mokoti luvena tagane o tamana

Na Gonetagane Cidroi,, mai vei Liz Lemon Swindle

1–7 ni Me

Luke 12–17; Joni 11

“Tou Mai Reki Vata; Niu sa Kunea na Noqu Sipi ka a Yali”

Nio wilika na Luke 12–17 kei na Joni 11, vakasaqara ena masu na cava e vinakata o Tamada Vakalomalagi mo kila ka vakayacora. Na nomu vulica na vei wase oqo e rawa ni dolava na lomamu kina itukutuku eso ka baleti iko sara ga.

Vola na Nomu Nanuma

Voleka ni ituvaki kece, e 99 mai na 100 e rawa ni nanumi me totoka sara–ia ena sega kevaka na iwiliwili oqo esa baleti ira na luvena lomani na Kalou (raica na Vunau kei na Veiyalayalati 18:10). Ena kena oqo, e dua mada ga na yalo ena gadrevi kina na vakasaqaqara vakamatailalai, yalogu “me [da] kunea mada” (Luke 15:4), me vaka ka a vakatavulica na iVakabula ena vosa vakatautauvata ni sipi ka yali. Sa na qai rawa ni tekivu na veirekitaki, baleta ni “sa levu vakakina na reki mai lomalagi ena vuku ni tamata ivalavala ca e le duabau sa qai veivutuni, ia ka lailai ga ena vukudra na tamata yalododonu e le ciwasagavulu kaciwa, sa sega ni yaga vei ira na veivutuni” (Luke 15:4–7). Kevaka e sega ni veidonui, e rawa ni veivuke me nanumi ni, e dina ga, ni sega sara e dua me “sega ni yaga vei ira na veivutuni.” Eda gadreva kece me da vueti. Ka da rawa ni vakaitavi kece ena veivueti, ka veirekitaki vata ena vuku ni vei yalo yadua sa vakabulai (raica na Vunau kei na Veiyalayalati 18:15–16).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Luke 12; 14–16

Au sa vakalougatataki ni‘u vakagoleya na yaloqu kina vei ka tawamudu.

Na cava me kaya kina na Kalou “Ko iko na lialia” ki na tamata gugumatua, rawati koya a tara na lololo lelevu ka vakatawa ena vua ni nona cakacaka? (raica na Luke 12:16–21). Ena vei wase oqo mai na Luke, e a vakatavulica na iVakabula eso na vosa vakatautauvata ka rawa ni vukei keda me da laveta na noda rai mai na vei ka ni vuravura ki na ka tawamudu. Oqo eso vei ira na vosa vakatautauvata o ya. O na umana vakacava na itukutuku mai vei ira yadudua? Na cava o nanuma ni tukuna tiko vei iko na Turaga?

• Na tamata vutuniyau lialia (Luke 12:13–21)

• Na magiti levu (Luke 14:12–24)

• Na gone cidroi (Luke 15:11–32)

• Na dauniyau tawadodonu (Luke 16:1–12)

• Na tamata vutuniyau kei Lasarusa (Luke 16:19 - 31)

Raica talega na Maciu 6:19–34; 2 Nifai 9:30; Vunau kei na Veiyalayalati 25:10.

Luke 15

E reki o Tamada Vakalomalagi ni ra sa kune ko ira ka ra sa yali tu.

Nio wilika na vosa vakatautauvata a vakavulica o Jisu ena Luke 15, na cava o vulica me baleta na nona nanuma na Tamada Vakalomalagi me baleti ira era ivalavala ca se ra sa “yali”? Me veinanumi vakacava e dua na iliuliu vakayalo—se dua ga vei keda—vei ira? Vakasamataka na sala era a rairai sauma vakacava kina na Farisi kei na vunivola na taro oqo (raica na Luke 15:1–2). Na sau ni taro nei Jisu e rawa ni kunei ena tolu na vosa vakatautauvata ena Luke 15. Nio wilika, vakasamataka na vei ka a vakavulica o Jisu vei ira na vunivola kei na Farisi ena vosa vakatautauvata oqo.

Sa rawa talega ni o biuta vata e dua na lisi ni vei ka e tautauvata kei na kedra duidui na vei vosa vakatautauvata oqo. Me ivakaraitaki, e rawa nio vakaraica na vei ka a yali ena vosa vakatautauvata yadua kei na vuna a yali kina, na sala a kunei kina, kei na nodra nanuma na tamata ena gauna sa kunei kina. Na itukutuku cava soti e varaitaka o Jisu me baleti ira era sa “yali” tu—ka wili kina o ira ka ra sega ni nanuma ni ra sa yali? Na cava na Nona itukutuku vei ira era vakasaqarai ira era sa yali tu?

Raica talega na Vunau kei na Veiyalayalati 18:10–16; Jeffrey R. Holland, “The Other Prodigal,” Ensign, Me 2002, 62–64.

na yalewa e vakasaqara na tiki ni siliva

Na Tiki ni Siliva ka a Yali, mai vei James Tissot

Luke 16:1–12

Na cava e a vakatavulica tiko na Karisito ena vosa vakatautauvata ni dauniyau tawadodonu?

E vakamacalataka o Elder James E. Talmage e dua na lesoni eda rawa ni vulica mai na vosa vakatautauvata: “Mo gumatua tiko; ni na siga mo rawa ni vakayagataka kina na nomu iyau vakavuravura ena yali kusarawa. Vuli mada ga mai vua na tawadodonu kei na tamata ca; kevaka era sa yalomatua ka vakavakarau me baleta walega na gauna mai muri ka ra kila, na cava soti o na vakavakarau taka o iko, nio vakabauta na icavacava tawamudu, mo vakarau kina. Kevaka ko sa bera ni vulica na vuku kei na yalomatua ena vakayagataki ni ‘iyau sa sega ni dodonu’ ko na vakanuinuitaki vakacava ena iyau sa gumatua sara.” (Jesus the Christ [1916], 464). Na lesoni cava tale eso o sa raica ena vosa vakatautauvata oqo?

Luke 17:11–19

Ni‘u vakavinavinakataka na noqu veivakalougatataki ena kauti au voleka ki vua na Kalou.

Kevaka o iko e a dua vei iratou na tini na vukavuka, ko nanuma beka ni ko na lesu mo la’ki vakavinavinakataka na iVakabula? Na ikuri ni veivakalougatataki cava a ciqoma na vukavuka yalo malumalumu baleta ni a vakavinavinaka?

Sa rawa talega mo vakasamataka vakatitobu na vosa ni iVakabula, “Sa vakabulai iko na nomu vakabauta” (tikina e 19). Ena nomu nanuma, e rau veisemati vakacava na vakavinavinaka kei na vakabauta? E rau vukei keda vakacava me da taucoko? Na vidio “President Russell M. Nelson on the Healing Power of Gratitude” (ChurchofJesusChrist.org) e rawa ni vukei iko mo vakasamataka vakatitobu na vei taro oqo.

Raica talega na Dale G. Renlund, “Consider the Goodness and Greatness of God,” Liaona, Me 2020, 41–44.

Joni 11:1–46

Ko Jisu Karisito na Vu ni Tucake tale kei na Vu ni Bula.

Na cakamana ni nona vakaturi mai na mate o Lasarusa e ivakadinadina kaukauwa ka sega ni rawa ni vakalasui ni ko Jisu e Luve ni Kalou vakaidina ka sa ikoya na Mesaia yalataki. Na vosa, malanivosa, se vakamatailalai cava ena Joni 11:1–46 e vakaqaqacotaka na nomu vakabauta ni ko Jisu Karisito sa ikoya na “vu ni tucaketale kei na vu ni bula”? Na cava na kena ibalebale vei iko nio Jisu “na vu ni tucake tale, kei na vu ni bula”?

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Luke 15:1–10.Na cava e ratou vakila e yalodra na lewe ni nomu vuvale ni ratou vakayalia e dua na ka—se me ratou yali? Ni nodratou vakaraitaka na vei ka e ratou sotava e rawa ni itekivu ni dua na veitalanoa me baleta na vosa vakatautauvata ni sipi ka yali kei na tiki ni siliva ka yali. Se ena rawa ni dou qitora e dua na qito me vuni e dua ka ra vaqarai koya na vo ni vuvale. E vukei keda vakacava na itaviqaravi oqo me da kilai rau vinaka kina na vosa vakatautauvata oqo?

Luke 15:11–32.Eda na vakataka vakacava na tama ena italanoa oqo ni o ira eda dau lomana era sa yali tu? Na cava eda rawa ni vulica mai vei koya na luvena tagane qase cake ka na rawa ni vukei keda me da va-Karisito cake? Ena sala cava e sa vakataka kina na tama oqo na Tamada Vakalomalagi ena vosa vakatautauvata ?

Luke 17:11–19.Me ratou vukei na lewe ni vuvale me ratou taurivaka na kedratou itukutuku na tini na tamata vukavuka, e rawa nio sureti iratou me ratou dui biuta vuni e dua na ivola ni vakavinavinaka vei ira yadua. E rawa ni dou lagata vata na “Wilika na Nomu Kalougata” (Serenilotu, naba 144) ka wilika na veivakalougatataki sa ciqoma na nomu matavuvale.

Joni 11:1–46.O ratou na lewe ni vuvale e rawa ni ratou sarava na vidio “Lazarus Is Raised from the Dead” (ChurchofJesusChrist.org) ka wasea na nodratou ivakadinadina me baleti Jisu Karisito.

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Serenilotu vakaturi: “Talei Vua Na i Vakatawa,” Serenilotu, naba 130.

Vakatoroicaketaki ni Noda Veivakavulici

Vakayagataka na iTalanoa kei na iVakaraitaki me Vakavulici Kina na iVakavuvuli ni Kosipeli E dau vakavulica vakawasoma na iVakabula na ivakavuvuli ni kosipeli ena italanoa kei na vosa vakatautauvata. Vakasamataka na ivakaraitaki ni italanoa mai na nomu bula e rawa ni cakava me ka bula e dua na ivakavuvuli ni kosipeli kina nomu vuvale (raica na Veivakavulici ena iVakarau ni iVakabula, 22).

tekiduru na tagane ena vakavinavinaka e matai Jisu

Evei Ga Na Lewe Ciwa, mai vei Liz Lemon Swindle