“31 ni Julai–6 ni Okosita. Cakacaka 22–28: ‘Me iTalatala kei na iVakadinadina’” Lako Mai, Mo Muri Au—Baleta na Tamata Yadua kei na Matavuvale: Veiyalayalati Vou 2023 (2022)

“31 ni Julai–6 ni Okosita. Cakacaka 22–28,” Lako Mai, Mo Muri Au—Baleta na Tamata Yadua kei na Matavuvale: 2023

iVakatakilakila

O Paula e valeniveivesu

31 ni Jiulai–6 ni Okosita

Cakacaka 22–28

“Me iTalatala kei na iVakadinadina”

Na veivakauqeti ni Yalo Tabu esa gauna ni vakadirorogo ka so na gauna e totolo sara. Na nomu vola na veivakauqeti ena rawa ni vakatara mo vakasamataka tale mai vakatitobu. Ni o wilika na Cakacaka 22–28, vola na veivakasama kei na veika o vakila e yaco mai vei iko, ka taura na gauna mo vakasamataka vakatitobu.

Vola na Veika o Vakauqeti kina

“Ena gauna eda vakayacora tiko kina na veitalai ni Turaga,” e yalataka o Peresitedi Thomas S. Monson, “e sa noda talega na veivuke ni Turaga” (“Meda Vuli, Vakayacora, Meda Vaka Sa Namaki,” Liaona, Nove. 2008, 62). Eda sega ni vakaivotavota, ena gaunisala maravu kei na veigauna tawacava ni rawa-ka. Na ivakadinadina ni veika oqo, sai koya meda kakua ni rai vakayawa, ka raici Paula ga na iApositolo. Na nona talai mai vua na iVakabula sai koya “me kauta na yacaqu ki na matadra na veimatanitu tani, kei ira na tui eso, kei ira na luve i Isireli” (Cakacaka 9:15). Ena wase 22–28 ni Cakacaka, eda raica na nona vakayacora tiko o Paula na itavi oqo kei na veisaqasaqa levu e sotava—sinucodotaki, vesu e valeniveivesu, vakararawataki vakayago, kasa nona waqa, ka laukati sara madaga ena gata. Eda raica talega ni o Jisu “sa tu voleka vua na Turaga, ka kaya, Mo vakacegu ga, Paula” (Cakacaka 23:11). Na veika a sotava o Paula sa dua na veivakananumi veivakauqeti ni kaci ni Turaga meda “vunautaka na [Nona] kosipeli ena yalomarau” e sala vata mai kei na yalayala oqo: “Dou laveta cake na yalomudou ka marau, niu sa tiko ena kemudou maliwa” (Vunau kei na Veiyalayalati 29:4–5; raica talega na Maciu 28:19–20).

iVakatakilakila

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Cakacaka 22:1–21; 26:1–29

Era wasea vakadoudou na tisaipeli i Jisu Karisito na nodra ivakadinadina.

Ena gauna a tukuna kina o Paula na ivakadinadina kaukauwa e volai tiko ena Cakacaka 22 kei na 26, a vesuki tu maivei ira na sotia ni Roma. Na tamata e vosa tiko kina o koya e tu vei ira na kaukauwa me ra vakatauca na lewa me vakamatei. Ia e digitaka sara vakadoudou me vakadinadinataki Jisu Karisito kei na “raivotu vakalomalagi” (Cakacaka 26:19) a ciqoma o koya. Na cava e vakauqeti iko baleta na nona vosa? Vakasamataka mada na veimadigi e rawa ni o wasea kina na nomu ivakadinadina. Me ivakaraitaki, era kila beka na nomu itokani na veika o vakila me baleti Jisu Karisito? Se na cava na iotioti ni gauna o a tukuna kina ki na nomu vuvale na sala o a rawata kina na nomu ivakadinadina ni kosipeli?

Ena gauna a vakasewasewani kina na cauravou o Josefa Simici ena nona tukuna na iMatai ni Raivotu, a vakauqeti ena sala a vakadinadinataka kina o Paula na nona raivotu (raica na Josefa Simici—Ai Tukutuku 1:24–25). O na vakalekataka vakacava na veika a vulica o Josefa Simici mai vei Paula? Na cava o vulica mai vei rau na ivakadinadina e rua oqo me baleti Jisu Karisito?

Raica talega na Neil L. Andersen,“Eda Tukuni Karisito,” Liaona, Nove. 2020, 88–91.

Cakacaka 23:10–11; 27:13–25, 40–44

Na Turaga e tu e yasadra era sasaga me qaravi Koya.

Me vaka e vakaraitaka vakamatata na veiqaravi nei Paula, na veidredre ena noda bula e sega ni vakatakilakila ni sega ni duavata na Kalou kei na cakacaka eda vakayacora tiko. Na kena dina, ena so na gauna eda vakila saraga na kaukauwa ni Nona veitokoni ena veigauna dredre oqori. Ena rawa ni ka marautaki meda railesuva na veika o sa wilika mai ena veiqaravi nei Paula ka vola eso na ka e sotava ka vosota o koya (raica oqo, me ivakaraitaki, Cakacaka 14:19–20; 16:19–27; 21:31–34; 23:10–11; 27:13–25, 40–44). A tu vakacava e yasana na Turaga? A tu vakacava e yasamu o Koya?

Cakacaka 24:24–27; 26:1–3, 24–29; 27

E tiko na veitaqomaki kei na vakacegu ena noda rogoca na nodra vosa na italai ni Kalou.

Ena gauna taucoko ni nona veiqaravi, a kaukauwa sara na nona vakadinadinataki Jisu Karisito kei na Nona kosipeli o Paula. E vuqa na tamata era a ciqoma na nona i vakadinadina, ia a sega ni o ira kece. Ni o wilika na Cakacaka 24:24–27 kei na Cakacaka 26:1–3, 24–29, vola na vosa kei na malanivosa e vakaraitaka na sala cava era a saqata kina na dauvakatulewa mai Roma e Jutia ki na vakavuvuli i Paula:

Filikesa
Fesito
Tui o Akaripa

Ena gauna e soko tiko kina ki Roma me lewai vei Sisa, e parofisaitaka o Paula ni “na levu na ka ca” ena yaco ki na waqa kei na pasidia (Cakacaka 27:10). Wilika na wase 27 me laurai kina na cava era a cakava na itokani kaimua nei Paula baleta na nona ivakaro. O kunea beka eso na lesoni e baleti iko ena veika era a sotava?

Na cava o a cakava me vakataki ira oqo ena gauna o rogoca kina na nodra ivakavuvuli na liuliu ni Lotu? Na cava so e rawa ni yaco me isau ni veika o vakayacora ena sala oqo? Na cava o sa vulica mai nai tukutuku eso oqo me baleta na vakamuri ni vakasala ni Turaga mai vei ira na Nona italai?

Raica talega na 2 Nifai 33:1–2; D. Todd Christofferson, “A Domo ni iVakasala,” Liaona, Me 2017, 108–11; “Muri Ira na Parofita Bula,” Nodra iVakavuvuli na Peresitedi ni Lotu: Ezra Taft Benson (2014), 147–55.

iVakatakilakila

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Cakacaka 24:16.Ni bera na nona saumaki o Paula, a vuqa sara na itukutuku ni nona cala vua na Kalou. Baleta ni sa gadreva me veivutuni, a kaya rawa kina, “Ia na ka oqo kau sa gumatua kina, me kakua ni dua na siga e cala kina na lewa ni lomaqu vua na Kalou, se vei ira na tamata” (raica talega na Vunau kei na Veiyalayalati 135:4–5). Ena rawa vakacava ni da kauta tani mai vu ni yaloda na noda cala vua na Kalou kei ira na tamata?

Cakacaka 26:16–18.Ena veitikina oqo, na cava e kacivi Paula kina na Turaga me cakava? Na madigi cava soti e tu vei keda me da vakayacora na veika vakaoqo?

Cakacaka 28:1–9.E dua beka ena nomu vuvale e taleitaka na gata? O na via kerea na tamata oya se dua tale na lewe ni vuvale me talanoataka na italanoa e kune ena Cakacaka 28:1–9. Eratou na taleitaka beka na luvemu me ra droinitaka nai yaloyalo ni veitalanoa oqo se vakatasuasuataka. Na lesoni cava soti eda rawa ni vulica mai na veitukutuku oqo? E dua beka sai koya ni Turaga e vakayacora na Nona yalayala vei ira na Nona italai. Me ivakaraitaki, e rawa ni o vakatauvatataka na yalayala e vakayacori ena Marika 16:18 kei na kena vakavotukanataki ena veika e sotava o Paula. Ena rawa talega ni o kunea ena dua na vosa ena koniferedi raraba se qai vakayacori ga e dua na yalayala e cakava e dua na italai ni Turaga—de dua beka e vakaibalebale vakalevu ki na nomu vuvale—ka qai vakaraitaka tu ena loma ni nomu vale. Ena rawa vakacava meda vakaraitaka na noda vakabauta ni na vakavotukana na yalayala oqori?

A taqomaki Paula na Kalou ni a kati koya e dua na gata paisoni.

Cakacaka 28:22–24.Me vaka na Lotu ena gauna i Paula (e vakatokai me “lotu tani” ena tikina 22), na Lotu ena gauna oqo e dau “vosa vakacacataki.” Ni ra vosataka nai Vakabula kei na Nona Lotu, e cava e cakava o Paula? Na cava e rawa ni da vulica mai na ka e a sotava o Paula?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Serenilotu vakaturi: “Sa Bula Tiko na iVakabula,” Sere ni Lotu, naba 75.

Vakatorocaketaki Noda Veivakavulici

Vakanamata ki na ivakavuvuli ena vakalougatataki ira nomu vuvale. Ni o vulica na ivolanikalou, tarogi iko, “Na cava au na kunea eke ena rawa ni vakaibalebale vakabibi ki na noqu vuvale?” (Raica na Veivakavulici ena iVakarau ni iVakabula, 17.)