Mêyi a Dipinguluja

Dikudimuna dia Mukanda wa Molomo

Mu Ngondu Muinayi, ngondu uvua tshitupa 6–9 Dilongesha ne Bipungidi bipetshibua, mudimu munena wa Joseph Smith uvua wa dikudimuna dia Mukanda wa Molomo. Katuena bamanya diumvuija dia bungi pa tshishima tshia ntungunukilu wa dikudimuna, kadi tudi bamanya ne Joseph Smith uvua mumonyi, muambuluisha kudi biamu bibidi bivua Nzambi mulongolola: mabua abidi amuesha munda abikidibua ne Ulima ne Tumima ne dikuabu dibua dibikidibua ne dibua dia mumonyi.

Pakamukonkeshabu pashisha mushindu kayi uvua muandiki eu mukudimuna, Joseph wakamba “ne kabivua bilomba bua kuambila bantu tutupa tua diumvuija tonsu.” Uvua wamba bipepela misangu mivula ne uvua mukudimuna “ku dipa ne ku bukola bua Nzambi.”

Mamanyisha adi alonda, afuma kudi bajadiki badimuena bua ntungunukilu wa dikudimuna, badi batua mpanda ku bujadiki buenda.

Bidi biedibua meji ne kasheta aka, kavua ka Hyrum Smith, kavua kenzela bua kuanji kusokokelamu bua mutantshi bitata bia ngolo.

Emma Smith

“Pavua bayanyi ukudimuna Mukanda wa Molomo, ngakafunda tshitupa tshia kuwowu, pavuaye wamba tshiambilu tshionsu, muaku ku muaku, ne pavuaye ufika pa mena a bantu ne miaba anyi miaku milepa bivua bikola bua kuamba, uvua utela maleta ayi, ne munkatshi mua diyifunda, pandi ngenza tshilema mu maleta, uvua ungimanyika ne ulongolola maleta anyi nansha muvuabi kabiyi bikumbana bua kumonaye mushindu umvua muyifunda musangu au. Nansha muaku Sala kavua mua kuwamba kumpala to, kadi uvua ne bua kuwutela, ne ngawamba buenda.”

“Bitata bivua misangu yonsu anu pa mesa kabiyi biteta bua kusokoka, bijingila mu kalamba ka pa mesa, tshimvua mumupesha bua kuyibunyamu. Ngakumvua musangu umua bua bitata, bu muvuabi bisomba pa mesa, bizola tshifundu tshiabi ne bunena. Bivua bimueneka ne bivua bibunyika bu mabeji a mupimbu, ne bienza mutoyi bu biamu padi muelelu munyungusha kudi tshiala, bu mudibi bienzeka misangu mikuabu ku muelelu wa mukanda. …

“Ditaba dianyi didi ne Mukanda wa Molomo udi bulelela bua bunzambi—tshiena nansha ne mpata mikesa buawu. Ndi mutuishibua ne kakuena muntu udi mua kuamba bia kufunda ku bianza bu yeya kayi mupeshibua meji; bualu, pavuaye muenza bu mufundi wenda, [Joseph] uvua ungambila diba ku diba; ne patuvua tualukila panyima pa biakudia, anyi pa dikisha, uvua ubangila muaba uvuaye mushila, kayi nansha utangila bivua bifundibua anyi kubadisha katupa. Tshivua tshintu tshia pa tshibidilu buenda bua kuenza. Bivua bikola bua nansha muntu mulonga bua kutshienza; ne, bua eu uvua mupangi ne kayi mulonga bu yeya, bivua bimueneka bikola.”

Oliver Cowdery

“Ngakafunda ne bika wanyi Mukanda wa Molomo mujima (pakumusha mabeji makesa) bu muvuabi bipatuka mukana mua muambi, bu muvuaye ubikudimuna ku dipa ne ku bukola bua Nzambi, ku mushindu wa Ulima ne Tumima, anyi, bu mudi mukanda uyibikila ne, bakudimunyi ba tshijila. Ngakamona ne mesu anyi, ne ngakalenga ne bianza bianyi, bitata bia ngolo ku biobi kuvuawu mukudimukibua. Ngakamona kabidi bakudimunyi.”

Biakumanya

1. Bua ngumu ya bungi, tangila Biena Bualu ne Nkonku, “Book of Mormon Translation,” Gospel Library; Richard E. Turley Jr., Robin S. Jensen, and Mark Ashurst-McGee, “Joseph the Seer,” Ensign, Ngondu wa Dikumi 2015, 48–55).

2. “Minutes, 25–26 October 1831,” Minute Book 2, 13, josephsmithpapers.org.

3. Mu “Church History,” Times and Seasons, Mar. 1, 1842, 707; tangila kabidi Teachings of Presidents of the Church: Joseph Smith (2007), 441.

4. Mu Edmund C. Briggs, “A Visit to Nauvoo in 1856,” Journal of History, vol. 9, no. 4 (Ngondu wa Dikumi 1916), 454; quoted in Russell M. Nelson, “A Treasured Testament,” Ensign, Ngondu wa Muanda Muteketa 1993, 62.

5. Mu “Last Testimony of Sister Emma,” Saints’ Herald, Ngondu wa Dikumi 1, 1879, 290; standardized.

6. Mu Reuben Miller journal, Ngondu wa Dikumi 21, 1848, Church History Library, Salt Lake City; mfundilu, bitudilu, ne maleta manena biakaja.