Mukanda wa ntuadijilu wa ku bianza wa Mukanda wa Molomo

Ngondu Muibidi 10–16: Bua Wikala Mutshimunyi

Dilongesha ne Bipungidi 10–11

Bu muvua dikudimuna dia Mukanda wa Molomo ditungunuka, lukonku lua kalua: tshinyi tshivua Joseph Smith ne Oliver Cowdery mua kuenza bua mabeji makudimuna avua majimina? Bivua mua kumvuika bua kukudimuna kabidi tshitupa atshi, kadi Mukalenga wakamona tshintu tshivuabu kabayi mua kumona: bena lukuna babu bavua balongolola bua kushintulula miaku pa mabeji awu bua kufila mpata pa mudimu mupela meji wa Joseph. Nzambi uvua ne dilongolola bua kuepuka bualu abu ne kulama mudimu bua uya kumpala. Bidimu binunu bishala, Nzambi wakafila meji kudi Nefi bua kufunda muandiku muibidi uvua wangata tshikondu atshi “bua kipatshila ka lungenyi kudiye” (1 Nefi 9:5).

Mukalenga wakambila Joseph ne lungenyi luanyi ludi lunena kupita budimu bua diabulu (Dilongesha ne Bipungidi 10:43). Tshidi mukenji wa dituishibua wa mu tshikondu bu mudi tshietu etshi, padi muluishi uvudija dienzeja dienda bua kutekesha ditabuija. Bu muvua Joseph, tudi mua kuikala bena “lulamatu ne tutungunuka” mu mudimu wa Nzambi uvuaye mutubikidila bua kuenza (kanungu 3). Pashisha netumona ne ukadi mutulongoluela mushindu bua ne “bibuelelu bia ku ngena kabiakutshimuna” kutudi to (kanungu 69).

Tangila Saints, 1:51–61.

Ngenyi bua Kulonga ku Nzubu ne ku Ekelezia

Dilongesha ne Bipungidi 10:1–33

Nzambi kakulekela bua Satana akumbaja dilongolola dia bubi dienda.

Satana musua bua tupua moyo ne udi koku—anyi ne katumonu nansha kakesa midikija enda mudiwu atukoka (tangila 2 Nefi 28:22–23). Kadi mêyi a Mukalenga mu Dilongesha ne Bipungidi 10 adi ajadika ne Satana udi mulelela—ne udi ubenga bikola mudimu wa Mukalenga. Mu tunungu 1–33, leja tshidi Nzambi mumanya pa buenzeji bua Satana (tangila kabidi tunungu 62–63). Udi mua kukonka kabidi Mukalenga bua akuambuluisha bua kumona mushindu udi Satana mua kukuteta. Pawudi ubala tshitupa 10, nana meji pa mushindu udi Mupandishi mua kukuambuluisha bua kukandamana ku buenzeji bua Satana.

Dilongesha ne Bipungidi 10:34–52

“Lungenyi lua Mukalenga ludi lunena kupita budimu bua diabulu.”

Nefi kavua mumanya buatshinyi uvua mupeshibua meji bua kuenza mishiki ibidi ya miandiku ya bantu benda. Molomo kavua mumanya buatshinyi uvua mupeshibua meji bua kuangata mushiki muibidi ne bitata bia ngolo. Kadi bambi bonsu babidi bavua batuishibua ne Nzambi uvua ne “kipatshila ka lungenyi” (1 Nefi 9:5; Miaku ya Molomo 1:7). Lelu tudi bamanya ndambu wa tshitupa tshia kipatshila aka: kualuja mabeji 116 avua majimina a Mukanda wa Molomo. Tshinyi tshiudi wela meji tshidi Mukalenga musua bua ulonga ku bionsu ebi? Nana meji pa lukonku alu pawudi ubala Dilongesha ne Bipungidi 10:34–52. Udi mua kuenza kabidi mulongu wa malelela audi mulonga pa Mukalenga ku tunungu etu. Mushindu kayi udi malelela â alenga malanda eba nenda? Tshinyi tshidi tshikukemesha pa lungenyi ne lumonu lua ntanta bia Mukalenga mu didilongolola dia dijimina dia mabeji 116?

Udi mua kudiumvua kabidi mupeshibua meji bua kukeba tshijadikilu tshia lungenyi ne lumonu lua ntanta mu moyo weba. Bala mulubu wa mukenji wa Mukulu Ronald A. Rasband “By Divine Design”—bidi mua kunutuadila bilejilu (Liahona, Ngondu wa Dikumi ne Umua 2017, 55–57). Ela meji bua kubifunda padibi bienda bilua kuwudi. Mushindu kayi udi Mukalenga muenza mudimu mu moyo weba? Tshilejilu, “bikuma kayi bidi bu mpukampuka” bidiyi mulongolola? Bishimikidi kayi bidiyi muteka bua mabenesha eba? Diba kayi divuaye mukulombola bua kusadila muntu kampanda mu dijinga?

Tangila kabidi Lomo 8:28; Dilongesha ne Bipungidi 90:24; Biena Bualu ne Nkonku, “Plan of Salvation,” Tshisangi tshia Mikanda ya Lumu Luimpa.

Diumvuija ku Mormon Abridging the Plates [Molomo wenza Tshikosu tshia Bitata], kudi Tom Lovell

Dilongesha ne Bipungidi 11

“Eyemenayi kudi Nyuma wa [Mukalenga].”

Hyrum tutuenda wa Joseph uvua musumpakana bua kumanya disua dia Mukalenga buenda, wakalomba Joseph bua akeba dibuluila mu dîna dienda. Muambi uvua ne disanka bua kutshienza, kadi mukenji mukesa umua mu dibuluila adi (Dilongesha ne Bipungidi 11) udi ne Hyrum uvua mua kukeba dibuluila buenda nkayenda. Ne bidi bia momumua ne bonsu badi ne majinga mimpa, ne bela muela wabu bua kupola (kanungu 27). Pawudi ubala tshitupa 11, tshinyi tshiudi umvua tshidi Mukalenga ukulongesha pa dibuluila dia nkaya? Mushindu kayi udibi bipetangana ne bidiyi mulongesha Oliver Cowdery mu tshitupa 6–9? Mikenji mikuabu kayi idiyi nayi bueba?

Tangila kabidi “Let the Holy Spirit Guide,” Hymns, no. 143.

Bikila balongi bua bela nkonku. Nkonku idi ilombola misangu mivula ku dibuluila. Pawudi ulongesha dîku dieba anyi kalasa ka Ekelezia, bakolesha bua bela nkonku, ne bambuluisha bua bapeta mandamuna mu mifundu. Tshilejilu, padibu ne nkonku pa dibuluila dia nkaya, kebayi pamua mandamuna mu Dilongesha ne Bipungidi 11:12–14.

Dilongesha ne Bipungidi 11:15–26

Bu mundi nkeba bua kupeta dîyi dia [Nzambi], nempeta Nyuma wenda ne bukola.

Nansha kumpala kua Mukanda wa Molomo kuikala mukudimuna, Hyrum Smith uvua ne dijinga dia kuambuluisha mu mudimu wa Dipinguluja. Pawudi ubala diandamuna dia Mukalenga ku majinga enda, ela meji pa tshidi tshiumvuija kuwudi bua kupeta dîyi dia [Nzambi] (kanungu 21). Mushindu kayi udi dipeta dîyi dia Nzambi dikuambuluisha bua kumusadila ne bukola?

Bua ngenyi ya bungi, tangila malu a ngondu ewu a Liahona ne makazina a Bua Dikankamika dia Bansonga.

Ngenyi bua Kulongesha Bana

Dilongesha ne Bipungidi 10:5

Pandi nsambila diba dionsu, ndi mpeta dikankamana dia kudi Nzambi.

• Bua kutuadija dileja kanungu aka kudi bana beba, udi mua kubakonka pa bintu bidibu benza “diba dionsu”. Tshinyi tshidi Mukalenga wamba bua tuikala tuenza diba dionsu mu Dilongesha ne Bipungidi 10:5? Buatshinyi musua bua tutshienza?

• Mushindu kayi uwudi mua kuambuluisha bana beba bua bavuluka bua kusambila diba dionsu? Pamuapa badi mua kuangula mabua a makesa ne mapuluka ne kuzolapu “Dilongesha ne Bipungidi 10:5” anyi “Sambila Diba Dionsu.” Badi mua kuteka mabua abu mu miaba mishilangana idibu basua bua kuikala kuvuluka bua kusambila, bu mudi pabuipi ne bulalu buabu, ne mikanda yabu ya tshilongelu, anyi miaba idibu badila biakudia. Bilondeshila ku Dilongesha ne Bipungidi 10:5, mushindu kayi udi Nzambi utubenesha patudi tusambila? Bana beba badi mua kupeta mandamuna a nsakidilu mu musambu wa “A Child’s Prayer” (Children’s Songbook, 13).

Dilongesha ne Bipungidi 11:12–13

Nyuma wa Tshijila udi undombola bua kuenza buimpa.

• Bana badi mua kulonga bua kumanya diba didi Nyuma wakula kudibu. Bua kubambuluisha, udi mua kusokoka muinda mukesa anyi munena ne tshimfuanyi tshia mpala wa disanka muaba kampanda mu tshibambalu; pashisha ambila bana beba bua bapeta bintu ebi. Bala Dilongesha ne Bipungidi 11:13, ne ambuluisha bana beba bua baleja miaku idi ipetangana ne bintu bidibu bapeta. Miaku eyi idi ilongesha tshinyi pa mushindu udi Nyuma wa Tshijila utuambuluisha?

• Ditalangalaja dia mamanya a mu nyuma didi mua kuambuluisha bana beba bua kumanya bukoki bua Nyuma wa Tshijila mu mioyo yabu. Pawudi utangalaja, balomba bua babanya mamanya abu. Nudi mua kubala kabidi pamua Dilongesha ne Bipungidi 11:12–13, mu dikeba dia mushindu utudi mua kumanya padi Nyuma wa Tshijila utuludika. Jadika ne Tatu wa mu Diûlu mmusua kutuludika kupitshila kudi Nyuma wa Tshijila.

Dilongesha ne Bipungidi 11:21, 26

Ndi ne dijinga dia kumanya lumu luimpa bua ne ngambuluisha bakuabu bua kupeta bulelela.

• Anu bu Hyrum Smith, bana beba badi pamuapa mua kuikala ne mishindu ya bungi bua kutangalaja lumu luimpa ne bakuabu. Nudi mua kubala pamua Dilongesha ne Bipungidi 11:21, 26 ne kukonka bana beba bua bapeta tshidi Mukalenga muambila Hyrum enza bua alongesha lumu luimpa. Bua kupeta dîyi dia Nzambi, tshidi tshiumvuija tshinyi? Mushindu kayi utudi mua kutshienza? Mushindu kayi utudi mua “kubuta” dîyi dia Nzambi mu mitshima yetu? Pamuapa bana beba badi mua kuenza dinaya mu diabanyangana tshintu kampanda pa Yezu Kilisto anyi pa Mukanda wa Molomo ne bakuabu.

Bua ngenyi ya bungi, tangila nomba ya ngondu eu ya Mulunda.

Joseph ne Hyrum Smith, kudi Ken Corbett