E veivakavulici tiko o Paula ena delana

24–30 ni Julai

Cakacaka 16–21

“Sa Kacivi Keitou na Turaga Me Keitou Vunautaka Vei Ira na iTukutuku Vinaka”

Ni o wilika na nona sasaga o Paula me vunautaka na kosipeli, ena rawa ni vakauqeti iko na Yalo ena so na vakasama kei na veika o rawa ni vakila. Vola na veivakauqeti oqo, ka tuvanaka mo vakayacori ira.

Vola na Veika o Vakauqeti Kina

E dua na iotioti ni vosa ni Turaga vei ira na Nona iApositolo sa ikoya na ivakaro, “O koya mo dou qai lako, ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu: vakavulici ira me ra vakabauta na ka kece kau a vosa kina vei kemudou” (Maciu 28:19–20). E dina ni sega ni yaco o ira na iApositolo ki na veimatanitu taucoko sara, e vakaraitaki ena Cakacaka 16–21 ni o Paula kei ira na nona itokani e vakasakiti sara na toso era cakava ena kena tauyavutaki na Lotu. Era veivakavulici, veipapitaisotaki, ka vakatikora na isolisoli ni Yalo Tabu. Era a vakayacora na cakacaka mana, e vakakina na vakabulai tale mai ni dua na tamata mai na mate, ka tukuna taumada talega na Vuki tani Levu (Cakacaka 20:7–12, 28-31). Na cakacaka era vakatekivuna e tomani tiko mai vei ira na iApositolo bula nikua, vakakina o ira na tisaipeli yalodina vakataki iko, era sa veivuke tiko ena kena vakavotukanataki na ilesilesi ni Vakabula ena sala e sega ni na rawa beka me vakasamataka o Paula. De dua o kilai ira beka eso na tamata era sega tu ni kila na Tamadra Vakalomalagi kei na Nona kosipeli. De dua o na vakila na “katakata ni loma[mu]” mo wasea kei ira na veika o kila baleti Koya (Cakacaka 17:16). Kevaka o vakamuria na ivakaraitaki ni yalomalumalumu kei na doudou nei Paula, ena wasei ni kosipeli, o na rawa ni kunea e dua “[sa] dolava na yalona na Turaga” (Cakacaka 16:14).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Cakacaka 16–21

Ena liutaki au na Yalo ena noqu sasaga me’u wasea na kosipeli.

A kaya na Parofita Josefa Simici, “E sega ni rawa vua e dua na tamata me vunautaka na Kosipeli ke sega na Yalo Tabu” (Nodra iVakavuvuli na Peresitedi ni Lotu: Josefa Simici [2007], 332). Ni o wilika na Cakacaka 16–21, vakasamataka na vuna e dina kina na itukutuku ni Parofita. Raica na gauna eso a vukei Paula kei na nona itokani kina na Yalo. Na veivakalougatataki cava so e yaco mai baleta ni ra vakamuria na Yalo? Ena gauna cava o vakila kina na Yalo ni vakauqeti iko ena nomu sasaga mo wasea na kosipeli?

Cakacaka 16–21

Au rawa ni vunautaka na kosipeli ena ituvaki cava ga.

Na bala i vale ni veivesu baleta na vunautaki ni kosipeli ena rawa ni dua nai naki me kua ni vunautaki kina. Ia vei Paula kei Sailasa, a yaco me dua na gauna me rau vakalotutaka kina e dua na i vakatawa ni valeniveivesu (raica na Cakacaka 16:16–34). Ena wase taucoko ni Cakacaka 16–21, vakasaqara na ivakaraitaki tale eso ni lomasoli nei Paula me wasea na nona ivakadinadina vei ira na tamata kece. Na cava o nanuma kina ni sa rui doudou ka sega ni rere kina? Na cava o vulica rawa mai na ivakaraitaki nei Paula?

E vuqa tale tu na itukutuku me baleta na kena wasei na kosipeli ena Cakacaka 16–21. Ni o vulica na veiwase oqo, vakaraica eso e ganiti iko vakabibi.

Raica talega na Dieter F. Uchtdorf, “Na Cakacaka ni Kaulotu: Wasea na Veika e Tu e Lomamu,” Liaona, Me 2019, 15–18.

e tauri tiko e dua na gonelailai

Oi keda yadua sa luvena na Kalou.

Cakacaka 17:16–34

“Oqo ni da sa kawa ni Kalou.”

Mai Aceni, a raica kina o Paula na veimataqali vakasama kei na rai vakalotu. Era sa dau vakasaqara me ra “ rogoca e dua na ka vou,” ni veika e mai vakaraitaka o Paula e ka vou dina sara vei ira (raica na Cakacaka 17:19–21). Era vakalou ki na vuqa na kalou, ka oka talega kina e dua era vakatoka me “Kalou e tawakilai” (Cakacaka 17:23), ia era vakabauta ni ra mana se kaukauwa na kalou eso oqo, era sega ni bula, se vakayago, ka sega dina sara ni Tamada. Vakasamataka vakatitobu na veika e tukuna o Paula me vukei ira me ra kila na Kalou. Na cava na kena ibalebale vei iko ni ko “sa kawa ni Kalou”? (Cakacaka 17:29). Ena nomu rai, na cava na duidui ni o dua na luve ni Kalou mai na dua ga na Nona ibulibuli? E vakauqeta vakacava na nomu raici iko kei ira na tani na nomu kila na dina oqo?

Kevaka o tu e yasai Paula ni a wasea tiko nonai vakadinadina, na cava o na tukuna vei ira na kai Kiriki ni gauna makawa me baleta na Tamada Vakalomalagi? O kila beka e dua ena rawa ni yaga vua ni rogoca na nomu ivakadinadina?

Raica talega na Roma 8:16; 1 Joni 5:2; “Eda Sa Kawa ni Kalou” (vidio), ChurchofJesusChrist.org.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Cakacaka 16–21.Me vakatitobutaki na nodratou kila vinaka na nomu vuvale na Cakacaka 16–21, sa rawa mo vulica na mape ena mua ni ituvatuva oqo, ka vaqara na veikoro ka vunautaka kina o Paula na kosipeli ena vei wase oqo. Na ivurevure cava soti e tu vei keda nikua me vukea na kena kau na kosipeli ki na veimatanitu kecega?

Mo vakauqeta na nomu matavuvale mo wasea na kosipeli, sa rawa mo vakaraitaka e dua se sivia na vidio ena “Wasei ni Kosipeli” iwasewase ni Valenivola Vakosipeli.

Cakacaka 17:10–12; 18:24–28.Ena rawa vakacava meda vakataki ira vakalevu cake na Yalosavasava ena veitikina oqo? Na cava beka na ibalebale ni “[ciqoma] na vosa ena tu vakarau ni vakasama”? (Cakacaka 17:11). Na cava e rawa ni da cakava meda “rawata sara me tukuna nai Vola Tabu”? (Cakacaka 18:24).

Cakacaka 19:1–7.Na veitikina oqo e rawa ni vukea na nomu matavuvale me veivosakitaka na bibi ni papitaiso kei na veivakadeitaki. Mo kila vakavinaka cake na dina ena Cakacaka 19:1–7, e rawa ni o veivosakitaka eso na ka e sega na betena ke sega na ka, me vaka na talevoni veikauyaki ka sega na batiri. Se sa rawa mo wasea na ivakavuvuli oqo nei Parofita Josefa Simici: “Na papitaiso ena wai sa papitaiso e veimama ga, ka sega na kena yaga ke sega na ikarua ni kena veimama—o ya, na papitaiso ena Yalo Tabu” (iVakavuvuli: Josefa Simici, 95). Na cava na vuna e “sega ni vinaka kina ena dua na ka” na papitaiso ke sega ni ciqomi na isolisoli ni Yalo Tabu? (raica na 3 Nifai 27:19–20; Mosese 6:59–61).

Cakacaka 19:18–20.Ni o wilika na Cakacaka 19:18–20, raica na isau ni iyaya era taukena tu na tamata era sa tuvakarau me ra biuta vakatikitiki me rawa ni ra ciqoma kina na kosipeli (raica na tikina e 19). E tiko beka eso na iyau vakavuravura se itaviqaravi e dodonu meda biuta vakatikitiki me rawa nida ciqoma na veivakalougatataki vakalomalagi?

Cakacaka 20:32–35.Na gauna cava sa bau cakava kina na nomu vuvale nai vakavuvuli nei Karisito “a ka ni veivakalougatataki vakalevu me soli-ka, ka vakalailai ga me taura na ka”? (Cakacaka 20:35). E tiko beka e dua ena rawa ni yaga vua na veiqaravi, gauna, se ka ni loloma mai na nomu vuvale? Vakamatavuvale, mo dou veivosakitaka eso na vakasama ka lalawataka mo dou qarava e dua. Na cava eda vakila ni da veiqaravi vei ira na tani? Na cava e ka ni veivakalougatataki vakalevu cake kina na soli-ka mai na kena ciqomi?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Au Luve ni Kalou,” iVolanisere ni Gonelalai, 2.

Vakatorocaketaki ni Vuli ni Tamata Yadudua

Vola na Veivakauqeti. “Ni o vola na veivakauqeti vakayalo, o sa vakaraitaka vua na Turaga ni ko mareqeta na Nona veidusimaki, ka na vakalougatataki iko wasoma ena veivakatakila” (Veivakavulici ena iVakarau ni iVakabula, 12; raica talega na tabana e 30).

na mape ni lakolako vakaulotu nei Paula

Na nona ilakolako vakaulotu na iApositolo o Paula.