Sepiteba 9–15: “iTukutuku Vinaka ni Reki Levu Sara.” Ilamani 13–16.
“Sepiteba 9–15: ‘iTukutuku Vinaka ni Reki Levu Sara’ Ilamani 13–16,” Lako Mai, Mo Muri Au—Me Baleta na iTikotiko kei na Lotu: iVola i Momani 2024 (2023)
“Sepiteba 9–15. Ilamani 13–16,” Lako Mai, Mo Muri Au—Me Baleta na iTikotiko kei na Lotu: 2024 (2023)
iVakatakilakila
Veivakavulici tu o Samuela na Leimanaiti ena bai
Samuela na Leimanaiti ena Bai, mai vei Arnold Friberg
Sepiteba 9–15: “iTukutuku Vinaka ni Reki Levu Sara.”
Na matai ni gauna a via saga kina o Samuela na Lemanaiti me wasea na “itukutuku vinaka” e Saraemala (Ilamani 13:7), a sega ni ciqomi o koya ka vakasavi tani mai vei ira na Nifaiti yalo kaukauwa. O rawa ni kaya ni sa vaka era tara tu e dua na lalaga tawacurumi rawa e lomadra ka sa tarovi ira ni ciqoma na itukutuku i Samuela. Sa kila dei tu o Samuela na bibi ni tukutuku e tukuna ka vakaraitaka na vakabauta ena muri ni vunau ni Kalou “me lako yani ka parofisaitaka” (Ilamani 13:3). Vakataki Samuela, eda sotava kece tu na lalaga ni da “caramaka na sala na Turaga” (Ilamani 14:9) ka segata ni muri ira na Nona parofita. Ka vakataki Samuela, eda vakadinadinataki Jisu Karisito talega, “o koya ena lako vakaidina mai,” ka sureta na tamata kecega me “vakabauta na yacana” (Ilamani 13:6; 14:13). Ena sega ni vakarorogo na tamata kecega, ka so ena saqati keda saraga. Ia o ira ka vakadinata na itukutuku oqo ena vakabauti Karisito sa raica ni sa “itukutuku vinaka ni reki levu sara” (Ilamani 16:14).
Sa soli ivakaro na Turaga mai vei ira na Nona parofita.
Ena ivolanikalou, era sa dau vakatauvatani na parofita kivei ira na ivakatawa ena bai se vale cere ka vakarota na veika rerevaki (raica na Aisea 62:6; Isikeli 33:1–7 Nio vulica na vosa i Samuela ena Ilamani 13, navuca na sala esa vaka tu kina na ivakatawa o koya kivei iko. Na cava a kaya o koya e vaka me veiganiti tu ki na noda gauna? (raica vakabibi na tikina e 8, 21–22, 26–29, 31, kei na 38). Me ivakaraitaki, na cava a vakatavulica o Samuela me baleta na veivutuni? baleta na yalomalumalumu kei na iyau? me baleta na qarai ni bula marau “ena caka cala”?
O rawa ni raica talega na itukutuku ni koniferedi sa oti ena ivakaro vata ga sa solia na Turaga vei ira na parofita ni gauna oqo. Na cava o sa vakauqeti ni cakava tu ena veivakaro oqo?
Vakaraica na ivakarau. Na ivakarau sa dua na ituvatuva se vakatakarakara e rawa ni vakayagataki me idusidusi ni kena rawati e dua na itavi. Ena ivolanikalou, eda raica na ivakarau eso e vakaraitaka na sala e rawata kina na Turaga na nona cakacaka, vaka na lako yani ni Nona italai mera vakaroti ira na tamata.
iVakatakilakila
sara koniferedi raraba tiko na matavuvale
Nida rogoci ira na parofita, era na dusi Jisu Karisito tu
Na ivakaro i Samuela ena veilewai ni Kalou sa okati vata tu na veisureti loloma veivueti ni veivutuni. Vakaraica na veisureti oqo ena Ilamani 13–15 (raica vakabibi na Ilamani 13:6–11; 14:15–19; 15:7–8). Na cava o sa vulica mai na veitikina oqo me baleta na veivutuni? Eso na tamata e raica ni veivutuni me dua na itotogi kaukauwa—e dua na ka me levei. Ena nomu nanuma, a vinakata ira vakacava na Nifaiti o Samuela ni raica na veivutuni?
Me vaqaqacotaka na nomu vuli, rawa ni o wilika na itukutuku i Peresitedi Russell M. Nelson “Rawa ni Da Caka Vinaka ka Vinaka Tu” (Liaona, Me 2019, 67). E vakamacalataka vakacava o koya na veivutuni? Na veivakalougatataki cava so ni veivutuni vakaidina o raica tu ena nona itukutuku? O rawa talega ni vakaraica na veika vakatabakidua sa sureta tu na parofita meda veisautaka. Na cava esa tukuna tiko vei iko na Yalo Tabu sa gadrevi mo veisautaka? Navuca ni vola tu na nomu vakatakila o sa ciqoma.
E duidui vakacava na veivutuni mai na veisau wale tu ga ni nomu itovo? Cava na vuna e bibi kina me vakadonui na veisureti ni Kalou meda veivutuni? Ni vakasamataki tu oqo, navuca ni lagata se rogoca na serenilotu e vakamacalataka na veisureti oqo, vaka na “Lawa ni Turaga” (Sere ni Lotu, naba 69).
Sa vakauta mai na Kalou na vakatakilakila kei na ka veivakurabuitaki eso me vakadinadinataka na sucu kei na mate ni iVakabula.
Ena Ilamani 14, a vakamacalataka o Samuela ni sa vakarautaka na Turaga na vakatakilakila eso ni sucu kei na mate ni iVakabula me ra “kila na [tamata] … na nona lako mai” ka “vakabauta na yacana” (Ilamani 14:12). Ni ko vulica na Ilamani 14, raica na vakatakilakila eso ni sucu ni iVakabula ena tikina e 1–8 kei na vakatakilakila eso ni Nona mate ena tikina e 20–28. Cava na vuna o nanuma kina ni ra sa sala vinaka na vakatakilakila oqo me vakadeitaka na sucu kei na mate i Jisu Karisito?
Eso tale na vakatakilakila levu vakatamata ka kilai vakalailai tu sa rawa ni vukei iko ni “vakabauta tu na yaca [ni iVakabula].” Na cava sa cakava o Koya me vaqaqacotaka na nomu vakabauti Koya?
Na vakaro cava sa soli me baleta na vakatakilakila eso ena Ilamani 16:13–23? O na levea vakacava na ivakarau ni tamata e vakamacalataki tu ena veitikina oqo?
Na veivunauci ni Turaga sa ivakatakilakila ni Nona loloma.
E tiko ena vosa i Samuela e vuqa na veivunauci bibi, ia na Ilamani 15:3 sa vakamatatataka vei keda na veivunauci ni Turaga. E rawa ni vakatakilakila vakacava ni Nona loloma na veivunauci ni Turaga? Na vakadinadina cava o raica tu ena loloma kei na loloma veivueti ni Turaga ena parofisai kei na vakaro eso i Samuela?
Navuca ni vulica na itukutuku i Elder D. Todd Christofferson “O Ira Kecega Au sa Lomana, Au sa Cudruva ka Vunauca” (Liaona, Me 2011, 97–100), ni vakaraici e tolu na inaki ni veivunauci vakalou. Na gauna cava o sa bau raica ni cakacaka kina vakaoqo na Kalou ena nomu bula?
Ena Ilamani 16, na cava o vulica tu mai vei ira ka ciqoma na ivakavuvuli i Samuela? Na cava o vulica tu mai vei ira ka vakanadakui koya? Vakasamataka na sala esa vukei iko kina na nodra muri na parofita bula mo toro volekati Jisu Karisito.
Me baleta na vakasama tale eso, raica na ilavelave ni vula oqo ni mekasini Liaona kei na Me iSakisaki ni iTabagone .
O rawa ni vakatavulici ira vakacava na luvemu ni sa rawa ni vosa ki lomada na Kalou, me vaka a cakava vei Samuela? De rawa ni o kerea me ra vakaraitaka vei iko na sala duidui eso mo veitaratara kina ni sega na vosa (vaka na imoimoi se irairai ni mata). E rawa ni mua oqo kina veivosakitaki ni sala duidui eso e veitaratara kina kei keda na Tamada Vakalomalagi. Me tiki ni veivosaki oqo, sa rawa nio raica kei ira na luvemu na yaloyalo kei Samuela na Leimanaiti (e rua na ituvatuva oqo) ka wilika na Ilamani 13:2–5 ni rogoca na luvemu na sala a tukuna kina na Kalou vei Samuela na ka me kaya.
E vuqa vei keda—vakabibi na gonelalai—sa gadreva na veivuke ena vulici ni kena vakilai na sala kei na gauna e vosa kina vei keda na Kalou. O rawa ni tukuna vei ira na luvemu na gauna a vukei iko kina na Yalo Tabu mo kila ena vunilomamu na ka e vinakata vei iko na Kalou mo kitaka se tukuna. Vakamacalataka na sala o kila kina ni sa veivosaki tiko kei iko na Kalou. De rawa ni wasea talega na luvemu na veika vata ga era sa sotakaya.
Na lagati vata ni “Samuel Tells of the Baby Jesus” (Children’s Songbook, 36) sa sala vinaka ni nodra vulica na luvemu na ka a vakatavulici Jisu Karisito kina o Samuela. Na wasei ni “Wase 40: Sa Tukuni Jisu Karisito o Samuela na Leimanaiti” (iTalanoa ni iVola i Momani, 111–13) sa dua tale. Na cava a vakatavulica o Samuela me baleta na iVakabula? De rawa talega nio wasea na ka era vakatavulica na parofita ni gauna oqo me baleti Koya. E tara vakacava na noda vakabauti Koya na nodra vosa?
O rawa ni tara na nodra veivakabauti na luvemu kivua na parofita ena kena vakaraitaki vei ira na ivakaraitaki ni tamata eso ka yalodina tu. Eso oqo sa kune ena Ilamani 16:1, 5. Ni ko wiliwili, rawa ni ra tucake na luvemu ni ra rogoca e dua na ka era cakava na tamata ni ra vakabauta tu na vosa i Samuela. Nio wilika na tikina e 2 kei na 6, sa rawa ni dabe sobu na luvemu ni ra rogoca e dua na ka era cakava na tamata ni ra sega ni vakabauta tu. E rawa vakacava ni da vakaraitaka ni da vakabauta na vosa ni parofita bula? Tukuna vei ira na gone na sala o sa vakalougatataki kina ni o muria na vakasala ni Turaga mai vei ira na Nona parofita.
Me baleta na vakasama tale eso, raica na ilavelave ni vula oqo ni mekasini Friend .