Korinica ena gauna eliu

Korinica, Ceva kei Kirisi, Vale levu ni Veivakasoqoni, droini maivei Balage Balogh/www.ArchaeologyIllustrated.com

21–27 ni Okosita

1 Korinica 1–7

”Mo Duavata Sara Vakavinaka”

Vola na veika o vakauqeti kina ni o wilika na 1 Korinica 1–7. Na veivakauqeti oqo e rawa ni oka kina na sasagataki ni vulici ni dua tale na vakasama, mo wasea vei ira na tani na veika o sa vulica, se mo vakayaco veisau ki na nomu bula.

Vola na Veika o Vakauqeti Kina

Ena veivula e tiko kina o Paula e Korinica, “sa lewe vuqa na kai Korinica ni ra sa rogoci [koya], era sa vakabauta, ka ra sa papitaisotaki” (Cakacaka 18:8). A rairai vakatuburarawa vei Paula me rogoca, ni oti toka ga e vica na yabaki, ni sa mai yaco na “veisei” kei na “dauveileti” ena kedra maliwa na Yalododonu e Korinica, ka ni gauna e yali tu kina o koya era sa tekivu siova na “vuku ni vuravura oqo” (1 Korinica 1:10–11, 20). Me kena isau, a vola o Paula na ivola eda sa vakatoka oqo me 1 Korinica. E sinai tu kina na ivakavuvuli bibi, ni gauna vata oqo, a vaka me yalorarawa o Paula ni ra sega tu ni vakarau na Yalosavasava me ra ciqoma na ivunau taucoko a via solia vei ira o koya. “Koi au, au sa sega ni vosa rawa vei kemudou, na veiwekani, me vaka vei ira era sa vakayalo,” a tagicaka o koya, “ni dou sa vakayago tikoga” (1 Korinica 3:1–3). Ni da vakavakarau me da wilika na vosa i Paula, ena rairai veivuke meda vakadikeva na noda rawa ni ciqoma na dina—oka kina na noda lomasoli meda rogoca na Yalo ka sasaga meda duavata vakavuvale, vata kei ira na wekada Yalododonu, vata kei na Kalou.

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

1 Korinica 1:10–17; 3:1-11

Era sa sasaga na lewe ni Lotu i Karisito mera duabau.

Eda sega ni kila na matailalai kece ni nodra tawaduavata na Yalododonu e Korinica, ia eda kila tu na tawaduavata ena noda veimaliwai vakataki keda. Vakasamataka mada e dua nai sema ni veimaliwai ena nomu bula ena rawa ni vinaka cake ena duavata; ka qai vakasaqara na veika e vakatavulica o Paula ena 1 Korinica 1:10–17; 3:1–11 me baleta na lailai ni nodra duavata na Yalosavasava e Koronica. Na raititobu cava soti o rawa ni rawata ena iwalewale ni kena taraicake vakalevu sara na duavata kei ira eso?

Raica talega na Mosaia 18:21; 4 Nifai 1:15–17; Vunau kei na Veiyalayalati 38:23–27; 105:1–5; Ulutaga Vakosipeli, “Duavata,” topics.ChurchofJesusChrist.org.

1 Korinica 1:17–31; 2

Me vakayacori taucoko na cakacaka ni Kalou, au sa gadreva na vuku ni Kalou.

Ni sa vinaka tiko—ka vakauqeti talega—meda vakasaqara na vuku ena vanua cava ga eda rawa ni kunea kina (raica na 2 Nifai 9:29; Vunau kei na Veiyalayalati 88:118), sa veivakaroti vakaukauwa sara o Paula me baleta na vuku veivakacalai vakatamata, ka vakatoka o koya me “vuku ni vuravura oqo.” Ni o wilika na 1 Korinica 1:17–25, vakasamataka vakatitobu na ibalebale ni veimalanivosa oqo. Na cava o nanuma e vakaibalebaletaka tiko o Paula na “vuku ni Kalou”? Cava na vuna eda gadreva kina na vuku ni Kalou me rawati taucoko kina na cakacaka ni Kalou?

Ena nomu sasaga mo rawata kece na nomu itavi ena vakataucokotaki ni cakacaka ni Kalou, o sa bau sotava mada na “rere, kei … na sautaninini levu” a vakila o Paula ni vakatavulici ira tiko na Yalododonu e Koronica? (1 Korinica 2:3). Na cava o kunea ena 1 Korinica 2:1–5 e vakayaloqaqataki iko? Vakasamataka na iwalewale o rawa ni vakaraitaka kina ni ko sa vakararavi vakalevu cake ki na “kaukauwa ni Kalou” ka sega ena “vuku ni tamata.”

Raica talega na Vunau kei na Veiyalayalati 1:17–28.

1 Korinica 2:9–16

Au sa gadreva na Yalo Tabu meu kila vakavinaka kina na veika ni Kalou.

Kevaka o via vulica vakalevu cake e dua na ka vaka na misini ni motoka se na droinitaki vale ni gauna makawa, o na cakava vakacava? Mai na 1 Korinica 2:9–16, e sa duidui vakacava na vulici ni “ka ni Kalou” mai na “veika ni tamata”? Cava na vuna sa dodonu me tiko kina kei keda na Yalo Tabu me da kila vakavinaka kina na veika ni Kalou? Ni wiliki oti na veitikina oqo, na cava o nanuma sa dodonu mo cakava mo kila vakavinaka sara kina vakalevu na veika vakayalo? Ena rawa ni veivuke vakacava na vosa i Paula kivua e dua e sotavi dredre tiko ena nona ivakadinadina?

1 Korinica 6:13–20

Sa ka tabu na yagoqu.

E vuqa vei ira na tamata e Korinica era nanuma ni ciqomi tu na veimoceri vakailoa ka buli vakatabakidua na yagodra me ra marautaki. E dua tale, sa sega ni duidui sara o Korinica mai na vuravura edaidai. Na cava e vakavulica o Paula ena 1 Korinica 6:13–20 ena rawa ni vukei iko ni vakamacalataka vei ira na tani na vuna o vinakata kina mo bulataka e dua na bula savasava?

Me vakataki Paula, a vakayaloqaqataki ira na Yalododonu o Sister Wendy W. Nelson me ra bula savasava; raica na nona itukutuku “Loloma kei na Vakamau” (lotu e vuravura raraba ni itabagone qase cake, 8 ni Janu., 2017, broadcasts.ChurchofJesusChrist.org). Me vaka e tukuna o Sister Nelson, na veivakalougatataki cava e yaco mai ena kena bulataki na ivakatagedegede ni Turaga me baleta na loloma kei na veivinakati?

1 Korinica 7:29–33

A vakavulica beka o Paula ni sa vinaka cake meda tawavakamau mai na vakamau?

E vica na tikina ena 1 Korinica 7 e vaka me nanumi kina ni ciqomi na vakamau, ia na nodra sega ni vakamau ka sega talega ni veiyacovi e vinaka cake. Ia, na iVakadewa i Josefa Simici, 1 Korinica 7:29–33 (ena idusidusi ki na iVolanikalou) ena vukea meda kila vakavinaka ni a vakaibalebaletaka tiko o Paula vei ira sa kacivi me ra daukaulotu tudei, me ra raica ni sa rawa ni ra qarava vakavinaka cake na Kalou kevaka era bula duadua voli ena gauna ni nodra kaulotu. Sa vakatavulica na Turaga mai vei ira na Nona italai, oka kina o Paula, ni sa tiki ni Nona ituvatuva tawamudu na vakamau ka sa veiganiti kaya ena bula vakacerecerei (raica na 1 Korinica 11:11; Vunau kei na Veiyalayalati 131:1–4).

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

1 Korinica 1:10–17; 3:1-11.Ni ra wilika tiko na nomu lewe ni vuvale na veitikina oqo, sureti ira me ra kunea e dua na raititobu ena rawa ni vukei ira me ra duavata vakalevu cake.

1 Korinica 3:1–2.Sa rawa mo wilika na veitikina oqo ni ko gunu sucu ka kana lewe ni manumanu tiko. Sa rawa mo vakatauvatana na sala era tubu cake kina na gonelalai ki na uabula ena ivakarau eda tubu vakayalo kina.

1 Korinica 3:4–9.A vakatauvatana o Paula na nona sasaga vakadaukaulotu ki na teivaki ni sore ni itei. Na cava e vakavulica vei keda na nona veivakatauvatani me baleta na wasei ni kosipeli?

1 Korinica 6:19–20.Na vakatauvatani ni yagoda ki na valetabu, me vaka e vakayacora o Paula, sa rawa ni dua na sala momona me vakavulici kina na bibi ni sa ka tabu na yagoda. De na rawa beka ni o vakaraitaka na iyaloyalo ni valetabu eso, me vaka na kena era tiki tiko ni idusidusi oqo. Cava na vuna era ka tabu kina na valetabu? E tautauvata vakacava na yagoda kei na valetabu? Na cava eda rawa ni cakava meda qarava kina na yagoda me vaka na valetabu?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Ko ni Solia Mai vei Au Nomuni Vale,” iVolanisere ni Gonelalai, 73.

Vakatorocaketaki ni Vuli ni Tamata Yadudua

Mo vosoti iko vakai iko. E vakatavulica o Paula ni liu taumada na sucu ni bera na lewe ni manumanu ena gauna eda vulica tiko kina na kosipeli (raica na 1 Korinica 3:1–2). Kevaka o raica ni so na ivunau e dredre tiko me kilai ena gauna oqo, vosota toka. Mo nuitaka tikoga ni na yaco mai nai saunitaro ni o vakabauta tiko ka vuli tiko vagumatua.

va na valetabu

E vakatauvatana o Paula na yagoda ki na bibi ni vakatabui ni valetabu. Tekivu ena imawi e cake ki na matau: Valetabu e Curitiba Brazil, Valetabu e Mexico City Mexico, Valetabu e Tokyo Japani, Valetabu e Accra Ghana.