Ngondu Muibidi 3–9: “Etshi Tshidi Nyuma wa Dibuluila”

Dilongesha ne Bipungidi 6–9

Ku ndekelu kua tshidimu 1828, mulongeshi wa tshilongelu wa tshitenda ubikidibua ne Oliver Cowdery wakitaba mudimu wa bulongeshi mu Manchester, New York, ne wakasomba ne dîku dia Lucy ne Joseph Smith Mukulumpa. Oliver wakumvua bakula pa muanabu Joseph ne pa mamanya enda a dikema, ne Oliver, uvua udiangata bu mukebi wa bulelela, wakajinga bua kumanya bia bungi. Bena Smith bakumvuija makumbula a banjelu bu muandiku wa kala, ne dipa dia dikudimuna ku bukola bua Nzambi. Oliver uvua musankishibua. Tshivua mua kuikala bulelela anyi? Lucy ne Joseph Mukulumpa bakamupesha mubelu udi ulombibua kudi muntu yonsu udi ukeba bulelela: sambila ne konka Mukalenga.

Oliver wakatshienza, ne Mukalenga wakandamuna, mu diakula ne ditalala kudi nyuma [wenda] (Dilongesha ne Bipungidi 6:23). Oliver wakajandula ne, dibuluila kadiena amu bua bambi bu Joseph Smith. Didi bua yonsu udi udijinga ne udikeba ne dinanukila. Oliver utshiuvua ne bia bungi bia kulonga, kadi uvua mumanya ndambu bua kuangata tshidia tshikuabu. Uvua mumanya ne Mukalenga uvua muenza tshintu tshia mushinga kupitshila ku Joseph Smith, ne Oliver uvua musua kuikala wa ku tshiotshi.

Tangila kabidi Saints, 1:58–64; “Days of Harmony” (video), Tshisangi tshia Lumu Luimpa.

Days of Harmony

Ngenyi bua Dilonga ku Nzubu ne ku Ekelezia

Dilongesha ne Bipungidi 6; 8–9

Tatu wa mu Diûlu udi wakula kundi kupitshila ku Nyuma wa Tshijila.

Mu printemps wa 1829, Oliver Cowdery wakadisuila bua kuikala mufundi wa Joseph Smith bu muvuaye utungunuka bua kukudimuna Mukanda wa Molomo. Dimanya adi diakamusankisha, ne wadikonka ne neudi mua kupeta kabidi dibuluila ne dipa dia kukudimuna. Kadi, didikija dienda dia kumpala, kadiakaya bimpa to.

Paukadi muluangana bua kupeta anyi bua kumvua dibuluila, pamuapa udi mua kudifuanyikija ne dimanya dia Oliver—ne dilonga didi difuminaku. Pawudi ubala Dilongesha ne Bipungidi 6, 8, ne 9, funda tshivua Mukalenga mulongesha Oliver pa dibuluila dia nkaya. Tshilejilu:

• Tshinyi tshidi Dilongesha ne Bipungidi 6:5–7; 8:1; 9:7–8 difila pa tshidi Mukalenga muindila kunudi kumpala kua kunubuluila disua dienda?

• Tshinyi tshiudi mulonga kufumina ku Dilongesha ne Bipungidi 6:14–17, 22–24; 8:2–3; 9:7–9 pa mishindu mishilangana idi dibuluila mua kufika? Mushindu kayi utudi mua kutshimanya?

• Tshinyi tshikuabu tshiudi mulonga pa dibuluila ku bitupa ebi?

Mamanya a Oliver adi mua kuenza bua “nuela meji enu” pa tshikondu tshinuvua bumvua Mukalenga wakula kunudi (Dilongesha ne Bipungidi 6:22). Ukadi mufunda ngenyi anyi ngumvuilu yeba pa mamanya â anyi? Biobi nanku, ela meji bua kubala biuvua mufunda. Biobi kabiyi nanku, angata diba dia kufunda tshiudi uvuluka. Ela meji ku mushindu uwudi mua kutungunuka bua kupeta dikankamika ku mamanya â. Bua ngenyi mikuabu, tangila mukenji wa Mukulu Neil L. Andersen “Spiritually Defining Memories” (Liahona, Ngondu Muitanu 2020, 18–22).

Balombodi bavula ba Ekelezia mbatangalaja mamanya abu ne dibuluila mu “Hear Him” video collection. Panyima pa bamona tshimua anyi bia bungi bia ku bindidimbi ebi, udi mua kudiumvua musakibua bua kuandika mamanya eba, kutangalaja mushindu udi Mukalenga muakula kuwudi.

Tangila kabidi Topics and Questions [Biena Bualu ne Nkonku], “Personal Revelation [Dibuluila dia Nkaya],” Gospel Library [Tshisangi tshia Lumu Luimpa]; “Oliver Cowdery’s Gift,” in Revelations in Context, 15–19.

Dilongesha ne Bipungidi 6:18–21, 29–37

Tangilayi kudi Kilisto mu meji onsu.

Mukalenga uvua mumanya ne Joseph Smith neapeta “malu makola” mu bidimu bialua (Dilongesha ne Bipungidi 06:18). Mmumanya mateta ikala kumpala kueba kabidi. Tshinyi tshiudi upeta mu mubelu wenda kudi Joseph ne Oliver mu Dilongesha ne Bipungidi 6:18–21, 29–37 udi mua kukuambuluisha bua kumueyemena?

Tshinyi tshiudi umvua tshidi tshiumvuija kutangila kudi [Kilisto] mu meji onsu? (kanungu 36). Mushindu kayi uwudi mua kutshienza bikola momumua—mu diba dimpa ne mu “malu makola”? Ela meji ku mubelu wa kudi Mulombodi Mukulu Russell M. Nelson: “Bidi bikala bia disu dikola ku moyo bua kudienzeja bua kutangila kudiye mu meji onsu. Kadi patudi tutshienza, mpata yetu ne ditshina bidi binyema” (“Drawing the Power of Jesus Christ into Our Lives,” Liahona, 41).

Tangila kabidi Neil L. Andersen, “My Mind Caught Hold upon This Thought of Jesus Christ,” Liahona, Ngondu Muitanu 2023, 91–94.

Diumvuija ku Monayi Tshianza Tshianyi, kudi Jeffrey Ward

Dilongesha ne Bipungidi 6:29–37

“Kanutshinyi bua kuenza buimpa to.”

Buatshinyi misangu mikuabu tudi “tutshina … bua kuenza buimpa”? (kanungu 33). Tshinyi tshiudi upeta mu Dilongesha ne Bipungidi 6: 29–37 tshidi tshikupesha dikima bua kuenza buimpa? Ela meji bua kuimba anyi kuteleja musambu udi ukusaka bua wikala ne dikima mu Kilisto, bu mudi “Let Us All Press On” (Hymns, no. 243).

Dilongesha ne Bipungidi 6–7; 9:3, 7–14

“Mena nebienzekela kuwudi bu muwajinga kundi.”

Funda misangu bungi kayi idi miaku “dijinga” anyi “majinga” imueneka mu tshitupa 6 ne 7. Tshinyi tshiudi mulonga ku bitupa ebi pa mushinga udi Nzambi uteka pa majinga eba? Diela nkayeba lukonku lua Mukalenga mu Dilongesha ne Bipungidi 7:1: “udi ujinga tshinyi?”

Dimua dia ku majinga malulama a Oliver Cowdery—kukudimuna bu muvua Joseph Smith wenza—kadivua dikumbaja to. Pawudi ubala Dilongesha ne Bipungidi 9:3, 7–14, muenenu kayi iwudi upeta idi mua kukuambuluisha padi majinga eba malulama ka’ayi makumbajibua bua mpindieu?

Tangila kabidi Dilongesha ne Bipungidi 11:8; Dallin H. Oaks, “Desire,” Liahona, Ngondu Muitanu 2011, 42–45.

Bua ngenyi ya bungi, tangila malu a ngondu ewu a Liahona ne makazina a Bua Dikankamika dia Bansonga.

Ngenyi bua Kulongesha Bana

Dilongesha ne Bipungidi 6:5, 15–16, 22–23; 8:2; 9:7–9

Tatu wa mu Diûlu udi wakula kundi kupitshila ku Nyuma wa Tshijila.

• Malelela avua Oliver Cowdery mulonga pa dibuluila dia muntu nkaya adi mua kuambuluisha bana beba bua batantshisha bukola buabu bua kumanya Nyuma wa Tshijila. Udi mua kuenzela “Shapita 5: Joseph Smith and Oliver Cowdery” (in Miyuki ya mu Dilongesha ne Bipungidi, 22–25,anyi video udi upetangana mu Tshisangi tshia Lumu luimpa) kubalongesha pa Oliver ne pa tshivuaye mulonga. Abanyanganayi umua ne mukuabu bitupa bienu binanga bia muyuki. Panudi nutshienza, nuimanyina pa bintu bidi Mukalenga ulongesha Oliver pa mushindu wa kumvua dîyi dia Nzambi, ne kubala tunungu tudi tuakanyina, bu mudi Dilongesha ne Bipungidi 6:23 anyi 9:7–9.

  The Lord Sends Oliver Cowdery: Learning about how God speaks to us

  

  Oliver Cowdery wakalonga pa dibuluila pavuaye wambuluisha Joseph Smith bua kukudimuna Mukanda wa Molomo.

• Udi mua kubikila kabidi bana beba bua balenga mitu yabu ne biadi pa udi ubala miaku “meji” ne “moyo” mu Dilongesha ne Bipungidi 8:2. Ku dimanya dieba, ambila bana beba, tshiditshi padi Nyuma wa Tshijila wakula mu meji eba ne mu moyo. Bambuluisha bua bapeta mandamuna ku lukonku lua “Mushindu kayi udi Nyuma wa Tshijila wakula kutudi?” mu tunungu etu: Dilongesha ne Bipungidi 6:15–16, 22–23; 8:2; 9:7–9.

Enzela miyuki. Miyuki idi yambuluisha bana beba bua kumvua nshindamenu ya lumu luimpa bualu idi ileja mushindu kayi udi bakuabu bateka nshindamenu eyi mu tshienzedi. Pawudi ulongesha, peta mushindu wa kuangata miyuki—idi ifuma ku mifundu, ku muyuki wa Ekelezia, anyi ku nsombelu weba—idi ileja nshindamenu mu mifundu.

Dilongesha ne Bipungidi 6:34

Bualu bua Yezu Kilisto, ntshiena mua “kutshina to.”

• Mukalenga wakambila Joseph ne Oliver, “Kanutshinyi, tshisumbu tshikesa tshia mikoku” (Dilongeshi ne Bipungidi 6:34). Udi mua kubikila bana beba bua bambulula tshiambilu atshi neba misangu mivula. Badi mua kusanka bua kuditeka bikala bu tshisumbu tshia mikoku tshitshina. Tshinyi tshidi mikoku bua kutshina? Pashisha nuenu ne bana benu nudi mua kutangila tshimfuanyi tshia Mupandishi bu mulami (kudi tshimua ku ndekelu kua tshifundu etshi) ne akula pa mushindu udiye utukuba bu mudi mulami udi ukuba mikoku yenda.

• Ela meji bua kunaya anyi kuimba musambu pa dipeta dikima mu Kilisto, bu mudi “Dare to Do Right” (Children’s Songbook, 158) or “Let Us All Press On” (Hymns, no. 243). Tshinyi tshidi musambu ulongesha pa mushindu udi Mukalenga utuambuluisha bua katutshinyi?

Dilongesha ne Bipungidi 6:36

Ndi mua kutangila kudi Yezu Kilisto mu meji onsu.

• Panyima pa dibala pamua Dilongesha ne Bipungidi 6:36, nuenu ne bana benu nudi mua kuenza mazola adi mua kunuambuluisha bua kuvuluka “kutangila kudi [Yezu Kilisto] mu meji onsu.” Abanyanganayi mazola enu, ne ambuluishayi bana benu bua bela meji pa muaba wa kuateka bua ne bikala ba’amona misangu yonsu.

Bua ngenyi ya bungi, tangila bualu bua ngondu ewu bua makazina a Mulunda.

Mukalenga Udi Mulami Wanyi, kudi Yongsung Kim