“20–26 ni Me: ‘Eda sa Ia Oqo ena Veiyalayalati kei Koya.’ Mosaia 18–24,” Lako Mai, Mo Muri Au—Me Baleta na iTikotiko kei na Lotu: iVola i Momani 2024 (2024)
“20–26 ni Me. Mosaia 18-24,” Lako Mai, Mo Muri Au—Me Baleta na iTikotiko kei na Lotu: 2024 (2024)
Minerva Teichert (1888-1976), Escape of King Limhi and His People1949-1951, iboro ena mesanaiti, 35 7/8 x 48 na idi. Vale ni Maroroi Cakacakaniliga e Brigham Young University, 1969.
20–26 ni Me: Eda sa Ia Oqo na Veiyalayalati Kei Koya
Mosaia 18–24
Na itukutuku i Alama kei na nona tamata ena Mosaia 18; 23–24 e vakaraitaka nai balebale ni “curu ki na lomanibai ni Kalou” (Mosaia 18:8). Ena gauna era sa papitaiso kina na tamata i Alama, era a cakava na veiyalayalati kei na Kalou me ra “qaravi koya ka muria na nona ivunau” (Mosaia 18:10 E dina ni oqo na cakacaka ni yalayala bibi ni tamata yadua vua na Kalou, e tiki talega ni sala mera na veimaliwai vinaka kina vakai ira. Io, na lakolako lesu vua na Tamada Vakalomalagi sa ka ni tamata yadua, ka sega tale ni dua ena maroroya na veiyalayalati ena vukuda, ia e sega ni kena ibalebale oya nida tiko taudua. Eda sa veigadrevi vakai keda. Oi keda na lewe ni Lotu i Karisito, eda sa veiyalayalati meda qarava na Kalou ena noda veivukei ka veiqaravi ena ilakolako oqo, “[meda] colata vata na noda icolacola” (Mosaia 18:8–10). E a tiko dina na nodra icolacola na tamata i Alama, me vakataki keda kecega. Ka dua na sala e vukei keda kina na Turaga me “rawarawa vei [keda] na nod[a] icolacola” (Mosaia 24:15) oya na nona solia vei keda e dua na mataitikotiko ni Yalododonu era sa yalataka mera rarawa kei keda ka vakacegui keda, me vaka ga eda sa yalataka nida na cakava vei ira.
Raica talega na “The Lord Delivers the Covenant Peoples of Alma and Limhi” (vidio), Gospel Library.
Vakasama eso ni Vuli ena iTikotiko kei na Lotu
Niu sa papitaiso, au sa vakayacora e dua na veiyalayalati kei na Kalou.
Vakasamataka na titobu ni nodra nanuma na tamata vakabauta ena Mosaia 18 me baleti Jisu Karisito. Era a qai sota vuni tiko, ena ririko levu, me ra vulica na veika e baleti Koya (raica na tikina e 3). Ni soli vei ira na madigi me ra vakaraitaka na nodra yalodina ena veiyalayalati ni papitaiso, “era sa vakasausau ena marau, ka ra kailavaka: Sa vakaoqo na gagadre ni lomai keimami” (Mosaia 18:11).
Na wiliki ni veitikina oqo e rawa ni dua na madigi vinaka mo vakasamataka vakatitobu na kena bibi vei iko na nomu veiyalayalati. Ni o vulica mada na Mosaia 18:8–14 vakasamataka na taro vakaoqo:
-
Na cava o vulica mai na veitikina oqo baleta na yalayala eso o vakayacora ena papitaiso? Na cava e yalataka vei iko na Kalou? (raica na tikina e 10, 13).
-
E vakaveiwekanitaki vakacava na noda veiyalayalati meda qarava na Kalou ki na noda sasaga meda veiqaravi vakai keda? (raica na tikina 8–9)
-
Na cava na kena ibalebale vei iko mo “tu mo [ivakadinadina] ni Kalou”? (tikina e 9).
-
E vukei iko vakacava na maroroi ni nomu veiyalayalati ni papitaiso mo “vakasinaiti ena Yalotabu”? (Mosaia 18:14). E vukei iko vakacava na Yalotabu mo maroroya na nomu veiyalayalati?
Na saumi ni veitaro oqo ena rawa ni muataki iko mo vakasamataka vakatitobu na vuna e bibi kina vua na Kalou na veiyalayalati kei na cakacaka vakalotu. Sa rawa mo raica na veivakararamataki e tiko ena itukutuku nei Elder Gerrit W. Gong “Taukeni Veiyalayalati” (Liaona, Nove. 2019, 80–83) se itukutuku nei Peresitedi Jean B. Bingham “Na Veiyalayalati kei na Kalou e Vakaukauwataki, Taqomaki, ka Vakarautaki Keda ki na Tawamudu Lagilagi” (Liaona, Me 2022, 66–69). Na cava na vuna o vakavinavinakataka kina na nomu veiyalayalati? Na cava o sa cakava mo maroroya tiko na nomu yalayala?
Raica talega na Ulutaga Vakosipeli, “Baptism,” Gospel Library; “Alma the Elder Teaches and Baptizes at the Waters of Mormon” (vidio), Gospel Library.
Vakavuvulitaka na dina mai na ivolanikalou kei ira na parofita edaidai. Ni o veivakavulici—ka vulica—nanuma tiko ni dua vei ira na sala vinaka duadua me vakalevutaki cake kina na vakabauti Karisito sai koya mo vakanamata ena ivolanikalou kei na nodra vosa na parofita edaidai (raica na Mosaia 18:19).
Sa vakaroti ira na Nona tamata na Kalou me ra vakasoqoni ira vata, veituvanaki, ka duavata.
Eso era vakataroga voli, na vuna eda gadreva kina na lotu? Vakasaqaqara ena Mosaia 18:17–31, ka vaqara na kedra yaga na tamata i Alama e kune ena nodra vakasoqoni vata ena “lotu i Karisito” (Mosaia 18:17). Na veika tautauvata cava o raica ena Lotu i Jisu Karisito ena gauna nei Alama kei na noda gauna oqo?
Na cava o na kaya vua e dua na itokani se lewe ni matavuvale ka sega ni vakabauta ni gadrevi e dua na lotu vakaituvatuva? Na cava na vuna o vakavinavinaka kina ni o lewena na Lotu i Jisu Karisito?
Vakasamataka na cava o rawa ni cakava mo vukei ira na lewe ni nomu tabanalevu se tabana me “semati na lomadra ena duavata kei na veilomani” (Mosaia 18:21).
Raica talega na Dallin H. Oaks, “Na Gagadre me Dua na Lotu,” Liaona, Nove. 2021, 24–26; “Love One Another,” Serenilotu, naba 308.
E vukei au na Kalou meu colata na noqu icolacola.
Era a yaco mera bobula vesuki na tamata i Limiai kei na tamata i Alama, e dina ga ni duidui nai ituvaki ruarua. Na cava o vulica ni o vakatautauvatataka na itukutuku ni tamata i Limiai ena Mosaia 19–22 kei ira na tamata i Alama ena Mosaia 18; 23–24 Ni o cakava oqo, vakasaqara na itukutuku e rawa ni yaga ki na nomu bula. Me ivakaraitaki, na cava na kena ibalebale na “sautu tale tiko mai vakamalua”? (Mosaia 21:16). O na bulataka vakacava na ivakavuvuli oqo?
Au rawa ni nuitaka na Turaga.
E dina ga ni ra sa veivutunitaka na nodra ivalavala ca, era se raica tu ga o Alama kei ira na nona tamata ni ra tu ga vakabobula vesuki. E vakaraitaka na veika era sotava ni noda nuitaka na Turaga kei na noda bulataka tiko na noda veiyalayalati e sega ni kauta laivi na noda ibolebole, ia e vukei keda meda uabaleti ira. Ni o wilika na Mosaia 23:21–24 kei na 24:8–17, toqa toka na vosa kei na veimalanivosa ena rawa ni vukei iko mo vulica mo nuitaka ga na Kalou, veitalia se ituvaki cava o tu kina.
Raica talega na David A. Bednar, “Colata na Nodra iColacola ena Loloma,” Liaona, Me 2014, 87–90.
Vakasama ni Nodra Tuberi na Gonelalai
Niu sa papitaiso, au sa vakayacora e dua na veiyalayalati kei na Kalou.
-
E dua na sala bibi duadua mo vukei ira kina na luvemu ena nodra vakarau me ra papitaiso sai koya me ra vakavulici baleta na veiyalayalati era na cakava ni ra papitaiso. Oqo e rawa ni rawarawa me vaka na kena vakaraitaki na iyaloyalo ena mua ni ituvatuva ni macawa oqo ka wilika vata kei ira na veiyalayalati ena Mosaia 18:9–10. Sa rawa mo sureta e dua na gone sa papitaiso oti me vakavulica oqo vei ira na gonelalai sobu. Era na taleitaka na luvemuni mera rogoca na nomuni a papitaiso. Sa vakalougatataka vakacava na nomu bula na nomu maroroya na nomu veiyalayalati kei na Kalou?
-
O ira na gone era sa papitaiso era rawa ni vakayagataka na veivakananumi wasoma me baleta na veiyalayalati era sa cakava ka vakavouya ena veimacawa ena sakaramede. Sa rawa vei ira na luvemu mera vakatauvatana na veiyalayalati ni papitaiso e vakamacalataki ena Mosaia 18:8–10 vata kei na masu ni sakaramede (raica na Vunau kei na Veiyalayalati 20:77,79) E rawa vakacava ni da cakava na sakaramede me gauna taleitaki sara, gauna rokovi, me vaka ga na gauna eda papitaiso kina?
Eda veiyalayalati kei na Kalou ena gauna eda papitaiso kina.
Ena gauna au sa paitaiso kina, au sa lewena na Lotu i Jisu Karisito.
-
Era sa kila tiko beka na luvemu na cava na ibalebale mo lewe ni Lotu i Jisu Karisito ni Yalododonu Edaidai? Sa rawa mo vukei ira mera raica na iyaloyalo e matataka na veika era a cakava na lewe ni Lotu ena Mosaia 18:17–28. Me vakataka, na iyaloyalo ni Veitabaki ki na Matabete kei na Saumi iKatini (iVola ni iYaloyalo ni Kosipeli, naba 106, 113) e rawa ni matataka na tikina e 18 kei na 27–28. Tukuna vei ira na vuna o vakavinavinakataka kina ni o sa lewena na Lotu i Jisu Karisito.
-
Nodra vukei na gone me ra vakila na “semati vata ena duavata kei na veilomani” (Mosaia 18:21) e vukei ira me ra sema tikoga ki na Lotu ena nodra bula taucoko. Sa rawa mo sureti ira na luvemu mera wilika na Mosaia 18:17–28. Na cava era a cakava na lewe ni Lotu i Karisito ena gauna i Alama me ra veilomani ka veiqaravi vakataki ira? E rawa vakacava ni da cakava oqo ena noda tabanalevu, tabana, se itikotiko raraba? E dua na sere me baleta na loloma, me vaka na “I’ll Walk with You” (Nodra Sere na Lalai, 140), e rawa ni vakusakusataka na itukutuku oqo.
E rawa ni vakamamadataka na noqu icolacola na Kalou.
-
E dua na lesoni vakaraitaki rawarawa e rawa ni vakavuna me daunanumi tu ga na vuli. Vakasinaita e dua na taga ena veiyaya bibi (me matataka na icolacola), ka sureta e dua na gone me taura na taga. Ni o wilika na Mosaia 24:8–17 vata kei ira na luvemu, kerei ira me ra kauta laivi e dua na iyaya mai na taga ena veigauna yadua era rogoca kina e dua na ka a cakava o Alama kei ira na nona tamata me ra vakasaqara na veivuke ni Kalou ena nodra icolacola. Mo qai veivosakitaka vata kei ira na sala e rawa ni vakamamadataka kina na Tamada Vakalomalagi na noda icolacola ni da vakasaqara na Nona veivuke.
Me ikuri ni vakasama tale eso, raica na ilavelave ni vula oqo ena iTokani ena kena mekasini.
Na Wai ko Momani, mai vei Jorge Cocco