The Camp Meeting [Tshisangilu tshia Kamponyi], kudi Worthington Whittredge

Ngondu Muitanu 12–18 “Keba Bushuwa Mapa Malenga”

Dilongesha ne Bipungidi 46–48

Bu muvua Parley P. Pratt, Oliver Cowdery, Ziba Peterson, ne Peter Whitmer Muana bashiya Kirtland ne baya bua kutungunuka kuyisha lumu luimpa, bavua bashiya bidimba bipia-bipia bia Ekelezia bipita 100 bivua ne lukunukunu lua bungi kadi dimanya dikesa anyi buludiki. Kabavua ne mikanda minena ya maludiki to, kabayi ne bisangilu bia dilonga bia bulombodi, kabayi ne dimona dia mpungilu munena—mu bionsu, kabavua nansha ne mabeji a Mukanda wa Molomo bua kumulonda. Ba bungi ba ku bitabi aba bapia-bapia bavua badina mu lumu luimpa lupingajibua ku mulayi wa madimueshi manena a nyuma, nangananga â malejibua mu Dipungila Dipia-Dipia (tangila, tshilejilu, 1 Kolinto 12:1-11). Kadi ba bungi bakamona bikola bua kujandula madimueshi malelela a Nyuma. Mu dimona lutatu elu, Joseph Smith wakasambila bua diambuluisha. Diandamuna dia Mukalenga didi mushinga lelu, padi bantu batamba kuvila anyi bapanga bintu bia Nyuma. Wakajadikilula ne madimueshi a nyuma adi malelela. Mukalenga wakatokesha kabidi tshivua mapa mikala; mapa a kudi Tatu wa mu Diûlu wa dinanga, mafila bua diakalenga dia aba badi bamunanga ne balama mikenji yenda yonsu, ne kudi bantu badi bakeba bua kuenza nanku (Dilongesha ne Bipungidi 46:9).

Ngenyi bua Kulonga mu Dîku ne mu Ekelezia

Dilongesha ne Bipungidi 46:1–7

Mupandishi udi wakidila aba bonsu badi bajinga kukukuila mu Ekelezia wenda.

Udi umvua ne balunda beba ne bantu badi mu nyinguluilu weba badi badiumvua bakidila mu bisangilu bia dikukuila bia tshikongu tshieba anyi? Tshiwudi wenza ntshinyi bua kuakaja miaba yeba ya bisangilu bia Ekelezia weba bua bantu kujinga bua kualukila kabidi? Nana meji bua mushindu uwudi mua kuenzela mibelu ya Mukalenga mu Dilongesha ne Bipungidi 46:1–7 (tangila kabidi 2 Nefi 26:24-28; 3 Nefi 18:22-23).

Udi kabidi mua kuela meji pa tshikondu tshiuvua mubuela mu bisangilu bia Ekelezia—anyi bisangilu bia bisumbu bikuabu—bua musangu wa kumpala. Tshinyi tshidi bantu benza bua kukuambuluisha bua kudiumvua muakadila?

Tangila kabidi Moroni 6:5–9; “’Tis Sweet to Sing the Matchless Love,” Hymns, no. 177; “Welcome” (video), Tshisangi tshia Lumu Luimpa.

Welcome Comeuntochrist.org

Dilongesha ne Bipungidi 46:7–33

Tatu wa mu Diûlu mumpesha mapa a nyuma bua kubenesha bakuabu.

Bansantu ba ku ntuajidilu bavua bitabuija mu mapa a nyuma kadi bivua bilomba mambuluisha makuabu bua kuajandula ne kumvua kipatshila kawu. Bu muwudi ulonga pa mapa a Nyuma mu Dilongesha ne Bipungidi 46:7–33, nana meji pa kipatshila “kadiwu mafidibua” (kanungu 8). Ntshinyi tshiwudi mulonga pa Nzambi—mufidi wa mapa â?

Udi mua kuela meji pa bilejilu bivua mumona bantu benzela anyi mapa makuabu a nyuma? Mushindu kayi uvuabi biambuluisha bana ba Nzambi? (kanungu 26). Udi mua kutangila kabidi wewa mua kujingulula bilejilu bishilashilangana bia mapa a nyuma mu mifundu bu mudi eyi: 1 Bakalenga 3:5–15; Daniela 2:26–30; Bienzedi 3:1–8; Helamana 5:17–19; Molomo 1:1–5; Etele 3:1–15; Dilongesha ne Bipungidi 6:10–12; Mose 7:13.

Dilonga dieba dia mapa a nyuma didi mua kukulombola bua kunana meji pa mapa kayi adi Nzambi mukupesha. Mushindu kayi uwudi mua kuenzela mapa â bua kubenesha bana Benda? Pawikala ne dibenesha dia nkambua mukulu, didi dikuleja mapa akadiyi mupeshibua. Dibala dia mukenji wa Mukulu John C. Pingree Muana “I Have a Work for Thee” didi mua kukunzulula kabidi lungenyi ku mapa awudi kuyi muanji kuela meji (Liahona, Ngondu wa Dikumi ne Umua 2017, 32–35).

Wewa musua bua kulonga pa mushindu uwudi mua kutantshisha mapa a nyuma, bulondanganyi pa ntuajidilu wa mukenji wa Mukulu Juan Pablo Villar “Exercising Our Spiritual Muscles” bidi mua kuambuluisha (Liahona, Ngondu Muitanu 2019, 95). “Didibidija” kayi didi mua kukuambuluisha bua kutantshisha mapa a nyuma eba?

Tangila kabidi Biena Bualu ne Makonka, “Holy Ghost,” Tshisangi tshia Lumu Luimpa.

Dilongesha ne Bipungidi 47

Mukalenga musua bua Ekelezia wenda alama malu a kala.

Dibikila dia John Whitmer bua kulama malu a kala a Ekelezia diakashala tshibidilu tshia balami ba miandiku munkatshi mua bantu ba Nzambi. Bua tshinyi udi wela meji ne kulama malu a kala kudi ne mushinga bua Mukalenga? Nana meji pa etshi paudi ubala tshitupa tshia 47 bu maludiki mafuananaga mu 2 Nefi 29:11–12; Mose 6:5; Abalahama 1:28, 31. Tshinyi tshiwudi umvua tshidi Mukalenga ujinga bua ufunda pa nsombelu weba?

Pa FamilySearch, udi mua kufunda malu ne mamanya a nsombelu weba—ne nsombelu ya ba nkambua beba (tangila FamilySearch.org).

Tangila Henry B. Eyring, “O Remember, Remember,” Liahona, Ngondu wa Dikumi ne Umua 2007, 66–69.

John Whitmer

Dilongesha ne Bipungidi 47

Nyuma wa Tshijila udi mua kundudika pandi nkumbaja dibikila dianyi.

Pamuapa udi mua kudituala bifuanangana ne tshivua John Whitmer mumvua pavuaye mujinga kutuishibua ne dibikila dienda didi difuma kudi Nzambi. Tshinyi tshivua Mukalenga muamba mu Dilongesha ne Bipungidi 47 kudi John Whitmer—ne kuwudi—bua kufila meji a nyuma a kueyemena mu dikumbaja mabikila adiye mukupa?

Mudimu wa mulongeshi. Dilongesha didi ditamba kupita difila dia ngumu. Didi ne kufuka muaba udi bidimba bia mu kalasa mua kulonga ne kujingulula bulelela buabu nkayabu ne kuambilangana bidibu balonga (tangila Teaching in the Savior’s Way,26).

Ngenyi bua Kulongesha Bana

Dilongesha ne Bipungidi 46:2–6

Ndi mua kuambuluisha bakuabu bua badiumvua bakidila mu ekelezia.

• Panyima pa dibala Dilongesha ne Bipungidi 46;5 ne bana beba, akula pa mushindu udi Mupandishi mujinga bua bantu badiumvua padibu balua mu Ekelezia wenda. Bikila bana beba bua kufuanyikija ne bakamona muntu mu ekelezia bua musangu wa kumpala. Bambuluisha bua kudibidija ne mishindu idibu bua kuambuluisha muntu ewu kudiumvua muakidila.

Dilongesha ne Bipungidi 46:7–26

Tatu wa mu Diûlu mmumpesha mapa a nyuma bua kubenesha bakuabu.

• Bua kuambuluisha bana beba bua kulonga pa mapa a nyuma mumvuija mu Dilongesha ne Bipungidi 46:13–26, itaba lungenyi elu. Udi mua kufunda mapa mu tupesa tua dibeji ne kuasokoka mu nzubu. Padi bana beba bapeta dibeji dionsu, bambuluisha bua kupeta muaba udi dipa difunda mu tshitupa 46. Bua dipa dionsu, akula nabu pa mushindu udidi dienzela bua kubenesha bakuabu (diumvuija mu “Chapita 20: Mapa a Nyuma,” mu Dilongesha ne Bipungidi Muyuki, 77-80, bidi mua kuambuluisha).

  Chapter 20: Gifts of the Spirit: 8•March 1831

• Ambila bana beba pa mapa awudi umvua ne Tatu Nzambi wa Diûlu mmubapesha, ne balekela bakula pa mapa adibu bamona mu umua ne umua. Bilondeshila Dilongesha ne Bipungidi 46:8–9, 26, buatshinyi Tatu wa mu Diûlu mutupesha mapa a nyuma? Mushindu kayi utudi mua kuenzela mapa etu bua kubenesha bakuabu?

Dilongesha ne Bipungidi 47:1, 3

Ndi mua kufunda mulubu wanyi.

• Lekela bana beba bajandula tshidi Mukalenga mujinga bua John Whitmer kuenza mu Dilongesha ne Bipungidi 47:1, 3. Nudi kabidi mua kuambilangana miyuki minanga ya mu mifundu. Imanyina ne tudi bamanya miyuki eyi bualu muntu mukuabu wakayifunda.

• Ela meji pa mushindu uwudi mua kupesha bana beba lungenyi lua nyuma bua kufunda miyuki yabu nkayabu. Udi mua kuabanya bimua bintu bifunda mu mukanda wa nkaya anyi muyuki pa nkambua (tangila FamilySearch.org anyi Memories app). Udi mua kufila bibejibeji bikuabu lukasa, bu mudi “Tshinyi tshidi tshifika mu lumingu elu tshiwudi munanga bua bankana beba bamanya?” anyi “Mushindu kayi uvua mumona tshianza tshia Mupandishi mu moyo weba lumingu elu?” Bana bateketa badi mua kuzola bimfuanyi bia malu abu mapeta, anyi badi mua kukuata mu dîyi ba kukula miyuki yabu. Mabenesha kayi adi alua mu kulama “malu a kala misangu yonsu”? (Dilongesha ne Bipungidi 47:1).

Dilongesha ne Bipungidi 48:2–3

Ndi mua kusadila bakuabu mu kutangalaja bindi mupeta.

• Pawudi ubala Dilongesha ne Bipungidi 48:2–3 ne bana beba, udi mua kujinga bua kumvuija ne bantu bavua balua mu Ohio bumbukila ku Esete, ne kabavua ne muaba wa kusomba to. Tshinyi tshiuvua Mukalenga mulomba Basantu bua kuenza bua kuambuluisha? Ambuluisha bana beba bua kuela meji pa bintu bidi Nzambi mubapesha bua kuambilangana ne bakuabu. Udi kabidi mua kuimba nabu musambu bu mudi “‘Give,’ Said the Little Stream” (Children’s Songbook, 116).

Bua ngenyi ya bungi, tangila bualu bua ngondu ewu bua makazina a Mulunda .

Aba bonsu badi bajinga kukukuila Mupandishi badi bakidibua mu bisangilu bia Bansantu benda.