A vakamasuti ratou na luvena o Ilamani, na tamai Nifai, me ratou “nanuma, nanuma.” A vinakata o koya me ratou nanumi ira na tubudratou, nanuma na nodra vosa na parofita, ka bibi duadua, nanuma na “noda Dauveivueti, o Karisito” (raica na Ilamani 5:5–14). Sa matata tu ni sa nanuma o Nifai, baleta na itukutuku vata ga oqo a cauraka o koya ena veiyabaki e muri vei ira na tamata “ka sega ni guce” (Ilamani 10:4. “Ko ni sa guilecava rawa vakacava na nomuni Kalou?” a taroga o koya (Ilamani 7:20). Na sasaga kece sara i Nifai—na vunau, masu, caka mana, kei na masuti ni dausiga vua na Kalou—sa ka eso me vukei ira na tamata ni gole vua na Kalou ka nanumi koya. Ena vuqa na gauna, na guilecavi ni Kalou esa leqa levu sara mai na Nona sega tu ni kilai. Ka sa rawarawa meda guilecavi Koya ni sa vagolei tani na noda vakasama ena “veika wale ni vuravura” ka ologi tu ena valavala ca (Ilamani 7:21; raica talega na Ilamani 12:2). Ia, me vaka sa vakaraitaka na ilesilesi i Nifai, e sega tu ni bera meda nanuma ka “saumaki mai vua na Turaga na nomuni Kalou” (Ilamani 7:17).
Era vakatakila na parofita na loma ni Kalou vei ira na tamata.
Ilamani 7–11 e sa vanua vinaka saraga me vulici kina na ka era cakava na parofita. Nio wilika na veiwase oqo, raica matua na cakacaka, vakasama, kei na veimaliwai i Nifai kei na Turaga. Sa vukei iko vakacava na ilesilesi i Nifai mo kila vakamatata kina na nodra itavi na parofita? Oqo e vica na ivakaraitaki. Na cava tale o sa raica?
Ilamani 7:17–22: Era tagicaka na veivutuni na parofita ka vakarota na isau ni valavala ca.
Mai na veika o sa wilika, o na vakamacalataka vakacava na parofita kei na ka e cakava? Navuca ni vola e dua na vakamacala lekaleka. Qai raica na cava o na vakuria ki na nomu vakamacala ni wiliki oti na icurucuru ni “Parofita” ena iDusidusi ki na iVolanikalou (Valenivola ni Kosipeli) se “Muria na Parofita Bula” (Nodra iVakavuvuli na Peresitedi ni Lotu: Ezra Taft Benson [2014], 147–55).
O siqema li na doudou i Nifai ena Ilamani 7:11–29? Cava na vuna o nanuma kina ni sa dodonu mera vosa doudou ena so na gauna na parofita me vaka a cakava o Nifai? Navuca ni vakaraica na isaunitaro ena wase ka kena ulutaga “Kakua ni Kurabui” ena itukutuku i Elder Neil L. Andersen “Na Parofita ni Kalou” (Liaona, Me 2018, 26).
Ni nanumi tu ni veika dina oqo, vakasamataka vagumatua na sala esa vakalougatataki iko kina na Turaga ena nodra ilesilesi na Nona parofita. Na cava sa vakavulica vei iko o Koya wale toka ga qo mai vua na noda parofita bula? Na cava o sa cakava tiko mo rogoca ka muria tu na veidusimaki ni Turaga?
Raica talega na Ulutaga ni Kosipeli, “Parofita,” Valenivola ni Kosipeli.
Na noqu vakabauti Jisu Karisito sa dodonu me taracake vakalevu mai na vakatakilakila kei na caka mana walega eso.
Ke sa rauta me veisautaka na yalo ni dua na tamata na vakatakilakila se caka mana eso, era sa na saumaki tu na Nifaiti taucoko ena vakatakilakila vakasakiti eso a solia o Nifai ena Ilamani 9. Ia a sega ni yaco oya. Siqema na sala eso era raimuria kina na tamata na caka mana ena Ilamani 9–10. Me ivakaraitaki, o rawa ni vakatauvatana na sausaumi ni lima na turaga kei na turaganilewa levu ena Ilamani 9:1–20 (raica talega na Ilamani 9:39–41; 10:12–15). Na cava o sa vulica mai na veika oqo ena kena taraicake na nomu vakabauti Jisu Karisito?
Na Turaga sa vakaukauwataki ira na tamata ka qara na Lomana ka segata me muria na Nona vunau.
Ni o vulica na Ilamani 10:1–12, siqema na ka a cakava o Nifai me rawata kina na veivakabauti ni Turaga. A vakaraitaka vakacava o koya ni sa qara na loma ni Turaga mai na nona vakai koya? Na cava sa vakauqeta na ka a sotava o Nifai mo cakava?
Sa sureta na vakatakila na tugani ni vosa ni Kalou.
Ni ko lomabibi tu, lomaleqa, se veilecayaki, o rawa ni vulica e dua na lesoni bibi mai na ivakaraitaki i Nifai ena Ilamani 10:2–4. Na cava a cakava o koya ni sa “vakayalomalumalumutaki” tu? (tikina e 3).
A vakamacalataka o Peresitedi Henry B. Eyring, “Ni da tugana, eda sureta na vakatakila mai na Yalotabu” (“Veiqaravi ena Yalotabu,” Liaona, Nove. 2010, 60). O na vakamatautaki iko vakacava ena tugatugani?
O dau nanuma vakacava na itukutuku bibi—vaka na siganisucu se macala ni veitarogi ni dua na lewe ni matavuvale? E tautauvata vakacava oqo ki na sasaga e gadrevi tu meda “nanuma na Turaga”? (Ilamani 12:5). E duidui tu vakacava?
Ilamani 12 e vakamacalataka e vica na ka e vakavuna mera guilecava kina na Turaga na tamata. De na rawa ni o volai ira ka vakasamataka vagumatua se rawa ni ra na vagolei iko tani tu mai Vua. Na cava sa vukei iko ni nanumi Jisu Karisito tu? Na cava o so vakauqeti ni cakava mai na ka o sa vulica tu?
Vakayagataka na lesoni vakaraitaki. Sa dau semata wasoma na iVakabula na ivakavuvuli ni kosipeli ki na veika ni veisiga e matata tu vei ira na tamata. Ni vulici se vakatavulici na Ilamani 12:1–6, o rawa ni vakatauvatana “na [nodra] sega ni dei na tamata” ki na ka eda vakila ni sagai tu meda tu dodonu ena dua na yava. E rawa vakacava ni da tudei tu vakayalo?
Me baleta na vakasama tale eso, raica na ilavelave ni vula oqo ni Liaona kei na mekasini Me iSakisaki ni iTabagone .
Me tekivutaki na veivosaki ni kena nanumi tu na Turaga, o rawa ni tukuna vei ira na luvemu na gauna o a guilecava kina e dua na ka. Me ra qai wasea vakai ira na veika vataga oya. Ni qai wilika vata na Ilamani 7:20–21 ka taroga na nodra nanuma na luvemu ena ibalebale ni guilecava na Kalou. Rawa ni ra droinitaka tu na luvemu na yaloyalo ni ka eso e rawa ni vakavuna noda guilecava na Turaga ka vakayagataka na nodra droini me ubia e dua na yaloyalo kei Jisu. Sa rawa ni ra qai vakasamataka na veika era rawa ni cakava ni nanumi Koya kina. Ni ra wasea tu na nodra vakasama, sa rawa ni ra kauta tani na droini yadudua me yacova ni sa vakatakilai na yaloyalo ni iVakabula.
Vukea na luvemu mera vakasaqara na Ilamani 8:13–23 mera raica na yaca ni parofita eso ka vakatavulici Jisu Karisito. Rawa ni ra veisoliaka tu na yaloyalo kei Jisu ena veigauna era raica kina e dua. Na cava sa vakatavulica na noda parofita bula me baleta na iVakabula?
Ni rawa ni lagata vata talega e dua na sere ni parofita, vaka na “Follow the Prophet” (Children’s Songbook, 110–11). Rawa ni o digitaka kei ira na luvemu e dua na malanivosa momona mai na sere ka vola e dua na vosa mai na malanivosa ena vica na mawe ni yava pepa yadua. Mo qai biuti ira na mawe ni yava ena vuloa e mua tu ki na yaloyalo ni iVakabula, ka rawa ni ra muri mawe ni yava na luvemu ki na yaloyalo. E sa muataki keda vakacava vei Jisu Karisito na muri tu ni parofita?
Sa sureta na vakatakila na tugani ni vosa ni Kalou.
Me vukei ira na luvemu ena ibalebale ni tugana, ni rawa ni wilika vata na “Tugana” ena iDusidusi ki na iVolanikalou (Valenivola ni Kosipeli). Na cava eso tale na vosa e tautauvata kei na tugana? De rawa ni wiliki vata na Ilamani 10:1–3 ka sosomitaka na vosa tugana ki na vosa tale eso oqori. Veivosakitaka kei ira na luvemu na sala eso mera caka tugatugani kina me tiki ni nodra vulica na ivolanikalou.
A talairawarawa o Nifai kivua na Tamada Vakalomalagi ena gauna mada ga e vakayacori kina na ka dredre. Me ivakaraitaki ni ka oqo, o rawa ni wilika kei ira na luvemu na Ilamani 10:2, 11–12. De na rawa ni ra vakatakarakarataka na luvemu na ka a cakava o Nifai—lako ki na dua na yasa ni rumu (me vaka era sa gole tiko ki vale), tu vakadua, vuki, ka lako ki na yasa kadua ni rumu (me vaka era sa lesu tiko me ra vakatavulici ira na tamata). Na cava eso na ka e vinakata na Tamada Vakalomalagi me da cakava?
Me baleta na vakasama tale eso, raica na ilavelave ni vula oqo ni mekasini Friend .
iVakatakilakila
Sa kilai tu o Sianitumu me daulaba
Ena isolisoli ni parofisai, sa walia kina o Nifai na labati ni turaganilewa levu.