Sa tubera cake o Jisu e dua na tagane mai na idavodavo

27 ni Feperueri–5 ni Maji

Maciu 8; Marika 2–4; Luke 7

“Sa Vakabulai Iko Na Nomu Vakabauta”

Qarauna mo kakua ni vakusakusataka na nomu vulica na ivolanikalou. Solia na gauna mo vakasamataka vakatitobu ena masumasu, kevaka sara mada ga e sega na nomu gauna mo wilika kina na vei tikina yadua. Na vei gauna vakaoqo ni kena vakasamataki vakatitobu e dau veimuataki ki na ivakatakila ki na tamata yadua.

Vola na Nomu Nanuma

E dua na itukutuku matata duadua ena Veiyalayalati Vou sa ikoya nio Jisu Karisito e dau veivakabulai. E vuqa sara na itukutuku ni nona vakabulai ira na tauvimate kei na vakararawataki na iVakabula—tekivu vua e dua na marama e tauvi katakata yaco sara ki vua e dua na yada ka a mate na luvena tagane. Na cava na vuna e vakabibitaki kina na veivakabulai vakayago? Na itukutuku cava beka e tiko me noda mai na vei cakamana oqo? E dua vei ira na itukutuku dina sara ka kilai levu sa ikoya nio Jisu Karisito sa Luve ni Kalou, ka tu vua na kaukauwa ni veika kece, ka wili kina na noda mosi vakayago kei na noda malumalumu. Ia, e dua tale na kena ibalebale e tiko ena Nona vosa vei ira na vunivola daulelewa: “Ia mo dou kila kina ni sa rawata na Luve ni tamata e vuravura me bokoca nai valavala ca” (Marika 2:10). Ni gauna o wilika kina na itukutuku me baleta na tamata mataboko se na vukavuka ka a vakabulai, e rawa ni o vakasamataka na veivakabulai—vakayalo ka vakayago—ka rawa ni ciqomi mai vua na iVakabula ka rogoca ni kaya vei iko, “Sa vakabulai iko na nomu vakabauta” (Luke 7:50)

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Maciu 8; Marika 2–3; Luke 7

Na iVakabula e rawa ni vakabula na malumalumu kei na tauvimate cava ga.

E vica na wase oqo e volaitukutukutaka e levu na veivakabulai mana e a vakayacora na iVakabula. Nio vulica na veivakabulai oqo, vakaraica na itukutuku eso me baleti iko. Sa rawa nio tarogi iko: Na cava e vakavulica na itukutuku oqo me baleta na vakabauti Jisu Karisito? Na cava e vakavulica na itukutuku oqo me baleta na iVakabula? Na cava e vinakata na Kalou me’u vulica mai na cakamana oqo? Oqo eso na kena ivakaraitaki, ia e vuqa tale tu:

• E dua na vukavuka (Maciu 8:1-4)

• Na italai ni turaganivalu ((Maciu 8:5–13; Luke 7:1–10)

• Na tinai wati Pita (Maciu 8:14–15)

• Na tamata paralasi (Marika 2:1–12)

• E dua na tagane e malai na ligana (Marika 3:1–5)

• Na luvena tagane e dua na yada mai Neini (Luke 7:11–16)

Raica talega na David A. Bednar, “Accepting the Lord‘s Will and Timing,” Liaona, Okos. 2016, 17–23; Neil L. Andersen, “Wounded,” Liaona, Nove. 2018, 83–86.

Marika 2:15–17; Luke 7:36–50

A sega ni lako mai o Jisu Karisito me cudruvi ira na tamata ivalavala ca ia me vakabulai ira.

Nio wilika na vei tikina oqo me baleta na veimaliwai nei Jisu kei ira na vunivola kei na Farisi, o na rawa beka ni vakasamataka kevaka o raici iko ena itukutuku oqo. Me vakataka, e vakataki Saimoni na Farisi beka na nomu vakanananu kei na ivalavala? O na vakamacalataka vakacava na kedrau duidui na sala a raici ira kina na tamata ivalavala ca o Jisu kei na nodra ivakarau na Farisi me vakataki Saimoni? Vakasamataka na sala era na vakila kina o ira era sa bikai tu ena ivalavala ca ni ra sa tiko vata kei na iVakabula. Na cava era vakila ni ra sa tiko vata kei iko?

Sa rawa talega nio vakasamataka vakatitobu ni ko sa rawa ni vakataka na marama e vakamacalataki tiko ena Luke 7:36–50. Ena gauna cava o sa bau sotava kina na yalo vinaka kei na loloma veivueti e vakaraitaka na iVakabula vua na marama oqo? Na cava o vulica mai na nona ivakaraitaki ni vakabauta, loloma, kei na yalo malumalumu?

Raica talega na Joni 3:17; Luke 9:51–56; Dieter F. Uchtdorf, “The Gift of Grace,” Liaona, Me 2015, 107–10.

Maciu 8:18-22; Marika 3:31–35

Ni’u sa tisaipeli i Jisu Karisito sa kena ibalebale me’u vakaliuci Koya ena noqu bula.

Ena vei tikina oqo, e vakavulica o Jisu ni da sa Nona tisaipeli e dodonu me da vakaliuci Koya ena noda bula, kevaka sara madaga ena so na gauna eda na vakuwai keda mai na vei ka eda vakamareqeta. Nio vulica na vei tikina oqo, vakasamataka vakatitobu na nomu bula vakatisaipeli. Na cava e dodonu kina vei ira na tisaipeli me ra dau vakaliuca na iVakabula? Na cava beka e gadrevi mo na vakuwai iko kina mo rawa ni o vakaliuci Jisu? (Raica talega na Luke 9:57–62.)

Maciu 8:23–27; Marika 4:35–41

E tiko vei Jisu Karisito na kaukauwa me kauta mai na vakacegu ena loma ni cava rerevaki ni bula.

O sa bau vakila vakacava na veika e ratou a vakila na tisaipeli i Jisu ena cava rerevaki mai wai—ni ratou sa raica na kena vodo tiko ena loma ni waqa na wai ni ua ka vakataroga, “Vakavuvuli, ko sa wele beka ga ni da sa mate?”

Ena Marika 4:35–41, o na kunea kina e va na taro. Vola yadua, ka vakasamataka vakatitobu na cava e vakavulici iko kina me baleta na sotavi ni bolebole ni bula ni da vakabauti Jisu Karisito. E kauta mai vakacava na vakacegu na iVakabula ena cava rerevaki ni nomu bula?

Raica talega na Lisa L. Harkness, “Peace Be Still,” Liaona, Nove. 2020, 80–82.

O Jisu ena waqa sa vakamaravutaka na cava

Mai na Rere ki na Vakabauta, mai vei Howard Lyon

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 8; Marika 2–4; Luke 7.Nanuma mo vola e dua na lisi ni cakamana e vakamacalataki tiko ena vei wase oqo. Tovolea mo kunea se droinitaka na kedra iyaloyalo eso (raica na Gospel Art Book se ChurchofJesusChrist.org). Sa rawa ki na lewe ni matavuvale yadua me vakayagataka na iyaloyalo me tukuna e dua na cakamana ka wasea na vei ka era sa vulica mai kina. Sa rawa ni o wasea eso na ivakaraitaki ni cakamana o sa raica se wilika e yaco ena gauna oqo.

Raica talega na vidio “Widow of Nain” kei na “Calming the Tempest” (ChurchofJesusChrist.org).

Maciu 8:5–13; Luke 7:1–10.Na cava e a vakauqeti Jisu me baleta na nona vakabauta na turaganivalu? Eda na vakaraitaka vakacava na veivakabauti vakaoqo vei Jisu Karisito?

Marika 2:1–12.“Wase 23: The Man Who Could Not Walk” (ena iTalanoa ni Veiyalayalati Vou, 57–58, se na kena vidio ena ChurchofJesusChrist.org) e rawa ni vukea na nomu matavuvale me veitalanoataka na Marika 2:1–12. (Raica talega na vidio “Jesus Forgives Sins and Heals a Man Stricken with Palsy” ena ChurchofJesusChrist.org.) E rawa vakacava ni da vakataki ira na itokani ni tamata ka sega ni lako rawa? O cei e a mataqali itokani vakaoya vei keitou?

Marika 4:35–41.Ena rawa beka ni vukei ira na lewe ni vuvale na itukutuku oqo ena gauna era rere kina? E vinaka beka me ra wilika na tikina 39 ka wasea na vei ka era sotava ena gauna e vukei ira kina na iVakabula me ra vakila na vakacegu.

Era na marautaka beka na gone me ra dramataka ni ra tiko ena dua na waqa ena wasawasa ka qai dua me wilika tiko na Marika 4:35–38. Oti, me ra qai dramataka ni ra tiko ena dua na waqa ena dua na wasawasa maravu ni dua e wilika tiko na tikina e 39. E rawa talega mo ni lagata vata e dua na sere me baleta na kune vakacegu vua na iVakabula, me vaka na “Jisu Sa Laba na Cagi” (Serenilotu, naba 57). Na malanivosa cava soti ena sere e vakavulica vei keda me baleta na vakacegu e solia o Jisu?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Serenilotu vakaturi: “Jisu sa Laba Na Cagi,” Serenilotu, naba 57.

Vakatoroicaketaki ni Noda Veivakavulici

Mo qai vakarawarawataka na nomu rawa ni tarai yani ena initaneti. Eso na gauna uasivi ni veivakatavulici e tekivu vaka taro se kauwai eso ena lomadra na lewe ni matavuvale. Raica me ra kila na lewe ni nomu matavuvale ni ko vinakata mo rogoci ira mai na nomu vosa kei na ivalavala. (Raica na Veivakavulici ena iVakarau ni iVakabula, 16.)

O Jisu kei na tamata tauvimate ena idavodavo a tukuci sobu mai dela ni vale

Na Karisito kei na Tamata Paralase, mai vei J. Kirk Richards