E vosa tiko o Jisu vua e dua na gonelailai

18–24 ni Sepiteba

2 Korinica 8–13

“Ko Koya sa Solia ena Marau sa Vinakata na Kalou”

Na volai ni veivakauqeti vakayalo ena rawa ni vukei iko mo nanuma na veika o vulica ena gauna ni vuli volanikalou. Ena rawa ni o vola ena ivola ni vuli ni veisiga, volavola ena vanua lala ena yasana imawi ni ivolanikalou, vakuria eso tale na itukutuku ena nomu Gospel Library app, se cakava e dua na katokatoni ni nomu vakasama.

Vola na Veika o Vakauqeti Kina

Na cava o na cakava kevaka o rogoca ni dua na ivavakoso Yalododonu era sotava tiko na dredre ni dravudravua ena nodra yasana? Oqo na ituvaki e vakamacalataka o Paula vei ira na Yalosavasava mai Korinica ena 2 Korinica 8–9. A nuitaka o koya ni na rawa ni vakamasuti ira na Yalosavasava e Korinica me ra wasea na veika sa levu tu vei ira kivei ira na Yalosavasava era gadreva na nodra veivuke. Ia ena taudaku ni kere cau, e lewe ni vosa i Paula eso na dina titobu me baleta na soli ka: “Me ra dui solia me vaka na ka sa vinakata ko koya yadua ena yalona; me kakua ena voraki, se ni sa vakasaurarataki: ia ko koya sa solia ena marau sa vinakata na Kalou” (2 Korinica 9:7). Ena noda gauna, e tiko ga o ira na Yalododonu e veiyasai vuravura era gadreva tu na veivuke. Ena so na gauna na ka ga eda rawa ni cakava oya meda lolo ka solia nai solisoli ni lolo. Ena so tale na gauna, ena rawa saraga ni da solia vakadodonu vua na tamata yadua. Se cava ga na ituvaki ni noda soli bula, e vinaka meda na vakadikeva na inaki ni noda soli-ka. Sa ivakaraitaki beka ni loloma na noda solibula? E dina sara, ni loloma sa vakavuna na soli-ka ena marau.

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

2 Korinica 8:1-15; 9:5–15

E rawa ni’u wasea ena marau na veika e tiko vei au me vakalougatataki ira na dravudravua kei na vakaleqai.

Sa dua na ka na levu ni tamata era sotava tu na dredre e veiyasai vuravura. Ena rawa vakacava ni da vakayacora na veisau? E solia na ivakasala oqo o Elder Jeffrey R. Holland: “Vutuniyau se dravudravua, meda sa ‘cakava na ka eda rawata’ vei ira sa vakaleqai tu [raica na Marika 14:6, 8]. … Na [Kalou] ena veivuke ka dusimaki iko ena cakacaka ni loloma vakatisaipeli ke o sa dau gagadre tu ga ka masu ka vakaraica na sala mo muria e dua na ivunau sa dau solia mai o Koya vakaveitarataravi” (Eda sa Sega Li ni Dravudravua Kecega?”,” Liaona, Nove. 2014, 41).

Wilika na 2 Korinica 8:1–15; 9:6–15, vola eso nai tukutuku ni vakavuvuli e vakatavulica o Paula me baleta na nodra kauwaitaki na dravudravua. Na cava e vakauqeti iko baleta nai vakasala nei Paula? Ena rawa ni o masulaka na veidusimaki me baleta na veika o rawa ni cakava me vakalougatataka e dua e vakaleqai tu. Mo nanuma tiko mo vola na veivakauqeti o ciqoma ka cakacakataka sara.

Raica talega na Mosaia 4:16–27; Alama 34:27–29; Russell M. Nelson, “Na iKarua ni iVakaro Cecere,” Liaona, Nove. 2019, 96–100; Henry B. Eyring, “Sa Sega Li ni Vakaoqo Na Lolo Kau sa Vinakata?,” Liaona, Me 2015, 22–25.

2 Korinica 11:1–6, 13–15; 13:5–9

“Dou dikevi kemudou, se dou tu ena vakabauta.”

Nikua, me vaka ena gauna nei Paula, era tu eso era segata me ra kauti keda tani “mai na kena dina kei na kena savasava vei Karisito” (2 Korinica 11:3). Ena vuku ni ka oqori, sa ka bibi kina meda cakava na ka e vakatura o Paula: “Dou dikevi kemudou, se dou tu ena vakabauta” (2 Korinica 13:5). Sa rawa mo tekivuna na iwalewale oqo ena nomu vakasamataka na ibalebale ni “tu ena vakabauta.” O kila vakacava ni o sa tu ena vakabauta? Vakaraica na madigi eso e tu vei iko mo dikevi iko kina.

Me tiki ni nomu veidikevi, sa rawa talega mo vakasamataka vakatitobu na malanivosa “mai na kena dina kei na kena savasava vei Karisito” (2 Korinica 11:3). O sa kunea vakacava na kena dina kei na kena savasava vei Karisito kei na Nona kosipeli? Ena rawa vakacava ki na nomu vakasama me “vakacalai mai [na] dina kei na savasava”? Na ivakasala veivukei cava o na kunea ena 2 Korinica 11:1–6, 13–15?

Mo raica talega na ivakasala oqo nei Peresitedi Dieter F. Uchtdorf: “Kevaka o na nanuma ena dua na gauna ni sega ni yaga vei iko na kosipeli, au sureti iko mo tu vakasuka, raica na nomu bula mai na dua na vanua cecere, ka vakarawarawataka na nomu ivakarau ni raica na bula vakatisaipeli. Vakanamata ki na ivunau, ivakavuvuli, kei na ivakavakayagataki taumada ni kosipeli. Au yalataka ni na tuberi iko ka vakalougatataki iko na Kalou ena nomu sala ki na bula vakasinaiti, ka na yaga vakavinaka cake vei iko na kosipeli.” (“E Yaga,” Liaona, Nove. 2015, 22).

2 Korinica 12:5–10

E sa veiganiti na loloma soliwale ni Vakabula me vukei au meu vaqaqacotaki ena noqu malumalumu.

Eda sega ni kila na cava a kaya kina o Paula na “voto ni kau sa vakalauti kina na lewequ” ia e tu kece vei keda na voto ni kau eda gadreva me kauta tani mai na noda bula na Kalou. Vakasamataka na voto ni kau ni o wilika na 2 Korinica 12:5–10, ka vakasamataka vakatitobu na veika o vulica me baleti Jisu Karisito ena veitikina oqo. Na cava e vakavulica o Paula ena veitikina oqo me baleta na veivakatovolei kei na malumalumu? Na cava e kena ibalebale vei iko ni sa “rauti iko na loloma” ni Kalou?

Raica talega na Mosaia 23:21–24; 24:10–15; Ica 12:27; Moronai 10:32–33.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

2 Korinica 8–9.Na cava eda kunea ena veiwase oqo ka vakauqeti keda meda dolele yani vei ira na dravudravua kei na vakaleqai? Oqo e rairai gauna vinaka me tuvai e dua na cakacaka ni veiqaravi vakavuvale ki vua e dua e tiko leqa.

2 Korinica 9:6–7.E kila tiko beka na nomu vuvale e dua ena rawa ni vakatokai me dua e dau “solia ena marau”? Ena rawa vakacava ni da vakayacora na noda veiqaravi vei ira na tani me ka marautaki? O ira na lewe ni matavuvale itabagone e rawa ni ra cakava na beji me volai toka kina “Au dau solia ena marau.” E rawa me icocovi na beji vei ira na lewe ni matavuvale ena veigauna kece o raici ira kina ni ra veiqaravi vakataki ira ena yalomarau.

2 Korinica 10:3–7.Ena rawa vakacava ni o vakavulica na nomu vuvale me baleta na “ivalu” me vorati nai valavala ca? Ena rawa ni marautaka nomu vuvale na tarai ni lalaga se tataqomaki ena idabedabe se tutuvi? E rawa ni vakavuna na veitalanoataki ni sala me talaraki sobu na veika e vakauti keda tani mai vua na Kalou ka “[vakamalumalumutaka] na nanuma kecega me talairawarawa vei Karisito.” Na cava eso nai “yaragi” vakayalo e vakayagataki me tarova noda vakanananu? (raica na Efeso 6:11–18).

2 Korinica 11:3.Na cava e rawa ni cakava na nomu vuvale me vakanamata vakalevu cake ena “dina kei na kena savasava vei Karisito”?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “‘Drodro,’ na Uciwai,” iVolanisere ni Gonelalai,, 116.

Vakatorocaketaki ni Vuli ni Tamata Yadudua

Vola na Veivakauqeti. E tukuna o Elder Richard G. Scott: “Na ka e kilai ka volai vakamatau sa ikoya na ka ena kilai vakarawarawa ena gauna e gadrevi kina. … [Na volai ni veidusimaki vakayalo] ena vaqaqacotaka nomu rawa ni ciqoma na ikuri ni rarama” (“Acquiring Spiritual Knowledge,” Ensign, Nove. 1993, 88; raica talega na Veivakavulici ena iVakarau ni iVakabula, 12, 30).

era veivuke tiko nai tabagone ena veiqaravi ni veivuke

“Me ra dui solia me vaka na ka sa vinakata ko koya yadua ena yalona; me kakua ena voraki, se ni sa vakasaurarataki: ia ko koya sa solia ena marau sa vinakata na Kalou” (2 Korinica 9:7).