“Tijem̧ba 30–Jānwōde 5. Kadkadin peij ko ilo Bok in Mormon: ‘Bar juon Kallim̧ur kōn Jisōs Kraist,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Tijem̧ba 30–Jānwōde 5. Kadkadin peij ko ilo Bok in Mormon,” Itok, Ļoor Eō—N̄an Kajjojo Armej im Baam̧le ko: Bok in Mormon 2020
Tijem̧ba 30–Jānwōde 5
Kadkadin peij ko ilo Bok in Mormon
“Bar juon Kallim̧ur kōn Jisōs Kraist”
Am̧ ekkatak kōn Bok in Mormon emaron̄ in em̧m̧anļo̧k eļān̄n̄e kwoj jino riiti peij ko me rej waļo̧k 1 Nipai. Ta eo kwoj loe ke ekōkajoorļo̧k naan in kam̧ool eo am̧?
Je En̄jake ko Rej Im̧we Eok
Mokta jān am̧ etal n̄an 1 Nipai jebta 1, eallikar bwe Bok in Mormon ejjab baj āinwōt bok ko jet. Ej kwaļo̧k kadkadin peij ko kōn juon bwebwenato ejjab āinwōt ko jet—ekoba loļo̧k ko an enjeļ ro, juon ļook in etto eo kar kalbwini bukwi iiō ilo juon to̧ļ, im juon rikallib eaar ukote ļook eo kōn kajoor eo an Anij. Bok in Mormon ejjab baj juon bwebwenato in armej ro etto ilo Amedka. Epād ie “tarlep in gospel eo indeeo” (kadkadin Bok in Mormon), im Anij Make eaar peek an itok—elmen an kar jeje, elmen kar kōjparoke, im elmen an kar kōm̧m̧an bwe en waļo̧k ilo raan kein ad. Iiō in, ilo am̧ ekkatak jān Bok in Mormon, jar kake, im bōk katak ko ie, kwonaaj bōk kajoor n̄an mour eo am̧, im kwonaaj maron̄ in ba, āinwōt Rikam̧ool ro Jilu rekar kōm̧m̧ane ilo naan in kam̧ool, eo aer, “Eaar kabwilōn̄lōn̄ ilo [meja].”
Ļōmņak ko n̄an Am̧ Katak Jeje ko Rekwojarjar Ippem Make
Bok in Mormon eo emaron̄ kōkajoorļo̧k aō tōmak ilo Jisōs Kraist.
Taitōl peij in Bok in Mormon eo ej letok eļapļo̧k jān baj juon taitōļ. Ilubwiljin men ko jet, ej kōlaajraki jet jibadbad ko kōn ļook in ekwojarjar. Pukot jibadbad kein, innām ilo am̧ ekkatak jān Bok in Mormon eo iiō in, kōkkaļļāik jibadbad ko me kwoj en̄jake ke rej kōttōbrak jibadbad kein. N̄an waanjon̄ok, naan ta ko rej im̧we eok “bwe Jisōs ej RiKraist eo, eo ej Anij Indeeo”?
Bok in Mormon “kōlaajrak eo an karōk in lo̧mo̧o̧r eo.”
Karōk in lo̧mo̧o̧r eo ej karōk eo an Jemedwōj Ilan̄ n̄an jipan̄ ro Nejin im̧we kōn kajoor, āinwōt E ej, im en̄jake m̧ōņōņō eo Ej en̄jake (lale 2 Nipai 2:25–26). Pinmuur eo an Jisōs Kraist ej kōm̧m̧an bwe karōk in en tōprak, im aolep katak, kain̄i, bujen, im kien me Anij eaar letok rej wōr tokjāer n̄an jipan̄ kōttōbrak karōk in.
Eļan̄n̄e kokōņaan meļeļe kōn karōk in lo̧mo̧o̧r eo, ejjeļo̧k bok em̧m̧anļo̧k n̄an riiti jān Bok in Mormon eo. Ej iokļo̧k karōk an Anij—ej kōjerbal elōn̄ āt ko—elōn̄ļo̧k jāņ 20 alen. Ilo am̧ ekkatak iiō in, lale bwe n̄e karōk eo an Anij rej ba kake ak kar kōmeļeļeik jidik im ta eo Bok in Mormon ej kōnnaan kake.
En̄in ej juon m̧akūtkūt n̄an am̧ jinoe. Riiti ennaan kein ilaļ, im kōlaajraki āt ko roktak kar litoki kōn karōk eo an Anij: 2 Nipai 9:13; 11:5; im Alma 12:32–34; 24:14; 41:2; 42:15–16. Ta āt kein kajjojo rej kwaļo̧k n̄an eok kōn karōk eo an Anij?
“Naan in Kam̧ool eo an Rikam̧ool ro Jilu”; “Naan in Kam̧ool eo an Rikam̧ool ro Ruwalitōk”
Imaron̄ in juon rikam̧ool kōn Bok in Mormon.
Jetōb Kwojarjar emaron̄ kam̧ool n̄an eok bwe Bok in Mormon ej m̧ool, men̄e kwojjan̄in kar lo pileij ko āinwōt kar Rikam̧ool ro Jilu im Rikam̧ool ro Ralitōk. Elmen an naan in kam̧ool ko aer kōkajoorļo̧k eo am̧? Elmen an Bok in Mormon “kwaļo̧k [etam̧] n̄an laļ in, n̄an kam̧ool n̄an laļ in” ta eo kwojeļā kōn Bok in Mormon eo? (“Naan in Kam̧ool eo an Rikam̧ool ro Ruwalitōk”).
“Naan in Kam̧ool eo an Rikanaan Josep Smith”
Itok eo an Bok in Mormon eo eaar kabwilōn̄lōn̄.
Eļan̄n̄e jabdewōt ej kajjitōk ippem ia eo Bok in Mormon eo eaar itok jene, ta eo kwonaaj kar ba? Elmen am̧ naaj kar kōmeļeļeik an pein Irooj boktok Bok in Mormon eo? Elmen an kar Josep Smith kōmeļeļeik itok eo an Bok in Mormon?
“Naan in Kam̧ool eo an Rikanaan Josep Smith”
Elmen an kar Bok in Mormon eo ukook?
Bok in Mormon eo eaar ukook “kōn kajoor eo an Anij.” Jejjab jeļā jabdewōt kōmeļeļe ko kōn kabwilōn̄lōn̄ in jerbal in ukook eo, ak jej jeļā bwe Josep Smith eaar juon rilolo, kein jerbal eo me Anij eaar kōpooje: ruo dōkā ko kar ņaetan Urim im Thummim im bar jet dōkā kar ņaetan dōkā in elolo. Josep eaar lo ilo dōkā kein ukook ko an kajin Pālle kōn jeje ko ioon pileij ko, im eaar kōļaaj an riiti ukook eo ilo an rijeje eo jei. Kajjjojo rijeje ro an Josep raar kam̧ool bwe kajoor in Anij eaar waļo̧k ilo ukook eo an jerbal in ekwojarjar.
Lale “Book of Mormon Translation” (Gospel Topics, topics.ChurchofJesusChrist.org).
Ļōmņak ko n̄an Katak Jeje ko Rekwojarjar an Baam̧le im Nokon in Jota an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb eo emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.
Taitōļ peij in Bok in Mormon eo
Bōlen baam̧le eo am̧ remaron̄ jino juon laajrak in eoon ko jān Bok in Mormon eo me eaar kōļapļo̧k ami tōmak “bwe Jisōs ej RiKraist eo” im kobaiki ilo aolepān iiō eo. Men in emaron̄ bar juon iien em̧m̧an n̄an ejaake juon karōk an baam̧le eo n̄an riiti Bok in Mormon eo: N̄āāt im ia kom̧ naaj ippān doon n̄an riit? Elmen an kajjojo ro uwaan baam̧le eo bōk kuņaer? N̄an jipan̄ ko jet, lale “Ļōmņak ko n̄an Kōkm̧anm̧anļo̧k an Baam̧le eo Am̧ Katak Jeje ko Rekwojarjar” ilo jinoin bok in jipan̄ in.
Kadkadin Bok in Mormon eo
Juon dōkā in jeban ej juon dōkā ilo io̧lepān juon jimeen me ej dāpij dōkā ko jet ippān doon. N̄an jipan̄ baam̧le eo am̧ meļeļe elmen an Bok in Mormon eo “dekā in jabōn em̧ eo an Kabun̄ in ad,” komaron̄ kalōke ak jin̄aik juon jimeen kōn juon dōkā in jeban em̧ ilo lōn̄. Ta eo ej waļo̧k eļan̄n̄e dōkā in jeban em̧ in ej em̧m̧akūt? Ta en kar waļo̧k eļan̄n̄e eban kar wōr ippād Bok in Mormon eo? Elmen ad maron̄ kōm̧m̧an bwe Bok in Mormon eo en dōkā in jeban em̧ in ad tōmak ilo Jisōs Kraist?
Bok in Mormon eo ej dōkā in jabōn em̧ eo an Kabun̄ in ad.
“Naan in Kam̧ool eo an Rikam̧ool ro Jilu”; “Naan in Kam̧ool ko an Rikam̧ool ro Ruwalitōk”
Baam̧le eo am̧ remaron̄ je naan in kam̧ool eo aer make kōn Bok in Mormon, je etaer, im ļōmņak kōn wāween ko n̄an kwaļo̧k naan in kam̧ool ko aer ippān ro jet.
“Naan in Kam̧ool eo an Rikanaan Josep Smith”
Ilo Bwebwenato eo an Josep, ta kam̧ool eo jej loe bwe Anij ekar bōk kūņaan ilo itok eo an Bok in Mormon eo?
N̄an eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Am̧ Make Ekkatak
Juon kallim̧ur in kanaan. Būreejtōn Russell M. Nelson eaar ba, “Ij kallim̧ur bwe ilo am̧ kōļmenļo̧kjeņ kōn ta eo kwar riiti [ilo Bok in Mormon eo], wūntō ko an lan̄ renaaj peļļo̧k, im kwonaaj bōk uwaak ko n̄an kajjitōk ko am̧ make n̄an tōl mour eo am̧ make” (“Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?” Ensign ak Liaona, Nob. 2017, 62–63).
Moronai Liļo̧k Pileij Gold ko, jān Gary L. Kapp