iOtioti ni Vakayakavi

Mo Dou Vakananumi Au Kina, mai vei Walter Rane

29 ni Me–4 ni June

Maciu 26; Marika 14; Joni 13

“iVakananumi”

Nio wilika na veika a yaco ka vakamacalataki tiko ena Maciu 26; Marika 14; kei na Joni 13, vakarorogo matua ki na veivakauqeti cava ga o ciqoma, vakauasivi na veivakauqeti ka na vakatitobutaka na nomu vakabauti Jisu Karisito kei na nomu yalayala Vua.

Vola na Nomu Nanuma

Na siga ni bera na Nona mate, a solia o Jisu vei iratou na Nona tisaipeli e dua na ka me ratou dau nanumi Koya kina. A “sa taura na madrai ko Jisu, ia ni sa lotutaka oti, sa dovia, ka solia vei ira na tisaipeli, ka kaya, Taura, kania, oqo na yagoqu. Sa qai taura na bilo ko koya, ia ni sa vakavinavinaka oti, sa solia vei ira ka kaya, Dou gunu kece kina; oqo na noqu dra” (Maciu 26:26–28).

A yaco oqo ena 2,000 na yabaki sa oti, ena dua na vanua e vuqa vei keda eda na sega ni raica, ena dua na ivosavosa e vica ga vei keda ena kila. Ia oqo, ena vei Sigatabu yadua ena noda dui vanua ni soqoni, o ira na matabete, ka vakatarai me ra cakacaka ena yaca i Jisu Karisito, era na cakava na ka a cakava o Koya. Era taura na madrai kei na wai, vakalougatataka, ka solia vei keda yadua, na Nona tisaipeli. E cakacaka rawarawa—e dua beka na ka e rawarawa cake, bibi cake, mai na kana madrai kei na gunu wai? Ia sa ka tabu vei keda na madrai kei na wai oya baleta ni rau vukei keda me da nanumi Koya. Oqori na sala me da kaya kina, “Au na sega vakadua ni guilecavi Koya”—sega walega ni, “Au na sega vakadua ni guilecava na veika au wilika me baleta na Nona ivakavuvuli kei na Nona bula.” Ia, eda kaya tiko, “Au na sega vakadua ni guilecava na ka a cakava vei au o Koya.” “Au na sega vakadua ni guilecava na Nona vueti au ni‘u a tagi me‘u vukei.” Kei na “Au na sega vakadua ni guilecava na Nona veivakadeitaki vei au kei na noqu yalayala Vua—na veiyalayalati keirau sa cakava.”

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Maciu 26:6-13; Marika 14:3-9

“Sa lako mai o koya … me lumuta na yagoqu me bulu.”

Ena dua na ivalavala dokai ni sokalou, a vakaraitaka na marama ena vei tikina oqo ni kila o koya se o cei o Jisu kei na cava esa vakarau me cakava o Koya (raica na Maciu 26:12). Na cava o nanuma e vakaibalebale vakalevu kina vua na iVakabula na nona ivalavala? (raica na tikina e 13). Na cava e vakauqeti iko me baleta na yalewa kei na nona vakabauta? Vakasamataka vakatitobu na sala o rawa ni muria kina na nona ivakaraitaki.

Raica talega na Joni 12:1–8.

Maciu 26:20–22; Marika 14:17–19

“Noqu Turaga, koi au beka?”

Na cava o sa vulica me baleti ira na tisaipeli mai na nodra taroga na Turaga ena vei tikina oqo? Ena nomu nanuma na cava beka era a taroga kina? Vakasamataka mada na sala o na taroga beka kina na Turaga, “Koi au beka?”

Raica talega na Dieter F. Uchtdorf, “Lord, Is It I?,” Liaona, Nove. 2014, 56–59.

Maciu 26:26–29; Marika 14:22–25

Na sakaramede sa dua na madigi me da vakananuma kina na iVakabula.

Ena gauna sa vakatakila kina na iVakabula na sakaramede vei iratou na Nona tisaipeli, na vakasama kei na vakanananu cava beka o nanuma ni a basika mai vei iratou? Vakasamataka na veika oqo ni o wilika na veika era sotava ena Maciu 26:26–29 kei na Marika 14:22–25. Na cava na vuna o nanuma kina ni a digitaka o Jisu na sala oqo me da dau nanumi Koya kina? Sa rawa talega ni o vakasamataka vakatitobu na veika o vakila ena gauna ni sakaramede. E tiko beka e dua na ka o rawa ni cakava me ka tabu ka vakaibalebale cake kina na veika o sotava?

Nio wilika ka vakasamataka vakatitobu na vei tikina oqo, o na rawa ni vola eso na ka o vakauqeti kina mo nanuma me baleta na iVakabula. E rawa ni o railesuva na veika oqo ena gauna ka tarava o na vakayagataka kina na sakaramede. E rawa talega nio railesuva ena vei gauna tale eso, me dua na sala ni nomu dau “daunanumi koya tikoga” (Moronai 4:3).

Raica talega na Luke 22:7–39; 3 Nifai 18:1–13; Vunau kei na Veiyalayalati 20:76–79; Ulutaga Vakosipeli,“Sakaramede,” topics.ChurchofJesusChrist.org; “Always Remember Him” (vidio), ChurchofJesusChrist.org.

Joni 13:1–17

Na iVakabula sa noda ivakaraitaki ni veiqaravi ena yalo malumalumu.

Ena gauna i Jisu, na savati ni yavana e dua tale na tamata e nodra cakacaka na dauveiqaravi, sega ni iliuliu. Ia a vinakata o Jisu me ratou vakasamataka ena dua tale na sala na Nona tisaipeli na ibalebale ni veiliutaki kei na veiqaravi. Na itukutuku cava o kunea ena nona vosa kei na ivalavala na iVakabula ena Joni 13:1–17? Ena nomu itovo vakavanua, na kena savati na yavadra na tani ena sega beka ni sala vakavanua ni veiqaravi. Ia vakasamataka mada na cava o rawa ni cakava mo muria kina na ivakaraitaki ni iVakabula ena veiqaravi ena yalo malumalumu.

Ena vinaka talega me da kila na veika e kila ka vakila o Jisu ena gauna vakalou oqo vata kei iratou na Nona iApositolo (raica na tikina e 1 kei na 3). Na cava era vakavulica vei iko na raititobu oqo me baleta na iVakabula?

Raica talega na Luke 22:24-27.

Joni 13:34–35

Na noqu lomani ira na tani sa ivakatakilakila ni‘u sa tisaipeli dina i Jisu Karisito.

Taumada, a solia o Jisu e dua na ivunau mo “lomana na kai nomu me vaka ko lomani iko” (Maciu 22:39). Ia oqo sa solia o Koya “e dua na ivakaro vou.” Na cava o nanuma e kena ibalebale mo lomani ira na tani me vaka na Nona lomani iko o Jisu? (raica na Joni 13:34).

Mo na vakasamataka talega vakatitobu na sala era na kila kina na tamata ni ko sa tisaipeli i Jisu Karisito. O na vakadeitaka vakacava ni loloma sa ikoya na nomu itovo dina ni bula Vakarisito?

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 26:26–29; Marika 14:22–25.Na cava e ratou vakila na nomu matavuvale ena gauna ni sakaramede e vei macawa? Ni wiliki ni imatai ni sakaramede e rawa ni vakauqeta e dua na veitalanoa me baleta na bibi ni sakaramede kei na sala eso me vakatoroicaketaki kina na veika o vakila. Sa rawa mo vakaraitaka na iyaloyalo Passing the Sacrament (Gospel Art Book,, no.108) ka wasea na vakasama vakai kemudou me baleta na ka o rawa ni cakava ni se bera, ni yaco tiko, kei na gauna e sa oti kina na sakaramede.

vakayagataka na marama na sakaramede

Sa vukei keda na sakaramede me da nanumi Jisu Karisito kina.

Maciu 26:30.Vakasamataka mo dou lagata e dua na serenilotu, me vakataki Jisu kei iratou na Nona iApositolo—ke ka me dua na sere ni sakaramede. Ena veivakalougatataki vakacava vei Jisu kei iratou na Nona iApositolo na laga serenilotu ena gauna oya? Era veivakalougatataki vakacava vei keda na serenilotu?

Joni 13:1–17.Ena vinaka beka mo vakaraitaka vei iratou na nomu matavuvale na iyaloyalo ena mua ni ituvatuva oqo ni o wilika tiko na vei tikina oqo. Na dina cava a vakavulica na iVakabula ena Nona ivalavala? Na veika matailalai cava ena iyaloyalo e vukei keda me da kila vinaka na dina oqo? Sa rawa ki na lewe ni matavuvale me ra wasea na sala sa kauta mai kina vei ira na marau na bulataki ni dina eso oqo (raica na Joni 13:17).

Joni 13:34–35.Nio wilika oti na vei tikina oqo, e dou na rawa ni veitalanoataka vata se me ra na kila vakacava eso tale na tamata ni dou tisaipeli i Jisu Karisito. E vinakata vakacava na iVakabula me ra kilai o ira na dau muri Koya? E rawa nio kerei iratou na lewe ni matavuvale me ratou veitalanoataki ira na tamata ka ra lomana ira na tani ka vakaraitaka tiko ni ra sa tisaipeli dina i Jisu Karisito. E rawa talega ni dou veitalanoataka na sala eso e rawa ni dou vakaraitaka kina na loloma levu cake vakamatavuvale.

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Dou Veilomani,” iVolanisere ni Lalai, 74.

Vakatoroicaketaki ni Vuli ni Tamata Yadua

Vakasamataka Vakatitobu E tiko ena ivolanikalou na ibalebalebale ni veika vakayalo eda dau calata kevaka eda vakawalena na noda wiliwili, ka da rawa ni cakava oqo ena ivola tale eso. Kakua ni vakusakusa mo vakacavara e dua na iwase. Taura na gauna mo vakasamataka vakatitobu kina na veika o wilika tiko.

E vuya tiko o Jisu na yavadra na tisaipeli.

Cecere duadua ena Matanitu, mai vei J. Kirk Richards