Sa tabaki Pita o Jisu

6–12 ni Maji

Maciu 9–10; Marika 5; Luke 9

“Sa Talai Ira na Lewe Tinikarua Oqo Ko Jisu”

Na vakasama ni vuli ena ituvatuva oqo e nakiti me vukea mo kunea na ibalebale ni ivolanikalou kivei iko. Ia, e sega ni dodonu me ra sosomitaka na ivakatakila kivei iko o rawa ni ciqoma me baleta na veitikina cava mo vulica se na sala mo vulica kina.

Vola na Nomu Nanuma

Nai tukutuku ni veivakabulai mana nei Jisu sa dewa totolo sara. Era vakamuri Koya na lewe vuqa, ena vakanuinui me ra na vakabulai mai na nodra tauvimate. Ia, ni sa raici ira yani na lewe vuqa na iVakabula, e sa raica e levu cake na ka mai na nodra malumalumu vakayago. E sa tuburi Koya na loloma, ni sa raica “na sipi sa sega na nodra ivakatawa” (Maciu 9:36). “E dina sa vakalewe na yabaki,” e raica o Koya, “a ra sa lewe lailai ga na ivakatawa ni were” (Maciu 9:37). A sa kacivi ira na iApositolo lewe tinikarua, “sa solia vei ira na kaukauwa,” ka qai talai ira me ra veivakavulici ka veiqaravi vei ira na “sipi ni matanitu nei Isireli era sa yali tu” (Maciu 10:1, 6). Nikua e sa gadrevi talega mera lewe levu cake na tamata cakacaka ni were me veiqaravi vei ira na luvena na Tamada Vakalomalagi. Era se lewe tinikarua tikoga na iApositolo, ia era sa levu cake na tisaipeli i Jisu Karisito ni vakatauvatani ena veigauna e liu—o ira na tamata era rawa ni cauraka ki vuravura taucoko ni sa, “Voleka mai na matanitu vakalomalagi” (Maciu 10:7).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Maciu 9:18-26; Marika 5:22-43

“Kakua ni yalolailai, vakadinata ga.”

Ena imatai ni gauna a kerei Jisu kina o Jairo me vakabulai luvena yalewa, ni “sa voleka sara ni mate,” a vosa vakatotolo o Jairo ka nuitaka: “Mo ni lako mai mo ni tabaki koya ena ligamuni, … ena qai bula ko koya” (Marika 5:23). Ia ni ratou sa lako yani, a tukuna vei Jairo e dua na italai ni sa bera: “Sa mate na luvemu yalewa: ko sa vakaoca tale nai Vakavuvuli e na vuku ni cava?” (tikina e 35). Sa vaka talega kina, ni sa rairai bera na marama e vakamacalataki tiko ena Marika 5:25–34, ka a tauvi mate tu ena 12 na yabaki.

Nio wilika na veitukutuku oqo, o na vakasamataka beka na veika e gadrevi me ia na veivakabulai ki na nomu bula se nomu matavuvale—oka kina na veika e vaka me “sa voleka sara na mate” se sa bera kina na veivakabulai. Na cava e vakauqeti iko me baleta na ivakaraitaki ni vakabauta ena itukutuku oqo? Raica talega na veika a tukuna o Jisu vua na yalewa kei Jairo. Na cava o vakila ni tukuna tiko vei iko o Koya?

Raica talega na Luke 8:41–56; Russell M. Nelson, “Vagoleya Mai na Mana nei Jisu Karisito ki na Noda Bula,” Liaona, Me 2017, 39–42; Nodra iVakavuvuli na Peresitedi ni Lotu: Gordon B. Hinckley (2016), 333–42.

sa dodoliga na marama me tara na beleni kote balavu i Jisu

Vakararavi vua na Turaga, maivei Liz Lemon Swindle

Maciu 10; Luke 9:1–6

E solia na Turaga na kaukauwa vei ira na Nona italai me ra vakayacora na Nona cakacaka.

Na ivakaro a solia o Jisu ena Maciu 10 kivei ira na Nona iApositolo e rawa ni baleti keda talega, baleta ni da sa vakaitavi kece ena cakacaka ni Turaga. Na kaukauwa cava e solia vei ira Nona iApositolo o Karisito me vukei ira me ra rawata na nodra ilesilesi? O na taura rawa vakacava na Nona kaukauwa ena cakacaka ko sa kacivi kina mo cakava? (raica na 2 Korinica 6:1–10; Vunau kei na Veiyalayalati 121:34–46).

Nio wilika na itavi e solia o Karisito vei ira Nona iApositolo, ena rawa beka ni votu mai nomu vakanananu na cakacaka e vinakata na Turaga mo cakava. E dua na ituvatuva vaka na kena oqo ena rawa ni vukei iko mo tuva vakamatau na nomu vakasama eso:

Maciu 10	Veivakanananu au ciqoma
Sa solia na iVakabula na kaukauwa vei ira na Nona tisaipeli.	Ena solia vei au na Kalou na kaukauwa au gadreva meu cakacaka kina.

Raica talega na Marika 6:7–13; Yavu ni Vakabauta 1:6; Bible Dictionary, “Apostle”; “Jesus Calls Twelve Apostles to Preach and Bless Others” (video), ChurchofJesusChrist.org.

Maciu 10:17–20

Ni’u sa veiqaravi ena cakacaka ni Turaga, ena vakauqeti au o Koya ena veika me’u tukuna.

E sa raica taumada na Turaga ni ra na vakacacani ka tarogi na Nona tisaipeli me baleta na nodra vakabauta—ena via tautauvata kei na veika era sotava o ira na tisaipeli ena gauna oqo. Ia, e yalataka vei ira na Nona tisaipeli ni ra na kila mai vua na Yalo na veika me ra tukuna. O sa sotava oti beka na kena sa yaco ena nomu bula na yalayala oqo, de dua ena gauna o wasea kina na nomu ivakadinadina, solia e dua na veivakalougatataki, se dua nomudrau veitalanoa kei na dua? Sa rawa mo wasea na veika o sotava vua e dua na nomu daulomani se vola ena ivolaniveisiga. Na cava o vakauqeti kina mo cakava me rawa ni o sotava vakalevu cake na veika oqo?

Raica talega na Luke 2:11–22; Vunau kei na Veiyalayalati 84:85.

Maciu 10:34–39

Na cava nai balebale ni vosa nei Jisu ni tukuna “Au sa sega ni lako mai me’u kauta mai na veivinakati, ai seleiwau ga”?

E vakatavulica o Elder D. Todd Christofferson: “Au kila deivaki eso vei kemuni o ni sa cakitaki ka biliraki mai vei tamamuni, tinamuni, tacimuni tagane se yalewa ena gauna o ni ciqoma kina na kosipeli i Jisu Karisito ka qai veiyalayalati kei Koya. Ena dua se so tale na sala, e sa gadrevi kina mo solibulataka na veiwekani dredre baleta na nomu loloma cecere vei Karisito, ka turu kina vakalevu na wai ni matamu. Ia ena nomu yalololoma sega ni luluqa rawa, o sa ququmi matua tiko ena ruku ni kauveilatai, ka vakaraitaka na nomu sega ni maduataka na Luveni Kalou” (“Kunea na Nomu Bula,” Ensign, Maji 2016,28).

Na lomasoli oqo mo vakayalia na isema vakaveiwekani e dredre mo rawa ni muria na iVakabula e salavata mai kei na yalayala “ia o koya sa vakayalia na nona bula ena vukuqu ena maroroya” (Maciu 10:39).

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Marika 5:22–43.Ni wilika vata na nomu vuvale na italanoa oqo, sa rawa mo ni tu vakadua beka mo taroga na nodra nanuma na lewe ni matavuvale kevaka mera a Jairo, na marama, se so tale na tamata ena italanoa. E rawa talega nio vakaraitaka na iyaloyalo ni italanoa, me vakataki ira ena ituvatuva oqo. E vakaraitaka vakacava na iyaloyalo oqo na nodra vakabauta na tamata ena italanoa? (Raica talega na vidio “Jesus Raises the Daughter of Jairus” kei na “Jesus Heals a Woman of Faith” ena ChurchofJesusChrist.org.) O na rairai vakasamataka talega eso na bolebole e sotava tiko na nomu matavuvale. Eda na bulataka vakacava na Nona vosa, “Kakua ni yalolailai, vakadinata ga”? (Marika 5:36).

Maciu 10:39; Luke 9:23–26.Na cava e rawa ni kena ibalebale me da “vakayalia” na noda bula ka “kunea”? (Maciu 10:39). Sa rawa kina lewe ni matavuvale mera wasea na veika era sa sotava ka vakaraitaka na ivakavuvuli i Jisu ena veitikina oqo.

Maciu 10:40.O sa cakava tiko vakacava kei na nomu vuvale na ciqomi kei na vakamuri ni nodra ivakasala na iApositolo ni gauna oqo? E vakavolekataki keda vakacava vei Jisu Karisito na noda talairawarawa ki na nodra ivakasala?

Luke 9:61–62.Na cava na kena ibalebale na rai lesu ni sa tauri na siviyara? Na cava e sega ni yaga kina kina matanitu ni Kalou na ituvaki ni yalo oqo?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Serenilotu vakaturi: “Ni Tudei na Vakabauta,” Serenilotu, naba 70.

Vakatorocaketaki ni Vuli ni Tamata Yadua

Vakarogoca na Yalo. Nio vuli tiko, yadrava matua na nomu vakasama kei na veika o vakila (raica na Vunau kei na Veiyalayalati 8:2–3), ke sega madaga ni veisotari kei na veika o wilika tiko. Na veivakanananu oqori e rawa saraga ni veika e vinakata na Kalou mo kila ka cakava.

Sa tubera cake o Jisu e dua na goneyalewa mai na idavodavo

Talitha Cumi, mai vei Eva Koleva Timothy