“18–24 ni Maji: ‘Sai Koya Oqo na Sala.’ 2 Nifai 31–33,” Lako Mai, Mo Muri Au—Me Baleta na iTikotiko kei na Lotu: iVola i Momani 2024 (2024)
“18–24 ni Maji. 2 Nifai 31–33,” Lako Mai, Mo Muri Au—Me Baleta na iTikotiko kei na Lotu: 2024 (2024)
E Vakatavulici Ira na Nona Tisaipeli o Karisito, mai vei Justin Kunz
18–24 ni Maji: “Sai Koya Oqo na Sala.”
2 Nifai 31–33
Ena maliwa ni otioti ni vosa nei Nifai, eda kunea kina na itukutuku oqo: “Sa vakaroti au vakaoqo na Turaga, ka sa dodonu meu talairawarawa kina” (2 Nifai 33:15 E veiganiti na veika oqo me usutu ni bula nei Nifai. E vakasaqara me kila vinaka na lewa ni Turaga ka talairawarawa qaqa kina—kevaka e gadrevi kina me mate me taura mai kina vei Lepani na peleti parasa, me tara e dua na waqa me takosovi na wasawasa, se vakavulica vakamatata ena yalodina na ivunau i Karisito ena kaukauwa. E rawa ni vakamatatataka o Nifai na gagadre meda “toso ki liu ka tudei vei Karisito,” ena kena vakamuri na “sala qiqo ka rabailailai sa basika ki na bula tawamudu” (2 Nifai 31:20,18), baleta oqori na sala e muria o koya. E kila vinaka tu o koya mai na veika sa sotava ni sala oqo, e dina ni levu na gauna drakidrakita, ia e marautaki talega, ni “ia sa sega sara e dua tale na sala se na yaca sa soli e ruku i lomalagi me ra vakabulai kina na tamata ki na matanitu ni Kalou” (2 Nifai 31:21).
Vakasama eso ni Vuli ena iTikotiko kei na Lotu
Na sala duadua ga ki na bula tawamudu sai Jisu Karisito kei na Nona ivunau.
Kevaka mo vakalekalekataka na ivakamacala ni sala ki na bula tawamudu ena vica ga na vosa, na cava o na tukuna? Raica na sala e vakamacalataka kina o Nifai ena 2 Nifai 31. Sa rawa mo droinitaka e dua na sala ka vola ena sala eso na ivakavuvuli se ituvatuva o kunea ena veiwase oqo. E rawa ni o vakuria ena nomu droini na ivakaleka ni veika a vakavulica o Nifai me baleta na ivakavuvuli yadua.
Ni ko sa wilika na 2 Nifai 31:18–20, mo vakadikeva na nomu sasaga mo “toso ki liu” ena sala ni kosipeli.
Raica talega na “Gu ki Liu,” Serenilotu, naba 81.
Ni da vakamuria na ivakavuvuli i Jisu Karisito ena liutaki keda ki na bula tawamudu.
E vakarautaka o Jisu Karisito na ivakaraitaki uasivi ni talairawarawa ena Nona mai papitaiso.
Se a yaco na nomu papitaiso e nanoa se 80 na yabaki sa oti, sa dua dina na gauna bibi. O sa curuma e dua na veiyalayalati tawamudu mo muri Jisu Karisito. Vakasamataka na nomu papitaiso ni o wilika na veika me baleta na papitaiso ni Vakabula ena 2 Nifai 31:4–13 Na kena saumi na vei taro vaka oqo ena rawa ni veivuke:
-
Na cava na vuna a papitaiso kina o Jisu? Na cava na vuna au a digitaka kina meu papitaiso?
-
Na veika cava au a yalataka niu a papitaiso? Na cava e yalataka na Turaga me kena isau? (raica na tikina e 12–13; raica talega na Mosaia 18:10, 13).
-
Au na vakaraitaka vakacava niu sa yalodina tikoga meu muri Jisu Karisito?
“Ko koya sa vosota me yacova na ivakataotioti, ena vakabulai.”
Ni o wilika na 2 Nifai 31:15–20, tarogi iko, “Au na kila vakacava niu sa vosota tiko ki na ivakataotioti?” Na cava o vulica mai vei Nifai e vukei iko mo sauma na taro oqo?
E vakatavulica o Elder Dale G. Renlund: “Na vosota ki na ivakataotioti e sega ni dua na ikalawa duidui ena ivunau i Karisito—me vaka ga ni da vakacavara na imatai ni va na ikalawa ka qai dabe sobu, kati batida, ka waraka meda mate. Sega, na vosota ki na ivakataotioti o ya meda gugumatua tikoga ka lomada dina meda tomana tikoga na veikalawa oqori” (“Lifelong Conversion” [Brigham Young University devotional, Sept. 14, 2021], 2, speeches.byu.edu). O na cakava tikoga vakacava na ikalawa ena ivunau i Karisito (vakabauta, veivutuni, papitaiso, kei na ciqomi ni Yalo Tabu)?
Ena vosa i Karisito kei na Yalo Tabu, ena vakaraitaka vei au na Kalou na ka meu cakava.
O sa bau lomatarotarotaka mada na veikalawa e tarava ena nomu bula? O ira na tamata i Nifai era a sotava talega oqori (raica na 2 Nifai 32:1). Vakaraica na isaunitaro nei Nifai ena 2 Nifai 32:2–9. O na vakamacalataka vakacava ena nomu vosa na veika e vakavulica o Nifai? Na veika sotavi cava e sa vukei iko mo kila na dina ni vosa nei Nifai?
Sa rawa mo cakava e dua na lisi ni vakatulewa se ituvaki eso (ena gauna oqo kei na veisiga ni mataka) o gadreva kina na veidusimaki ni Kalou. Na cava o rawa ni vulica mai na 2 Nifai 32 ena vukei iko mo rawata na veivakauqeti mai Vua? Na cava ena rawa ni liutaki ira na tamata “mera vakaukauwataka na lomadra vua na Yalo Tabu”? (2 Nifai 33:2)
Ni ko vakasamataka vakatitobu na ivakasala nei Nifai, vakasamataka na sala o vulica kina na vosa ni iVakabula. O na vakamacalataka beka me vaka na vakalomavinaka, kana, se kana magiti? Ena nomu nanuma, na cava na kena duidui? Vakasamataka na sala e rawa ni o cakava kina na veika o sotava ena vosa ni iVakabula me vaka na kana magiti. Ena rawa beka ni o kauta mai eso na vakasama mai vua e dua na itokani se lewe ni matavuvale.
Mo kana magiti ena vosa i Karisito. E vuqa tu na sala me da kana magiti kina ena vosa i Karisito, oka kina na masulaki ni veivakauqeti, tarogi ni taro eliu kei na gauna ni vuli, na vosa me vakamatatataki, vakanananu titobu, na veidutaitaki, volavola, vaqarai ni dina ni kosipeli, kei na bulataki ni ivolanikalou ki na nomu bula (raica na 1 Nifai 19:23).
O na sureta vakacava na Yalo Tabu me itokani tudei ena nomu bula, ka sega ni dua na vulagi vagauna? Wilika na vakatutu e tolu nei David A. Bednar me yaco kina na veitokani kei na Yalo Tabu me “ka dina tikoga” ena “Ciqoma na Yalo Tabu” (Liaona, Nove. 2010, 94–97). O na bulataka vakacava na nona ivakasala?
Raica talega na Ulutaga ni Kosipeli, “Revelation,” Gospel Library; “Daily Bread: Pattern” (vidio), Gospel Library.
E vakauqeti keda kece na iVola i Momani meda vakadinata na Karisito.
Ena 2 Nifai 33, ni mai vakacavara o Nifai na nona volavola, a vakamacalataka o koya na vuna e volavola kina ena imatai ni gauna. Na cava eso na vuna o kunea ena wase oqo? Vakasamataka na italanoa kei na ivakavuvuli o sa wilika rawa ena 1 Nifai kei na 2 Nifai. Na cava e sa vakauqeti iko vakalevu duadua kei na nomu vakabauti Karisito?
Raica talega na “Nephi Records His Final Testimony” (vidio), Gospel Library.
Me ikuri ni vakasama, raica na ilavelave ni vula oqo ni Liaona kei na Me iSakisaki ni iTabagone ena kena mekasini.
Vakasama ni Nodra Tuberi na Gonelalai
Niu sa papitaiso, au sa muri Jisu tiko.
-
E tiko e dua na iyaloyalo kei Jisu ni papitaiso tiko ena mua ni ituvatuva oqo. Sa rawa ni ra vakayagataka na luvemu me ra tukuna kina vei iko na veika era kila me baleta na ka oqo (raica talega na Maciu 3:13–17). Na cava na vuna e vinakata kina o Jisu meda papitaiso me vakataki Koya? E rawa ni ra vakarogoca na luvemuni na vuna ni o ni wilika vata na tikina eso ena 2 Nifai 31:4–13. Ena rawa ni veivuke kevaka e dua ka se qai papitaiso oti ga e rawa ni wasea na veika e sotava.
E vakavulica vei au o Jisu Karisito na sala meu lesu kina vei Tamada Vakalomalagi.
-
Me vukei ira na luvemu me ra raitayalotaka na ivakavuvuli ena 2 Nifai 31, mera droinitaka e dua na sala vata kei na dua na iyaloyalo i Karisito e muana. E rawa ni o vukei ira me ra kunea se droinitaka na iyaloyalo ka matataka na ikalawa eso ena salatu oya, me vaka na vakabauti Karisito, veivutuni, papitaiso, na isolisoli ni Yalo Tabu, kei na vosota me yacova na ivakataotioti. E rawa ni ra dusia na iyaloyalo ni o ni wilika vata na 2 Nifai 31:17–20 .
Au rawa ni kana magiti ena vosa i Karisito.
-
Mo vakavulica na veika e baleta na “kana magiti” ena vosa i Karisito, e rawa ni o kerei ira na luvemu me ra matanataka na sala era na kana magiti kina ena kedra kakana taleitaki. Ena 2 Nifai 32:3, na cava a kaya o Nifai ni dodonu me da kana magiti kina? E duidui vakacava na kanamagiti ena vosa ni Kalou mai na kena wiliki walega? De rawa ni ra matanataka na luvemu na kedra duidui. Wasea vei ira na gone na veivakalougatataki o sa rawata ena nomu kanamagiti ena ivolanikalou.
E vinakata na Tamada Vakalomalagi meu dau masu tikoga.
-
Ni wiliki oti na 2 Nifai 32:8–9, veitalanoa kei ira na luvemu me baleta na vuna e sega ni vinakata kina o Setani meda masu. Cava na vuna e vinakata kina na Kalou me da “dau masu tikoga”? E rawa ni ra cakava na luvemu e dua na lisi se droinitaka na iyaloyalo ni ituvaki eso era rawa ni masu kina. E rawa ni qai lagata e dua na sere e vakavulica na masu, me vaka na “Bera Ni Ko Gole Yani?” (Sere ni Lotu, naba 78). Sa rawa mo sosomitaka eso na vosa ena sere ena nodra vosa mai na ituvatuva e sa tiko vei ira. Ena vakalougatataki keda vakacava na Turaga ni da dau masu?
Me ikuri ni vakasama, raica na ilavelave ni vula oqo ena iTokani ena kena mekasini.
Me Vakataucokotaka na Valavala Dodonu Kecega, mai vei Liz Lemon Swindle