vuli vata tiko na matavuvale

4–10 ni Maji: “Eda Reki ena Vukui Karisito.”

2 Nifai 20–25

Na volavola i Aisea e oka kina na veivakaroti kaukauwa, ia era solia talega na inuinui kei na reki. Oqo e dua na vuna a okati ira kina o Nifai ena nona ivola: “Au sa vola eso na vosa i Aisea,” a kaya o koya, “me ra laveta cake kina na yalodra ka marau … ko ira kece na noqu tamata era na raica na vosa” (2 Nifai 11:8). E rawa ni vakasamataki vakaoqo, na veisureti me wiliki na volavola nei Aisea sai koya na veisureti ni reki. E rawa ni o marau, me vakataki Nifai, ena parofisai nei Aisea me baleta na vakasokumuni kei Isireli, na lako mai ni Mesaia, kei na sautu ena gauna ni mileniumi e yalataki vei ira na yalododonu. E rawa ni o reki mo bula ena siga sa parofisaitaki tu ni Turaga ena “vakarewataka ko koya e dua na drotini vei ira na veimatanitu, ka na vakasoqoni ira vata na Isireli era sa biu laivi” (2 Nifai 21:12). Ni ko sa via gunuva na ivalavala dodonu, sa rawa “ena reki … mo takiva na wai mai na mataniwai ni veivakabulai” (2 Nifai 22:3 Ena dua tale na kena itukutukuni, sa rawa mo “reki ena vukui Karisito” (2 Nifai 25:26).

Vakasama eso ni Vuli ena iTikotiko kei na Lotu

2 Nifai 21–22

Sa rawa niu kunea na vakacegu vei Jisu Karisito.

O ira na luvei Liai era vakaleqai tiko ena veiileti. A ca vakalevu sara na leqa oqo ena veitabatamata ni mataka, veimuataki ki na veisei, vesuki, yaluma, kei na veivakarusai. Ka sa yaco tikoga na veileti me dua na leqa nikua.

Ni vakasamataki kece tiko oqori, vakasamataka na parofisai ena 2 Nifai 21–22. Vakasamataka mada na sala sa vakavotukanataka tiko kina na iVakabula na parofisai oqo. Na cava na kena ibalebale vei iko na parofisai ni na “veimaliwai talega na wolifa kei na lami”? (2 Nifai 21:6). Vakasamataka vakatitobu na cava mo cakava mo dauveivakameautaki.

Raica na Dale G. Renlund, “Na Vakacegu i Karisito e Mudukatani na Veicacati,” Liaona, Nove. 2021, 83–85.

2 Nifai 21:9–12

Na Turaga ena vakasokomuni ira na Nona tamata.

E ratou a ivakadinadina o Nifai kei na nona matavuvale ena nodra veiseyaki na kai Isireli (raica na 2 Nifai 25:10). Oqo sa rawa mo vakaitavi ena nodra vakasoqoni vata na Isireli (raica na 2 Nifai 21:12). Ni o wilika na 2 Nifai 21:9–12, vakasamataka na sala o rawa ni veivuke kina ena kena vakayacori na parofisai eso e vakamacalataki ena veitikina oqo.

Me ivakaraitaki, ni o wilika na “drotini” (ivakatagedegede se ivakatakilakila) ka na vakaturi cake me vakasoqoni ira na tamata ni Kalou, vakasamataka na sala o sa raica kina na Kalou ni vakasoqoni ira vata na Nona tamata, vakayago ka vakayalo. Na cava era vakauqeti kina na tamata vua na Turaga kei na Nona Lotu?

Na cava o sa vakauqeti kina mo cakava mo veivuke ena nodra vakumuni na tamata ni Kalou?

2 Nifai 23–24

Ena lutu na veika vakavuravura kei Papiloni.

Na matanitu o Papiloni sa dua na politiki kaukauwa ka vakamataivalu rerevaki kivei Isireli ena gauna e liu. Ia vei ira na tamata i Nifai—kei keda nikua—na veivakarerei levu duadua sai koya na ka e matataka o Papiloni: na bula vakavuravura kei na ivalavala ca. Vakasamataka mada na kena rawa ni vakayaco-ka na ivakaro ena 2 Nifai 23–24 vei ira na tamata era rere se qoroya se vakanuinuitaka na vutuniyau kei na kaukauwa nei Papiloni (raica na ivakaraitaki 23:6–9, 11, 19–22; 24:10–19). Na cava eso na ka tautauvata eda na rerevaka se qoroya se nuitaka nikua? Na cava o vakila baleta na itukutuku ni iVakabula vei iko e rawa ni tiko ena veiwase ni vola oqo? Vakasamataka na sala o rawa ni vakaraitaka kina ni o “marautaka na cecere ni Turaga” (2 Nifai 23:3).

ivakatakilakila ni semineri

2 Nifai 25:19–29

“Eda veivosakitaki Karisito … eda reki ena vukui Karisito.”

A vosa raraba o Nifai ena nona wasea na nona vakabauta—vakabibi na nona ivakadinadina baleti Jisu Karisito. Ena gauna taucoko ni nomu vulica na 2 Nifai 25, vakasamataka mada na gagadre nei Nifai me “vakauqeti ira kina na luvena … me ra vakabauti Karisito, ka vakaduavatataki tale kei na Kalou” (tikina e 23). Na cava a vinakata o Nifai me ra kila na tamata me baleta na iVakabula? (raica na tikina e 12–13, 16). A tovolea vakacava o Nifai me vakauqeti ira na tamata mera vakabauti Koya? (raica na tikina e 19–29). Raica toka na veitikina ena wase oqo e uqeti iko mo vakadinata ka muri Jisu Karisito.

Eso vei keda ena sega beka ni yalodoudou me vaka e tukuna tiko o Nifai me baleti Karisito. Ia e rawa beka ni o kunea e dua na ka ena ivakavuvuli i Nifai ena 2 Nifai 25:23–26 e vakauqeti iko mo tukuna na veika baleti Koya vei ira tale eso ena doudou. Me vakataka, na vosa nei Nifai “Eda reki ena vukui Karisito” ena rawa ni vakauqeti iko mo vakasamataka na sala e kauta mai kina vei iko na iVakabula na reki—kei na sala o rawa ni wasea kina na reki oya vei ira na tamata.

Ena nona itukutuku “Eda Reki ena Vukui Karisito” (Liaona, Nove. 2020, 88–91), e vakatura kina o Elder Neil L. Andersen na sala meda vosa vakadodonu cake kina baleti Karisito ena veituvaki eso. Na nona vakatutu cava e matata cake vei iko? Na madigi cava e tu vei iko mo veivosakitaki Karisito kina vei ira na tamata?

Na cava o vakauqeti kina mo tukuna vei ira na tamata me baleti Jisu Karisito? Kevaka o gadreva eso na vakasama, sa rawa mo vakasaqara “Se Bula na Karisito: Nodra iVakadinadina na iApositolo” (Gospel Library). Na serenilotu me vaka na “Au Kilai Jisu” (Serenilotu, naba 74) ena rawa me soli vakasama vei iko.

Me ikuri ni vakasama, raica na ilavelave ni vula oqo ni Liaona kei na Me iSakisaki ni iTtabagone ena kena mekasini.

Vakasama ni Nodra Tuberi na Gonelalai

2 Nifai 21:1-5

Ena lewa ena buladodonu o Jisu Karisito.

• Me vukei ira na luvemu me ra raitayalotaka na veitikina oqo, raica kevaka e rawa ni o kunea e dua na vunikau ka sa tamusuki sobu se tubu cake e dua na tabana mai na dua na vunikau (se vakayagataka na iyaloyalo e ra). Kevaka e matataki Jisu Karisito na “tabana” ena 2 Nifai 21:1 na cava e vakavulica vei keda na tikina e 2–5 me baleti Koya?

na kau lailai e tubu mai na icoke ni vunikau

2 Nifai 21:6–9

O Jisu Karisito e kauta mai na vakacegu kei na reki.

• Na cava e vakavulica na 2 Nifai 21:6–9 me baleta na veika e rawa ni yaco ni ra muria na iVakabula na tamata kecega? (raica talega na 4 Nifai 1:15–18). Eda na cakava vakacava me yaco na noda itikotiko me vakataka cake oqo? Era na taleitaka beka na luvemu mera raica na kedra iyaloyalo na manumanu e tukuni tiko ena tikina e 6–7—na manumanu era dau veimecaki ia era na sega ni veivakamavoataki ni sa lako tale mai o Jisu (raica na tabana ni itaviqaravi ena macawa oqo). E rawa talega ni ra droinitaka na luvemuni na kedra iyaloyalo kei ira na manumanu oqo era bula vakacegu vata tiko kei Jisu.

2 Nifai 21:11–12; 22

Na Turaga sa vakasokomuni ira tiko na Nona tamata.

• E kaya o Aisea ni na vakarewataka na Turaga e dua na “drotini ki na veimatanitu” me vukei ira na tamata me ra soqoni vata yani Vua (raica na 2 Nifai 21:11–12). Vukei ira na luvemu me ra kila ni drotini sa vaka e dua na kuila. De rawa beka ni ra taleitaka mera droinitaka ga na nodra kuila. E rawa ni ra okata kina na iyaloyalo se vosa e matataka na vuna era lako mai kina vei Jisu Karisito kei na Nona Lotu. Me ra veivosakitaka na nodra kuila, ka vukei ira me ra vakasamataka na sala e rawa ni ra vukei ira kina na tamata me ra “vakasoqoni” yani vei Jisu Karisito.

• Ni o wilika vata na 2 Nifai 22:4–5 sa rawa mo veitalanoa vata kei ira na luvemu me baleta eso na “ka sa uasivi sara” sa cakava na Turaga. Na cava soti eso na “ivalavala sa cakava ena keda maliwa” na Turaga e rawa ni da tukuna? Me vukei ira na luvemu me ra vakasamataka na taro oqo, sa rawa mo ni lagata vata e dua na sere baleta na iVakabula, me vaka na “Au Kilai Jisu” (Serenilotu, naba 74). E rawa mo ni veivukevuke mo ni vakacavara e dua na yatuvosa vakaoqo: “Au vakabauti Karisito; O Koya .” Eda rawa vakacava meda vukei ira eso mera kila na veika sa cakava vei keda na iVakabula?

2 Nifai 25:26

“Eda reki ena vukui Karisito.”

• Ena rawa ni o vukei ira vakacava na luvemu mera “reki ena vukui Karisito”? Sa rawa mo tukuna e dua na italanoa kei Jisu Karisito ena Nona kauta mai na reki vei ira na tamata, se mo vakaraitaka e dua na vidio me vaka na “Jesus Heals a Man Born Blind” se “Suffer the Little Children to Come unto Me” (Gospel Library). Sa rawa vei ira na luvemu mera tukuna mai na veigauna rekitaki ena italanoa se vidio. Ni o qai wilika vata na 2 Nifai 25:26, e rawa ni ra veivosakitaka na vuna era “reki [kina] ena vukui Karisito.”

Vakadinadinataki Karisito Kakua ni nanuma ni nomu matavuvale e ratou kila na veika o vakila me baleta na iVakabula. Mo tukuna vei ira, ka laiva na nomu nanuma me baleta na iVakabula me vakayarayarataka na sala o veimaliwai kina kei ira.

Me ikuri ni vakasama, raica na ilavelave ni vula oqo ena iTokani ena kena mekasini.

era vakavulica tiko e dua na matavuvale na daukaulotu

Au Lako Ke Ko ni Lewa, Mai vei Ramon Ely Garcia Rivas

tabana ni itaviqaravi: o Jisu Karisito e kauta mai na vakacegu kei na reki