“5–11 ni June. Joni 14-17: ‘Dou Tiko ga Ena Noqu Loloma’” Lako Mai, Mo Muri Au—Me Baleta na Tamata Yadua kei na Matavuvale: Veiyalayalati Vou 2023 (2022)

“5–11 ni June. John 14-17,” Lako Mai, Mo Muri Au—Me Baleta na Tamata Yadua kei na Matavuvale: Veiyalayalati Vou 2023

iVakatakilakila

iOtioti ni Vakayakavi

Na iOtioti ni Vakayakavi, mai vei William Henry Margetson

5–11 ni June

Joni 14–17

“Dou Tikoga ena Noqu Loloma”

Nio wilika na ivakavuvuli ni Vakabula ena Joni 13–17, ena vukei iko na Yalo Tabu mo kunea na itukutuku e baleti iko. Vola na vei vakasama eso o sa ciqoma.

Vola na Nomu Nanuma

Eda vakatoka ena gauna oqo me “iOtioti ni Vakayakavi,” ia eda sega ni kila kevaka era a kidava vakataucoko na tisaepeli i Jisu, ena nodra mai soqoni vata ena Kana vata ni Lako Sivia, ni sa na iotioti ni nodra na kana vata kei na nodra iVakavuvuli ni sa bera na Nona mate. Ia, sa kila ko Jisu ni “sa yaco mai na nona gauna” (Joni 13:1). Sa voleka nona sotava yani na rarawa e Kecesimani, na lawakitaki kei na cakitaki mai vei ira na Nona itokani voleka, kei na mate vutugu ena kauveilatai. E dina ni sa votu mai Vua na vei ka rerevaki oqori, e vakanamata ga o Jisu vei ira na Nona tisaepeli ka sega Vua. Na cava beka era na gadreva me ra kila ena vei siga kei na vei yabaki mai liu? Na ivakavuvuli malumu i Jisu ena Joni 14–17 e vakaraitaka na vei ka e vakila o Koya me baleti ira nona tisaepeli, ena gauna oya kei na gauna oqo. E dua vei ira na dina veivakacegui e vuqa a wasea o Koya sa ikoya na veivakadeitaki ni, ena dua na vakasama, ena sega vakadua ni biuti keda o Koya. “Kevaka dou sa talairawarawa kina noqu vunau, dou na tiko ga ena noqu loloma” (Joni 15:10).

iVakatakilakila

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Joni 14–15

Au vakaraitaka na noqu lomani Jisu Karisito ena noqu maroroya na Nona ivakaro.

Nio wilika na Joni 14–15, ena rawa ni o toqa toka se makataka na vakayagataki yadua ni vosa na loloma. Ena rawa beka ni o raica na vosa na ivunau e vakayagataki wasoma kei na vosa oqo na loloma ena vei wase oqo. Na cava o rawa ni vulica mai na veiwekani ni loloma kei na ivunau mai na ivakavuvuli ni Vakabula? Na vosa kei na malanivosa cava tale o kunea e sema tiko ki na loloma ena vei wase oqo?

Vakasamataka vakatitobu na sala sa vakauqeti iko kina na loloma ni iVakabula.

Raica talega na Joni 13:34–35; D. Todd Christofferson, “Abide in My Love,” Liaona, Nove. 2016, 48–51.

iVakatakilakila

E vosa tiko o Jisu vei ira na tisaepeli

Na iOtioti ni Kana Vata, mai vei Clark Kelley Price

Joni 14–16

Na Yalo Tabu e vukei au me’u vakayacora na noqu inaki vakatisaepeli i Jisu Karisito.

E a rairai mosi beka vei iratou na tisaepeli me ratou rogoca ni sa voleka sara ni oti na nodratou gauna vata kei na iVakabula. E ratou na rairai lomaleqataka talega na sala me ratou na veimaliwai vinaka tiko kina ni sa yali o Koya. Nio wilika na Joni 14–16, vakaraica na ka a kaya na iVakabula me vakadeitaki ira tale kina. Vakauasivi, raica na veika a vakavulica vei iratou me baleta na Yalo Tabu. Na cava e rawa ni o vulica me baleta na Yalo Tabu mai na vosa ni iVakabula ena vei tikina oqo?

Na cava e ratou gadreva kina na tisaepeli na mataqali veivuke vakaoqo mai vua na Yalo Tabu? Esa vakayacora vakacava na Yalo Tabu na itavi oqo vei iko? Vakasamataka na veika o rawa ni cakava me na qaqaco cake kina na Nona veivakauqeti ena nomu bula.

Raica talega na 3 Nifai 19:9; 27:20; Vunau kei na Veiyalayalati 11:12–14; Mosese 6:61; Michelle D. Craig, “Rawaka Vakayalo,” Liaona, Nove. 2019, 19–21.

Joni 15:1–8

Ni‘u sa tu vei Karisito, au na vuataka na vua vinaka.

Na cava o nanuma ni ibalebale ni “tu vei [Karisito]”? (Joni 15:4). Na cava na “nomu ivua” o sa vakaraitaka kina ni o sa tu vata kei na vaini, ka matataki Jisu Karisito?

Joni 17

E tu o Jisu Karisito ena vukudra na Nona tisaepeli.

Na vosa i Jisu e tiko ena Joni 17 e kilai me Masu ni Vakatakekere. Ena masu oqo, e masulaki ira kina na Nona iApositolo o Jisu kei ira “era na vakabauti [Koya] ena vuku ni nodra vosa” (Joni 17:20). E kena ibalebale ni masulaki iko tiko o Koya. Na cava e kerea o Jisu vei Tamana ena vukumu kei ira kece era vakabauta? Na cava e vakavulica vei iko me baleta na Nona nanuma me baleti iko?

Na masu oqo e vakavulica na dina titobu e tawamudu. Na dina cava tale o sa kunea? Nio wilika na wase oqo, sa rawa mo vola na vei ka o sa vulica me baleta na vei ka oqo:

Masu
Na veimaliwai i Jisu Karisito kei Tamana
Na veimaliwai ni iVakabula kei ira na Nona tisaepeli
Na vei ka era duidui kina na tisaepeli mai vei vuravura
Eso tale na dina o malele kina

Joni 17:11, 21–23

Rau sa duavata vakavinaka sara na Tamada Vakalomalagi kei Jisu Karisito.

Ena Nona masu ena Joni 17, a vakamatatataka kina o Jisu na Nona duavata kei na Tamana. Ena sala cava e rau sa “dua bau ga” kina na Tamana kei na Luvena? (Joni 17:11, 21–23). Mo nanuma tiko ni masu na iVakabula me ratou na dua bau “me vaka”—se ena sala vata ga e rau sa dua bau—kina o Koya kei Tamana (Joni 17:22). Na cava na kena ibalebale oqo vei iko? Vakasamataka na nomu veimaliwai—me vakataki, iko kei na watimu se lewe ni matavuvale tale eso, kei ira na lewe ni tabanalevu, kei ira na itokani Vakarisito. O na cakacakataka yani vakacava na mataqali dua bau vakaoqo ka tiko vei Jisu kei na Tamana?

Raica talega na Quentin L. Cook, “Hearts Knit in Righteousness and Unity,” Liaona, Nove. 2020, 18–22; Sharon Eubank, “By Union of Feeling We Obtain Power with God,” Liaona, Nove. 2020, 55–57.

iVakatakilakila

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Joni 14:5–6.E ratou na rawa ni marautaka na lewe ni matavuvale me ratou veivukevuke ena liutaki ni nomu matavuvale ena dua na taubale ena sala. E yaco vakacava o Jisu me o Koya “na sala”? E liutaki keda tiko ivei o Koya?

Joni 19:26–27.E duidui vakacava na vakacegu i Jisu mai na kena “sa solia ko vuravura”? E rawa ni ra wasea na lewe ni matavuvale na sala eso era sa kunea kina na sautu kei na vakacegu mai vua na Yalo Tabu.

Joni 15:1–8.Ena rawa ni lasa me wiliki na tikina oqo ena yasa ni dua na kau vaini, vunikau, se dua tale na itei. Na cava ena yaco kina dua na tabana ni sa kau tani mai na vuna? E rawa ni o veitalanoataka na sala eda sa vakataka kina na vei tabana kei na ibalebale ni “tiko ga” vua na iVakabula ka “vua.”

Joni 15:17–27; 16:1–7.Na cava o nanuma ni a vakarautaki iratou kina na Nona tisaepeli o Jisu Karisito me baleta na veivakacacani? Era sa vakacacani tiko vakacava na tisaepeli i Karisito ena gauna oqo? Ena rawa ni vukei keda vakacava na veivakasalataki ni iVakabula ena vei tikina oqo ena gauna eda sotava kina na veivakacacani?

Joni 16:33.E sa uabaleti vuravura vakacava o Jisu Karisito? Sa kauta vakacava mai na Nona Veisorovaki ki vei keda na vakacegu kei na marau vinaka? (raica talega na Vunau kei na Veiyalayalati 68:6

Joni 17:21–23.Na cava ena vukea na nomu matavuvale me ratou vulica na sala me ratou duavata vakalevu cake kina me vakataki Jisu Karisito kei na Tamada Vakalomalagi? E rawa ni veitalanoataki e dua na timi ni qito taleitaki kei na sala era cakacaka vata kina ki na dua na lalawa bibi. Se rawa ni o vakarorogo ki na dua na matasere se mataivakatagi ka veitalanoataka na sala era duavata kina na daunivakatagi me buli kina e dua na sereivakatagi totoka.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Jisu Karisito,” Nodra iVolanisere na Lalai,, 56

Vakatoroicaketaki ni Noda Veivakavulici

Vakayagataka na katoni ni itukutuku e vakarogoci. Nio vakavulica na ivolanikalou ki na nomu vuvale, sa rawa mo rogoca na ivolanikalou e katoni me vakarogoci, e kune ena ChurchofJesusChrist.org se na Gospel Library app. Vakarorogo ki na Joni 14–17 ena rawa ni kaukauwa sara baleta na vei tikina oqo era tiko kina na vosa ni iVakabula.