Keriso i luma o Pilato

Ecce Homo, saunia e Antonio Ciseri

19–25 Iuni

Mataio 27; Mareko 15; Luka 23; Ioane 19

“Ua Mae’a”

Mataio 27; Mareko 15; Luka 23; ma le Ioane 19 e aofia ai faamatalaga o toe itula o le soifuaga faaletino o le Faaola. Saili ia lagonaina Lona alofa mo oe a o e su‘esu‘e e uiga i Lana taulaga ma le maliu.

Tusifaamaumau Ou Lagona Uuna‘i

I upu uma ma galuega, sa faata‘ita‘i mai ai e Iesu Keriso le alofa moni—le mea lea na ta’ua e le Aposetolo o Paulo o le alofa mama (tagai 1 Korinito 13). E leai se taimi na sili ona iloagofie ai nai lo toe itula o le soifua o le Faaola. O Lona filemu mamalu i mata o tuua’iga pepelo sa faaalia ai o Ia “e le faaitaitagofie” (1 Korinito 13:5). O Lona naunauta‘i e gaua‘i atu i le sasaina, tauemuga, ma le faasatauroga—e ui ina ua alu Lona mana e fa‘a‘uma ai Ona mafatiaga—sa faaalia foi faapea sa Ia “agamalu” ma ”onosa‘i i mea uma” (1 Korinito 13:4, 7). O Lona mutimutialofa i Lona tina ma Lona alofa mutimutivale i e na faasatauroina o Ia—i le taimi o Ona puapuaga e le mafaatusalia—sa faaalia ai sa Ia “lei sailia [Ana] lava mea” (1 Korinito 13:5). I Ona toe taimi i le fogaeleele, sa faia ai e Iesu mea sa Ia faia i Lana galuega atoa i le tino—o le aoao mai o i tatou i le faaalia mai ia i tatou. E moni lava, o le alofa moni o le “alofa mama o Keriso” (Moronae 7:47).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataio 27; Mareko 15; Luka 23; Ioane 19

O le naunautaiga o Iesu Keriso e mafatia ua faaalia ai Lona alofa mo le Tama ma mo i tatou uma.

E ui ina i ai le mana o le Faaola e aumaia ai i lalo “lekeona o agelu” (Mataio 26:53), ae sa Ia filifili lava Ia e onosaia faamasinoga le tonu, o tauemuga mataga, ma le tiga faaletino e le mafuatiaina. Aisea na Ia faia ai? “Ona o lona agalelei alofa,” na molimau mai Nifae, “ma lona talitiga i le fanauga a tagata” (1 Nifae 19:9).

Keriso o loo amoina le satauro

“Ma ua ave e ia lona satauro ua maliu atu foi i … Kolokota”(Ioane 19:17).

E ono amata lau suesuega o toe itula o le Faaola i le faitauina lea o le 1 Nifae 19:9. O gafea o le Mataio 27; Mareko 15; Luka 23; ma le Ioane 19 e te maua ai ni faataitaiga o mea taitasi na ta’ua e Nifae o le a mafatia ai Iesu?

• “[Latou] te faamasino ia te ia o se meanoa”

• “Na latou faatiga ia te ia.”

• “Na latou fepo ia te ia.”

• “Ua latou feanu ia te ia.”

O fea fuaitau ua fesoasoani e te lagonaina ai le “alofa agalelei” o le Faaola ia te oe? O a isi ou mafaufauga ma lagona o i ai ao e faitau i nei tala? Mafaufau e tusi i lalo pe faasoa atu i se tasi.

Tagai foi “Jesus Is Condemned before Pilate” and “Jesus Is Scourged and Crucified” (vitio), ChurchofJesusChrist.org.

Mataio 27:27–49, 54; Mareko 15:16–32; Luka 23:11, 35–39; Ioane 19:1–5

E le mafai e tauemuga ona suia le mea moni.

E ui ina sa onosaia e Iesu tauemuga i Lana galuega atoa, ae sa atili ai ona faateteleina i le taimi o le sasaina o Ia ma le Faasatauroga. Ae o lea tauemuga sa lei mafai ona suia le upumoni: O Iesu o le Alo o le Atua. A o e faitau e uiga i le faamaasiasiga sa onosaia e Iesu, mafaufau e uiga i tetee ma tauemuga o loo feagai ma Lana galuega i aso nei. O a ni malamalamaaga ua e maua e uiga i le onosaia o tetee? O le a se mea ua uunaia ai oe e uiga i upu a le taitai ole toaselau? Mataio 27:54?

Mataio 27:46; Mareko 15:34

Sa puapuagatia toatasi Iesu Keriso ina ia ou le [puapuagatia].

I le taimi o se tasi o Ona taimi sili ona tiga i luga o le satauro, o Iesu, o le sa faalagolago e le aunoa i Lona Tama Faalelagi, sa faafuasei ona ia lagonaina le tuulafoaia. O le faitau e uiga i lenei mea e ono taitai atu ai oe e mafaufau i taimi na e lagonaina ai le mamao mai le Atua. Atonu foi e te mafaufau loloto i le ala ua mafai ai e le taulaga a le Faaola i luga o le satauro ona e manumalo i lena mamao. E pei ona molimau mai Elder Jeffrey R. Holland, “Talu ai sa savalia e Iesu se ala umi, ma le tuuatoatasi na o ia lava, tatou te le tau faia faapena. … O loo ili mai le tumutumu o Kalevaria le upumoni o le a le tuulafoaiina lava i tatou e aunoa ma se fesoasoani, tusa lava pe i ai nisi taimi tatou te lagona ai o loo tatou faapena” (“None Were with Him,” Liahona, Me 2009, 88). Mafaufau i auala e mafai e le Faaola ona fesoasoani ia te oe e faatoilalo le tuuatoatasi ao e faitau i le toega o le savali a Elder Holland.

Luka 23:34

O le Faaola o lo tatou faataitaiga o le faamagalo atu.

O a ni ou lagona pe a e faitauina upu a le Faaola i le Luka 23:34? (tagai i le malamalamaaga na tuuina mai e le Faaliliuga a Iosefa Samita i le vaefaamatalaga i). I le faasino atu i upu a le Faaola, na aoao mai ai e Peresitene Henry B. Eyring: “E tatau ona tatou faamagalo atu ma aua nei faatauagavale ia i latou o e tausuai mai ia i tatou. Na faia e le Faaola le faataitaiga mai le satauro. … Tatou te le iloa loto o i latou e faatiga ia i tatou” (“That We May Be One,” Ensign, May 1998, 68). E mafai faapefea ona fesoasoani lenei fuaiupu ia te oe pe afai e faigata ona e faamagalo atu i se tasi?

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataio 27; Mareko 15; Luka 23; Ioane 19.Ina ia fesoasoani i lou aiga e aoao e uiga i mea na tutupu o loo faamatalaina i nei mataupu, e mafai ona tou faasoa i le “Mataupu 52: O Faamasinoga o Iesu” ma le “Mataupu 53: Ua Faasatauroina Iesu” (i le Tala o le Feagaiga Fou, 133–38, po o vitio e fetaui i ai i luga o le ChurchofJesusChrist.org). Pe e mafai ona tou matamata faatasi i vitio o loo faaalia ai mea nei na tutupu: “Jesus Is Condemned before Pilate” ma le “Jesus Is Scourged and Crucified” (ChurchofJesusChrist.org). Atonu e te valaaulia tamaiti e toe faamatala tala i a latou lava upu. E mafai e tagata o le aiga ona faasoa mai o latou lagona e uiga i le Faaola ona o mea na puapuagatia ai o Ia mo i tatou.

Mataio 27:11–26; Mareko 15:1–15; Luka 23:12–25; Ioane 19:1–16.Aisea na tuuina atu ai e Pilato ia Iesu ina ia faasatauroina, tusa pe sa ia iloa e mama Iesu? O a lesona tatou te aoaoina mai le aafiaga o Pilato e uiga i le tu atu mo le mea sa’o? E ono fesoasoani mo lou aiga le faatino i taga o faataitaiga e mafai ai ona latou faata’ita’ia le tutu atu mo le mea sa’o.

Mataio 27:46; Luka 23:34, 43, 46; Ioane 19:26–28,30.Atonu e mafai ona tofi tagata taitoatasi o le aiga e faitau se fetalaiga se tasi pe sili atu na faia e le Faaola i luga o le satauro, o loo maua i fuaiupu nei. Fai atu ia i latou e faasoa mai mea ua latou aoaoina mai nei fetalaiga e uiga i le Faaola ma Lana misiona.

Mareko 15:39.O faapefea ona faamalolosia e le faitau e uiga i le Faasatauroga lau molimau o Iesu o le “Alo o le Atua”?

Ioane 19:25–27.O a ni mea ua tatou aoao mai i nei fuaiupu e uiga i le auala e mafai ona tatou alolofa ma lagolago ai tagata o le aiga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Viiga fautuaina: “Sa Faasatauro le Alii,” Viiga, nu. 96.

Faaleleia o Lo Tatou Aoao Atu

Faataitai i le soifuaga o le Faaola. “E fesoasoani tele le suesueina o ala na aoao mai ai le Faaola—o metotia sa Ia faaaogaina ma mea sa Ia fetalai ai. Ae o le mana a le Faaola e aoao ma siitia ai isi na sau mai le auala na Ia soifua ai ma le ituaiga o tagata na avea ai o Ia. O le filiga tele e te taumafai e ola ai e pei o Iesu Keriso, o le a atili ai ona mafai ona e aoao atu e pei o Ia” (Aoao Atu i le Ala a le Faaola,13).

Keriso i luga o le satauro

Keriso i luga o le Satauro, saunia e Carl Henrich Bloch