Sa vakavulici Tui Limiai o Amoni

Minerva Teichert (1888-1976), Ammon before King Limhi, 1949-1951, iboro ena mesanaiti, 35 15/16 x 48 idi. Vale ni Maroroi Cakacakaniliga e Brigham Young University, 1969.

6–12 ni Me: “Ena Kaukauwa ni Turaga”

Mosaia 7–10

Ena gauna era marautaka tiko kina na “sautu” na tamata nei Mosaia na Tui e Saraemala (Mosaia 7:1), a vagolei na nodra vakasama ki na dua tale na ilawalawa ni Nifaiti, o ira era a biubiu ena vuqa na yabaki yani ki liu mera lai tiko ena vanua o Liai-Nifai. E sa oti yani e vuqa na itabagauna, ka sega ni ra rogoca e dua na ka o ira na tamata i Mosaia mai vei ira oqo. Sa qai kerei Amoni kina o Mosaia me liutaka e dua na lawalawa me vakasaqarai ira na Nifaiti era a lako yani oya. Era kunei ira na Nifaiti oqo o iratou na ilawalawa oqo,ni ra sa vesuki tu vei ira na Lemanaiti, ka “vu kece oqo mai na caka cala” (Mosaia 7:24). Ia, ni ratou yaco yani o Amoni kei iratou na tacina, sa basika vakasauri kina na inuinui ni veisereki.

Ena so na gauna eda vakataki ira na Nifaiti vesuki oqo, eda vakararawataki baleta na noda ivalavala ca, ka da raitayalotaka tu meda na kunea vakacava tale beka na vakacegu. Ena so na gauna eda vakataki Amoni, eda vakila na veivakauqeti meda dolele yani vei ira eso ka da qai raica e muri ena noda sasaga oqori eda vakauqeti ira me ra “laveta cake na ulu[dra], ka marau, ka [mera] vakararavi vua na Kalou” (Mosaia 7:19). Se vakacava sara na kedra ituvaki, eda gadreva kece meda veivutuni ka “vuki vua na Turaga ena loma[da] taucoko,” ena vakabauta “ena … sereki [keda] ko Koya” (Mosaia 7:33).

Vakasama eso ni Vuli ena iTikotiko kei na Lotu

Mosaia 7:14–33

E tu vei Jisu Karisito na kaukauwa me vueti au.

Ena nona a sotavi Amoni o Limiai na Tui a solia vua na inuinui, ka vinakata me solia na inuinui oya vei ira na nona tamata. E rairai rawa ni solia talega vei iko na inuinui na nona vosa. Me kena itukutuku, sa rawa mo railesuva na kedra ituvaki na tamata i Limiai ena Mosaia 7:20–25. Qai vakasamataka vakatitobu na veitaro oqo ni o wilika na Mosaia 7:14–33:

• Na cava e kaya o Limiai me vaqaqacotaka na nodra vakabauta kei na vakanuinui vei Karisito na nona tamata?

• Na malanivosa cava e vukei iko mo vakila na inuinui? (raica na tikina e 19, 33).

• Na veika cava soti o sa sotava sa vukei iko mo nuitaka ni na rawa vua na Kalou me sereki iko?

Raica talega “Na Noda iVakabula,” Sere ni Lotu, naba 5.

Mosaia 7:26–27

Au a buli meu “ucuya na Kalou.”

Ena Mosaia 7:26–27, a vakamacalataka o Limiai eso na dina e vakavuvulitaka o Apinatai. Na dina cava o rawa ni raica ena veitikina oqo? Era vakayaco-ka vakacava na dina oqo ena sala o raica kina na Kalou vakakina o iko?

Raica talega na Russell M. Nelson, “Your Body: A Magnificent Gift to Cherish,” Liaona, Oko. 2019, 50–55.

ivakatakilakila ni semineri

Mosaia 8:13–19

E vakarautaka na Turaga na parofita, daurairai, ka dauvakatakila me vinaka ki na kawatamata.

Ena gauna a rogoca kina na ivakadinadina i Amoni o Limiai ni sa solia na Turaga e dua na daurairai, sa “marau vakalevu sara na tui, ka vakavinavinaka vua na Kalou” (Mosaia 8:19). Na cava o nanuma ni vakakina oya na veika a vakila? Na cava o vulica me baleti ira na daurairai mai na vosa i Amoni ena Mosaia 8:13–19

Nikua, eda sa tokoni ira na lewe ni Mataveiliutaki Taumada kei na Kuoramu ni iApositolo Le Tinikarua ni ra sa parofita, daurairai, ka daunivakatakila. Era sa “yaga vakalevu” vakacava vei iko? (Mosaia 8:18). Na cava era sa vakavulica vei iko baleti Jisu Karisito?

Ena rawa vakacava, me vakataki Amoni, mo vosa doudou baleta na kena gadrevi o ira na parofita, daurairai, kei na daunivakatakila? (raica na Mosaia 8:13–18 Me vakataka, na cava o rawa ni wasea ki na nomu matavuvale se ena itukutuku raraba me baleta:

• Na dina era sa vakalesui mai ena noda gauna oqo mai vei Joseph Smith kei ira tale eso na parofita ni Turaga (me vaka na ituvaki ni Kalou, na keda ivakatakilakila vakalou, se na ituvaki tawamudu ni matavuvale). Na railesuvi ni “Na Vakalesuimai ni Taucoko ni Kosipeli i Jisu Karisito” se “Na Matavuvale: Ai Vakaro ki Vuravura Raraba” (Gospel Library) ena vukea mo vakasamataka eso na dina oqo.

• Na veivakalougatataki ni ivakaro se cakacaka vakalotu (me vaka na Vosa ni Vuku, na lawa ni tiko savasava, se vauci ni matavuvale).

Ena vula sa oti, eda a rogoci ira na parofita, daurairai, ka dauvakatakila ena koniferedi raraba. Na itukutuku cava e vakauqeti iko? Na cava o na cakava me duatani mai na veika o sa vulica? Na cava era kaya na daurairai ni Turaga me baleta “na veika ena yaco mai”? Mosaia 8:17

Raica talega na Gospel Topics, “Prophets,” Gospel Library.

Mosaia 9–10

Au rawa ni sotava na noqu veibolebole “ena kaukauwa ni Turaga.”

A vakadinadinataka o Senifi ni nona cala a biuti ira na nona tamata ena dua na ituvaki dredre. Ia e muri, ena ivalu kei ira na Leimanaiti, a vukei ira na nona tamata me ra sotava na nodra bolebole ena vakabauta na Turaga. Ni o wilika na Mosaia 9–10, vakasaqara na veika era a cakava na tamata i Senifi me ra vakaraitaka na nodra vakabauta. E a vakaukauwataki ira vakacava na Kalou? Sa vaqaqacotaki iko vakacava o Koya? Na cava na kena ibalebale mo lako ki liu “ena kaukauwa ni Turaga”? (Mosaia 9:17; 10:10-11).

Mosaia 10:11–17

Na noqu digidigi e rawa ni veivakauqeti vei ira na itabatamata eso.

Ni o wilika na Mosaia 10:11–17, vakaraica na ivakarau kei na itovo ni veitabatamata e liu ni Lemanaiti a vakayaco-ka ki na veitabatamata e tarava. Na cava e vakatura oqo me baleta na digidigi o cakava e rawa ni vakayaco-ka kina vei ira tale eso—me baleta na vinaka se ca—oka kina o ira na tamata era se bera ni sucu?

Vakayagataka na lesoni vakaraitaki. Na lesoni vakaraitaki e dau lasa ka guiguilecavi dredre. Ena rawa beka ni ra vakaraitaka na laini ni domino e dua na sala e rawa ni tarai ira kina na nodra kawa na nodra digidigi na tamata (raica na Mosaia 10:11–17).

Vakasama ni Nodra Tuberi na Gonelalai

Mosaia 7:19

A vukei ira na tamata ena ivolanikalou na Kalou, ka rawa Vua me vukei au.

• Ni ra vakaleqai tu na nona tamata, a wasea na ivolanikalou o Tui Limiai me tarai cake kina na nodra vakabauta. Tarogi ira na luvemu me baleta na italanoa ni ivolanikalou se tamata e vukei ira me ra vakabauta. Oti mo qai wilika vei ira na Mosaia 7:19 ka railesuva na italanoa e tukuni tiko ena tikina oqo (raica na “The Passover” kei na “The Israelites in the Wilderness” ena Old Testament Stories, 70–76). Sa rawa vei ira na luvemu mera matanataka. A vukei ira vakacava na tamata ena italanoa oqo na Turaga? Ena vukei keda beka vakacava o Koya?

• Me ikuri ni ivakaraitaki ni sala e vukei keda kina na Turaga, digitaka eso na tikina mai na “Book of Mormon Stories” se “Nephi’s Courage” (Nodra Sere na Lalai, 118–19, 120–21) mo lagata vata kei ira na luvemu. Vukei ira me ra raica na sala e vukei ira kina na tamata na Turaga ena iVola i Momani—kei na sala e rawa ni vukei keda kina o Koya.

Mosaia 8:16–18

Na Kalou sa soli ira na parofita, daurairai, kei na dauvakatakila vei keda.

• E dua na sala meda veivakavulici kina me baleti ira na daurairai o ya meda vakatauvatana ki na veika ena vukei keda meda rai vakavinaka cake, me vaka na matailoilo, vakadodorairai, se dua na maikorosikopi. Ni o qai wilika na Mosaia 8:17 vei ira na luvemu, e rawa ni ra biuta na ligadra e matadra me vaka era rai tiko ena vakadodorairai ena veigauna era rogoca kina na vosa “daurairai” (raica talega na Mosese 6:35–36). Veitalanoataka vata kei ira me baleta na veika e dau vukei ira na parofita na Turaga me ra “raica” na veika eda sega ni raica rawa. Na cava era sa vakatakila vei keda na noda parofita se daurairai, me vakataki Josefa Simici?

• Ni wiliki oti na Mosaia 8:16–18 vata kei ira na luvemu, sa rawa mo vukei ira mera vakasamataka na sala mera vakaoti kina na yatuvosa me vakaoqo Na daurairai sa vaka e dua … e vukei keda … . Me ivakaraitaki, na daurairai e vaka e dua na ivakatakilakila ni gaunisala e dusimaki keda vei Jisu.

• E rawa talega ni o cakava na mawe ni yava pepa ka sureti ira na luvemu me ra droinitaka na iyaloyalo eso ni veika era sa vakasalataki keda kina na parofita, daurairai, kei na dauvakatakila meda cakava. Biuta na mawe ni yava ena dua na sala wavokita na rumu, ka laivi ira na luvemu me ra taubale ena mawe ni yava oqo. E rawa vakacava ni “yaga vakalevu” vei keda na daurairai? (raica na Mosaia 8:17–18).

Mosaia 9:14–18; 10:10–11

Niu sa malumalumu, e rawa ni vakaukauwataki au na Turaga.

• Ni ra sotava na bolebole na gone, ena so na gauna era malumalumu ka veilecayaki. O na vukei ira vakacava na luvemu me ra vakararavi ki na kaukauwa ni Turaga? E rawa ni o tarogi ira se cava eda cakava me yaco me da kaukauwa vakayago. Na cava na kena ibalebale me tu vei keda “na kaukauwa ni tamata”? (raica na Mosaia 10:11). Na cava na kena ibalebale me tu vei keda “na kaukauwa ni Turaga”? (raica na Mosaia 9:17–18; 10:10). Eda dau rawata vakacava na kaukauwa ni Turaga? E rawa ni ra droinitaka na luvemu e dua na iyaloyalo ni veika ena vukei ira me ra ciqoma na kaukauwa ni Turaga.

Me ikuri ni vakasama tale eso, raica na ilavelave ni vula oqo ena iTokani ena kena mekasini.

Josefa Simici kei Moronai

Na Raivotu vei Josefa Simici, mai vei Clark Kelley Price

tabana ni itaviqaravi: Sa vakarautaka na Kalou na parofita, daurairai, kei na dauvakatakila me yaga vei ira na kawatamata.