sakaramede

“Ai buli madrai eda sa dovia, sa sega li ni ka sa noda vata kina na yago i Karisito? Ni sa dua bauga na madrai, sa qai yagona e dua bauga koi keda e lewe vuqa” (1 Korinica 10:16–17).