« 22–28 nō Tēnuare : ‘’Ua fa’a’ahuhia… i te parauti’a ’e te mana o te Atua’ 1 Nephi 11–15 », Mai, pe’e mai—Nō te ’utuāfare ’e te fare purera’a : Buka a Moromona 2024 (2024)
« 22–28 nō Tēnuare. 1 Nephi 11-15 », Mai, pe’e mai—Nō te ’utuāfare ’e te fare purera’a : 2024 (2024)
Te here o te Atua, nā Sabrina Squires
22–28 nō Tēnuare : « ’Ua fa’a’ahuhia… i te parauti’a ’e te mana o te Atua »
1 Nephi 11–15
E ’ohipa rahi roa ana’e tā te Atua e rave nā tāna peropheta, pinepine ’oia i te hōro’a i taua peropheta ra i te hō’ē ’ōrama rahi mau. ’Ua fāri’i Mose, Ioane, Lehi ’e ’o Iosepha Semita i te mau ’ōrama mai te reira te huru—e mau ’ōrama tei fa’a’ā’ano i tō rātou ferurira’a ’e tei tauturu ia rātou ’ia ’ite i te rahi mau ’e te fa’ahiahia mau o te ’ohipa a te Atua.
’Ua fāri’i ato’a Nephi i te hō’ē o teie mau ’ōrama tei taui i tōna orara’a. ’Ua ’ite ’oia i te tāvinira’a a te Fa’aora, te ananahi o te hua’ai o Lehi i roto i te fenua i parauhia, ’e te hope’ara’a o te ’ohipa a te Atua i te mau mahana hope’a nei. I muri a’e i teie ’ōrama, ’ua ineine maita’i a’e Nephi nō te ’ohipa e vai ra i mua iāna. ’E e nehenehe ato’a te tai’ora’a i teie ’ōrama e tauturu ia ’outou ’ia fa’aineine ia ’outou—nō te mea e ’ohipa ato’a tā te Atua nā ’outou e rave i roto i tōna bāsileia. Tei rotopū ’outou i te « feiā mo’a o te ’ēkālesia a te ’Ārenio » tā Nephi i ’ite, « ’o tei ha’apurarahia nā roto i te ao ato’a nei ; ’e ’ua fa’a’ahuhia rātou i te parauti’a ’e te mana o te Atua ma te hanahana rahi » (1 Nephi 14:14).
Hi’o ato’a « Nephi Sees a Vision of Future Events [’Ua ’ite Nephi i te hō’ē ’ōrama nō te mau ’ohipa e tupu ’a muri a’e] » (video), Vaira’a buka ’evanelia.
Mana’o nō te ’apo i te ha’api’ira’a i te ’utuāfare ’e i te fare purera’a
’Ua tono mai te Atua ia Iesu Mesia mai te hō’ē fa’a’itera’a nō tōna here.
I tō Nephi anira’a i te melahi nō ni’a i te aura’a o te tumu rā’au i roto i te ’ōrama o Lehi, e nehenehe noa i te melahi e parau ē, « e fa’ahōho’ara’a te reira nō te here o te Atua ». ’Ua fa’a’ite rā ’oia ia Nephi e rave rahi taipe ’e mau tupura’a ’ohipa nō te orara’a o te Fa’aora. ’A ’imi i teie mau taipe ’e te mau tupura’a ’ohipa ’a tai’o ai ’e ’a feruri ai ’outou te 1 Nephi 11. E aha tā ’outou i ’ite mai ’o tē tauturu ia ’outou ’ia māramarama nō te aha Iesu Mesia i riro ai ’ei fa’a’itera’a ’ōtahi nō te here o te Atua ?
E nehenehe ato’a ’outou e feruri e māta’ita’i i te mau video nō ni’a i te Bibilia i roto i te Vaira’a buka ’evanelia, e tū’ati ’e te mau tupura’a ’ohipa tā Nephi i ’ite. E mea nāhea tō te Fa’aora tauturura’a ia ’outou ’ia putapū i te here o tō ’outou Metua i te ao ra ?
Hi’o ato’a Susan H. Porter, « Te aroha o te Atua : Te mea ’oa’oa roa a’e nō te vairua », Liahona, Nov. 2021, 33–35.
E nehenehe au e « fa’a’ahuhia i te parauti’a » ’e te mana.
E’ita ’o Nephi e ora maoro nō te riro ’ei ’ite nō te mea tāna i ’ite i roto i tōna ’ōrama. Nō te aha e mea faufa’a nō Nephi ’ia ’ite i teie mau mea ? Nō te aha e mea faufa’a nō ’outou ’ia ’ite i te reira ? ’A ui i teie mau uira’a i te mau taime ato’a e tai’o ’outou i te hō’ē mea tā Nephi i ’ite i roto i tōna ’ōrama (hi’o 1 Nephi 12–14). E aha te mau mana’o tā ’outou i fāri’i nō ni’a i tō ’outou ti’ara’a i roto i te « ’ohipa rahi ’e te maere » a te Fatu ? (1 Nephi 14:7). E aha te tahi o te mau ’ohipa rahi ’e te māere tāna i rave nō ’outou ?
’A feruri iho ā rā i te parau fafau i roto te 1 Nephi 14:14. Nāhea tō te Fa’aora fa’atupura’a i teie parau fafau i roto i tō ’outou orara’a ? (Nō te tahi mau hi’ora’a, hi’o David A. Bednar, « ’E te mana o te Atua ma te hanahana rahi », Liahona, Nov. 2021, 28–30, nā tuha’a hope’a iho ā rā e piti.)
E aha « te ’ekālesia rahi ’e te vi’ivi’i » tā Nēphi i ’ite ?
Tē fa’ata’a nei Elder Dallin H. Oaks ē, « te ’ekālesia rahi ’e te vi’ivi’i » tā Nephi i fa’ata’a mai, e fa’ahōho’ara’a ïa nō « te mau ferurira’a hōhonu ato’a ’aore rā te mau fa’anahora’a e pāto’i nei i te ti’aturira’a i te Atua. ’E te ‘tītīra’a’ ’o tā teie ‘’ekālesia’ e ’imi nei i te arata’i atu i te feiā mo’a, e ’ere ïa i te ’ōpanipanira’a pae tino, e tītīra’a rā o te mau mana’o hape » (« Stand as Witnesses of God », Ensign, Māti 2015, 32). Nāhea te Fa’aora i te tauturu ia ’outou ’ia ’ape—’e ’ia horo ’ē atu—i te tītīra’a o te mau mana’o hape ?
E pāhono mai te Atua iā’u mai te mea e ani au ma te fa’aro’o.
’Ua tupu a’ena ānei te mana’o i roto ia ’outou ē, ’aita ’outou e fāri’i nei i te heheura’a—’aita te Atua e paraparau mai nei ia ’outou ? E aha te parau a’o tā Nephi i hōro’a i tōna nā taea’e i te tupura’a te reira mana’o i roto ia rāua ? (Hi’o 1 Nephi 15:1–11.) Nāhea ’outou i te fa’a’ohipa i te parau a’o a Nephi i roto i tō ’outou orara’a ?
E tauturu te tāpe’a-māite-ra’a i te parau a te Atua iā’u ’ia pāto’i i te mana o Sātane.
Pinepine Nephi i te fāri’i i te mau ’ohipa rū e parau i tōna mau taea’e. E au rā ē, e fa’ahiehiera’a ta’a ’ē tōna nō ni’a i te mea tāna i parau ia rātou i roto te 1 Nephi 15:23–25. E aha te poro’i a Nephi, ’e i tō ’outou mana’o nō te aha e ’ohipa poihere te reira nōna ?
’Ua ha’api’i Elder David A. Bednar ē, e nehenehe « te parau a te Atua » e fa’ahiti i te mau pāpa’ira’a mo’a, i te mau parau a te mau peropheta ora, ’e ia Iesu Mesia iho. I tō ’outou mana’o, e aha te aura’a e « mau māite » i te mau pāpa’ira’a mo’a ’e i te mau parau a te mau peropheta ora ? E aha te aura’a e « mau maīte » ia Iesu Mesia ? E nehenehe ’outou e ’imi i te mau pāhonora’a i teie mau uira’a i roto i te parau poro’i a Elder Bednar « ’Aore rā mātou i ha’apa’o noa atu ia rātou » (Liahona, Mē 2022, 14–16).
Nāhea te mau-māite-ra’a i te parau a te Atua i te tauturu ia ’outou ’ia pāto’i i te ’enemi ? E nehenehe te fa’a’īra’a i te hō’ē tāpura mai teie te huru e tauturu i te fa’anaho i tō ’outou mau mana’o :
|
… e tauturu iā’u ’ia upo’oti’a i ni’a i te pōiri o te fa’ahemara’a ? (hi’o 1 Nephi 12:17) |
… e tauturu iā’u « ’eiaha e ha’apa’o » i te fa’aahaaha ’e te ’ā’au teitei o te ao nei ? (1 Nephi 12:18) | |
|
Nāhea i te tāpe’a-māite-ra’a i te mau pāpa’ira’a mo’a ’e te mau parau a te mau peropheta ora … | ||
|
Nāhea i te tāpe’a-māite-ra’a i te Fa’aora … |
Hi’o ato’a Jorge F. Zeballos, « Patura’a i te hō’ē orara’a e ’aroti’a i te ’ati », Liahona, Nov. 2022, 50–52.
E au te mau pāpa’ira’a mo’a mai te hō’ē auri ’o tē arata’i ia tātou i te tumu rā’au o te ora.
Nō te tahi atu ā mana’o, hi’o i te mau ve’a nō teie ’āva’e o te Liahona ’e Nō te Pūai ’o te Feiā ’Āpī.
Mana’o nō te ha’api’i i te tamari’i
’Ua tono mai te Metua i te ao ra ia Iesu Mesia nō te mea ’ua here ’oia iā’u.
-
Nō te ha’api’i ia Nephi nō ni’a i te here o te Atua, ’ua fa’a’ite te hō’ē melahi ia Nephi i te mau tupura’a ’ohipa nō te orara’a o te Fa’aora. E nehenehe ’outou e nā reira ato’a nō tā ’outou mau tamari’i—hōro’a ia rātou i te mau hōho’a o te mau tupura’a ’ohipa tā Nephi i ’ite i roto te 1 Nephi 11:20, 24, 27, 31, ’e 33 (hi’o Buka hōho’a ’evanelia, nūmera 30, 35, 39, 42, 57). ’A tai’o ai ’outou i teie mau ’īrava, ’a tauturu i tā ’outou mau tamari’i ’ia ’imi i te hōho’a e tū’ati i te reira. E aha tā tātou e ha’api’i mai nō ni’a ia Iesu Mesia nā roto mai i teie mau ’īrava ’e teie mau hōho’a ?
-
E tauturu te hīmenera’a i te hō’ē hīmene mai te « Je ressens son amour » (Chants pour les enfants, 42–43) i tā ’outou mau tamari’i ’ia putapū i te here o te Atua. I muri a’e i tā ’outou hīmenera’a, e ani i tā ’outou mau tamari’i e aha tā rātou i ha’api’i mai nā roto mai i te hīmene. E aha atu ā tā tātou i ha’api’i mai nō ni’a i te here o te Atua i roto te 1 Nephi 11:22–23 ?
Fa’a’ohipa i te anoihi nō te tauturu i te mau tamari’i ’ia ha’api’i mai. ’Ia ha’api’i ana’e ’outou i te mau tamari’i i te hō’ē ’ā’amu o te pāpa’ira’a mo’a, ’a tāuturu ia rātou ’ia hi’o mana’o i te reira. E nehenehe ’outou e fa’a’ohipa i te mau hōho’a, te mau video, te mau pēpe hūrio, te mau ’ahu ’e tē vai atu ra.
Tē ha’api’i nei te Buka a Moromona i te mau parau mau faufa’a rahi.
-
Nō te tauturu i tā ’outou mau tamari’i ’ia ha’afaufa’a i te mau parau mau « pāpū ’e te faufa’a » i roto i te Buka a Moromona, e nehenehe ’outou e pāpa’i i te hō’ē hōho’a ’e e ani i tā ’outou mau tamari’i ’ia taui ’aore rā ’ia ’īriti i te mau tuha’a o te hōho’a nō te fa’ahuru ’ē te hi’ora’a. E nehenehe ’outou e fa’a’ohipa i te reira nō te ha’api’i ē, ’ua tauihia te mau mea i roto i te Bibilia ’e ’ua ’īriti-’ē-hia i te roara’a o te tau. E tai’o ’āmui te 1 Nephi 13:40 ’e e ’āparau nāhea te Buka a Moromona (« teie mau pāpa’ira’a hope’a ») i te tauturu ia tātou ’ia māramarama i te « mau mea pāpū ’e te faufa’a » tei mo’e i roto i te Bibilia (te mau pāpa’ira’a « mātāmua »). E aha te mau parau mau « pāpū ’e te faufa’a » tā ’outou i ’apo mai i roto i te Buka a Moromona ?
-
E nehenehe te video « The Book of Mormon—a Book from God [Te Buka a Moromona—hō’ē Buka nō ’ō mai i te Atua] » (Vaira’a buka ’evanelia) e tauturu i tā ’outou mau tamari’i ’ia ’ite nō te aha e mea faufa’a ’ia fāri’i i te Bibilia ’e te Buka a Moromona. E ’oa’oa paha te mau tamari’i ’ia hāmani fa’ahou i te fa’ahōho’ara’a i roto i te vidéo.
Tē fa’aho’i fa’ahou mai nei te Buka a Moromona i te mau parau mau o te ’evanelia i mo’e i te roara’a o te tāivara’a.
E tauturu te tāpe’a-māite-ra’a i te parau a te Atua iā’u ’ia pāto’i i te fa’ahemara’a.
-
’A hōro’a i tā outou mau tamari’i i te taime nō te fa’a’ite mai i te mea tā rātou e ha’amana’o nei nō ni’a i te ’ōrama o Lehi. E mea maita’i ’ia fa’a’ohipa i te hō’ē hōho’a, mai terā i roto i te arata’i ha’api’ira’a nō te hepetoma i ma’iri. E aha te mea i tāpe’a i te ta’ata ’ia tāpae i te tumu rā’au ? E aha te mea i tauturu ia rātou ’ia tāpae i reira ? E nehenehe ’outou e ani ia rātou ’ia ’imi i te auri i roto i te hōho’a. E tai’o ’āmui te 1 Nephi 15:23–24 nō te ’ite e aha tā te auri e fa’ahōho’a nei ’e e nāhea te reira i te tauturu ia tātou.
Nō te tahi atu ā mana’o, hi’o i te ve’a nō teie ’āva’e o te Hoa.
Te ’ōrama o Nephi nō Maria, nā James Johnson