Naan in Kam̧ool eo an Rikanaan Josep Smith

Naan ko an Rikanaan Josep Smith make rej kwaļo̧k kōn waļo̧k tok eo an Bok in Mormon rej:

“Ilo jo̧tiinin … ron̄ouljuon raan in Jebtōm̧ba [1823] … Iaar jino jar im owar n̄an Anij Ekajoor Bōtata. …

“Ilo iien eo ke iaar kūr n̄an Anij, iaar lo juon meram ej waļo̧k ilo ruum̧ eo aō, eo eaar ļapļo̧k wōt m̧ae iien eo ruum̧ eo eaar meramļo̧k jān raan ilo ioļapļap in raelep, ke eidin̄ an juon armej waļo̧k iturin jikin babu eo aō, ej jutak imejatoto, bwe neen ļein eaar jab un̄ūr laļ.

“Eaar kōņak juon liboror ebbooļoļ elukkuun mouj. Eļapļo̧k an mouj jān mouj otemjej iaar lo ioon laļ in; ibarāinwōt jab tōmak bwe ejjeļo̧k jabdewōt ioon laļ maron̄ kōm̧m̧an bwe en jon̄an wōt mouj im errabōlbōl in. Lo̧piden pā ko pein raar keelwaan, barāinwōt itulōn̄ in kwōleleen pein; āindein, barāinwōt, ne ko neen raar keelwaan, barāinwōt tulōn̄ in ne ko neen, ilōn̄ in wōt kwōleleen ne ko neen. Bōran im kōnwaan raar barāinwōt jab libobo. Iaar lo bwe eaar bar ejjeļo̧k ballin ijello̧kun wōt liboror in, bwe eaar peļļo̧k, bwe in maron̄ lo ubōn.

“Ejjab liboror eo an wōt eaar lukkuun mouj, ak aolepān armej in eaar lukkuun aiboojojļo̧k jān maron̄ kōmmeļeļeiki, im turin mejān ejejir jān jarom. Ruum̧ eo eaar meram otem meram, ak eaar jab lukkuun meram in wōt peļaakin armej in. Ke iaar jino kalimjeke, iaar mijak; ak mijak ejjab to eaar ilo̧k jān eō.

“Eaar kūr eō kōn eta, im eaar jiron̄ eō bwe eaar juon ribōk naan jilkintok jān im̧aan mejān Anij n̄an eō, im bwe etan ej Moronai; bwe Anij eaar wōr juon jerbal n̄an eō bwe in kōm̧m̧ane; im bwe eta eaikuj jim̧or nebar im matōrtōr ilubwiljin aolep laļ ko, bwij ko, lo ko, ak bwe eaikuj in naaj mennin kōnono jim̧or ilo nebar im matōrtōr ilubwiljin armej otemjej.

“Eaar ba ewōr juon bok kar kalbwini, kar je ioon pileij gold ko, ej kwaļo̧k bwebwenato in ro raar pād m̧okta ilo aelōn̄ jab in, im ej unjān ijo raar jebar jān e. Eaar barāinwōt ba bwe tarlep in Gospel eo ejjeļo̧k jem̧ļo̧kin eaar pād ie, āinwōt Rilo̧mo̧o̧r eaar leļo̧k n̄an ro raar jokwe ijin etto;

“Barāinwōt, bwe eaar wōr ruo dekā ko ilo jet silver bow ko kōm̧m̧an jān silver—im dekā kein, rej ekkejel n̄an juon dipil, ilo likiio etaer Urim im Tumim—kar likūti ippān pileij ko; im bōk im kōjerbali dekā kein etan ‘rilolo’ ro ilo etto ak iien ko m̧okta; im bwe Anij eaar kōpooji n̄an ukōte bok eo. …

“Bar juon alen, eaar jiron̄ eō, bwe n̄e ij bōk pileij ko eaar kōnono kaki—bwe iien eo naaj būki ejjan̄in kar jejjet—ij jab aikuj naaj kwaļo̧ki n̄an jabdewōt armej; barāinwōt dipil eo ippān Urim im Tumim eo; n̄an wōt ro jiron̄ eō bwe in aikuj kwaļo̧k n̄an er; eļan̄n̄e inaaj kōm̧m̧ane naaj aikuj ko̧kkure eō. Ke eaar bwebwenato ippa kōn pileij ko, visōn eo eaar peļļo̧k n̄an koļmānļo̧kijeņ eo aō bwe in maron̄ lo jikin eo pileij ko kar likūti ie, im bwe eaar lukkuun alikkar ilo ejjeļo̧k tinaad bwe iaar jeļā kajjien ijo ke iaar bar ilo̧k n̄an e.

“Ālikin kōnono in, iaar lo meram eo ilo ruum̧ eo eaar jidimkij an jino kukļo̧k ipeļaakin ānbwinnin armej eo eaar kōnono n̄an eō, im eaar wōnm̧aanļo̧k ilo wāween in m̧ae iien ruum̧ eo eaar bar juon alen bar marok, ijello̧kun wōt ipeļaakin; ke, eaar m̧ōkaj aō kar lo, āinwōt an kar waļo̧k, juon peļļo̧kļo̧k n̄an lan̄, im eaar wanlōn̄ļo̧k m̧ae iien eo aolepān eaar makunļo̧k, im ruum̧ eo eaar bar ro̧o̧l n̄an m̧okta jān an kar meram in lan̄ in waļo̧k tok.

“Iaar babu im koļmānļo̧kijeņ kōn wāween in ejej uwaan, im bwilōn̄ eļap kōn ta eo kar jiron̄ eō jān rilotok eo āinjuon; ke, ioļapān ememļo̧kjeņ in aō, ejidimkij iaar bar lo bwe ruum̧ eo aō eaar bar jino meram, im em̧ōkaj, āinwōt m̧okta, ejja rilotok in jān lan̄ eaar pād iturin jikin kiki eo aō.

“Eaar jino, im bar kwaļo̧k ejja men ko wōt eaar ba ilo lotok eo an kein kajuon, ilo ejjeļo̧k irļo̧k; ke ej dedeļo̧k, eaar karon̄ eō kōn kaje ko reļļap ko renaaj kar itok ioon laļ, kōn jorrāān ko reļļap kōn n̄ūta, jāje, im nan̄inmej; im bwe kaje kein renana ren kar itok ioon laļ ilo epepen in. Ālikin an kar ba men kein, eaar bar juon alen weaaklōn̄ļo̧k āinwōt an kar kōm̧m̧an m̧okta.

“Ilo iien in, eaar m̧wilaļ kejakļo̧kjeņ ko likūt ilo koļmānļo̧kijeņ eo aō, bwe mejki eaar ilo̧k jān meja, im iaar babu ilo ememļo̧kjeņ im bwilōn̄ kōn ta eo iaar jim̧or lo im ron̄. Ak iaar bar ilbōk ke iaar lo ejja rilotok in wōt iturin jikin kiki eo aō, im kar ron̄ eaar ba ak bar kōnono n̄an n̄a ejja men ko eaar ba m̧okta; im kobaik ippān men kein juon naan in kakkōl n̄an eō, jiron̄ eō bwe Setan enaaj kajjion̄ kapo eō (ilo waļo̧kin ļamļamin an baam̧le eo an jema jeram̧ōl), n̄an bōk pileij ko kōn jibadbad eo n̄an m̧weie. Men in eaar kapo eō, im ba ej aikuj ejjeļo̧k aō bar kōttōpar kōn pileij ko ijello̧kun wōt n̄an kaiboojoj Anij, im iaikuj jab oktak kōn jabdewōt jibadek ijello̧kun wōt kalōk aelōn̄ eo an; ijello̧kun men in iban maron̄ būki.

“Ālikin lotok in kein kajilu, eaar bar weaaklōn̄ļo̧k ilo lan̄ āinwōt m̧okta, im iaar bar make iaō n̄an kejakļo̧kjeņ kōn oktak eo an ta eo ej kab m̧ōj aō iioone; ejjab etto ālikin wōt an armej in lan̄ in weaaklōn̄ļo̧k jān eō alen kein kajilu, eaar kūr kako, im iaar lo bwe raan eaar epaak an jededļo̧k, āindein bwe bwebwenato ko amro remaron̄ kar bōk aolepān bon̄ōn eo.

“Ejjab etto ālikin aō kar jerkak jān jikin babu eo aō, im, āinwōt iien ko jet, kar ilo̧k n̄an jerbal ko an raan eo; ak, ilo kajjion̄ jerbal āinwōt iien ko jet, iaar lo bwe kajoor eo aō eaar maat jon̄an iaar kanooj m̧ōjņo̧. Jema, eo eaar jerbal ippa, eaar lo bwe ewōr juon men eaar jab em̧m̧an ippa, im eaar jiron̄ eō bwe in ro̧o̧l n̄an m̧weo im̧ōm. Iaar jino kōn ļōmņak eo bwe in ilo̧k n̄an m̧weo; ak, ke iaar jino kijoone wōrwōr eo bwe in ilo̧k jān meļaaj eo kōm ar pād ie, kajoor eo aō eaar lukkuun jako jān eō, im iaar wōtlo̧k ioon laļ, im ium̧win jidik iien iaar jab kile jabdewōt.

“Men eo m̧oktata iaar maron̄ keememeje eaar juon ainikien eaar kōnono n̄an eō, im kūr eō kōn eta. Iaar reilōn̄ļo̧k, im lo ejja rilotok eo wōt ej jutak ioon bōra, peļaakin eobrak kōn meram āinwōt m̧okta. Innām eaar bar kwaļo̧k n̄an eō aolep men ko eaar kwaļo̧ki ilo bon̄ōn eo ej jem̧ļo̧kļo̧k, im jiron̄ eō bwe in etal n̄an jema im ba n̄an e kōn visōn eo im kakien ko iaar būki.

“Iaar pokake e; iaar ro̧o̧lļo̧k n̄an jema ilo meļaaj eo, im kwaļo̧k n̄an e aolepān men in. Eaar uwaak e eō bwe men in eaar jān Anij, im jiron̄ eō bwe in ilo̧k im kōm̧m̧an āinwōt rilotok eo eaar jiron̄ eō. Iaar ilo̧k jān meļaaj eo, im ilo̧k n̄an jikin eo rilotok eo e eaar ba n̄an eō ke kar likūt pileij ko ie; im jān wōt alikkar eo ilo visōn eo iaar loe, iaar jeļā kajjien ijo iien eo wōt im iaar tōpare.

“Iturin jikin kwelo̧k in edik Manchester, Ontario kounty, New York, ej jutak juon bat ebwe dettan, im eutiejtata iaan bat ko ijin. Iturilikin bat in, ejjab ettoļo̧k jān ioon, ium̧win juon dekā ebwe an ļap, pileij ko rej babu, kar likūti ilo juon bo̧o̧k dekā. Dekā in emijel im doululļo̧k ioļapļap in ijo itulōn̄, im māniļo̧k n̄an tōrerein, kōn menin tueoļapļap in eaar alikkar ioon bwidej, ak aolepān peļaakin tōrerein eaar libobo kōn bwidej.

“Ālikin kar joļo̧k bwidej jān e, iaar bōk juon kein lakiluluiki, eo iaar likūt ium̧win tōrerein dekā eo, im kōn jidik kijejeto iaar lōn̄aje lōn̄ļo̧k. Iaar reilo̧k ilowaan, im em̧ool iaar lo pileij ko, Urim im Tumim eo, im dipil eo, āinwōt an kar rilotok eo ba. Bo̧o̧k eo im raar babu ilowaan eaar ejaake jān kōbabuik dekā ko ippān doon kōn juon jimāāņ. Itulaļin bo̧o̧k eo eaar babu ruo dekā rej ettōr jān kein m̧aan bo̧o̧k eo jān turājet n̄an ijo iturājet, im ioon dekā kein eaar babu pileij ko im bar jet men ippāer.

“Iaar kajjion̄ kotaki im kadiwōjitok, ak rilotok eo eaar kōmo̧iki, im kar bar jiron̄ eō bwe iien eo n̄an kwaļo̧ki ejjan̄in jejjet, barāinwōt bwe eban jejjet, m̧ae emān iiō jān iien in; ak eaar jiron̄ eō bwe ij aikuj itok n̄an ijin jejjet in juon iiō ālikin iien in, im bwe enaaj pād ijin n̄an iioone eō, im bwe ij aikuj wōnm̧aanļo̧k im kōm̧m̧ane wāween in m̧ae iien eo enaaj jejjet n̄an būki pileij ko.

“Āindein, āinwōt kar jiron̄ eō, iaar ilo̧k jem̧ļo̧kin kajjojo iiō, im ilo kajjojo iien kein iaar lo ejja rilotok in wōt ijo, im bōk naan in tōl im jeļāļo̧kjeņ jān e ilo kajjojo iien bwebwenato ko amro, kautiej wōt ta eo Irooj en kar kōm̧m̧ane, im ekōjkan im ilo wāween ta naaj kar kajeikik aelōn̄ eo an ilo raan ko āliktata. …

“Āliktata iien eo eaar jejjet n̄an būki pileij ko, Urim im Tumim eo, im dipil eo. Ilo ron̄oulruo raan in Jebtōm̧ba, juon to̧ujin ruwalitōkbukwi im ron̄ouljiljilimjuon, ālikin ilo̧k āinwōt iien ko m̧okta kajjojo jem̧ļo̧kin juon iiō n̄an ijo kar likūti ie, ejja rilotok in wōt jān lan̄ litok n̄an peiū kōn kakkōl in: bwe ij aikuj bōk eddoier; bwe eļan̄n̄e inaaj kōtļo̧ki ilo ejjeļo̧k erki, ak kōn aō jerwaan, naaj bukweļo̧k eō; a bwe eļan̄n̄e inaaj kōjerbal jabdewōt aō maron̄ n̄an kōjparoki, m̧ae iien e, rilotok eo, enaaj kūr n̄ani, rej aikuj tiljek aer pād.

“Ejjab etto iaar jeļā un eo etke iaar bōk kakkōl in epen n̄an oņaaki, im etke rilotok in eaar ba bwe n̄e inaaj kōm̧m̧ane ta eo aikuji ilo peiū, enaaj kūr n̄an eō. Bwe ejjab to jān ke naan eo ajeeded ke repād ippa, kijejeto ko reļļaptata kar kōjerbali n̄an būki jān eō. Jabdewōt kōttōbalbal kar maron̄ ļōmņake ekar n̄an jibadbad in. Matōrtōr eo eaar meo̧ļo̧k im kajoorļo̧k jān m̧okta, im jarlepju ko raar jab jem̧ļo̧k kairuj er n̄an būki jān eō n̄e remaron̄. Ak kōn jeļāļo̧kjeņ an Anij, raar pād wōt ilo oņaake eo ilo peiū, m̧ae iien eo iaar kōtōprake kaki ta eo kar aikuji jān peiū. Ke, ekkar n̄an karōk ko, rilotok eo eaar bar kūr n̄an eō, iaar liļo̧k n̄an e; im repād ippān ilo kōjparok eo an n̄an rainin, ej ruo raan in Māe, juon to̧ujin ruwalitōkbukwi im jiln̄uulruwalitōk.”

N̄an tarlep in ļo̧o̧k in, lale Josep Smith—Bwebwenato ilo Bōōr Eo Eļap Wōņāān.

Ļo̧o̧k in etto in āindein kar kūbwijtok jān bwidej āinwōt ainikien juon armej ej kōnono jān bwidej, im ukōte ilo kajin ko rainin kōn mennin letok eo im kajoor an Anij āinwōt kam̧ool kake kōn kabab-laļ eo jān Lan̄, kar je n̄an laļ in ilo kajin In̄lij ilo iiō eo 1830 āinwōt The Book of Mormon.