tagane ena vunikau ni lako yani o Jisu

E Kaba e Vu ni Lolo o Sakiusa, mai vei James Tissot

15-21 ni Me

Maciu 21–23; Marika 11; Luke 19–20; Joni 12

“Raica, Sa Lako Mai Vei Iko na Nomu Tui”

Ni se bera ni wiliki na vakasama ena ituvatuva oqo, wilika na Maciu 21–23; Marika 11; Luke 19–20; kei na Joni 12. Vola na ka o nanuma e rawa ni o wasea vei iratou na nomu vuvale se lewe ni kalasi ena Lotu.

Vola na Nomu Nanuma

Sa via kana na iVakabula ena ilakolako mai Pecani ki Jerusalemi, ka raica e dua na vu ni lolo sa tu mai liu sa vaka me ivurevure ni kakana. Ia ni toro yani o Jisu ki na vunikau, a raica ni sega tu na vuana (raica na Maciu 21:17–20; Marika 11:12–14,20). Ena dua na sala, na vu ni lolo e vakataki ira na iliuliu ni lotu dauveivakaisini e Jerusalemi: na nodra ivakavuvuli tawayaga kei na irairai vakalotu e taudaku e sega ni veivakamamautaki vakayalo. O ira na Farisi kei na vunivola e vaka me ra muria tiko na ivunau ia era calata na rua na ivunau lelevu duadua: mo lomana na Kalou ka lomana na wekamu me vakataki iko (raica na Maciu 22:34–40; 23:23).

Ena kena veibasai, e levu era sa kunea na vua vinaka ena ivakavuvuli i Jisu. Ni sa yaco i Jerusalemi, era a kidavaki Koya ena tabanikau era taya me ra conia kina na Nona sala, ka reki ni sa dede, me vaka e tukuna na parofisai makawa, “Ena lako mai vei iko na nomu Tui” (Sakaraia 9:9). Nio wiliwili tiko ena macawa oqo, vakasamataka na vua ni ivakavuvuli ni iVakabula kei na solibula ni veisorovaki ena nomu bula kei na nomu rawa ni “vua vakalevu” (Joni 12: 24).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Luke 19:1–10

Na Turaga e sega ni vakatulewa mai na irairai e taudaku ia mai na gagadre ga ni lomada.

Ena gauna i Jisu, era dau nanuma e vuqa na tamata nio ira na turaga, se daukumuna na ivakacavacava, era daulawaki ka butakoci ira na tamata. E baleta oya era sa nanuma kina ni o Sakiusa, e turaga daukumuni ivakacavacava liu, e vutuniyau, e rairai kilakasamitaki taki sara vakalevu. Ia o Jisu e rai ki na lomai Sakiusa. Na cava e vakaraitaka na Luke 19:1–10 me baleta na lomai Sakiusa? E rawa nio vola na vei vosa ena vei tikina oqo ka vakaraitaka na vei ka e a vakayacora ko Sakiusa me vakaraitaka kina na nona lomadina vua na iVakabula. Na cava soti na gagadre ni lomamu? Na cava o sa cakava tiko mo vakasaqara kina na iVakabula, me vakataki Sakiusa?

Raica talega na Vunau kei na Veiyalayalati 137:9.

Maciu 23; Luke 20:45–47

Sa sega ni taleitaka na veivakaisini o Jisu.

Na veimaliwai ni iVakabula kei ira na vunivola kei na Farisi e vakaraitaka e dua na duidui matalia ki na nona veimaliwai kei Sakiusa. Me vaka e vakamacalataka o Peresitedi Dieter F. Uchtdorf , “O [Jisu] a tucake me cudruvi ira na dau veivakaisini me vakataki ira na vunivola, o ira na Farisi, kei ira na luvei Setoki—o ira ka ra via vakaraitaka ni ra dodonu ka me ra rawata kina na dokai, cakacakayaco kei na iyau kei vuravura, ia ena gauna kece oya era vakatotogani ira tiko kina na tamata ka dodonu me ra vakalougatataki ira tiko” (“Ena Keda iTuvaki Dina,” Liaona, Me 2015,81).

Ena Maciu 23, e a vakayagataka kina na iVakabula e vica vata na vosa vakatautauvata me vakamacalataka kina na veivakaisini. Vakasamataka mo makataka se tuvana na vosa vakatautauvata oqori ka nanuma dei na ka era vakatavulica me baleta na veivakaisini. Na cava na kedrau duidui na veivakaisini kei na malumalumu vakatamata eda sotava kece ni da tovolea me da bulataka na kosipeli? Na cava o sa vakauqeti kina me vakayacora me duidui ena vuku ni ivakavuvuli ni iVakabula?

Raica talega na Bible Dictionary, “Hypocrite.”

Maciu 21:1–11; Marika 11:1–11; Luke 19:29–44; Joni 12:1-8, 12–16

O Jisu Karisito sa noqu Tui.

Ni sa yaco yani o Jisu i Jerusalemi ni vo toka e vica na siga me vakacavara kina na Nona Veisorovaki, o ira era kilai Koya ni sa nodra Tui era sa vakaraitaka na nodra yalodina ena nodra lumuti Koya, conaka ena isulu kei na tabani niu na Nona sala ki Jerusalemi, ka lagati na vakacaucau. Vakasamataka ni na vakatitobutaka vakacava na ivurevure oqo na nomu kila na ka sa yaco, ka a tekivu ena iotioti ni macawa ni Nona bula na iVakabula.

• E dua na ivakaraitaki makawa ni kena lumuti e dua na tui: 2 Tui 9:1-6, 13

• E dua na parofisai makawa me baleta na curu vakatui qaqa: Sakaraia 9:9

• Na ibalebale ni vosa osana: “Osana” ena iDusidusi ki na iVolanikalou (scriptures.ChurchofJesusChrist.org)

• Na parofisai ni na lesu mai vakacava na iVakabula: iVakatakila 7:9–12

O na rokova ka ciqoma vakacava na iVakabula me nomu Turaga ka Tui?

Raica talega na Gerrit W. Gong, “Hosanna and Hallelujah—The Living Jesus Christ: The Heart of Restoration and Easter,” Liaona, Me 2020, 52–55; “Na Curu Qaqa ni Turaga ki Jerusalemi” (vidio), ChurchofJesusChrist.org.

Maciu 22:34–40

E rua na ivunau levu sa ikoya mo lomana na Kalou ka lomani ira na tamata me vakataki iko.

Kevaka o vakila nio sa uabaleti ena nomu saga mo muri Jisu Karisito, na Nona vosa na iVakabula vei ira na vu ni lawa ena Maciu 22 e rawa ni vukei iko mo vakarawarawataka ka vakanamatataka na nomu itutu vakatisaepeli. Oqo e dua na sala mo vakayacora kina oqo: Vola e dua na iwiliwili ni ivunau ni Turaga. Era sema vakacava na ka yadudua e na nomu iwiliwili ki na rua na ivunau lelevu? E rawa vakacava ni nomu vakanamata kina rua na ivunau lelevu ena vukei iko mo muri ira na kena vo?

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 21:12–14.E vakaraitaka vakacava na vosa kei na ivalavala nei Jisu ena Maciu 21:12–14 na vei ka e vakila o Koya me baleta na valetabu? Eda vakaraitaka vakacava na vei ka eda vakila me baleta na valetabu? Na cava eda rawa ni “vakasevi” tani (tikina e 12) mai na noda bula me yaco na noda itikotiko me vakataka cake na valetabu? Sa rawa mo dou lagata vata e dua na sere me baleta na valetabu, me vaka na “Raica na Valetabu” (iVolanisere ni Lalai, 99).

Maciu 21:28–32.Na lesoni cava mai na vosa vakatautauvata ni tamata kei na rua na luvena tagane e rawa ni vukea na nomu matavuvale? Me vaka beka oqo, e rawa nio vakayagataka na italanoa me veitalanoataki kina na bibi ni talairawarawa kei na veivutuni. De na vinaka me ratou vola e dua na drama me vakatasuasuataka na vosa vakatautauvata ka me dou qai veitarataravi ena dramataka na vei lesilesi duidui eso.

Maciu 22:15–22; Luke 20:21–26.Era na marautaka beka na gone me ra cakava na sede vakatakarakara e tiko kina na “ituvaki kei na itutu” i Jisu. E rawa ni ra vola ena daku ni sede eso na “ka sa nona na Kalou” (Maciu 22:21) e rawa ni da solia Vua. E rawa talega nio veitalanoataka na ibalebale ni kena tiko vei keda na “ituvaki kei na itutu” ni iVakabula (Maciu 22:20; raica talega na Mosaia 5:8; Alama 5:14).

Joni 12:1–8.A vakaraitaka vakacava o Meri na nona lomana na iVakabula? Eda vakaraitaka vakacava na noda lomani Koya?

e quata tiko na yalewa na yavai Jisu ena drauniuluna

Savata Tiko na Yavai Jisu, mai vei Brian Call

Joni 12:42–43.Na revurevu cava ni veimaliwai vakatamata e dau vakayalolailaitaki keda ena so na gauna me da vakaraitaka kina se taqomaka na noda vakabauti Jisu Karisito? Me ivakaraitaki ni tamata era a sega ni dau rawai mai na ibili ni veimaliwai, raica na Taniela 1:3–20; 3; 6; Joni 7:45–53; 9:1–38; kei na Mosaia 17:1–4. Ena rawa vakacava ni da vakaraitaka na vakarokoroko vei ira na tamata ni ra vakaraitaka se taqomaka tiko na nodra vakabauta vakalotu?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Marau na Tui Sau!,” Serenilotu, naba 35.

Vakatoroicaketaki ni Noda Veivakavulici

Vakayagataka na droini me ra vakaitavi kina na lewe ni vuvale. “Na Gospel Art Book kei na Gospel Media Library ena ChurchofJesusChrist.org era tiko kina e vuqa na iyaloyalo kei na vidio e rawa ni vukea na [nomu vuvale] me ratou raitayalotaka na ivakamacala se vei ka a yaco” (Veivakavulici ena iVakarau ni iVakabula, 22).

na curu vakatui qaqa i Karisito

Curu Vakatui Qaqa,, mai vei Walter Rane