na witi sa vakarau tamusuki

20–26 ni Maji

Maciu 13; Luke 8; 13

“O Koya sa Vakadaligana me Rogoca Me Mani Rogoca Sara”

Ni o wilika na Maciu 13 kei na Luke 8; 13, vakasamataka mo na vakarautaki iko vakacava mo na “rogoca” ka vakavinavinakataka na ivakavuvuli ni iVakabula ena vosa vakatautauvata oqo. Na cava o na cakava mo vakayacora kina na ivakavuvuli oqo ena nomu bula?

Vola na Nomu Nanuma

Eso na nona ivakavuvuli guiguilecavi dredre na iVakabula e vakavulici vakaitalanoa rawarawa ka vakatokai me vosa vakatautauvata. Oqo era a sega walega ni italanoa taleitaki ni veika vakayago se veika a yaco. Era vakatawani tu ena dina titobu baleta na matanitu ni Kalou vei ira era sa vakarau tu vakayalo. E dua vei ira na imatai ni vosa vakatautauvata ena Veiyalayalati Vou—na vosa vakatautauvata ni daukakaburaki (raica na Maciu 13:3–23)—e sureti keda me da dikeva na noda vakavakarau me da ciqoma na vosa ni Kalou. “Ki vua sa ciqoma,” a kaya o Jisu, “ki vua ena soli kina, ka na soli vakalevu sara vua” (iVakadewa i Josefa Simici, Maciu 13:10 [ena Maciu 13:12, ivakamacala e ra a]). Ni da sa vakarau me da vulica na vosa vakatautauvata ni iVakabula—se dua ga vei ira na Nona ivakavuvuli—e dua na vanua vinaka me da tekivu kina oya me da vakadikeva mada na lomada ka qai raica kevaka eda sa solia tiko ki na vosa ni Kalou na “qele vinaka” (Maciu 13:8) me tubu vinaka, serau, vuavuai vinaka, ka qai vuataka mai na vua ena vakalougatataki keda kei na noda matavuvale me vakalevu sara.

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Maciu 13:3–23; Luke 8:4–15; 13:6–9

Me vakavakarau na lomaqu me ciqoma na vosa ni Kalou.

Na cava na vuna e dau ciqoma kina na dina ena so na gauna na yaloda, ena so tale na gauna eda temaki me da vorata? Na kena wiliki na vosa vakatautauvata ni daukakaburaki ena rawa ni vakarautaka na madigi vinaka me vakasamataki na sala o ciqoma kina na dina mai vua na Turaga. Ena veivuke beka mo veiduitaitaka na tikina e 3–8 ena Maciu 13 kei na ivakadewa e tiko ena tikina e 18–23 Na cava o rawa ni cakava mo cukiraka kina na “qele vinaka” e lomamu? Na cava e so na “wa vakavotona” ka rawa ni ivakatao ni nomu rogoca vakaidina ka muria na vosa ni Kalou? E rawa beka vakacava mo uabaleta na “wa vakavotona” oqo?

Na nomu vulica na vosa vakatautauvata oqo e rawa talega ni vakauqeta na sala mo wilika kina na vosa vakatautauvata ena Luke 13:6–9. Na cava na “vuanikau” e vakasaqara mai vei keda na Turaga? Eda na vakabulabulataka vakacava na noda qele me rawa ni da “vua”?

Raica talega na Mosaia 2:9; Alama 12:10–11; 32:28–43; Dallin H. Oaks, “The Parabale of the Sower,” Liaona, Me 2015, 32–35.

Maciu 13:24–35, 44–52; Luke 13:18–21

Na vosavakatautauvata i Jisu e vukei au me’u kila vinaka na tubu kei na icavacava ni Nona Lotu.

A vakavulica o Josefa Simici ni vosa vakatautauvata ena Maciu 13 e vakamacalataka na tubu kei na icavacava ni Lotu ena iotioti ni gauna. Sa rawa mo railesuva na vosa ni Parofita ena Nodra iVakavuvuli na Peresitedi ni Lotu: Josefa Simici (2007), 293–303, ni o vakasamataka na cava e vakavulica vei iko na vosa vakatautauvata oqo me baleta na Lotu ni Turaga:

• Na sila vinaka kei na sila ca (13:24–30, 36–43)

• Na sore ni musita (13:31–32)

• Na leveni (13:33)

• Na iyau sa vuni tu kei na mataniciva talei (13:44–46)

• Na lawa (13:47–50)

• O itaukei ni vale (13:52)

Ni o sa vakasamataki ira vakatitobu na vosa vakatautauvata oqo, na cava o vakauqeti kina mo vakayacora mo vakaitavi vakalevu cake kina ena cakacaka ni Lotu i Karisito ena gauna oqo?

Raica talega na iDusidusi ki na iVolanikalou, “Kingdom of God or Kingdom of Heaven,” “Parable,” scriptures.ChurchofJesusChrist.org.

mataniciva

Na kosipeli i Jisu Karisito e “mataniciva talei” (Maciu 13:46).

Maciu 13:24-30, 36-43

Na yalododonu ena tubu ena kedra maliwa na valavala ca me yacova na ivakataotioti kei vuravura.

E dua na sala me vakadikevi kina na vosa vakatautauvata sa ikoya me droini taki e dua na kena iyaloyalo ka me qai kabi kina na kena ivakadewa mai na Maciu 13:36–43 kei na Vunau kei na Veiyalayalati 86:1–7. Na silica ca “e dua na co ca e gaga, ka, yacova sara ni sa matua, e via tautauvata kei na witi na kena irairai” (Bible Dictionary, “Tares”). Na dina cava ena vosa vakatautauvata e vakauqeti iko mo yalodina tiko ga veitalia na ivalavala ca ena vuravura oqo?

Luke 8:1–3

Ena sala cava so era qarava kina na iVakabula o ira “na yalewa eso”?

“E vuqa tale na tisaepeli yalewa era a lako vata kei Jisu kei iratou na Le Tinikarua, era vuli vakayalo mai vei [Jisu] ka qaravi Koya vakayago. … Me ikuri ni kena ciqomi na veiqaravi i Jisu—na itukutuku vinaka ni Nona kosipeli kei na veivakalougatataki ni Nona kaukauwa veivakabulai—o ira na yalewa oqo era a qaravi Koya, solia na nodra iyau ka yalodina” (Luvequ Yalewa ena Noqu Matanitu [2017], 4). O ira na marama era muria na iVakabula era vakadinadinataka vaka kaukauwa sara me baleti Koya (raica na Linda K. Burton, “Certain Women,” Liaona, Me 2017, 12–15).

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 13.Ni ra wilika na nomu vuvale na vosa vakatautauvata ni iVakabula, era na rairai vinakataka me ra vakasamataka eso na nodra vosa vakatautauvata vakai ira e vakavulica na dina vata oqori me baleta na matanitu vakalomalagi (na Lotu), ni vakayagataki tiko na iyaya kei na ituvaki e ra kila tiko.

Maciu 13:3–23; Luke 8:4–15.Ni wiliki oti na vosa vakatautauvata ni daukakaburaki, ena rawa ni veitalanoataka na nomu vuvale na taro vakaoqo: Na cava e rawa ni cakava na noda “qele” (yaloda) “vatu” se “vakaruguta” na vosa? Eda na vakadeitaka vakacava me bulabula ka vuavuai vinaka na noda qele?

Kevaka era tiko na gonelalai ena nomu vuvale, ena rawa ni ka ni lasa me ra vakatasuasuataka na lewe ni vuvale na veisala eso e rawa ni vakarautaki kina na yaloda me da rogoca na vosa ni Kalou ni ra vakilakila na vo ni lewe ni vuvale na veika era cakava tiko.

Maciu 13:13–16.Ena rawa vakacava mo vukea na nomu lewe ni vuvale me ra kila vinaka na bibi ni kena ciqomi e yalodra dina na vosa i Karisito? Me vakaraitaki ni “sa didivara [sara] na daligadra,” e rawa ni o ubia na daligana e dua na lewe ni matavuvale ni o wilika lo tiko na Maciu 13:13–16. E vakacava na kila vinaka ni vuvale oya me baleta na vei tikina oqori? Na cava eso na sala eda rawa ni dolava kina na matada, daligada, kei na lomada ki na vosa ni Kalou?

Maciu 13:44–46.Na cava e rau via tautauvata kina oi rau na turaga ena vosa vakatautauvata oqo? E tiko beka eso tale na ka e dodonu me da cakava tiko ena noda dui bula yadua ka vakamatavuvale me rawa ni da vakaliuca kina na matanitu ni Kalou ena noda bula?

Luke 13:11–17.Era sa sotava beka na lewe ni matavuvale na vei ka eso ka vakavuna me ra vakila ni ra sa sega ni rawa “tudonutaki [ira] rawa”? Eda kila beka e dua tale e vakila vakaoqo? E rawa vakacava ni da veivuke?” Ena vukei keda vakacava na iVakabula me da “sereki” rawa mai na noda malumalumu?

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Serenilotu vakaturi: “Kaburaki E Veisiga,” Serenilotu, naba 132.

Vakatoroicaketaki ni Noda Veivakavulici

Vakalekalekataka e dua na ivolanikalou Digia e dua na ivolanikalou e vakaibalebale ki na nomu vuvale, ka sureti ira na leweni vuvale me ra cavuqaqataka. E vakatavulica o Elder Richard G. Scott, “E dua na tiki ni volanikalou ka rawa ni cavuqaqataki ena yaco me nomu itokani ka na sega ni vakamalumalumutaki ena balavu ni gauna” (“Na Kaukauwa ni Volanikalou,” Liaona, Nove 2011, 6).

e kaburaka tiko na sorenikau e dua na turaga

Na Vosa Vakatautauvata ni Daukakaburaki, mai vei George Soper