Moroni 7–9

Kinatibuk-ang Pagpasabot

Si Moroni, kinsa naglatagaw nga nag-inusara sulod sa daghan nga mga katuigan human ang iyang mga katawhan malaglag, mirekord sa mga pulong sa iyang amahan mahitungod sa paglaom nga atong maangkon diha kang Kristo bahin sa mas dagko nga mga butang nga moabot. Siya nagdasig kanato sa paggamit sa Kahayag ni Kristo aron mahibalo kon unsay sakto ug sayop. Mitudlo siya kon unsaon “paghupot sa matag maayo nga butang” (Moroni 7:20, 25), ilabi na sa gugma nga putli, “ang tiunay nga gugma ni Kristo” (Moroni 7:47). Mipakigbahin usab siya og sulat gikan sa iyang amahan nga nagtudlo nga ang gagmay nga mga bata maluwas pinaagi sa Pag-ula ni Kristo ug dili magkinahanglan og bunyag.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Moroni 7:1–19

Katuyoan sa leksiyon: Kini nga leksiyon makatabang sa mga estudyante sa pagsalig kang Jesukristo sa paghukom tali sa maayo ug sa daotan.

• Pagpangandam sa estudyante: Dapita ang mga estudyante sa pagtambong nga andam nga mopakigbahin kon sa unsang paagi ang mga pagpili nga ilang gihimo naimpluwensiyahan sa ilang pagtuo kang Jesukristo.

• Hulagway nga ipakita: Ang hulagway nga adunay duha ka mga kwadro nga makita nga managlahi nga mga kolor sa abohon

• Butang: Usa ka espat alang sa gisugyot nga leksiyon nga naggamit og usa ka butang

• Sugyot sa pagtudlo pinaagi sa videoconference: Aron mahimo ang leksiyon nga naggamit og usa ka butang gamit ang espat, seguroha nga ngitngit ang luna sa imong palibot. Ikonsiderar ang pagsira sa mga kurtina, pagbalhin ngadto sa usa ka lawak nga walay daghang mga bintana, o pagbutang og usa ka habol nga itabon sa imong computer ug sa imong kaugalingon. (Mahimo nimong ipraktis kini gamit ang imong kamera sa kompyuter sa dili pa ang klase aron maseguro nga ngitngit ang lugar.) Dapita ang mga estudyante sa pagbasa og usa ka kasulatan o usa ka kard nga imong gikuptan duol sa kamera samtang ngitngit pa. Dayon ipadan-ag ang usa ka espat sa kard o kasulatan ug hangyoa ang mga estudyante sa pagsulay pag-usab. Mahimong epektibo usab ang pagdapit daan og usa ka estudyante sa paghatag niini nga leksiyon nga naggamit og usa ka butang ngadto sa klase.

Moroni 7:20–43

Katuyoan sa leksiyon: Kini nga leksiyon makatabang sa mga estudyante nga mobati og dugang nga paglaom pinaagi ni Jesukristo.

• Pagpangandam sa estudyante: Ikonsiderar ang pagdapit sa mga estudyante sa pagbasa sa 1 Pedro 3:15 ug sa pagpamalandong kon giunsa ni Jesukristo paghatag kanila og paglaom.

• Mga butang: Usa ka lamesa nga adunay nagkalainlaing mga butang, lakip ang mga meryenda nga mahimong ikonsiderar sa mga estudyante nga maayo ug dili maayo

• Mga bidyo: “Si Alma Mipamatuod ngadto sa Iyang Anak nga si Helaman” (7:09; tan-awa gikan sa time code 1:30 hangtod sa 2:32); “Finding Hope through the Resurrection of Christ [Pagkaplag og Paglaom pinaagi sa Pagkabanhaw ni Kristo]” (4:41); “Ang Gamhanan nga Tig-ayo” (13:00; tan-awa gikan sa time code 8:49 hangtod sa 11:53)

• Handout: “Pagkaplag og Paglaom diha kang Jesukristo”

• Sugyot sa pagtudlo pinaagi sa videoconference: Ikonsiderar ang paggamit sa imong kamera aron ipakita ang lamesa nga giandam alang sa leksiyon nga naggamit og usa ka butang ug pangutan-a ang mga estudyante kon unsang mga butang ang ilang ikonsiderar nga maayo ug dili maayo.

Moroni 7:44–48

Katuyoan sa leksiyon: Kini nga leksiyon gituyo aron sa pagtabang sa mga estudyante nga makasabot ug magtinguha og gugma nga putli sa ilang mga kinabuhi.

• Pagpangandam sa estudyante: Dapita ang mga estudyante sa paghunahuna og mga ehemplo sa dihang ang Manluluwas mipakita og gugma, ingon man usab sa mga ehemplo sa Kristohanong gugma karon.

• Mga bidyo: “The Coat [Ang Kupo]” (2:07); “Gordon Hinckley: Lessons I Learned as a Boy [Gordon Hinckley: Mga Leksiyon nga Akong Nakat-onan isip usa ka Bata nga Lalaki]” (4:04); “Charity: An Example of the Believers [Gugma nga Putli: Usa ka Ehemplo sa mga Magtutuo]” (4:50); “Ang Gugma nga Putli Dili Gayod Mopakyas” (19:48; tan-awa gikan sa time code 15:05 hangtod sa 17:22)

• Hulagway nga ipakita: Usa ka hulagway sa Manluluwas

• Sugyot sa pagtudlo pinaagi sa videoconference: Ikonsiderar ang pagdapit sa mga estudyante sa paggamit sa chat sa pagpakigbahin sa ilang mga pangutana mahitungod sa gugma nga putli. Kini maghimo sa ilang mga pangutana nga makita sa ilang mga klasmeyt aron mabasa atol sa sunod nga bahin sa leksiyon. Dayon ipakita ang mga kalihokan nga mahimo sa mga estudyante aron sa pagsulay sa pagpangita og mga tubag sa ilang mga pangutana.

Doktrinal nga Kahanas: Moroni 7:45–48

Katuyoan sa leksiyon: Kini nga leksiyon makatabang sa mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan sa Moroni 7:45–48, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

• Pagpangandam sa estudyante: Dapita ang mga estudyante sa paghunahuna og mga sitwasyon nga ilang nasinati o nasaksihan diin sila makapraktis og gugma nga putli

• Sulod nga ipakita: Usa ka drowing sa usa ka kasingkasing diha sa pisara nga adunay pakisayran sa kasulatan ug mga pulong sa mahinungdanon nga hugpong sa mga pulong sa kasulatan nga gisulat palibot sa kasingkasing sa sinulagma nga pagkahan-ay

• Sugyot sa pagtudlo pinaagi sa videoconference: Aron matabangan ang imong mga estudyante sa pagrebyo sa mga baroganan sa pag-angkon og espirituhanong kahibalo, ikonsiderar ang pagsagol sa mga pulong sa matag usa sa tulo ka mga baroganan. I-type ang nagkasagol nga mga baroganan sa tagsa-tagsa diha sa chat ug dapita ang mga estudyante sa pagtubag gamit ang saktong mga pulong sa labing dali nga panahon.

Moroni 8

Katuyoan sa leksiyon: Kini nga leksiyon gituyo aron matabangan ang mga estudyante nga mas makasabot kon nganong ang gagmay nga mga bata wala magkinahanglan og bunyag ug unsa ang gitudlo niana kanato mahitungod sa Langitnong Amahan ug ni Jesukristo.

• Pagpangandam sa estudyante: Mahimo nimong ipakigbahin ang istorya gikan sa sinugdanan sa leksiyon o ang susama niana ug hangyoa ang mga estudyante sa paghunahuna kon unsaon nila sa pagtubag ang sitwasyon.

• Bidyo: “Ug Usa ka Bata nga Gamay Maoy Magamando Kanila” (16:55; tan-awa gikan sa time code 4:40 hangtod sa 5:59)

• Sugyot sa pagtudlo pinaagi sa videoconference: Mahimo nimong buhaton pag-usab ang tsart sa digital nga paagi ug ipakigbahin ang imong screen ngadto sa mga estudyante. Samtang ireport nila unsa ang ilang nakaplagan sa ilang pagtuon, mahimo nimong ibutang ang ilang mga nakaplagan sa angay nga kolum.