Moromona e pāpa’i ra i ni’a i te mau pāpa’a ’auro

1–7 nō Tēnuare°: Te tahi fa’ahou ’ite nō Iesu Mesia.

Mau ’api ’ōmuara’a o te Buka a Moromona

Hou ā ’outou ’a tae ai i te 1 Nephi pene 1, e ’ite ’outou ē, e ’ere roa atu te Buka a Moromona i te hō’ē buka mai te tahi atu mau buka. Tē fa’ata’a nei tāna mau ’api ’ōmuara’a i te hō’ē ’ā’amu e ’ere mai te tahi atu—’oia ato’a te mau fārereira’a a te mau melahi, te hō’ē pāpa’a parau tahito tei hunahia i roto i te hō’ē ’āivi e rave rahi tenetere, ’e te hō’ē tamaiti ’āpī tei ’īriti i te pāpa’a parau nā roto i te mana o te Atua. E ’ere te Buka a Moromona i te hō’ē noa ’ā’amu nō te mau nuna’a tahito nō Amerika. Tē tūtava nei te reira i te ha’apāpū i te mau ta’ata ato’a ē, « ’O Iesu te Mesia » (’api upo’o parau o te Buka a Moromona), ’e nā te Atua iho i arata’i i te huru nō te pāpa’ira’a i te reira, te fa’ahereherera’ahia ’e te hōro’ara’ahia mai ia tātou. I teie matahiti, ’a tai’o ai ’outou i te Buka a Moromona, ’a pure nō te reira ’e ’a fa’a’ohipa i tāna mau ha’api’ira’a, e ani manihini ’outou i te mana o te Fa’aora i roto i tō ’outou orara’a. ’E e fa’auruhia paha ’outou e parau ē, mai tā te nā ’ite to’otoru i nā reira i roto i tō rātou ’itera’a pāpū, « E mea māere roa ho’i ïa [iā’u] ».

Mana’o nō te ’apo i te ha’api’ira’a i te ’utuāfare ’e i te fare purera’a

’Api upo’o parau o te Buka a Moromona

E nehenehe te tuatāpapara’a i te Buka a Moromona e ha’apūai i tō’u fa’aro’o ia Iesu Mesia.

Tē hōro’a nei te ’api upo’o parau o te Buka a Moromona i te mau mea hau atu i te hō’ē noa upo’o parau iti. I roto i te tahi atu mau mea, tē tāpura nei te reira e rave rahi fā o teie pāpa’a parau mo’a. ’A ’imi i teie mau fā i roto i te ’api upo’o parau. E nehenehe te mau uira’a mai teie e tauturu ia ’outou ’a feruri ai ’outou°: Nō te aha tei ia tātou nei te Buka a Moromona°? Nāhea te Buka a Moromona e ta’a ’ē ai i te tahi atu mau buka°?

’Ua tae paha i te taime nō te hāmani i te hō’ē fa’anahora’a nō te ta’ata hō’ē ’aore rā, nō te ’utuāfare nō te tai’ora’a i te Buka a Moromona i teie matahiti. Ahea ’aore rā i hea ’outou e tai’o ai°? Nāhea ’outou i te ani i te Vārua i roto i tā ’outou tuatāpapara’a°? Tē vai ra ānei te tahi mea ta’a ’ē tā ’outou e ’imi ra, ’a tuatāpapa ai ’outou°? ’Ei hi’ora’a, e nehenehe ’outou e ’imi i te mau tuha’a ’o tē fa’atupu i te mau ’ōpuara’a, tei ’itehia ia ’outou i ni’a i te ’api upo’o parau. E nehenehe ’outou e tāpe’a i te hō’ē tāpura o te mau ’īrava ’o tē patu i tō ’outou fa’aro’o ia Iesu Mesia.

Hi’o ato’a 2 Nephi 25:26°; Mosia 3:5–8°; Alama 5:48°; 7:10–13°; Helamana 5:12°; 3 Nephi 9:13–18°; 11:6–14°; Moroni 10:32–33.

Hō’ē fafaura’a tohuhia ’Ua parau te peresideni RussellM. Nelson : « Tē parau fafau atu nei au ē, ’ia feruri māite ’outou i tā ’outou i tuatāpapa [i roto i te Buka a Moromona], e matara mai te mau ha’amāramarama o te ra’i, ’e e fāri’i mai ’outou i te pāhonora’a i tā ’outou iho mau uira’a ’e te arata’ira’a nō tō ’outou iho orara’a » (« Te Buka a Moromona : E aha te huru tō ’outou orara’a ’āhani ’aita te reira ? », Liahona, Nov. 2017, 62–63).

Ītona nō te séminaire

’Ōmuara’a o te Buka a Moromona°; « Te ’itera’a pāpū o nā ’ite to’otoru°; « Te ’itera’a pāpū o nā ’ite to’ova’u »

E nehenehe au e riro ’ei ’ite nō te Buka a Moromona.

E nehenehe te Vārua Maita’i e fa’a’ite pāpū ia ’outou ē, e parau mau te Buka a Moromona, noa atu ’aita ’outou i ’ite mata i te mau pāpa’a ’auro mai nā ’ite to’otoru ’e nā ’ite to’ova’u. ’A tai’o ai ’outou i tā rātou mau parau, ’a feruri nāhea tō rātou ’itera’a pāpū i te ha’apūai i tō outou.

E aha te mea tei fa’auru ia ’outou nō ni’a i te huru ’a fa’a’ite ai teie mau ’ite i tō rātou ’itera’a pāpū nō te Buka a Moromona°? ’A feruri e nāhea ’outou e nehenehe ai e fa’a’ite i tō ’outou ’itera’a pāpū nō te Buka a Moromona—tōna iho ā rā ’itera’a pāpū nō Iesu Mesia. ’Ei hi’ora’a, ’a feruri na ē, tē paraparau ra ’outou i te hō’ē hoa tei ’ore nā i fa’aro’o a’e nei i te parau nō te Buka a Moromona. E aha tā ’outou e parau iāna nō ni’a i te reira°? Nāhea ’outou i te tāmata i te fa’auru i tō ’outou hoa ’ia tai’o i te reira ? E hi’o fa’ahou i te ’Omuara’a o te Buka a Moromona. E ’ite mai paha ’outou i te mau ha’apāpūra’a i reira, ’o te riro ’ei mea faufa’a ’ia fa’a’ite atu i tō ’outou hoa. E nehenehe ato’a te mau video i muri nei e hōro’a ia ’outou te mau mana’o°:

• « ʼŌmuaraʼa o te Buka a Moromona »

• « E aha te Buka a Moromona ? Hōʼē hiʼo-poto-raʼa e 60 tetoni »

• « Hōʼē ʼāʼamu nō te Buka a Moromona »

E hāmani i te hō’ē tāpura nō te mau mea tā ’outou e fa’a’ite atu i te hō’ē hoa nō ni’a i te Buka a Moromona. Tāmata i te fa’a’ite i te Buka a Moromona ma te fa’a’ohipa i te fa’aaura’a rorouira o te Buka a Moromona.

Hi’o ato’a Ronald A. Rasband, « Teie nei mahana », Liahona, Novema 2022, 25–28°; Mau parau tumu nō te ’evanelia, « Buka a Moromona », Vaira’a buka ’evanelia; « ’Ua pou mai ra Moroni », Te mau Hīmene, N°9.

Iosepha Semita ’e nā ʼite toʼotoru e pure ʼāmui ra

ʼUa faʼaʼite nā ʼite toʼotoru i te ʼiteraʼa pāpū nō ni’a i te Buka a Moromona.

« Te ’itera’a pāpū o te peropheta Iosepha Semita »

’Ua riro te taera’a mai o te Buka a Moromona ’ei temeio.

Mai te mea, e ui mai te hō’ē ta’ata ia ’outou nō hea mai te Buka a Moromona, e aha tā ’outou e pāhono atu ? Nāhea ’outou i te tātara i te ’ohipa a te Atua i roto i te hōro’ara’a mai i te Buka a Moromona ia tatou ? ’A tai’o ai ’outou i te ’itera’a pāpū o Iosepha Semita, ’a ha’apa’o maita’i e mea nāhea tōna tātarara’a i te reira. ’Ia au i te mea tā ’outou i tai’o, i tō ’outou mana’o, e aha tō te Atua mana’o nō ni’a i te faufa’a rahi o te Buka a Moromona°?

Hi’o ato’a Ulisses Soares, « Te taera’a mai o te Buka a Moromona », Liahona, Mē 2020, 32–35 ; « », Vaira’a buka ’evanelia.

Nō te tahi atu ā mana’o, hi’o i te mau ve’a nō teie ’āva’e o te Liahona ’e Nō te Pūai o te Feiā ’Āpī.

Mana’o nō te ha’api’i i te tamari’i

’Api upo’o parau o te Buka a Moromona

E tauturu te tai’ora’a i te Buka a Moromona iā’u ’ia roa’a te fa’aro’o ia Iesu Mesia.

• Vaiiho i tā ’outou mau tamari’i ’ia hi’o ’e ’ia tāpe’a i te hō’ē Buka a Moromona. Tauturu ia rātou ’ia fa’atoro i ni’a i te upo’o parau iti, Te tahi fa’ahou ’ite nō Iesu Mesia. E nehenehe ato’a ’outou e tauturu ia rātou ’ia ’imi, i ni’a i te ’api upo’o parau, te pereota « ’O Iesu te Mesia, te Atua mure ’ore, tē fa’a’itera’a iāna iho i te mau nuna’a ato’a ». Tauturu ia rātou ’ia hāro’aro’a ē, te aura’a ra, tē ha’api’i nei te Buka a Moromona ia tātou nō ni’a ia Iesu Mesia. ’A parau poto noa ia rātou, e mea nāhea tō te Buka a Moromona ha’apūaira’a i tō ’outou fa’aro’o ia Iesu Mesia. E nehenehe ato’a ’outou e ani ia rātou, nō ni’a i tā rātou mau ’ā’amu au roa a’e o te Buka a Moromona. Te hīmenera’a « Dans le Livre de Mormon » (Chants pour les enfants, 62) e fa’aha’amana’o te reira ia rātou i te tahi o teie mau ’ā’amu.

’Ōmuara’a o te Buka a Moromona

Te Buka a Moromona ’o te ’ōfa’i tumu ïa nō tā tātou ha’apa’ora’a.

• E nehenehe te ’api fa’a’ana’anataera’a nō teie hepetoma ’e te hōho’a i raro nei e tauturu i tā ’outou mau tamari’i ’ia hāro’aro’a i teie mau parau a Iosepha Semita i roto te ’ōmuara’a o te Buka a Moromona : « Te Buka a Moromona [’o] te ’ōfa’i tumu nō tā tātou ha’apa’ora’a ». E mea ’ārearea ato’a ’ia patu ’aore rā ’ia pāpa’i hōho’a i te hō’ē ’āpou ’e te hō’ē ’ōfa’i tumu i ni’a. E aha te mea e tupu, mai te peu e tātarahia te ’ōfa’i tumu ? E aha te ’ohipa e tupu mai, ’āhiri ’aita e vai ra ia tātou te Buka a Moromona ? E nehenehe ’outou e tai’o ’āmui i te ahe’e hope’a o te ’ōmuara’a, nō te ’ite mai e aha te tahi atu mau mea tā tātou e ha’api’i mai ’ia fāri’i ana’e tātou i te parau mau o te Buka a Moromona. Nāhea tātou i te fa’ariro i te Buka a Moromona ’ei ’ōfa’i tumu nō tō tātou fa’aro’o ia Iesu Mesia ?

e ’āpou ’ōfa’i ’e te hō’ē ’ōfa’i tumu nō te tāpe’a i te reira ma te pāpū

Te Buka a Moromona ’o te ’ōfa’i tumu ïa nō tā tātou ha’apa’ora’a.

« Te ’itera’a pāpū o nā ’ite to’otoru » ; « Te ’itera’a pāpū o nā ’ite to’ova’u »

E nehenehe au e riro ’ei ’ite nō te Buka a Moromona.

• Nō te tauturu i tā ’outou mau tamari’i ’ia hāro’aro’a e aha te aura’a ’ia riro ’ei ’ite, e nehenehe ’outou e fa’ata’a ia rātou i te hō’ē mea tā ’outou i ’ite mata ’o tā rātou i ’ore i ’ite mata. I muri iho, ’a vaiiho ia rātou ’ia nā reira ato’a nō ’outou. E arata’i mai paha te reira i te ’āparaura’a nō ni’a i nā 11 ta’ata tei ’ite mata i te mau pāpa’a ’auro, nō reira mai te ’īritira’ahia te Buka a Moromona. ’Ia tai’o ’āmui ana’e ’outou i te mau ’itera’a pāpū, e nehenehe ’outou e paraparau ē, nō te aha teie mau ’ite i hina’aro ai ’ia ’ite te tahi atu mau ta’ata nō ni’a i tō rātou ’itera’a pāpū. ’O vai tā tātou e hina’aro e parau atu nō ni’a i te Buka a Moromona ?

« Te ’itera’a pāpū o te peropheta Iosepha Semita »

’Ua hōro’ahia mai te Buka a Moromona ia tātou nā roto i te mana o te Atua.

• Nō te tauturu i tā ’outou mau tamari’i ’ia ha’api’i mai, e mea nāhea tō te Atua hōro’ara’a mai ia tātou i te Buka a Moromona, e nehenehe ’outou e tai’o i te tahi mau tuha’a o « Te ʼiteraʼa pāpū o te peropheta Iosepha Semita » ia rātou. E nehenehe ato’a ’outou e fa’a’ohipa i te « Pene 1°: Nāhea tātou i te fāri’ira’a i te Buka a Moromona » (i roto Te mau ’ā’amu o te Buka a Moromona, 2–4). E au ato’a paha tā ’outou mau tamari’i ’ia ha’uti ta’ata ora i te ’ā’amu nō te tahi ma’a taime iti.

Nō te tahi atu ā mana’o, hi’o i te ve’a nō teie ’āva’e o te Hoa.

Iosepha e fāri’i ra i te mau pāpa’a ’auro nā roto mai ia Moroni

Moroni e hōro’a ra i te mau pāpa’a ’auro, nā Gary L. Kapp

’api fa’a’ana’anataera’a : Te Buka a Moromona ’o te ’ōfa’i tumu nō tā tātou ha’apa’ora’a.