Karua ni Lako Mai

Na iKarua ni Lako Mai, mai vei Harry Anderson

22–28 ni Me

Josefa Simici—Maciu 1; Maciu 24–25; Marika 12–13; Luke 21

“Sa Lako Mai na Luve ni Tamata”

Nio wilika na Josefa Simici—Maciu 1; Maciu 24–25; Marika 12–13; kei na Luke 21, o na taroga beka, “Na itukutuku cava e tiko ena vei wase oqo e baleti au? noqu matavuvale? kei na noqu veikacivi?”

Vola na Nomu Nanuma

E ratou a kunea beka na tisaepeli i Jisu ni veivakakidacalataki na Nona parofisai: na valetabu cecere e Jerusalemi, na valenisoqo vakayalo ka vakavanua ni Jiu, ena vakacacani sara “ka talaraki sobu … ka sega e dua na vatu e taqa toka e delana.” E ratou a gadreva na tisaepeli me ratou kila vakalevu sara. “Sa yaco ni naica na veika oqo?” e ratou a taroga. “Ka cava nai vakatakilakila ni nomuni lako mai?” (Josefa Simici—Maciu 1:2–4). Na isaunitaro ni iVakabula a vakatakila na veivakarusai levu ki Jerusalemi—e dua na parofisai ka a vakavotukana ena AD 70—ena lailai kevaka e vakatauvatani ki na ivakatakilakila ni Nona lako mai ena vakataotioti ni gauna. Na vei ka e dei cake mai na valetabu e Jerusalemi ena rawa ni sega ni tudei—na matanisiga, na vula, na kalokalo, na vei matanitu, kei na wasawasa. Ka vakakina “ka na yavalati na veikaukauwa vakalomalagi” (Josefa Simici—Maciu 1:33). Kevaka eda sa vakila tiko vakayalo, na vei yavavala oqo ena rawa ni vakavulici keda me da nuitaka e dua na ka e tudei dina sara. Me vaka a yalataka o Jisu, “Ena takali ko lomalagi kei vuravura, ia na noqu vosa ena sega ni takali. … Ia ko koya ena tugana na noqu vosa, ena sega ni vakacalai” (Josefa Simici—Maciu 1:35,37).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Na cava na Josefa Simici—Maciu?

Josefa Simici—Maciu, e tiko ena Mataniciva Talei, na ivakadewa i Josefa Simici ni iotioti ni tikina ena Maciu 23 kei na taucoko ni Maciu 24. Na railesu veivakauqeti nei Josefa Simici e vakalesuya mai na vei dina talei a yali tu. Tikina e 12–21 e tukuna tiko na kena vakarusai o Jerusalemi ena gauna makawa; tikina e 21–55 e tiko kina na parofisai ni vakataotioti ni gauna.

Josefa Simici—Maciu 1:21–37; Marika 13:21–37; Luke 21:25–38

Na parofisai me baleta na Karua ni Lesu mai ni iVakabula ena rawa ni vukei au me’u vakanamata ki na vei siga ni mataka ena vakabauta.

Ena rawa ni veivakayavalati na wiliki ni vei ka ena yaco ni mua tiko kina Karua ni Lako mai nei Jisu Karisito. Ia ni a parofisaitaka o Jisu na vei ka oqo, a tukuna o Koya vei iratou na Nona tisaepeli “mo dou kakua ni kidroa” (Josefa Simici—Maciu 1:23). Ena rawa vakacava ni o “kakua ni kidroa” ni o rogoca na vei ka me baleta na uneune, ivalu, veicavilaki, kei na lauqa? Vakasamataka na vei taro oqo ni o wilika na vei tikina oqo. Makataka se toqa toka eso na ivakasala veivakadeitaki o kunea.

Raica talega na iUlutaga Vakosipeli, “Second Coming of Jesus Christ,” topics.ChurchofJesusChrist.org.

Josefa Simici—Maciu 1:26–27, 38–55; Maciu 25:1–13; Luke 21:29–36

Au na dauvakavakarau tu ga kina iKarua ni Lako mai ni iVakabula.

E vakaraitaka na Kalou ni “sa sega ni dua e kila na tiki ni siga sa lako mai kina na Luveni tamata” (Maciu 25:13). E sega ni vinakata o Koya ni yaco mai na siga oya me da qai “kidacala” tu (Luke 21:34), ka sa vakasalataki keda o Koya ena sala me da vakavakarau kina.

Nio wilika na vei tikina oqo, raica matua na vosa vakatautauvata kei na so tale na vosa vakatautauvata e vakayagataka na iVakabula me vakavulica vei keda me da dau vakavakarau kina iKarua ni Nona Lako mai. Na cava o vulica mai kina? Na cava o sa vakauqeti mo vakayacora?

O na rairai vakasamataka talega na sala e vinakata kina na iVakabula mo veivuke kina ena vakarautaki ni vuravura kina iKarua ni Nona Lako Mai. Na cava o nanuma e kena ibalebale mo tu vakarau mo ciqoma na iVakabula ena Nona lako mai? Na itukutuku nei Elder D. Todd Christofferson “Preparing for the Lord‘s Return” (Liaona, Me 2019, 81–84) ena rawa ni vukei iko mo vakasamataka vakatitobu na ka oqo.

Raica talega na Russell M. Nelson, “Embrace the Future with Faith,” Liaona, Nove. 2020, 73–76.

Maciu 25:14–30

Sa vinaka vei au na Tamada Vakalomalagi me‘u vakayagataka vakavuku na Nona isolisoli.

Ena vosa vakatautauvata ni iVakabula, na “taledi” e tukuna tiko na ilavo. Ia na vosa vakatautauvata ni taledi e rawa ni vakauqeti keda me da vakasamataka vakatitobu na ivakarau eda vakayagataka tiko kina e dua na noda veivakalougatataki, ka sega walega ni ilavo. Nio wilika oti na vosa vakatautauvata oqo, vola e dua na ituvatuva ni veivakalougatataki kei na ilesilesi sa nuitaka tiko vei iko na Tamada Vakalomalagi. Na cava e namaka o Koya me da cakava ena veivakalougatataki oqori? O rawa ni vakayagataka vakavuku vakacava na isolisoli eso oqori?

Maciu 25:31–46

Ni‘u sa qaravi ira na tamata, au sa qarava tiko na Kalou.

Kevaka o dau vakasamataka tu beka se na lewa vakacava na Turaga na nomu bula, wilika na vosa vakatautauvata ni sipi kei na me. Na cava na vuna o nanuma kina ni nomu qaravi ira na vakaleqai tu ena vukei iko mo vakarautaki mo “taukena na matanitu” ni Kalou?

E tautauvata vakacava na vosa vakatautauvata oqo vei rau na rua tale o ya Maciu 25? Na itukutuku cava e ratou tautauvata kina na tolu oqo?

Raica talega na Mosaia 2:17; 5:13.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Josefa Simici—Maciu.Me vukea na nomu vuvale ena kena vakadikevi na wase oqo, sureti ira me ra vakasaqara na ivakavuvuli ni iVakabula me baleta na sala eda rawa ni vakavakarau kina ki na iKarua ni Nona Lako mai (raica, me vaka na tikina e 22–23, 29–30, 37, 46–48). Na cava me da vakayacora me da muria kina na ivakasala oqo? Ena rawa ni ratou marautaka na nomu vuvale na lagati ni “Ena Lesu Tale Beka Mai” (iVolanisere ni Lalai, 46) ka droinitaka na iyaloyalo ni veika era raitayaloyalotaka ni na vakacava beka na iKarua ni Nona Lako Mai na iVakabula.

Josefa Simici—Maciu 1:22, 37.Na cava na ibalebale ni vakamareqeta na vosa ni Kalou? Me da cakava rawa vakacava oqo vakai keda yadua ka vakamatavuvale? Ena vukei keda vakacava na noda cakava oqo me da kakua ni lawakitaki rawa?

Maciu 25:1–13.E rawa nio vakayagataka na iyaloyalo ni tini na yalewa ka sala vata kei na idusidusi oqo me veitalanoataki na Maciu 25:1–13 Na vakamatailalai cava eda raica ena iyaloyalo ka vakamacalataki ena vei tikina oqo?

Sa rawa mo kotiva na pepa ena ibulibuli ni turu ni waiwai ka vunitaka wavoki na turu oqori ena nomu vale. E rawa nio vakabira na turu kina iyaya me vaka na ivolanikalou se dua na iyaloyalo ni valetabu. Ni ra sa kunea na lewe ni matavuvale na turu, sa rawa mo dou veitalanoataka na sala ena vukei keda kina na vei ka oqo me da vakavakarau kina iKarua ni Lako Mai.

Marika 12:38–44; Luke 21:1–4.Na cava e vakavulica vei keda na vei tikina oqo me baleta na nona raica na iVakabula na iyau vakavuravura? Vakaraitaka ki na nomu matavuvale na sala me saumi kina na ikatini kei na isolisoli ni lolo vua na Turaga. Ena vukea vakacava na tarai cake ni matanitu ni Kalou na vei solisoli oqo? Na cava eso tale na sala eda rawa ni solia kina “na veika kece [e tu vei keda]” vua na Turaga? (Marika 12:44).

e biuta tiko o marama na nona siliva ena kato

Na tiki ni Siliva ni Yada, mai vei Sandra Rast

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Ena Lesu Tale Beka Mai,” iVolanisere ni Gonelalai, 46.

Vakatoroicaketaki ni Vuli ni Tamata Yadua

Vakarautaka na nomu itikotiko wavoki. “Na veika e wavokiti keda tu ena rawa ni vakayaco-ka me da vuli ka vakila na dina” (Veivakavulici ena iVakarau ni iVakabula, 15). Saga mo vakasaqara e dua na vanua o na rawa ni vakila kina na veivakauqeti ni Yalo Tabu ni o vulica na ivolanikalou. Na sereivakatagi kei na iyaloyalo veilaveti e rawa ni sureta na Yalo.

era tauri cina tiko na marama

E Lima Vei Ira Na Vuku, mai vei Walter Rane