E vola tiko o Paula e dua na ivola

7–13 ni Okosita

Roma 1–6

“Na Kaukauwa ni Kalou Me Vakabulai Kina Ko Ira Yadua”

Na volai ni veivakauqeti ena vukei iko mo nanuma na ka e vakavulica tiko vei iko na Yalo. Vakasamataka talega na veika o vakila me baleta na veivakauqeti e yaco vei iko.

Vola na Veika o Uqeti Kina

Ena gauna sa vola kina na nona ivola o Paula vei ira na lewe ni Lotu mai Roma, e dua nai lawalawa veicurumaki ni Jiu kei na Matanitu Tani, ka sa tubu sara na Lotu i Jisu Karisito mai na dua nai lawalawa lailai vakabauta mai Kalili. E rauta ni oti e 20 na yabaki ni oti na Tucaketale ni iVakabula, era sa tu nai vavakoso lotu Va-Karisito voleka ni veivanua kece era lako yani kina na iApositolo—oka kina o Roma, nai tikotiko liu ni dua na matanitu qaqa. Ia, ni vakatauvatani kei na rabailevu ni matanitu vaka-Roma, e se lailai sara na Lotu ka dau vakawasoma me mua kina na veivakacacani. Ena ituvaki vakaoqo, eso a rairai “maduataka na kosipeli i Karisito”—ia, e dina, e sega ni o Paula. E kila ka vakadinadinataka na kaukauwa dina oya, “na kaukauwa ni Kalou me vakabulai kina ko ira yadua,” e kunei ena kosipeli i Jisu Karisito (Roma 1:16).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Na cava so nai iVola, ka ra sa tuvani vakacava?

Na iVola eso oqo era a vola na liuliu ni Lotu vei ira na Yalosavasava ena veiyasai vuravura. E vuqa na ivola ena Veiyalayalati Vou e vola na iApositolo o Paula—tekivu mai na Roma me yaco ki na Iperiu. E tuvanaki na nona ivola ena kena balavu, vakavo ga na Iperiu (raica na iDusidusi ki na iVolanikalou,“Nai Vola Eso e Vola ko Pauline”). E dina ga ni matai ni vola ena Veiyalayalati Vou na Roma, e a qai volai tu ni sa voleka ni cava na ilakolako vakaulotu nei Paula.

Roma 1–6

“Ena bula e na vakabauta ko koya sa yalododonu.”

Na ivakamacala eso oqo ena rawa ni vukei iko mo kila vinaka cake na iVola vei ira na kai Roma:

Na lawa.Ni vola o Paula baleta “na lawa,” e a vakaibalebaletaka tiko o koya na lawa i Mosese. Na vosa “cakacaka” ena volavola nei Paula e tukuna tiko na ivalavala e taudaku e sema tiko ki na lawa i Mosese. Vakasamataka na sala e duidui kina na lawa i Mosese kei na cakacaka e gadrevi kina mai na “lawa ni vakabauta” e vakamacalataki tiko ena Roma 3:23–31.

Cilivi, sega ni cilivi.Ena gauna makawa, na kena vakayacori na cili e ivakarau se ivakatakilakila ni veiyalayalati a cakava na Kalou vata kei Eparama. E vakayagataka o Paula na vosa “cilivi” me vakatokai ira na Jiu (na tamata ni veiyalayalati) kei na “sega ni cilivi” me vakatokai vei ira na Matanitu Tani. Vakasamataka vakatitobu na cava e vakavulica na Roma 2:25–29 me baleta na ibalebale dina ni tamata ni veiyalayalati ni Kalou. Raica na cilivi sa sega tale ni ivakarau ni veiyalayalati ni Kalou kei ira na Nona tamata (raica na Cakacaka 15:23–29).

Veivakadonui, vakadonui, veivakadodonutaki.Na veivosa oqo e vakayagataki ena bokoci, se vosoti, ni valavala ca. Ena gauna eda sa vakadonui kina, eda sa vosoti, vakatokai meda tawacala, ka vagalalataki mai na itotogi tawamudu ni noda ivalavala ca. Ni o raica na vosa oqo, raica na veika e vakatavulica o Paula me baleta na veika e rawa ni yaco kina na vakadonui (raica talega na iDusidusi ki na iVolanikalou,“Veivakadonui, Dodonu,” scriptures.ChurchofJesusChrist.org); D. Todd Christofferson, “Vakadodonutaki kei na Veivakatabui,” Ensign, June 2001, 18–25). Ena Roma, na vosa me vaka na “dodonu” kei na “ivalavala dodonu” e rawa ni raici me vosa tautauvata ni vosa me vaka na “lewa dodonu” kei na “veivakadonui.”

Loloma soliwale.Na loloma soli wale sai koya na “veivuke vakalou … se veivaqaqacotaki, e soli mai ena loloma veivueti cecekia kei na loloma i Jisu Karisito.” Mai na loloma soliwale, ena tucake tale na tamata taucoko ka rawata na bula tawamate rawa. Me kena ikuri, “na loloma soliwale oqo sa ikoya na kaukauwa ka rawa kina vua na tagane kei na yalewa me rawata na bula tawamudu kei na bula vakacerecerei ni oti na nodra sa solia na nodra vinaka duadua.” Eda sega ni rawata na loloma soliwale mai na noda sasaga; ia, sai koya na loloma soliwale e solia vei keda na “kaukauwa kei na veivuke meda kitaka na cakacaka vinaka ka [eda] na sega beka ni rawa ni maroroya” (Bible Dictionary, “Loloma Soliwale”; raica talega na 2 Nifai 25:23; Dieter F. Uchtdorf, “Na iSolisoli ni Loloma Soliwale,” Liaona, Me 2015, 107–10); Brad Wilcox, “Sa Rauti Ira Vinaka na Nona Loloma Soliwale,” Liahona, Sept. 2013, 43–45). Ni o wilika na Roma, vola na veika o sa vulica me baleta na loloma soliwale ni iVakabula.

Roma 2:17–29

Na noqu ivalavala e dodonu me iyaloyalo ka me levu cake kina na noqu saumaki mai.

Eso vei ira na Jiu Lotu Vakarisito e Roma era se vakabauta tiko ga ni itovo ni bula kei na ivakarau ni lawa i Mosese e kauta mai na veivakabulai. Oqo sa vaka me dua na leqa ka sega ni veiganiti ena gauna oqo baleta ni da sa sega ni vakamuria na lawa i Mosese. Ia ni o wilika na ivola i Paula, vakabibi na Roma 2:17–29, vakasamataka mada na nomu sasaga vakataki iko mo bulataka na kosipeli. E sa vakavuna tiko na veika o vakayacora tiko, me vaka na vakaivotavota ena sakaramede se vakaitavi e valetabu, me titobu na nomu saumaki mai ka vaqaqacotaka na nomu vakabauti Karisito? (raica na Alama 25:15–16). E tiko beka e dua na ka mo veisautaka me yaco na nomu ivalavala e tuba sa vakavuna tiko na veisau ni yalomu?

Raica talega na Dallin H. Oaks, “Na Bolebole mo Yaco,” Ensign, Nove. 2000, 32–34.

Roma 3:10–31; 5

Ena vuku i Jisu Karisito, sa rawa niu vosoti mai na noqu ivalavala ca.

Era na rairai yalolailai eso na tamata ena vosa doudou nei Paula ni “sa sega e dua sai valavala dodonu, sa sega sara e dua” (Roma 3:10). Ia e tiko talega ena Roma eso na itukutuku ni vakanuinui. Vakasaqarai ira ena wase 3 kei na 5, ka vakasamataka na vuna me nanumi tiko kina ni “sai valavala ca ko ira kecega na tamata, ka ra sega ni yacova na ka e vakarokorokotaki kina na Kalou” (Roma 3:23) e ikalawa bibi me vulici meda “reki ena inuinui” ena vuku i Jisu Karisito (Roma 5:2).

Roma 6

Sa sureti au o Jisu Karisito meu i “valavala vaka talega kina ena bula vou.”

E vakatavulica o Paula ni kosipeli i Jisu Karisito e dodonu me veisautaka na noda ivakarau ni bula. Na itukutuku cava ena Roma 6 e vakamacalataka na sala sa vukei iko kina na nomu muria na iVakabula mo i “valavala vakatalega kina ena bula vou”? (tikina e 4).

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Roma 1:16–17.Ena rawa vakacava ni da vakaraitaka noda “sa sega ni maduataka na itukutuku vinaka kei Karisito”?

Roma 3:23–28.Ni o wilika na veitikina oqo, e rawa ni o veivosakitaka na kedrau duidui na “cakacakataki” ni loloma soliwale ni Kalou, ka da na sega ni rawa ni cakava, kei na ciqoma, ka dodonu me da cakava. Na gauna cava eda sa bau vakila kina na loloma soliwale ni Kalou? E rawa vakacava ni da ciqoma vakataucoko sara?

Roma 5:3–5.Na dredre cava so eda sa sotava? E sa vukei keda vakacava na veika dredre oqo meda rawa ni tauyavutaka na dauvosota vakadede, kilai na veika e sa sotavi, kei na inuinui?

Roma 6:3–6.Na cava e kaya o Paula ena veitikina oqo me baleta na ivakatakarakara ni papitaiso? Ena rawa beka ni tuvatuva nomu vuvale me tiko ena dua na papitaiso sa roro tiko mai. Se rawa ni wasea e dua ena nomu vuvale eso na itaba se eso na ka e nanuma mai na gauna ni nona papitaiso. E vukei keda vakacava na vakayacori kei na maroroi ni noda veiyalayalati ni papitaiso meda “ivalavala vaka talega kina ena bula vou”?

e dua na tagane e papitaisotaka tiko e dua ena drano

Na papitaiso sa vakatakarataka na ivakatekivu ni dua na bula vou vaka tisaipeli i Karisito.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Vaqara Drodrolagi ni Bula Vesu No,” iVolanisere ni Gonelalai, 53.

Vakatorocaketaki na Vuli ni Tamata Yadudua

Taroga na taro eso ni o vuli tiko. Ni o vulica tiko na ivolanikalou, ena votu mai ki na vakasama na taro eso. Vakasamataka vakatitobu na veitaro oqo ka vakasaqara na kena isau. Me ivakaraitaki, ena Roma 1–6 e rawa ni o vakasaqara kina na isaunitaro oqo “Na cava na loloma soliwale?”

E vueta mai e dua na goneyalewa o Karisito ena dua na uciwai

Kakua ni Rere, mai vei Greg K. Olsen