Tu e matai Pailato o Karisito

Ecce Homo, mai vei Antonio Ciseri

19–25 ni June

Maciu 27; Marika 15; Luke 23; Joni 19

“Sa oti”

Maciu 27; Marika 15; Luke 23; kei na Joni 19 e oka kina na ivakamacala ni otioti ni auwa ni bula vakayago ni iVakabula. Vakasaqara mo vakila Nona loloma vei iko ni o vulica na veika me baleta na Nona solibula kei na mate.

Vola na Nomu Nanuma

Ena vosa kei na cakacaka yadua, e vakaraitaka o Jisu Karisito na loloma levu e savasava—oqo na ka e vakatoka na iApositolo o Paula me loloma uasivi (raica na 1 Korinica 13). E sega ni dua na gauna me kilai levu kina me vaka nai otioti ni auwa ni bula vakayago ni Vakabula. Na nona vadigagalu dokai ena mata ni veibeitaki vakailasu a vakaraitaka kina ni o Koya e sega ni “cudrucudru” vakarawarawa (1 Korinica 13:5). Na Nona lomasoli me vakamavoataki, vakalialiai, ka vakoti ena kauveilatai—ni vesuka tu na Nona kaukauwa me tinia Nona yaluma—e vakaraitaka ni “vosota vakadede” ka “vosota na veika kece” (1 Koronica 13:4, 7). Na Nona loloma cecere vua na Tinana kei na Nona loloma veivueti vei ira era vakoti Koya—ena gauna sara madaga ni Nona mosi sega ni vakatauvatani rawa—e vakaraitaka o Koya ni “sa sega ni qara na ka me [Nona] ga” (1 Korinica 13:5). Ena iotioti ni Nona gauna e vuravura, e cakava tiko o Jisu na veika e a cakava tiko o Koya ena gauna ni Nona veiqaravi ena vuravura oqo—e vakavulici keda tiko mai na ivakaraitaki. Sa dina sara, ni loloma uasivi sai koya na “loloma taucoko i Karisito” (Moronai 7:47).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Maciu 27; Marika 15; Luke 23; Joni 19

Na lomasoli i Jisu Karisito me vakararawataki sa vakaraitaka tiko na Nona loloma vei Tamana kei keda kece.

E dina ga ni a tu vua na iVakabula na kaukauwa me kaciva mai na “agilose ka tinikarua na vavakoso ka vakacaca” (Maciu 26:53), a digia o Koya ena galala me vosota na veivakatovolei vakatani, veivakalialiai butobuto, kei na mosi vakayago e sega ni vakasamataki rawa. Na cava a cakava kina o Koya? “Ena vuku ni nona yalololoma,” a vakadinadinataka o Nifai, sa “dauvosoti ira vakadede na luve ni tamata” (1 Nifai 19:9).

Sa laveta tiko na kauveilatai o Karisito

“A sa colata na nona kauveilatai ko koya, ka lako yani ki … Kolikoca” (Joni 19:17).

Sa rawa mo tekivuna na nomu vulica na veika e baleta na iotioti ni auwa ni Vakabula ena nomu wilika na 1 Nifai 19:9. Ena tikina cava so ena Maciu 27; Marika 15; Luke 23; kei na Joni 19 o na kunea kina na ivakaraitaki yadua ni veivakararawataki e tukuna tiko o Nifai ni na sotava o Jisu?

• “[Era] na okati koya me ka wale”

• “Era sa vakanakuitataki koya”

• “Era sa yaviti koya”

• “Era kasiviti koya”

Na itukutuku cava e vukei iko mo vakila na “yalololoma” ni iVakabula vei iko? Na vakasama kei na vakanananu cava tale eso e tiko vei iko ni o wilika na itukutuku oqo? Sa rawa mo vola kece oqo se wasea vua e dua.

Raica talega na vidio ni “Sa Cudruvi ko Jisu e Matai Pailato” kei na “Vakanakuitataki ka Vakamatei ko Jisu”, ChurchofJesusChrist.org.

Maciu 27:27–49, 54; Marika 15:16–32; Luke 23:11, 35–39; Joni 19:1–5

Na veivakalialiai ena sega ni veisautaka rawa na dina.

A vosota tu mai o Jisu na veivakalialiai ni a veiqaravi tiko kina, e a qai tubu cake ga na kena kaukauwa ena gauna ni sa mai vakamavoataki kei na Vakoti e Kauveilatai. Ia, na veivakalialiai oqo e sega ni veisautaka rawa na dina: o Jisu na Luve ni Kalou. Ni o wilika na veivakamaduataki a vosota o Jisu, vakasamataka na veisaqasaqa kei na veivakalialiai ni Nona cakacaka e sotavi tu ena gauna oqo. Na cava eso na rai titobu o vulica me baleta na vosota tiko na veisaqasaqa? Na cava e uqeti iko me baleta na vosa nei turaga ni valu ena Maciu 27:54?

Maciu 27:46; Marika 15:34

A vakararawataki duadua ga o Jisu Karisito ka me kakua o au.

Ena dua na Nona gauna bibi duadua ena kauveilatai, o Jisu, ka dau vakararavi tu ga vua na Tamana Vakalomalagi, a vakila vakasauri ni sa biu. Na wiliki ni veika oqo ena rawa ni muataki iko mo vakasamataka na veigauna o vakila kina ni o yawa mai vua na Kalou. Sa rawa mo vakasamataka vakatitobu na sala e rawa kina vei iko mo ulabaleta na veiyawaki ni vanua oya ena solibula ni iVakabula ena kauveilatai. Me vaka e vakadinadinataka o Elder Jeffrey R. Holland, “Baleta ni a lakova duadua tu o Jisu na salatu balavu, galili, vakai koya ga, e sega ni dodonu meda na cakava talega vakakina. … Sa uvu na davui ena delana o Kalivari baleta na ka dina ni da na sega vakadua ni biu taudua tu ka sega ni vukei, kevaka mada ga ena so na gauna eda vakila ni vakakina” (“E Sega ni Dua e Tu Vata Kei Koya,” Liahona, Me 2009, 88). Vakasamataka na sala e rawa ni vukei iko kina na iVakabula mo ulabaleta na galili ni o wilika na vo ni itukutuku nei Elder Holland.

Luke 23:34

Sa noda ivakaraitaki ni veivosoti na iVakabula.

Na cava o vakila ni ko wilika na nona vosa na iVakabula ena Luke 23:34? (raica na raititobu mai na iVakadewa i Josefa Simici ena ivakamacala e botona c). Ni tukuna tiko na vosa ni Vakabula, e vakatavulica o Peresitedi Henry B. Eyring: “E dodonu meda veivosoti ka sega ni yalocataka e dua sa vakacudrui keda. Na iVakabula sa biuta na ivakaraitaki vei keda ena kauveilatai. … Eda sega ni kila na yalodra o ira era vakacudrui keda” (“Me da Duabau Ga,” Ensign, Me 1998, 68). Ena rawa ni vukei iko vakacava na tikina oqo kevaka e dredre tiko vei iko mo vosota e dua?

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 27; Marika 15; Luke 23; Joni 19.Me vukea na nomu vuvale me vulica na veika e vakamacalataki tiko ena wase oqo, sa rawa mo wasea vei iratou na “Wase 52: Na Vakatovolei nei Jisu” kei na “Wase 53: Sa Lauvako ko Jisu” (ena Na iTukuni ena Veiyalayalati Vou, 133–38, se na vidio e sema kina ena ChurchofJesusChrist.org). Se e rawa ni o sarava vata na vidio ka vakaraitaki kina na veika a yaco oqo: “Sa Cudruvi e Matai Pailato o Jisu” kei na “Sa Vakanakuitataki ka Vakoti ki na Kauveilatai ko Jisu” (ChurchofJesusChrist.org). Sa rawa mo sureti ira na gone me ra talanoataka tale na italanoa ena nodra vosa ga. E rawa ni ra wasea na lewe ni matavuvale na nodra nanuma baleta na iVakabula ena vuku ni veika a vakararawataki kina o Koya ena vukuda.

Maciu 27:11–26; Marika 15:1–15; Luke 23:12–25; Joni 19:1-16.Na cava e soli Jisu yani kina o Pailato me vakoti e kauveilatai, dina ga ni kila ni a sega nona cala o Jisu? Na cava eda vulica mai na veika e sotava o Pailato me baleta na noda dau tutaka na veika eda kila ni dodonu? Ena rawa beka ni veivuke me ra vakatasuasuataka na nomu vuvale e dua na tikina ka na vakatarai ira me ra tutaka na veika era kila ni dina.

Maciu 27:46; Luke 23:34, 43, 46; Joni 19:26–28, 30.Sa rawa mo lesia na lewe ni matavuvale yadua me wilika e dua se sivia na itukutuku a kaya na iVakabula ena kauveilatai, era tiko ena veitikina oqo. Kerei ira me ra wasea na veika era sa vulica mai na vosa oqo me baleta na iVakabula kei na Nona ilesilesi.

Marika 15:39.E sa vaqaqacotaka vakacava na noda wilika tiko na Veivakoti na noda ivakadinadina ni o Jisu sa “Luve ni Kalou”?

Joni 19:25–27.Na cava eda sa vulica mai na veitikina oqo me baleta na sala ni noda rawa ni lomana ka tokoni ira na noda lewe ni matavuvale?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Serenilotu vakaturi: “Kauveilatai Mai Kalivari,” Serenilotu, naba. 107.

Vakatorocaketaki ni Noda Veivakavulici

Vakatotomuria na bula ni iVakabula. “E veivuke na noda vulica na ivakarau e veivakavulici kina na iVakabula—na iwalewale a vakayagataka o Koya kei na veika a cavuta. Ia na kaukauwa ni iVakabula me veivakavulici ka laveti ira cake na tamata e tadu mai na ivakarau ni Nona bula kei na mataqali tamata vakacava o Koya. Na levu ni nomu gugumatua mo bula me vakataki Jisu Karisito, ena levu cake nomu rawa ni veivakatavulici me vakataki Koya” (Veivakavulici ena iVakarau ni iVakabula, 13).

O Karisito ena kauvelatai

Na Karisito ena Kauveilatai, mai vei Carl Heinrich Bloch