Keriso ma ona soo i Ketesemane

Togalaau i Ketesemane, saunia e Derek Hegsted

12–18 Iuni

Luka 22; Ioane 18

“Ia Aua Le Faia Lo’u Loto a o Lou Finagalo”

Faifai malie lou faitauina o le Luka 22 ma le Ioane 18 i lenei vaiaso. Mafaufau loloto ma tatalo i mea e te faitauina. O le faia o lea mea e tuu atu ai i le Agaga le avanoa e molimau mai ai i lou loto e moni tusitusiga paia.

Tusifaamaumau Ou Lagona Uuna‘i

Sa na o le toatolu molimau na va‘aitino i mafatiaga o Iesu Keriso i le Faato‘aga o Ketesemane—ma sa tele lava ina latou momoe. I lena faato‘aga ma mulimuli ane i luga o le satauro, sa tau‘aveina ai e Iesu lava ia agasala, o tiga, ma puapuaga o tagata uma o e sa ola, e ui e leai se tasi na ola i lena taimi na iloaina le mea sa tupu. O mea aupito taua o le faavavau sa tele ina mavae atu e aunoa ma se ano i ai o le faalelalolagi. Ae sa silafia e le Atua le Tamā. Sa Ia faafofoga mai i le augani atu a Lona Alo faamaoni: “Lo’u Tama e, a e finagalo i ai, ia e aveese lenei ipu ia te au: a e aua le faia lo’u loto, a o lou finagalo. Ona faaali mai ai lea ia te ia o le agelu mai le lagi, ua faamalosi ia te ia” (Luka 22:42–43). E ui ina sa tatou lei i ai iina e molimau i lenei faatinoga o le le manatu faapito ma le usiusitai, o i tatou o molimau o le Togiola a Iesu Keriso. O taimi uma tatou te salamo ai ma maua le faamagaloga o a tatou agasala, o taimi uma foi tatou te lagonaina ai le mana faamalosiau o le Faaola, e mafai ona tatou molimau atu i le moni o le mea sa tupu i le Faatoaga o Ketesemane.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Luka 22:31–34, 54–62; Ioane 18:17–27

O le liua o se faiga e faifai pea.

Mafaufau i aafiaga o Peteru sa i ai ma le Faaola—o vavega sa ia molimauina ma aoaoga faavae sa ia aoaoina. Aisea la o le a fetalai atu ai le Faaola ia Peteru, “Pe a liua mai oe, ia e faamalosi ou uso”?Luka 22:32; ua faaopoopo le faatusilima). Ao e mafaufau loloto i lenei mea, atonu e fesoasoani le mafaufau i mea na aoao mai e Elder David A. Bednar e uiga i le eseesega i le va o se i ai o se molimau ma le liua moni (tagai “Faaliliuina i le Alii,” Liahona, Nov. 2012, 106–9).

A o e faitau i aafiaga o Peteru i le Luka 22:31–34, 54–62 (tagai foi Ioane 18:17–27), mafaufau i lou lava liua. Na i ai se taimi na e lagona ai le matuai tuuto atu na faapea, e pei o Peteru, sa e “sauni ta te o faatasi ma [le Faaola], i le fale puipui atoa ma le oti”? (Luka 22:33). Aisea e mouese ai na lagona i ni isi o taimi? E i ai avanoa i aso taitasi a le o le teena pe molimau i le Faaola; o le a se mea o le a e faia e avea ai i aso taitasi o se molimau ia te Ia? O a isi lesona ua e aoao mai i le aafiaga a Peteru?

Ao faaauau ona e faitau i le Feagaiga Fou, vaavaai mo faamaoniga o le liua faifaipea o Peteru. Ia maitau foi auala na ia taliaina ai le valaau a le Alii ia “faamalosi ou uso” (Luka 22:32; tagai Galuega 3–4).

(tagai foi Mareko 14:27–31

Luka 22:39–46

Na puapuagatia le Faaola i Ketesemane mo au.

Na valaaulia e Peresitene RussellM. Nelson i tatou e “faaalu aoga le taimi e aoao ai e uiga i le Faaola ma Lana taulaga togiola” (“Mauaina o le Mana o Iesu Keriso i o Tatou Olaga,” Liahona, Me 2017,40).

Mafaufau po o le a lau mea e fai e talia ai le valaaulia a Peresitene Nelson. E mafai ona e amata i le manatunatu loloto ma le agaga tatalo i puapuaga o le Faaola i Ketesemane e pei ona faamatala mai i nei fuaiupu, ma tusi i lalo lagona uunai ma fesili e oo atu i le mafaufau.

Mo se suesuega e sili atu ona loloto i le Faaola ma Lana Togiola, taumafai e saili isi mau mo tali i fesili e pei o nei:

• Aisea na tatau ai ona i ai le Togiola a le Faaola? (Tagai 2 Nifaei 2:5–10, 17–26; 9:5–26; Alema 34:8–16; 42:9–26.)

• O le a se mea na oo i le Faaola ao mafatia o Ia? Tagai i le Isaia 53:3–5; Mosaea 3:7; Alema 7:11–13; Mataupu Faavae ma Feagaiga 19:16–19.)

• O faapefea ona aafia lo’u olaga i puapuaga o Keriso? (Tagai Ioane 10:10–11; Eperu 4:14–16; 1 Ioane 1:7; Alema 34:31; Moronae 10:32–33; Dallin H. Oaks, “Faamalosia e ala i le Togiola a Iesu Keriso; Liahona, Nov. 2015, 61–64.)

• O isi a’u fesili:

A o e aoao i le mea na tupu i Ketesemane, e ono malie le iloa o Ketesemane o se togalaau o olive ma sa aofia ai ma se soligavine, sa faaaogaina e soli ai olive ma tatau le suauu sa faaaoga mo moli ma meaai faapea foi ma faamalologa (tagai Luka 10:34). E faapefea e le faiga o le tatauina o le suauu olive ona faatusa i le mea na faia e le Faaola mo i tatou i Ketesemane? Mo ni isi manatu, tagai i le savali a D. Todd Christofferson “Tumau i Lo’u Alofa” (Liahona, Nov. 2016, 50–51).

Tagai foi Mataio 26:36-46; Mareko 14:32–42.

Ioane 18:28–38

“E le mai le lalolagi nei [le] malo [o le Faaola].”

I le avea ai o se taitai faaupufai, sa masani Ponotio Pilato i le pule ma malo o lenei lalolagi. Ae sa fetalai Iesu e uiga i se ituaiga malo e matuai ese lava. O le mafaufau i tua i mea na e faitau i ai e uiga i le soifuaga o le Faaola, o a ni faamaoniga o e vaaia o “e le mai le lalolagi nei [Lona] malo”? (Ioane 18:36). Aisea e taua ai lou iloa o lenei mea? O le a se isi mea o tumatila mai ia te oe e uiga i le fetalaiga a Iesu ia Pilato’?

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Luka 22:31–32.Mata na faapeī lagona o Peteru i le iloa sa tatalo Iesu mo ia ma lona faatuatua? O ai e mafai ona tatou tatalo ai “ina ne’i mavae [o latou] faatuatua”? (fuaiupu 32).

Luka 22:39–46.O le aoao e uiga i puapuaga o le Faaola i Ketesemane e mafai ona avea o se aafiaga paia mo lou aiga. Mafaufau i mea e mafai ona e faia e fatu ai se agaga migao ma le tapuai ao e suesue i le Luka 22:39–46. Atonu tou te taina pe usu faatasi ni viiga po o ni pese a tamaiti e sili ona fiafia ai lou aiga e uiga i le Faaola. E mafai ona tou vaavaai i galuega o faatufugaga e faatatau i ai pe matamata i se vitio e pei o le “The Savior Suffers in Gethsemane” (ChurchofJesusChrist.org). A o e faitau i fuaiupu, e mafai e tagata o le aiga ona fefaasoaai i fuaitau e faapitoa ona anoa ia i latou—atonu o se savali e fesoasoani latou te lagona ai le alofa o le Faaola (tagai foi Mataio 26:36–46; Mareko 14:32–42). Atonu foi e te valaaulia i latou e faasoa atu a latou molimau ia Iesu Keriso ma Lana Togiola.

Luka 22:42.E mafai e tagata o le aiga ona faasoa ni aafiaga i se taimi na latou aoaoina ai e faapea atu “Ia aua le faia Lo’u loto, ae o lou finagalo.”

Luka 22:50–51; Ioane 18:10–11.O le a se mea ua tatou aoaoina e uiga ia Iesu mai i nei fuaiupu?

Keriso o loo faamalolo le taliga o le auauna

Suffer Ye Thus Far, saunia e Walter Rane

Ioane 18:37–38.O le a faapefea ona tatou taliina le fesili a Pilato “Po o le a le upu moni?” (fuaiupu 38). Mo ni isi manatu, tagai Ioane 8:32; Mataupu Faavae ma Feagaiga 84:45; 93:23–28; ma le “Oh Say, What Is Truth?,” Hymns, no. 272.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ou te Tu ma Ofo,” Viiga, nu. 107.

Faaleleia o Suesuega Faaletagata Lava ia

Saili i upu a perofeta ma aposetolo o aso e gata ai. Faitau ma po o a mea na aoao mai e perofeta ma aposetolo o aso e gata ai e uiga i upumoni e te maua i mau. Mo se faataitaiga, i le lomiga o le konafesi aoao aupito lata mai o le Liahona, e mafai ona e sailia le faasino autu mo le “Togiola” (tagai Aoao Atu i le Ala a le Faaola,21).

Keriso i Ketesemane

Aua Le Faia Lo’u Loto, a o Lou, saunia e Walter Rane