mau ta’ata e hi’opo’a ra i te Liahona

29 nō Tēnuare–4 nō Fēpuare : « E fa’aineine au i te ’ē’a i mua ia ’outou »

1 Nephi 16–22

’A rātere noa ai te ’utuāfare o Lehi nō te fenua i parauhia, ’ua parau te Fatu ia rātou i teie parau fafau : « E fa’aineine au i te ’ē’a i mua ia ’outou, mai te mea e ha’apa’o ’outou i tā’u mau fa’auera’a » (1 Nephi 17:13). E mea pāpū roa, e ’ere te aura’a o teie parau fafau ē, e ’ōhie noa te tere—’aita te mau melo o te ’utuāfare e fāri’i noa, ’ua fati te mau fana, ’ua aro haere te ta’ata ’e ’ua pohe ’e ’ua tītau-fa’ahou-hia ia rātou e hāmani i te hō’ē pahī i te mau mātēria tā rātou iho i hāmani i reira. Terā rā, ’ia fa’aruru ana’e te ’utuāfare i te ’ati ’aore rā i te mau ’ohipa teimaha roa ’ino, ’ua ’ite Nephi ē, ’aita te Fatu i ātea roa. ’Ua ’ite ’oia ē, e « fa’a’amu ïa [te Atua] i [te feiā ha’apa’o maita’i], e fa’aitoito ia rātou ’e e fa’atupu ho’i ’oia i te rāve’a e ti’a ai ia rātou ’ia rave i te mea tāna i fa’aue mai ia rātou » (1 Nephi 17:3). Mai te peu tē uiui nei ’outou nō te aha tē tupu nei te mau ’ohipa ’ino i ni’a i te mau ta’ata maita’i mai ia Nephi ’e tōna ’utuāfare, e ’ite mai paha ’outou i te tahi mau mana’o i roto i teie mau pene. Te mea faufa’a atu rā paha, e ’ite mai ’outou e aha tā te mau ta’ata maita’i e rave ’ia tupu ana’e te mau ’ohipa ’ino.

Mana’o nō te ’apo i te ha’api’ira’a i te ’utuāfare ’e i te fare purera’a

Ītona nō te séminaire

1 Nephi 16–18

E tauturu te Fa’aora iā’u ’ia fa’aruru i te mau tāmatara’a o te orara’a.

’Ua fa’aruru te ’utuāfare o Nephi i te tahi mau tāmatara’a fifi—mai ia tātou pā’āto’a nei. E aha tā ’outou i ha’api’i mai nā roto mai ia Nephi nō ni’a i te fa’arurura’a i te ’ati ma te fa’aro’o ia Iesu Mesia ? ’A tai’o i tōna mau ’itera’a i roto te 1 Nephi 16:17–32 ; 16:34–39 ; 17:7–16 ; 18:1–4 ; ’e 18:9–22. E pāpa’i i te mau mea tā ’outou e ’ite mai i raro a’e i te mau upo’o parau mai teie : « Tāmatara’a », « Nāhea Nephi i te pāhonora’a » ’e « Nāhea te Fatu i te tauturura’a ». E aha tā ’outou i ha’api’i mai ’o tā ’outou e nehenehe e fa’a’ohipa i mua i te mau tāmatara’a tā ’outou e fārerei nei ?

I muri a’e i te ’apora’a mai nā roto mai ia Nephi ’e tōna ’utuāfare, e nehenehe ’outou e pāpa’i i te tahi atu ā mau mana’o i raro a’e i teie mau upo’o parau : « Tō’u mau tāmatara’a », « Nāhea vau i te pāhono atu » ’e « Nāhea te Fatu i te tauturu iā’u ». ’A nā reira ai ’outou, e nehenehe ’outou e hi’o i te mau pāpa’ira’a mo’a mai teie : Mataio 11:28–30 ; Ioane 14:26–27 ; Mosia 24:13–15. E nehenehe te hō’ē hīmene mai te « I hea vau e fāri’i ai i te hau ? » (Te mau Hīmene, N°62), e ha’apūai i tō ’outou fa’aro’o i te Fa’aora ’e te tauturu tāna e pupu mai i roto i te mau taime tāmatara’a.

Hi’o ato’a Anthony D. Perkins « ’A ha’amana’o i tō ’oe feiā mo’a tei māuiui, e tō mātou Atua », Liahona, Novema 2021, 103–5 ; « He Will Give You Help [E tauturu ’oia ia ’oe] », « The Lord Guides Lehi’s Journey [’Ua arata’i te Fatu i te tere o Lehi] », « The Lord Commands Nephi to Build a Ship [’Ua fa’aue te Fatu ia Nephi e hāmani i te hō’ē pāhi] », ’e « Lehi’s Family Sails to the Promised Land [’Ua fano atu te ’utuāfare o Lehi i te fenua i parauhia ra] » (video), Vaira’a buka ’evanelia

1 Nephi 16:10–16, 23–31 ; 18:11–22

E arata’i te Fatu iā’u nā roto i te mau rāve’a iti ’e te ’ōhie.

I te arata’ira’a te Atua i te ’utuāfare o Lehi i roto i te medebara, ’aita ’oia i hōro’a ia rātou i te hō’ē hōho’a fenua e fa’a’ite ra i te mau tuha’a ri’i ato’a o te tere. ’Ua hōro’a rā ’oia ia rātou i te Liahona nō te arata’i ia rātou i te mau mahana ato’a. ’Ia tai’o ’outou i te 1 Nephi 16:10–16, 23–31, ’e te 18:10–22, e nehenehe e hāmani i te hō’ē tāpura nō te mau parau tumu e fa’ahōho’a nei i te huru te Atua ’ia arata’i i tāna mau tamari’i (’ei hi’ora’a, e nehenehe te 1 Nephi 16:10 e ha’api’i ē, i te tahi mau taime, e arata’i te Atua ia tātou nā roto i te mau rāve’a mana’o-’ore-hia). E aha te mau tū’atira’a tā ’outou e ’ite nei i rotopū i te Liahona ’e te Vārua Maita’i ? E aha te « mau rāve’a iti roa » i fa’atupu ai ’oia i « te mau mea rarahi » i roto i tō ’outou orara’a ?

Hi’o ato’a Alama 37:7, 38–47 ; Te Ha’api’ira’a Tumu ’e te mau Fafaura’a 64:33–34.

Lehi e fa’a’ohipa ra i te Liahona

Mai te mea ’ua ineine ’outou e’ita ’outou e mata’u, nā Clark Kelley Price

1 Nephi 17:1–6, 17–22

E nehenehe tō’u mau fifi e riro ’ei ha’amaita’ira’a.

Noa atu ē, hō’ē ā huru tāmatara’a tō Nephi ’e tō tōna nā taea’e i roto i te medebara, e mea ta’a ’ē roa te mau ’ohipa i tupu nō rātou. E nehenehe ’outou e fa’aau i te ’ā’amu o Nephi nō tōna tere i roto i te medebara (hi’o 1 Nephi 17:1–6) ’e te ’ā’amu o tōna nā taea’e (hi’o 1 Nephi 17:17–22). E aha tā Nephi i ’ite ’aore rā i rave tei tauturu iāna ’ia roa’a i te hō’ē hi’ora’a ātea ha’apa’o maita’i ? E pāpa’i i te hō’ē tāmatara’a ’aita i maoro a’e nei ’aore rā e tupu noa ra, nō ni’a i te hi’ora’a ātea o te fa’aro’o ’e te ’ā’au mehara. E aha tā ’outou i putapū ’aore rā i ha’api’i mai nā roto mai i te reira ?

Hi’o ato’a Amy A. Wright, « E fa’aora te Mesia i tei fati », Liahona, Mē 2022, 81–84 ; « No Strength without Struggle [’Aita e pūai ’aita ana’e e ’arora’a] » (video), Vaira’a buka ’evanelia.

Taime ferurira’a ma te hau. Ravera’a i te taime nō te feruri, nō te ’ōreromo’o [mediter], nō te ferurira’a ’aore rā nō te pāpa’i, e nehenehe e arata’i atu i te fa’aurura’a. E tauturu te reira ia tātou ’ia ’ite e nāhea te ha’api’ira’a tumu ’aore rā te mau parau tumu o te ’evanelia e tū’ati ai i tō tātou orara’a. ’Ia ha’api’i ana’e ’outou ia vetahi ’ē, ’a hōro’a ia rātou i te taime nō te feruri ’e nō te pāpa’i i tō rātou mau mana’o. E nehenehe ato’a te reira e fa’arahi i tō rātou hina’aro ’ia fa’a’ite mai i tō rātou mau mana’o ’e tō rātou mau putapūra’a ia vetahi ’ē.

1 Nephi 19:22–24 ; 20–22

E nehenehe au e « fa’aau i te mau pāpa’ira’a mo’a ato’a » iā’u iho.

Nō te mea ho’i ’ua pāpa’ihia te mau pāpa’ira’a mo’a e rā ’ē te tau, e au ra ē, ’aita roa te reira e tano nō tātou i teie mahana. ’Ua ’ite maita’i a’e rā o Nephi. « ’Ua fa’aau ho’i au i te mau pāpa’ira’a mo’a ato’a ia mātou », tāna ïa parau, « ’ia riro te reira ’ei maita’i ’e ’ei ha’api’ira’a ho’i nā mātou » (1 Nephi 19:23). Teie te hō’ē o te mau tumu i ’itehia ai ia Nephi te mana rahi pae vārua i roto i te mau pāpa’ira’a mo’a.

’A feruri i te mau uira’a mai teie i muri nei ’a tai’o ai ’outou te 1 Nephi 20–22 :

1 Nephi 20:1–9.E aha tā teie mau ’īrava e ha’api’i nei nō ni’a i te ta’ata i te ’anotau o Isaia ? E aha te mea tā ’outou e ’ite mai e tano ato’a nō ’outou ?

1 Nephi 20:17–22.E aha tā teie mau ʼīrava e haʼapiʼi nei nō ni’a i te arata’ira’a a te Metua i te ao ra i te ta’ata i te ’anotau o Isaia ? Nāhea ’oia i te ani ia ’outou ’ia pe’e iāna ?

E aha atu ā tā ’outou e ’ite mai i roto te 1 Nephi 20–22, ’o tā ’outou e nehenehe e « fa’aau » i ni’a ia ’outou iho ?

Nō te tahi atu ā mana’o, hi’o i te mau ve’a nō teie ’āva’e o te Liahona ’e Nō te Pūai ’o te Feiā ’Āpī.

Mana’o nō te ha’api’i i te tamari’i

1 Nephi 16:10, 28–29 ; 18:8–13, 20–22

’Ia ha’apa’o ana’e au i te mau fa’auera’a, e arata’i te Fatu iā’u.

• Mai te mea e ’avei’a tā ’outou, e hōho’a fenua, ’aore rā te tahi atu mea ’o tē tauturu ia tātou ’ia ’ite i tō tātou ’ē’a, e nehenehe ’outou e fa’a’ite i te reira i tā ’outou mau tamari’i. E riro te reira ’ei rāve’a maita’i roa nō te ha’amata i te hō’ē ’āparaura’a nō ni’a i te Liahona, tā ’outou e nehenehe e tai’o i roto te 1 Nephi 16:10, 28–29. E aha te tahi mau tumu e nehenehe ai te hō’ē ’avei’a e ’ore e tere ’aore ra hō’ē hōho’a fenua ? Nō te aha ’aita te liahona e tere maita’i i te tahi mau taime nō te ’utuāfare o Lehi ? (hi’o 1 Nephi 18:9–12, 20–22). E aha tā te Metua i te ao ra i hōro’a mai ia tātou i teie mahana nō te arata’i ia tātou ’ia ho’i iāna ra ?

• Nō te tauturu i tā ’outou mau tamari’i ’ia fa’a’ohipa i te mea tā rātou i ha’api’i mai nō ni’a i te Liahona i roto te 1 Nephi 16:10, 26–31 ; 18:8–22, e ani ia rātou ’ia feruri i te hō’ē fa’aotira’a faufa’a roa ’aore rā i te hō’ē fa’aotira’a fifi. E aha tā te Atua i hōro’a mai ia tātou nō te arata’i ia tātou i teie mahana mai te au i te hō’ē liahona ? (Hi’o, ’ei hi’ora’a, Alama 37:38–44.) E nehenehe e fa’a’ite i te hō’ē ’itera’a nō te ta’ata iho, i reira tō te Metua i te ao ra arata’ira’a ia ’outou.

1 Nephi 16:21–32

E nehenehe au e riro ’ei hi’ora’a maita’i nō tō’u ’utuāfare.

• ’A tai’o ’āmui ai ’outou te 1 Nephi 16:21–32, ’a tauturu i tā ’outou mau tamari’i ’ia ’ite e mea nāhea te hi’ora’a o Nephi i te tauturura’a i tōna ’utuāfare (hi’o ato’a te video « The Lord Guides Lehi’s Journey [’Ua arata’i te Fatu i te tere o Lehi] » [Vaira’a buka ’evanelia]). E arata’i mai paha te reira i te ’āparaura’a nō ni’a i te huru e nehenehe ai tātou e riro mai ia Nephi te huru. E ani i tā ’outou mau tamari’i ’ia fa’anaho i te hō’ē ’ohipa tā rātou e nehenehe e rave, nō te riro ’ei fa’aurura’a maita’i i ni’a i te tahi atu mau melo o te ’utuāfare.

1 Nephi 17:7–19 ; 18:1–4

E nehenehe te Metua i te ao ra e tauturu mai iā’u ’ia rave i te mau ’ohipa fifi.

• E mea au nā te mau tamari’i ’ia fa’ati’a i te mau ’ā’amu. E ani ia rātou ’ia tauturu mai ia ’outou ’ia fa’ati’a i te ’ā’amu o Nephi, tei fa’auehia e hāmani i te hō’ē pahī (hi’o 1 Nephi 17:7–19 ; 18:1–4 ; hi’o ato’a « Pene 7 : Te hāmanira’a i te pahī », i roto Te mau ’ā’amu o te Buka a Moromona, 21–22 ; ’aore rā te video « The Lord Instructs Nephi to Build a Ship [’Ua ha’api’i te Fatu ia Nephi i te hāmani i te hō’ēe pāhi » [Vaira’a buka ’evanelia]). E nehenehe ato’a rātou e hīmene ’amui i te ’īrava piti o te « Le courage de Nephi » (Chants pour les enfants, 64). E aha te mea i tauturu ia Nephi ’ia roa’a te itoito, ’a tāhitohito ai tōna nā taea’e iāna nō te tāmatara’a i te hāmani i te pahī ?

• ’Aita o Nephi i ’ite nāhea ’ia hāmani i te hō’ē pahī, nō reira ’ua ti’aturi ’oia i te arata’ira’a a te Fatu. I muri a’e i te tai’ora’a te 1 Nephi 18:1 ’e ’outou, e nehenehe tā ’outou mau tamari’i e fa’a’ī i te ’api fa’a’ana’anataera’a nō teie hepetoma. ’A rave ai rātou i te reira, ’a parau ia rātou nāhea te Metua i te a’o ra e nehenehe ai e tauturu ia tātou ’ia rave i te mau ’ohipa fifi, mai tāna i tauturu ia Nephi.

Nō te tahi atu ā mana’o, hi’o i te ve’a nō teie ’āva’e o te Hoa.

Nephi ’e tōna ’utuāfare i ni’a i te pahī

E mea ’eta’eta roa rāua i ni’a iā’u, nā Walter Rane

’api fa’a’ana’anataera’a : E nehenehe te Metua i te ao ra e tauturu iā’u ’ia rave i te mau ’ohipa fifi.