Ngondu Muinayi 28–Ngondu Muitanu 4: Mukenji Wanyi bua Kulombola Ekelezia Wanyi

Dilongesha ne Bipungidi 41–44

Ekelezia wakadiunda lukasa mu 1830 ne mu 1831, nangananga ne tshisumbu tshia bidimba bipia-bipia bia mu Kirtland, Ohio. Didiunda edi divua difila disanka ne dikankamija bansantu, kadi divua dileja kabidi ntatu kampanda. Mushindu kayi uwudi usangisha tshisumbu tshia bitabuiji tshidi mu divula? Nangananga, tshinyi tshia kuenza padibu batuala dilongesha ne bikadilu bia ku ditabuija diabu dia kala? Tshilejilu, diba didi Joseph Smith ufika mu Kirtland ku mbangilu wa Ngondu Muibidi, uvua musangana bidimba bipia-bipia biabanyangana bintu bia pamua mu didikija Bena Kilisto ba mu Dipungila Dipia-dipia (tangila Bienzedi 4:32–37). Mukalenga wakenza makaja ne matokesha a mushinga pa tshiotshi ne pa biena bualu bikuabu. Uvua mutshienza mu tshitupa tshinena kupitshila ku dibuluila diandika mu Dilongesha ne Bipungidi 42 didiyi ubikila ne mukenji wanyi bua kulombola ekelezia wanyi (kanungu 59). Mu dibuluila edi, tudi tulonga malelela adi mikala nshindamenu bua dishindamija dia Ekelezia wa Mukalenga mu matuku a ndekelu. Ne tudi tulonga ne, tudi ne bia bungi bia kulonga: Mukalenga mmulaya ne pawudi ulomba udi upeta dibuluila pa dibuluila, dimanya pa dimanya (Dilongesha ne Bipungidi 42:61).

Tangila kabidi Saints, 1:114–19.

Ngenyi bua Dilonga ku Nzubu ne ku Ekelezia

Dilongesha ne Bipungidi 41

Ewu udi upeta mukenji wanyi ne uwenza, yeya awu udi muyidi wanyi.

Ku mbangilu kua 1831, Bansantu bavua babanga kudisangisha mu Ohio. Bavua bajinga kupeta mukenji uvua Nzambi mulaya bua kubabuluila koku (tangila Dilongesha ne Bipungidi 38:32). Kadi tshiakumpala, uvua mulongesha mushindu kayi uvua bayidi benda mua kudilongolola bua kupeta mukenji wenda. Nshindamenu kayi yiwudi usangana mu Dilongesha ne Bipungidi 41:1–6 ivua miambuluisha Bansantu bua kupeta mukenji wa Nzambi? Mushindu kayi udi nshindamenu eyi mua kukuambuluisha bua kupeta maludiki a kudiye?

Tangila kabidi “A Bishop unto the Church [Muepiskopo mu Ekelezia],” mu Revelations in Context, 77–83.

Dilongesha ne Bipungidi 42

Mukalenga udi umpesha mikenji bualu mmunanga.

Bansantu bavua bamona dibuluila divua disanganyibua mu Dilongesha ne Bipungidi 42:1–72 dikala dimua dia ku a mushinga ku avua Muambi mupeta. Divua dimua dia ku mabuluila a kumpala avua mapatula. Mu bidimu bia bungi, Bansantu bavua badibikila bipepela ne “mukenji.” Nansha mudi tshitupa etshi katshiyi tshiangata mikenji anyi mêyi a Mukalenga onsu, bidi bikumbana bua kunana meji buatshinyi nshindamenu eyi ivua ne mushinga bua ekelezia mupinguluja mupia-mupia. Buatshinyi bidi ne mushinga buetu lelu?

Bualu tshitupa 42 tshidi tshikala tshilepa, udi mua kuela meji bua kutshilonga mu tutupa tukesa tukesa, bu mudibi bilonda. Jandula nshindamenu idi milongesha mu yoyi yonsu, ne ela meji mushindu udi mikenji eyi mikala tshimanyinu tshia dinanga dia Mukalenga bua bantu benda.

• Tunungu 4–9, 11–17, 56–58

• Tunungu 18–29

• Tunungu 30–31

• Tunungu 40–42

• Tunungu 43–52

Buatshinyi Nzambi udi utupesha mêyi ne mikenji? Mu mishindu kayi yiuvua muikala mubeneshibua ku dimanya ne ku dilonda dia mikenji?

Dilongesha ne Bipungidi 42:30–42

Vulukayi bapela.

Bu tshitupa tshia mukenji mubuluila mu tshitupa 42, Mukalenga wakalongesha Bansantu benda mushindu uvuabu mua kuikala, bu balondi ba Yezu Kilisto bakala bua kuikala ne “bintu bionsu pamua” (Bienzedi 2:44; 4 Nefi 1:3), ne kakuvua mupela munkatshi muabu (Mose 7:18). Tshinyi tshiudi mulonga ku Dilongesha ne Bipungidi 42:30–42 pa mushindu uvua Bansantu bateka mukenji wa dijidila mu tshienzedi? (Kujidila kudi kumvuija kuteka tshintu kampanda ku luseka bua kipatshila ka tshijila.)

Nansha tuetu katuyi ne “bintu bionsu pamua” lelu, Bansantu ba matuku a ndekelu mu ntempelo badi bapunga bua kuteka mukenji wa kujidila mu tshienzedi. Mushindu kayi uwudi mua kujidila bidi Nzambi mukupesha bua kubenesha bantu badi mu dijinga? Pamuapa dimba musambu bu “Because I Have Been Given Much” (Hymns, no. 219) didi mua kukupesha ngenyi.

Tangila kabidi Sharon Eubank, “I Pray He’ll Use Us [Ndi Nsambila bua Atuenzela],” Liahona, Ngondu wa Dikumi ne Umua 2021, 53–56; “The Law [Mikenji],” mu Revelations in Context [Mabuluila mu miaku], 93–95.

Kilisto ne Nsongaluma Mubanji Mumanyi wa Mikenji, kudi Heinrich Hofmann

Dilongesha ne Bipungidi 42:61, 65–68; 43:1–16

Nzambi udi ufila mabuluila bua kuludika Ekelezia wenda—ne bua kundudika.

Fuanyikija ne udi uyukilangana ne tshidimba tshipia-tshipia tshia Ekelezia tshidi tshisanka bua kumanya ne Ekelezia udi uludikibua kudi dibuluila. Mushindu kayi uwudi mua kuenzela Dilongesha ne Bipungidi 43:1–16 bua kumuambuluisha anyi kumulongesha ngenzelu wa Mukalenga bua diludika Ekelezia wenda kupitshila ku muambi wenda? Mushindu kayi uwudi mua kuenzela Dilongesha ne Bipungidi 42:61, 65–68 bua kulongesha pa dipeta dia dibuluila dia muntu nkaya?

Bintu kayi bikuabu bia ditalala ne bia disanka biuvua mupeta bia kudi Mukalenga kupitshila ku Nyuma wenda?

Bua kulonga mushindu udi balombodi ba Ekelezia bumvua dîyi dia Mukalenga, udi mua kumona tshimua tshia ku bindidimbi mu “Hear Him [Mutelejayi]” mu tshisumbu mu Gospel Library [Tshisangi tshia Lumu Luimpa]. Ela meji bua kuenza weba video, umvuija mushindu kayi udi Mukalenga uyukila neba.

Tangila kabidi Russell M. Nelson, “Revelation for the Church, Revelation for Our Lives,” Liahona, Ngondu Muitanu 2018, 93–96; “All Things Must Be Done in Order [Malu Onsu Adi Ne Tshia Kuenjibua mu Bulongama],” mu Revelations in Context [Mabuluila mu Miaku], 50–53.

Enzela malongesha a bintu. Malongesha a bintu anyi mambuluisha adi amueneka bidi mua kuambuluisha bantu baudi ulongesha bua kumvua malelela a lumu luimpa bilenga ne kubivuluka mutantshi mula. Tshilejilu, udi mua kuenzela puzzle, kusangisha tshipesa ku tshipesa, bua kulongesha pa dipeta dia dibuluila pa dibuluila, dimanya pa dimanya (Dilongesha ne Bipungidi 42:61).

Ngenyi bua Kulongesha Bana

Dilongesha ne Bipungidi 41:5

Muyidi udi ewu udi upeta mikenji ya Mukalenga ne uyitumikila.

• Bua kuambuluisha bana beba bua kumanya tshidi tshiumvuija kuikala muyidi wa Yezu Kilisto, udi mua kufunda Dilongesha ne Bipungidi 41:5 pa dibeji, mu dishiya miaba mitoka ikala muaku muyidi mua kuikala. Pashisha badi mua kukeba mu kanungu 5 muaku udi mupangika. Bilondeshila tunungu etu, kuikala muyidi wa Yezu Kilisto kudi kumvuija tshinyi? Mushindu kayi utudi tuteta bua kuikala bayidi ba Yezu Kilisto balenga?

Dilongesha ne Bipungidi 42:2

Ndi ne disanka pandi ntumikila Mukalenga.

• Bana beba badi mua kunaya dinaya didi dibalomba bua kuteleja bimpa ne kulonda maludiki. Udi mua kuenzela dinaya edi bua kuakula pa tshidi tshiumvuija “kuteleja ne kumvua ne kutumikila” Mukalenga (Dilongesha ne Bipungidi 42:2). Maludiki kayi adiye mutupesha? Mushindu kayi utudi tubeneshibua ku ditumikila dia mikenji yenda?

• Udi mua kujikija dibeji dia tshibilu tshia lumingu elu ne bana beba. Udi mua kuimba musambu pa ditumikila dia mikenji ya Nzambi, bu mudi “I Want to Live the Gospel” (Children’s Songbook, 148). Ela meji bua kuabanyangana mushindu udi ditumikila dia mikenji ya Nzambi dinutuadila disanka.

  

Dilongesha ne Bipungidi 42:38

Ndi nsadila Yezu Kilisto pandi nsadila bakuabu.

• Panyima pa dibala pamua Dilongesha ne Bipungidi 42:38, ambuluisha bana beba bua bela meji ku mishindu idibu mua kusadila Yezu ku disadila dia bakuabu. Badi mua kupeta ngenyi mikuabu idi ifuma ku video wa “Pass It On [Basambulujila tshiotshi]” (ChurchofJesusChrist.org). Badi mua kutangila kabidi bimfuanyi bia Mupandishi wambuluisha bakuabu, ondopa babedi, anyi muikala bimpa ne bana (tangila Mukanda wa Bimfuanyi bia Lumu Luimpa], nos. 42, 47).

  Pass It On

  

• Udi mua kuleja bana beba kabeji ka Tshiadikumi ne Milambu Mikuabu ne kuakula pa mushindu wa kukenzela bua kufila tshitudi natshi bua kubenesha bakuabu (tangila kabidi “Tithing and Donations Online”).

Dilongesha ne Bipungidi 43:1–7

Amu muambi ki udi mua kupeta dibuluila dia Ekelezia mujima.

• Bikila bana beba bua bafuanyikija ne muntu mukuabu udi ujuka mu tshisangilu tshia bujadiki ne wambila tshikongu ne mmupeta dibuluila bua Ekelezia mujima (tshilejilu, dibuluila dia ne katuena mua kudia kabidi tshiomba anyi ne tudi tubanga kowa bianza ne mabela pa mutu pa mâyi.) Udi wamba ne tuteleja bidiyi wamba pa mutu pa kuteleja muambi. Tshinyi tshidi mua kuikala tshibi ne atshi? Pashisha nudi mua kulonga Dilongesha ne Bipungidi 43:1–7 pamua bua kujandula mushindu udi Mukalenga mufila mikenji kudi Ekelezia wenda.

• Udi mua kuleja kabidi tshimfuanyi tshia muambi udi ne moyo ne kubikila bana beba bua kuabanyangana tshidibu balonga musangu mushala. Padibu bajinga diambuluisha, abanyanganayi katupa ka video anyi mufundu wa ku mukenji wa mpungilu munena mushala. Buatshinyi bidi dibenesha bua kuikala ne muambi udi ne moyo?

Bua ngenyi ya bungi, tangila bualu bua ngondu ewu bua makazina a Mulunda.

Joseph Smith mu Diyisha, kudi Sam Lawlor