« 8–14 nō Tēnuare°: ‘E haere au e rave’. 1°Nephi 1–5 », Mai, pe’e mai—Nō te ’utuāfare ’e te fare purera’a : Buka a Moromona 2024 (2024)
« 8–14 nō Tēnuare. 1 Nephi 1–5 », Mai, pe’e mai—Nō te ’utuāfare ’e te fare purera’a : 2024 (2024)
Lehi e rātere ra nā pīha’i iho i te Miti Ute’ute, nā Gary Smith
8–14 nō Tēnuare°: « E haere au e rave ».
1°Nephi 1–5
E ha’amata te Buka a Moromona nā roto i te hō’ē ’ā’amu o te hō’ē ’utuāfare mau e fa’aruru ra i te mau ha’afifira’a mau. ’Ua tupu te reira i te matahiti 600 hou te Mesia, tē vai nei rā te mau mea nō ni’a i teie ’ā’amu e au ra ē, e mea mātauhia e te mau ’utuāfare i teie mahana. ’Ua ora teie ’utuāfare i roto i te hō’ē ao ’ino, terā rā ’ua fafau te Fatu ia rātou ē, mai te peu e pe’e rātou iāna, e arata’i ’oia ia rātou ma te pāruruhia. I roto i te tere, ’ua fāri’i rātou i te mau taime maita’i ’e te mau taime ’ino, i te mau ha’amaita’ira’a rahi ’e te mau temeio, ’ua tupu ato’a rā i roto ia rātou te mau mārōra’a ’e te hāmani-’ino-ra’a. E mea varavara roa i roto i te mau pāpa’ira’a mo’a tē vai ra te hō’ē ’ā’amu pāpū maita’i nō te hō’ē ’utuāfare e tāmata ra i te ora i te ’evanelia°: Te mau metua e ’aro nei nō te fa’auru i te fa’aro’o i roto i tō rātou ’utuāfare ’e tē ha’ape’ape’a nei nō tō rātou pārurura’a, te mau tamari’i e fa’aoti nei e ti’aturi ānei i tō rātou mau metua, ’e te mau taea’e e fa’aruru ra i te pohehae ’e te mārōra’a—’e i te tahi taime e fa’a’ore nei i te hapa a te tahi ’e te tahi. I roto i te tā’āto’ara’a, tē vai ra te mana i roto i te mau hi’ora’a o te fa’aro’o o teie ’utuāfare huru ti’a ’ore.
Mana’o nō te ’apo i te ha’api’ira’a i te ’utuāfare ’e i te fare purera’a
E mea « faufa’a rahi » te parau a te Atua nō’u.
Hōʼē poroʼi faufaʼa roa i roto i te Buka a Moromona ’o te « faufaʼa rahi » ïa o te parau a te Atua.(1 Nephi 5:21). ’A tai’o ai ’outou te 1 Nephi 1–5, ’a ’imi e mea nāhea te parau a te Atua i te ha’amaita’ira’a i te ’utuāfare o Lehi, ma te ’āfaro ti’a ’aore rā, nā te tahi atu rāve’a (’ei hi’ora’a, hi’o 1:11–15°; 3:19–20°; 5:10–22). E aha tā teie mau pene e ha’api’i nei ia ’outou nō ni’a i te parau a te Atua ? E aha tā ’outou i ’ite mai ’o tē fa’a’ana’anatae ia ’outou ’ia mā’imi mau i te mau pāpa’ira’a mo’a ?
Hi’o ato’a « ’Ia tai’o vau i te parau mo’a », Te mau Hīmene, N°169°; « Scriptures Legacy [Faufa’a ’āi’a o te mau pāpa’ira’a mo’a] » (video), Vaira’a buka ’evanelia.
E nehenehe au e fāri’i ’e e ha’apūai i tō’u ’itera’a pāpū, ma te fāriu atu i ni’a i te Fatu.
ʼUa mātauhia Nephi nō tōna faʼaroʼo pūai i te Fatu, ʼua tītauhia rā iāna ʼia haʼa nō te fāri’i i tōna ’iteraʼa pāpū—mai ia tātou pā’āto’a e nā reira nei. E aha tā ’outou e tai’o nei i roto te 1 Nephi 2 ’o tē fa’a’ite ra, nō te aha Nephi i fāri’i ai i te hō’ē ’itera’a pāpū ē, e parau mau te mau parau a tōna metua tāne°? Nō te aha ’aita o Lamana ’e o Lemuela i fāri’i i teie ’itera’a pāpū°? (Hi’o ato’a 1 Nephi 15:2–11). I tei hea taime tō ’outou ’itera’a i te Fatu i te tāmarūra’a i tō ’outou māfatu°?
Hi’o ato’a « The Lord Commands Lehi’s Family to Leave Jerusalem [’Ua fa’aue te Fatu i te ’utuafare o Lehi e fa’aru’e ia Ierusalema] » (video), Vaira’a buka ’evanelia
E fa’aineine te Atua i te hō’ē rāve’a nō’u nō te rave i tōna hina’aro.
I tō te Fatu fa’auera’a i te mau tamaiti a Lehi ’ia haere e ti’i i te ’api veo, ’aita ’oia i hōro’a i te mau arata’ira’a ta’a ’ē e nāhea i te rave i te reira. E mea pinepine te reira nō te mau arata’ira’a ’o tā tātou e fāri’i nei nā ’ō mai i te Atua ra, ’e e tae mai te mana’o ē, « e mea rave ’atā » te ’ohipa tāna e tītau nei (1 Nephi 3:5). E aha te mea tei fa’auru ia ’outou i roto i te pāhonora’a a Nephi i te fa’auera’a a te Fatu i roto te 1 Nephi 3:7, 15–16°?
’A tai’o ai ’outou te 1 Nephi 3–4, ’a ’imi i te mau fifi rau tā Nephi i fārerei. Nāhea tō te Fatu « fa’aineinera’a i te hō’ē rāve’a » e ti’a ai ia Nephi ’ia « rave i te mea tāna i [fa’aue] »°? Nō te aha e mea faufa’a ’ia ’ite ’outou i te ’ohipa tā te Fatu i rave nō Nephi°?
Hō’ē rāve’a pūai tā te Atua i fa’aineine ia tātou ’ia ha’apa’o i tāna mau fa’auera’a, ’o tē tonora’a mai ïa ia Iesu Mesia ’ei Fa’aora nō tātou. E tai’o i te parau poro’i a te peresideni Dallin°H. Oaks « E aha tā tō tātou Fa’aora i rave nō tātou°? » (Liahona, Mē 2021, 75–77). Nāhea Iesu Mesia i te fa’aineinera’a i te hō’ē rāve’a nō tātou tāta’itahi ? Ma te ’itera’a ē, ’ua upo’oti’a ’oia i ni’a i te mau mea ato’a nō ’outou, e aha tei fa’auruhia ia ’outou ’ia « haere ’e ’ia rave » ?
Hi’o ato’a « Nephi Is Led by the Spirit to Obtain the Plates of Brass [’Ua arata’ihia Nephi e te Vārua nō te fāri’i i te mau pāpa’a parau] » (video), Vaira’a buka ’evanelia.
Fa’a’ohipa i te mau ’ā’amu ’e te mau hi’ora’a nō te ha’api’i i te mau parau tumu o te ’evanelia. ’A fa’aineine ai ’outou nō te ha’api’i, ’a feruri i tō ’outou iho mau ’itera’a ’o tē nehenehe e ’āmui atu i te piti o te ’itera’a pāpū i te mau ’ā’amu o te mau pāpa’ira’a mo’a. ’Ei hi’ora’a, i nāhea tō te Fatu fa’aineinera’a i te hō’ē rāve’a nō ’outou nō te rave i tōna hina’aro ?
’Ua ’ī roa tō rātou ’ā’au i te ’oa’oa, nā Walter Rane
E nehenehe te ha’amana’ora’a i te mau ’ohipa a te Atua e hōro’a mai iā’u i te fa’aro’o nō te ha’apa’o i tāna mau fa’auera’a.
’Ia hina’aro ana’e Lamana ’e o Lemuela e amuamu ’aore rā e mutamuta, tei pīha’i iho noa ’o Nephi ’e ’o Lehi nō te fa’aitoito ’e nō te a’o ia rāua. ’Ia hina’aro ana’e ’outou e amuamu, e riro e mea maita’i ’ia tai’o i te mau parau a Nephi e a Lehi. Nāhea Nephi ’e o Lehi i te tāmatara’a i te tauturu ia vetahi ’ē ’ia patu i te fa’aro’o i te Atua ?(hi’o 1 Nephi 4:1–3 ; 5:1–8 ; hi’o ato’a 1 Nephi 7:6–21). E aha tā ’outou i ha’api’i mai ’o tē nehenehe e tauturu ia ’outou, i te taime e fa’ahemahia ’outou ’ia amuamu ’aore rā ’ia mutamuta ?
« ’Ua arata’ihia vau e te Vārua ».
I roto te 1 Nephi 4:5–18, e aha te mea tā ’outou i fa’ahiahia nō ni’a i te ’aravihi o Nephi ’ia ’ite ’e ’ia pe’e i te Vārua ? E ti’a ia ’outou ’ia tuatāpapa i te parau poro’i a te peresideni Russell M. Nelson « Heheura’a nō te ’Ēkālesia, heheura’a nō tō tātou orara’a » (Liahona, Mē 2018, 93–96), nō te ’apo hau atu ā nō ni’a i te fāri’ira’a i te heheura’a nō ’ō mai i te Fatu ra.
Nō te tahi atu ā mana’o, hi’o i te mau ve’a nō teie ’āva’e o te Liahona ’e Nō te Pūai ’o te Feiā ’Āpī .
Mana’o nō te ha’api’i i te tamari’i
E nehenehe au e fāri’i i tō’u iho ’itera’a pāpū.
-
Nāhea Nephi i te ’itera’a ē, e parau mau tā tōna metua tāne i ha’api’i ? Tauturu i tā ’outou mau tamari’i ’ia ’imi i te mau pāhonora’a i teie uira’a i roto te 1 Nephi 2:16, 19. E au ato’a paha rātou e pāpa’i i te mau ’ohipa a Nephi i ni’a i te mau ’ōfa’i aore rā i ni’a i te tahi atu mau tao’a, ’e i muri iho, e hāmani i te hō’ē mea i te mau tao’a. E arata’i mai paha te reira i te ’āparaura’a, e nāhea teie mau ’ohipa i te tauturu ia tātou ’ia patu i te hō’ē ’itera’a pāpū.
-
E nehenehe ’outou e fa’a’ite i tā ’outou mau tamari’i i te mau hōho’a ’aore rā te mau tao’a ’o tē fa’ahōho’a i te mau mea ’o tā rātou e nehenehe e ’imi i te hō’ē ’itera’a pāpū, mai te hō’ē Buka a Moromona ’aore rā hō’ē hōho’a nō Iesu Mesia, nō te hō’ē hiero ’aore rā nō te peropheta ora. E ani ia rātou ’ia rave mai hō’ē ’e ’ia fa’a’ite mai i tō rātou ’itera’a pāpū nō te reira ’ohipa. E nehenehe ato’a ’outou e parau i tā ’outou mau tamari’i, e mea nāhea tō ’outou fāri’ira’a i tō ’outou ’itera’a pāpū. Nō te aha tātou e hina’aro ai i tō tātou iho ’itera’a pāpū ?
E tauturu mai te Atua iā’u ’ia ha’apa’o i tāna mau fa’auera’a.
-
E fa’a’ohipa hō’ē ’aore rā hau atu o teie mau mātēria nō te tauturu i tā ’outou mau tamari’i ’ia fa’ata’a mai, e mea nāhea tō te Atua tauturura’a ia Nephi ’ia roa’a mai te mau pāpa’a parau : 1 Nephi 3–4 ; ’api fa’a’ana’anataera’a nō teie hepetoma ; « Le courage de Nephi » (Chants pour les enfants, 64–65) ; ’e te « Pene 4 : Te mau pāpa’a parau » (i roto Te mau ’ā’amu nō te Buka a Moromona, 8–12).
-
E au paha ’outou ’e tā ’outou mau tamari’i ’ia ha’uti teata ta’ata ora te 1 Nephi 3:2–7. E nehenehe paha ’outou e fa’ariro ia ’outou o Lehi ’e e ani i tā ’outou mau tamari’i, ’ia ho’i i Ierusalema nō te rave mai i te mau pāpa’a parau. E ani ia rātou ’ia pāhono nā roto i tā rātou iho mau parau mai te huru ē, o Lamana ’e o Lemuela ’aore rā o Nephi rātou. E aha te tahi mau mea tā te Atua i fa’aue ia tātou ’ia rave ? (hi’o mau hōho’a 103–15 i roto te Buka hōho’a ’evanelia ’aore rā Mosia 18:8–10 nō te mau mana’o). Nāhea e ti’a ai ia tātou ’ia riro mai ia Nephi te huru ?
E tao’a faufa’a rahi roa te mau pāpa’ira’a mo’a.
-
’Ua riro te mau pāpa’ira’a mo’a ’ei mea faufa’a roa nō te ’utuāfare o Lehi. Nō te fa’ahōho’a i te reira, e nehenehe ’outou e ani i tā ’outou mau tamari’i ’ia tauturu mai ia ’outou ’ia fa’ati’a ’aore rā ’ia ha’uti i te mau mea tā Nephi ’e tōna mau taea’e i rave, nō te fāri’i i te mau pāpa’a parau : ’Ua rātere ātea rātou, ’ua hōro’a i tā rātou ’auro ’e te moni, ’e ’ua tāpuni i roto i te hō’ē ana nō te pāruru i tō rātou ora. I muri iho, e nehenehe ’outou e tai’o 1 Nephi 5:21 ’e ’ia ’āparau nō te aha te mau pāpa’ira’a mo’a i riro ai e mea faufa’a rahi roa nō te ’utuāfare o Lehi. Nō te aha te reira e riro ai ’ei mea faufa’a roa nō tātou ? Nāhea e ti’a ai ia tātou ’ia fa’ariro i te mau pāpa’ira’a mo’a ’ei tao’a faufa’a rahi ?
’Ua ha’afaufa’a Nephi ’e tōna ’utuāfare i te mau pāpa’ira’a mo’a.
E arata’i te Vārua Maita’i iā’u ’a ’imi ai au i te rave i te hina’aro o te Fatu.
-
I muri a’e i te hi’o-’āmui-fa’ahou-ra’a te 1 Nephi 3 e mea nāhea tō Nephi ’e tōna mau taea’e tāmatara’a ’ia roa’a mai te mau pāpa’a parau, ’a tai’o ’e tā ’outou mau tamari’i te 1 Nephi 4:6 nō te ’ite mai e aha tā Nephi i rave tei fa’ati’a iāna ’ia manuia i te pae hope’a. I muri iho, e nehenehe te mau tamari’i e tāpura mai i te mau mea tā te Atua e hina’aro ’ia rave rātou. Nāhea te Vārua Maita’i e nehenehe ai e tauturu ia tātou i roto i teie mau huru tupura’a ?
Nō te tahi atu ā mana’o, hi’o i te ve’a nō teie ’āva’e o te Hoa.
’Ua ha’apa’o vau i te reo o te Vārua, nā Walter Rane