Abentekiti A

Ibukiia Kaaro—Katauraoaia Ami Ataei nakon Maiuakinan ana Kawai ni Berita te Atua

Bukina bwa E tangiriko, E onimakiniko, ao E atai am konabwai, e a tia n anganiko Tamam are i Karawa am tai ni buokiia am ataei bwa a na maiu ao n rikirake i nanon kawain Ana berita ae tabu, te kawai nakon te maiu ae akea tokina (taraa Reirei ao Berita aika Tabu 68:25–28). Raon aei bon buokaia ni katauraoia ni karaoi ao ni kawakin berita aika tabu, n aron te berita ae tabu n te bwabetito ao berita aika karaoaki i nanon te tembora. Rinanon berita aika tabu aikai, am ataei a na kona ni kukurei ni kabaeiia nakon aia Tia Kamaiu, Iesu Kristo.

A mwaiti kawai aika ko kona ni buokiia am ataei iai ni katauraoia ibukin te kawai aei i aon kawain te berita, ao Tamam are i Karawa e na buokiko ni kakaea te kabanea n tamaroa ni kawai ae na buokiia. I nanon am tai ni ukora ana kairiiri te tamnei, e riai bwa ko na ataia bwa e aki ti reke te atatai man taian reirei ake a katauraoaki. Ni bon koauana, ao te bwai ae karika te reirei n rangi ni korakora i nanon te mweenga bon man te banna ni katooto ake a reke i nanon taai n reirei aika kimototo, ao man beebete aroia—kaanga te aekaki are e riki bwa bon anuara ni katoa bong. Ai aekan toauan kawain te berita ae tabu bon te kawai ae tangira te botumwaaka, i nanon am tai ni maiu, bon ti tebo naba ma reiakinan kawain te berita ae tabu. (Taraa “Home and Family,” Reirei n Ana Kawai te Tia Kamaiu [2022], 30–31.)

Aika i nano bon tabeua iango aika a na kona ni kaira aia iango nakon kairiiri mai ieta. Ko kona ni karekei iango riki tabeua ibukin reiakinaia ataein-te moanrinan i nanon “Abentekiti B: Ibukin te Moanrinan—Katauraoaia Ataei nakon Maiuakinan ana Kawai ni Berita te Atua.”

Bwabetito ao te Kamatoa

E anga te reirei Nibwaai bwa “te mataroa are [ti] na rin iai” ni kawain te berita ae tabu “bon te rairannano ma te bwabetito i nanon te ran” (2 Nibwaai 31:17). Am mwakuri ni buokiia am ataei ni katauraoia ibukin te bwabetito ao te kamatoa e kona ni kakorakoraia i nanon touan te kawai anne. Mwakuri aikai e moanaki man te reirei i aon taekan te onimaki iroun Iesu Kristo ao te rairannano. N ikotaki ma te reirei i aon arora ni kaboui ara berita n ara bwabetito man kanakin te toa ni katoa wiiki.

E anga te reirei Nibwaai bwa “te mataroa are [ti] na rin iai” ni kawain te berita ae tabu “bon te rairannano ma te bwabetito i nanon te ran” (2 Nibwaai 31:17).

Aikai bwaai n ibuobuoki riki tabeua aika a kona ni buokiko: 2 Nibwaai 31; te rongorongo ae onoti n te Rao maekatiin i aon te bwabetito; Topics and Questions, “Baptism,” Gospel Library.

• Ngkana iai bwaai aika ko a tia n rinanona aika a tia ni kakorakoraa am onimaki iroun Tamam are i Karawa ao Iesu Kristo, tibwauaia ma am ataei. Buokiia ni kaotaia bwa te onimaki bon te bwai ae kona n rikirake ni korakora ao ni korakora riki i nanon te maiu. Tera tabeua bwaai aika a kona am ataei ni karaoi ni karikirakea aia onimaki ma ni korakora iroun Kristo i mwain ae a bwabetitoaki?

• Ngkana e karaoi rinerine am ataei aika bure, taetae ma ngaia rinanon kukureim i aon taekan te bwaintangira n te rairannano. Ao ngkana ko karaoa te rinerine ae bure, tibwaua te kimwareirei are reke ngke ko raira nanom. Kaotia bwa e bon koaua ae e a tia ni korakai ao ni mate Iesu Kristo ibukin ara bure, ti kona ni rairi nanora ni katoa bong, ni kabwaraaki ara bure, ao ni karekea te mwaaka ni bitaki. Ngkana e ukoukora kabwaraan ana bure am ataei, kabwara raoi ma te kukurei ae bati.

• Tuanga am ataei rongorongon am bwabetitio. Kaoti tamnei ao tibwauai am ururing. Taekina aron am namakin, e kanga kawakinan am berita ake ko karaoi inanon am bwabetito n tia ni buokiko n ataa raoi Iesu Kristo, ao e kanga am berita n teimatoa ni uota te kakabwaia i nanon maium. Kaunga am ataei bwa e na titiraki.

• Ngkana iai te bwabetito n am utu ke n am uoote, kaira am ataei bwa e na noria. Maoroakinna ma ngaia aron te bwai ae kam noria ao n namakinna. Ngkana e riai, taetae nakon te aomata are e bwabetitoaki ao titirakinna titiraki n aron aikai: “Ko kanga n rineia bwa ko na karaoa te babaire aei? Ko kanga ni katauraoiko?”

• Ngkana ko nooriia am ataei ni karaoa te bwai are a tia ni berita bwa a na karaoia, kaota am tangira nakoina. Taekinna nakoina ae kawakinan motinnano e buokiira ni katauraoira ni kawakin ara berita aika ti karaoi ngke ti bwabetitoaki. Tera ara berita ae ti karaoia nakon te Atua ngke ti bwabetitoaki? Tera ae E berita iai nakoira? (Taraa Motiaea 18:8–10, 13.)

• Maroroakinna bwa e kanga kamatoaam ao te riki bwa kaain Ana Ekaretia Iesu Kristo ibukiia Aika Itiaki ni Boong aika Kaitira n tia ni kakabwaiako. Te katooto, ko kanga ni kaaniaki riki ma Tamam are i Karawa ao Iesu Kristo ngke ko a tia ni beku ibukiia tabeman ao tabeman a tia ni beku ibukim? Buoka am ataei n iangoi aanga aika e na kona ni beku ao ni kakorakoraia iai tabeman ngkai ngaia kaain te Ekaretia. Buokiia naba n rinanon ao n ataa te kimwareirei ae e reke man te mwakuri n ibuobuoki.

• Ngkana iai te bwai ae kakawaki ao n tabu ae kam a tia ni kaai n rinanona ngkoe ma am ataei (n tain te taromauri, ke i nanon ami tai ni wareki booki aika tabu, ke man buokan temanna), tuangngia aron am namakin n tamnei ke namakin ake ko karekei. Kaoiia am ataei bwa a na tibwaua aia namakin. Tarai kawai aika kakaokoro ae kona n taetae iai te Tamnei nakoia aomata, n raonaki ma kawai ae E taetae raoi iai ma ngkoe. Buoka am ataei n uring ao n tibwaia ma ngkoe taai ake a namakina iai ana wirikiriki te Tamnei ae Raoiroi.

• Kaai ni matakuakin tabeua tamnei n te witeo inanon te Gospel Library ae atuunaki “Hear Him!” Uaia ni marooro i aon aia kawai ana toro te Uea aika kakaokoro n ongora Bwanaana. Kaoiia am ataei bwa a na korea te tamnei ke ni karaoa te witeo i aon aroia bwa a kanga n ongo bwanaan te Tia Kamaiu.

• Karaoa te toa bwa te tai ae tabu ao ni kakukurei i nanon am utu. Tibwaia ma ataei bwa ko kanga ni kabotoa am iango i aon Iesu Kristo n tain te toa. Buokiia am ataei ni karaoi babaire ni kaotia bwa te toa e rangi n tabu irouia. Te katooto, ongoraeakinan taekan tataron te toa e kona ni kauringiira ara berita man ara bwabetito.

• A mwaiti man te beeba ni kaongora n te Rao maekatiin ae iai i nanona rongorongo, karaki, ao waaki ni kakukurei aika e na buokiia ataei ni katauraoiia ibukin te bwabetito ao te kamatoa. Angan am ataei aia tai bwa a na wareki tabeua ni kukurei iai ma ngkoe. (Taraa naba “Preparing for Baptism” n aia mwakoro ataei n te Gospel Library.)

Mwaakan te Nakoanibonga, Kariaiakaki ao Kiing

Te nakoanibonga bon te kariaiakaki ao mwaakan te Atua are ngaia ae E kakabwaiaiia iai Natina. Ana nakoanibonga te Atua e mena i aon te aba n te bong aei i nanon Ana Ekaretia Iesu Kristo ibukiia Aika Itiaki ni Boong aika Kaitira. “Ni kabane kaain te Ekaretia ake a kawakin aia berita—aine, mwaane, ao ataei—a kakabwaiaaki ma mwaakan ana nakoanibonga te Atua i nanon mweengaia ni kakorakoraia i bon irouia ao aia utu” (Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong aika Kaitira, 3.6, Gospel Library). Te mwaaka aei e na buokiia membwa ni karaoan ana mwakuri te Atua ni kamaiu ao n te karietataaki ni bon oin maiuia ao aia utu (taraaAeniboki ni Kabuta, 2.2).

Ngkana mwaane ao aine a karaoi tibwangaia inanon te Ekaretia, a karaoia man ana kariaia te nakoanibonga, iaan aia kaetieti ake iai irouia kiingin te nakoanibonga. Natin Tamara are i Karawa ni kabane—Natina mwaane ao Natina aine—a na kakabwaiaaki i nanon rikiraken ataakin te nakoanibonga.

Ti karekei otenanti man ana kariaia te nakoanibonga. “Mwaane aika tau ake kaain te Ekaretia a karekea te kariaiakaki n te nakoanibonga rinanon anganakiia te nakoanibonga ao te katabu nakon aobitin te nakoanibonga” (Aeniboki ni Kabuta, 3.4). Naake a taua aobitin te nakoanibonga a kona ni kariaiakaki iroun temanna are e taua kingin te nakoanibonga ni karaoi otenanti n te nakoanibonga.

N reiakina riki taekan te nakoanibonga, taraa Russell M. Nelson, “Kakabwaia n Tamnei,” Riaona, Nobembwa 2019, 76–79; Russell M. Nelson, “The Price of Priesthood Power,” Riaona, Meei 2016, 66–69; “Tuua n te Nakoanibonga,” mwakoro 3 n te Aeniboki ni Kabuta.

• Karaoi otenanti n te nakoanibonga bwa teuana mwakoron maiun am utu ae ko na kateimatoa. Te katooto, buoka am ataei ni katauraoia n tamneina ibukin te toa ni katoa wiiki. Kaungaiia am ataei bwa a na ukoukori kakabwaia n te nakoanibonga ngkana a aoraki ke a kainnanoa te rau ke tao kairakiia. Karaoia bwa anuam n atai kawai ae kakabwaia iai am utu te Uea rinanon mwaakan te nakoanibonga.

• Ngkana kam kaai ni wareki booki aika tabu, tarai aanga ake e na reke iai maroroakinan aron te Atua ni kakabwaiaia aomata rinanon Mwaakana. Tibwauai am taneiai ngke e a tia te Atua ni kakabwaiako rinanon Ana nakoanibonga. Ibukin katooto n taian kakabwaia aika ti karekei mairoun te Atua rinanon te nakoanibonga, taraa Aeniboki ni Kabuta, 3.2, 3.5.

• Reireiniia am ataei bwa i mwiin te bwabetito, a kona ni karekea mwaakan te nakoanibonga man kawakinan te berita n te bwabetito. Kaai n rinanon ana rongorongo Beretitenti Russell M. Nelson “Spiritual Treasures” (Riaona, Nob. 2019, 76–79). Tuanga am ataei bwa a kanga otenanti n te nakoanibonga ni uota mwaakan te Atua nakon maium. Ibukin ataakin aanga tabeua aika ti kakabwaiaaki iai man ni mwaakan te nakoanibonga, ao taraa Aeniboki ni Kabuta, 3.5.

• Maroroakina te titiraki “E kanga aron taraakin ana toro te Uea?” Bootaki ni wareka Reirei ao Berita aika Tabu 121:36–42, ao kakaei rekeia. Ngkana arona bwa ko nooria bwa am ataei (ke tabeman riki) a karaoi kanoan moan tua ke bwaai ake a mwaneweaki i nanon kiibu aikai, ao katerei bwa ana ataia.

• Ngkana arona bwa e kabonganaa te kiing am ataei ni kauka te mataroa ke ni kamaiua te kaa, anaa te tai teutana ni kabotauii kiing akanne ma kiingin te nakoanibonga ake irouia ara mataniwii. (Ibukin kabwarabwaraan kiing n te nakoanibonga, taraa Aeniboki ni Kabuta, 3.4.1). Tera ae e kona kingin te nakoanibonga ni “kauki” ke ni “kamaiuii” ibukira? Taraa naba Gary E. Stevenson, “A Ngaa Kiing ao te Kariaia n te Nakoanibonga?,” Riaona, Meei 2016, 29–32; “Where are the Keys?” (witeo), Gospel Library.

  Where Are the Keys?

• Ngkana ko kamatoaaki nakon te wewete anne, kaira am ataei, ngkana e kona. Kariaia am ataei bwa a na noora arom ni kakoroa nanon te wewete anne. Ko kona naba ni kakaei aanga aika a na kona ni buokiko iai natim. Kabwarabaraa aron am namakin ni mwaakan te Uea i nanon te wewete anne.

Te Bwabetitoaki ao te Kamatoaaki ibukiia am Bakatibu

Tembora bon mwakoron ana babaire Tamara are i Karawa ibukiia Natina. I nanon Ana auti te Uea, ti karaoi berita aika tabu ma Tamara are i Karawa ngkai ti karaoi otenanti aika tabu, ake a bane ni kaeineti nakon Iesu Kristo. E a tia Tamara are i Karawa ni katauraoa te kawai ibukiia Natina ni kabane bwa a na karaoi berita aika tabu ao n ira buakon karaoan otenanti, n ikotaki ma naake aki reke irouia n te maiu aei. Ni moan te ririki are e koro iai 12 ana ririki natim, ikanne are a roro n te bwabetitoaki ao ni kamatoaaki inanon te tembora ibukiia bakatibu ake a tia ni mate (taraa naba 1-Ikorinto 15:29).

• Nakon ana auti te Uea n tainako ngkana ko kona. Marooro ma natim ibukin kawaran te tembora ao arona ni kakorakoraa iai aron am reitaki ma Tamara are i Karawa ao Iesu Kristo.

• Uaia n rinanoi ao maroroakin titiraki ake a irekereke ma te tembora. Ko kona ni kunei i aon iteraniba 36–37 n Ibukin Kakorakoraia Kairake: Te Kairi ibukin Karaoan Rinerine (2022). Marooro ma natim i aon bwaai ake a na karaoaki n tain te intawiu ibukin karekean te kariaia n rin n te tembora. Tibwauaia mangaia bukina ngkai e kakawaki karekean te kariaia n rin n te tembora iroum.

• Ikotaki wareka Maraki 4:6. Maroroakinna bwa e kanga nanom n rairaki nakoia am bakatibu. Karekea riki rongorongoia am bakatibu i nanon ami kakaei iaon rongorongoia am utu n te FamilySearch.org. Kakaeia am bakatibu ake a kainanoa bwabetitoakiia ao kamatoakiia. Te tia rabakau ibukin rongorongon te utu n te tembora n am uoote e kona n ibuobuoki.

• Kaai n rinanoi tabeua kanoan booki ma reirei ake a maneweaki n te mwakoro are taekinaki iai te “Tembora” n aia mwakoro ataei n te Gospel Library. (Taraa naba “Preparing Your Child for Temple Baptisms and Confirmations” n ChurchofJesusChrist.org.)

Karekean te Kakabwaia n te Tamanuea

E kona n riki ana kakabwaia te tamanuea bwa kairakira, te mweeraoi, ao te kairiiri. Iai i nanona reirei ibon ibukira mai iroun Tamara are i Karawa ni buokiira ni mataata n rikira ae akea tokina ao te kantaninga ibukira. Buokiia am ataei ni katauraoi ni karekea te kakabwaia n tamanuea man reiakinaia kakawakin ao tabun raoi te kakabwaia n tamanuea.

N reiakina riki ae mwaiti, taraa Topics and Questions, “Patriarchal Blessings,” Gospel Library; Julie B. Beck, “You Have a Noble Birthright,” Riaona, Meei 2006, 106–8.

• Tibwauaa am taneiai ma am ataei ngke ko karekea ana kakabwaia te tamanuea. Ko kona n tibwauai bwaai n arom ni katauraoiko ni karekea, e kanga n tia ni buokiko ni kaan riki ma te Atua, ao E kanga n reitinako ni kairiko rinanon te kakabwaia aio. Ko kona naba ni kaoiia am ataei bwa a na marooro ma kaain te utu ake tabeman ake a tia ni karekea ana kakabwaia n tamanuea.

• Botaki n rinanon ana marooro Unimwaane Randall K. Bennett “Am Kakabwaia n Tamanuea—Kairaki Karekeana Iroun Tamara are i Karawa” ao Unimwaane Kazuhiko Yamashita’s message “Nningai ae Ko na Karekea iai Am Kakabwaia n Tamanuea” (Riaona, Meei 2023, 42–43, 88–90). Tibwauaia i marenami bwa tera ae ko reiakinna man rongorongo aikai iaon ae bukin tera Tamara are i Karawa e tangiriira bwa ti na karekea te kakabwaia n tamanuea. N reiakina aron karekean ana kakabwaia te tamanuea, taraa te Aeniboki ni Kabuta, 18.17.

• Ngkana iai am bakatibu aika a tia ni karekea ana kakabwaia te tamanuea ao, e na kona n buokiko riki ni kaira am iango ngkana ko warekia ma natim. Ngkana ko kan karekea aia kakabwaia am bakatibu ake a tia ni mate, kariniko n te ChurchofJesusChrist.org, kotea Tools ae mena ieta ni koonan am tikuriin man te angaatai, ao rinea Patriarchal Blessing.

• Ngkana a tia am ataei ni karekea aia kakabwaia n tamanuea, kaoiia kaain te utu ake airi n te tai anne bwa a na korei ao n tibwauai aia namakin ma am ataei.

Karekean Te Entaumente

E tangiriira te Atua n anga, ni kakabwaiaia, ni kabane Natina ma “te mwaaka mai ieta” (Reirei ao Berita aika Tabu 95:8). Ti nakon te tembora ibukin karekean ara entaumente tii n te taina, ma berita aika tabu aika ti karaoi ma te Atua ao te mwaaka n tamnei are E anganiira bwa kanoan te entaumente anne e kona n anganiira te kakabwaia ni katoa bongin maiura.

• Kaota tamnein te tembora i nanon mweengam. Tuangiia am ataei aron te namakin are ko karekea i nanon ana auti te Uea. Kataia ni kakaotia i nanon am marooro aron tangirakin te Uea ao Ana auti ao berita aika tabu ake ko a tia ni karaoi i nanona. Kakaei taai ni kona n nako n te tembora ma am ataei ni karaoi bwabetito ao kamatoa ibukiia aia bakatibu.

• Kaai n rinnako ni mamataku i nanon te temples.ChurchofJesusChrist.org. Uaia ni wareka taian rongorongo n aekan “About the Temple Endowment” ao “Prepare for the House of the Lord.” Kariaia am ataei bwa a na anga titiraki ake iai irouia i aon te tembora. Ibukin kairakim iaon rongorongo ake ko kona ni maroroakin i tinanikun te tembora ao, wareka ana rongorongo Unimwaane David A. Bednar “N Tauraoi ni Karekei Bwaai Nako Aika Kainnanoaki” (Riaona, Meei 2019, 101–4; taraa mwakorona ae atunaki n “Reiakinan ao te Katauraoi nakon te Tembora ae Boto n te Mweenga man Boutokaaki n te Ekaretia”).

• Ngkana ngkoe ao am ataei kam iria buakon ke ni kakoaua ibukin karaoan otenanti ake tabeua (n aron te toa ke te kakabwaia ni katoki aoraki), kataia maroroakina te kanikina are irekereke inanon te otenanti are karaoaki anne. Tera ae a tei ibukina kanikinaa aikanne? A kanga ni kaota koauan Iesu Kristo? Aio e kona ni buoka am ataei ni katauraoa nanona n iangoi nanon kanikina aika tei ibukin otenanti n te tembora aikai, are e kaota naba koauan Iesu Kristo.

• Buokiia am ataei bwa a na ataa aron kawakinakin te berita ae tabu n te bwabetito are kabwarabwaraki n Motiaea 18:8–10, 13. Buokiia naba am ataei bwa a na ataia bwa E kanga te Uea ni kakabwaiaia. Karikirakea ni kamatoa nanoia am ataei n aia konabwai ni kawakin berita.

• Kabatia am tai ni marooro raoi ibukin am berita aika tabu ake ko karaoi i nanon te tembora ao aia ibuobuoki ni kaira am rinerine ao ni kaniiko riki ma Iesu Kristo. Ko kona ni kabongana te Aeniboki ni Kabuta, 27.2, n rinanoi berita aika tabu ake ti karaoi i nanon te tembora. Ngkana ko a tia ni karekea te entaumente, tuangiia am ataei bwa e kanga te kamenti n te tembora ni buokiko n uring am berita ma Iesu Kristo (taraa “Sacred Temple Clothing” [witeo], Gospel Library).

Sacred Temple Clothing

Beku ni Mitinare

E reireiniira Unimwaane David A. Bednar: “Te bwai ae rangi ni kakawaki ae ko na riai ni karaoia ni katauraoiko n riki bwa te mitinare imwain ae ko nako n am mition. … Te bwai ae ti na ataia bwa tiaki te nako ni mitinare; ma, arora n riki bwa mitinare ao ni beku i nanon maiura ma nanora, ara onimaki, ara iango, ao korakorara. … Ko katauraoiko ibukin te mwakuri ni mitinare ni uaa tokin maium” (“Becoming a Missionary,” Riaona, Nob. 2005, 45–46). Te taneiai ake a tia n rinanona am ataei n riki bwa te mitinare e na anganna te kakabwaia ae akea tokina, ma tiaki ti i nanon ana tai are kabaeaki iai n ana mwakuri ni mitinare.

N reiakina riki ae bati, taraa Russell M. Nelson, “Tataekinan te Euangkerio n Rau,” Riaona, Meei 2022, 6–7; M. Russell Ballard, “I Kakabwaiaaki Man te Mwakuri ni Mitinare,” Riaona, Meei 2022, 8–10; “Missionary Preparation: Adjusting to Missionary Life,” Gospel Library.

• Karaoan banna ibukin tibwauakin te euangkerio n aanga aika ti taneiai iai. Tatauraoi n taainako nakon tibwauakin am namakin ma tabeman ibukin Tamam are i Karawa ao ara Tia Kamaiu ao kakabwaia ake ko karekei man Ana euangkerio ae kaokaki te Tia Kamaiu ao ngkai kaain Ana Ekaretia. Kaoiia te koraki bwa a na raoniia am utu n te Ekaretia ao n ami waaki ni kakukurei i nanon ami utu.

• Kakaei aanga aika e na kona n reke angaia kaain am utu ni kaitiboaki iai ma mitinare. Kaoiia bwa a na reireiniia raoraom, ao kariaia rokoia bwa a na reireiniia kaain mweengam. Tuangiia mitinare taekan waaki ake a karekea ao e kanga ni buokia te mwakuri ni mitinare ni kaniia nakon Iesu Kristo. Titirakiniia naba tera ae a karaoia (ke tera ae a tangiria bwa a kaman tia ni karaoia) ibukin katauraoakiia n riki bwa mitinare.

• Ngkana ko karaoa te mwakuri ni mitinare, marooroakin n taainako bwaai ake ko aitara mangaai. Ke kaoiia raoraom ke kaain am utu ake a tia ni karaoa te mwakuri ni mitinare bwa a na karakina aroia. Ko kona naba ni maroroakina arom n tibwauaa te euangkerio ma tabeman i nanon maium. Buokiia am ataei ni iangoi aanga ake a kona iai n tibwauaa te euangkerio.

• Angan am ataei ana tai n reireiniia ami utu tuua nako n te euangkerio. A kona naba am ataei ni kataneiaia n tibwauaa aia koaua ma tabeman aomata. Tao te katooto, ko kona ni maroroakin titiraki n aron “Ti na kangaa n taekina rongorongon Ana Boki Moomon nakon te aomata ae e tuai man ongoongo taekana mai i mwaaina?” ke “Ti na kangaa ni kabwarabwaraa kainanoakin te Tia Kamaiu nakon temanna ae tiaki te Kiritian?”

• Reireina am ataei bwa e na kona n taetae nakoia aomata n akea ana kangaanga. Tera aanga aika tamaroa aika ko kona ni moana iai am marooro? Kaungaa am ataei bwa a na rabakau n ongoraa nakon te bwai ae a taekinna tabeman, kataia ota bwa tera are a mena i nanoia, ao tibwauaa koauan te euangkerio are a na kona ni kakabwaiai maiuiia.

• Kakaei aanga aika e na kona am ataei n reiakin aron katei ma onimaki ake tabeua. Buokia bwa a aonga ni kinai ao ni karinei tamaroan ao koauan tua n aia onimaki aomata ake tabeman.

Karekean Otenanti n te Kabaebae

I nanon te tembora, ao a kona ni mareaki taanga ibukin te tai ae akea tokina. E karaoaki aei n te otenanti ae atongaki bwa te “kabaebae.” E ngae ngke e tuai n roro natim te aine ke te mwaane ni karaoa te otenanti aei, baika a uarereke, ni bebete, ae kam uaia ni karaoi inanon ririki akanne a kona ni buokiia ni katauraoi ibukin karekean te kakabwaia aei.

• Bootaki ni wareka “Te Utu: Te Katanoata nakon te Aonaaba” (Gospel Library). Tera ae e reiakinai n te katanoata aei iaon rongorongon te maiu ni kukurei inanon te utu ao te maiu n taanga ae nakoraoi? Rineia ma am ataei, teuana mai ibuakon tua ake a maneweaki i nanon te katanoata anne. Ko kona naba ni kakaei rongorongo inanon booki aika tabu ake a kaeineti nakon te moan tua anne i nanon te Guide to the Scriptures. Ko kona naba ni katei am kouru i nanon am utu ake a na kona ni kaeineti ma te moan tua anne. Ngkana ko mwakurii am kouru, botaki ni maroroakina korakoran te moan tua anne ae kona n anganiko i nanon te maiu n utu.

• Warekia ma am ataei, ana rongorongo Beretitenti Dieter F. Uchtdorf “In Praise of Those Who Save” (Riaona, Meei 2016, 77–80). Ngkana ko roko n te mwakoro ae atunaki n “A Society of Disposables,” ao ko kona n tarai bwain mwengam aika a kona ni bane taia ao aika aki. Maroroakina aron kawakinan bwaai n aron teia aika kakaokoro bwa aonga n tei maan. Tera ae e tuangiia aei i aon arora are ti riai ni karaoi ibukin kawakinan ara mare ao ara reitaki i nanon ara utu? Tera riki ae ti reiakinna man ana rongorongo Beretitenti Uchtdorf iaon aron ana ibuobuoki te Tia Kamaiu ni kakorakorai maiura n taanga ao ara utu?

• Karika am mamarooro ma am ataei ni kamataatai bwaai ake ngkoe ao kainabam kam reiakinna i aon kabotoan Kristo n am mare ae akea tokina, ao am anga ni kataia ni kanakoraoia riki. Ngkana ngkoe ao kainabam kam a tia ni kabaeaki n te tembora, kaotia nakoia natim man am banna ni katoto arom ni kekeiaki ni kawakin am berita aika tabu ma te Uea. Kaotia nakon am ataei bwa ko kanga ni teimatoa ni katea Tamam are i Karawa ao am Tia Kamaiu bwa boton aan ami reitaki ao A kangaa ni buokiko (Taraa naba Ulisses Soares, “N te Reitaki ma te Uea,” Riaona, Nobembwa 2022, 42–45).

• Ngkana e kainnanoaki karaoan te babaire n te utu, karaoi bootaki ni marooro ao marooro i aoiia. Kakoauaa raoi bwa ana riai n ongoraeaki aia iango kaain te utu ni kabane ao ni karauaki raoi n rinanoaki. Kabonganai marooro aikai bwa te tai ni kanakoraoa aron te marooro n reitaki ao te itangitangiri i nanon te reitaki n utu, e ngae ngkana iai tabeman aika a kakaokoro tein aia taratara. (Taraa M. Russell Ballard, “Family Councils,” Riaona, Meei 2016, 63–65.)

• Ngkana iai te aki nanoraoi ke te unraa inanon te utu, ao kaota te taotaona n nano ao te nanoanga. Buokiia am ataei bwa a na noora aron kanakoraoan te unraa rinanon ana kawai Kristo are e kona ni katauraoiia ibukin te mare ae kakukurei. Bootaki ni wareka Reirei ao Berita aika Tabu 121:41–42, ao maroroakina aron kairan taian moan tua aikai i nanon te maiu n taanga.