Mibati ka na ba sukad sa panginahanglan og dugang nga paglaom sa imong kinabuhi? Si Moroni, kinsa naglatagaw nga nag-inusara sulod sa daghan nga mga katuigan human ang iyang mga katawhan malaglag, mirekord sa mga pulong sa iyang amahan mahitungod sa paglaom nga atong maangkon diha kang Kristo bahin sa mas dagko nga mga butang nga moabot. Kini nga leksiyon makatabang kanimo nga mobati og dugang nga paglaom pinaagi ni Jesukristo.
Tabangi ang mga estudyante nga makaila sa impluwensiya sa Manluluwas sa ilang mga kinabuhi. Pangita og mga kahigayonan sa paghatag og gibug-aton sa makapabayaw nga gahom ug kaluoy sa Manluluwas ingon nga girekord diha sa mga kasulatan. Dapita ang mga estudyante sa pagpamalandong kon sa unsang paagi gipagaan ni Jesukristo ang ilang mga palas-anon ug gitabangan sila nga makalahutay sa mga kalisdanan. Dasiga sila sa pagdangop ngadto sa Langitnong Amahan ug ni Jesukristo nga adunay hugot nga pagtuo.
Pagpangandam sa estudyante: Ikonsiderar ang pagdapit sa mga estudyante sa pagbasa sa 1 Pedro 3:15 ug sa pagpamalandong kon giunsa ni Jesukristo paghatag kanila og paglaom.
Mga Posibleng Kalihokan sa Pagkat-on
Mohupot sa matag maayo nga butang
Kon mahimo, pag-andam og usa ka lamesa nga adunay mga butang nga lagmit gusto sa mga estudyante ug mga butang nga dili gusto sa mga estudyante (pananglitan, adunay pipila ka lamian nga mga pagkaon diha sa lamesa ingon man usab mga daan nga mga utanon ug walay sulod nga mga pamutos sa kendi). Sugdi pinaagi sa pagdapit sa mga estudyante sa pagduol ug “paghupot” sa usa ka butang nga ilang gipili. Pangutan-a sila kon nganong gipili nila ang unsay ilang gipili ug kon ila ba kining giisip nga usa ka “maayo nga butang.”
Diha sa Moroni 7, si Mormon miingon nga gusto niyang tabangan ang iyang katawhan nga makahibalo kon unsaon nga “mohupot sa matag maayo nga butang” (bersikulo 21).
Sa dihang si Mormon migamit sa hugpong sa mga pulong nga “maayo nga butang,” unsa sa imong hunahuna ang iyang gipasabot?
Unsa ang pipila ka espirituhanon ug mahangtorong “maayo nga mga butang” nga gusto nimong huptan, o madawat, niini nga kinabuhi o sa sunod?
Mahimo nimong mahinumdoman nga sa Moroni 7:12–19, si Mormon mitudlo nga ang tanang maayo nga mga butang nagagikan ni Jesukristo. Basaha ang Moroni 7:20–26, mangita sa unsay gitudlo ni Mormon kon unsaon sa pagdawat niining maayo nga mga butang gikan kang Kristo.
Unsay imong nakaplagan?
Kon gikinahanglan, ipasabot nga si Mormon mihatag og gibug-aton nga kita kinahanglan nga adunay hugot nga pagtuo diha ni Jesukristo. Si Mormon mitudlo nga aron sa pagtabang kanato nga makabaton og hugot nga pagtuo kang Kristo, ang Langitnong Amahan mipadala og mga anghel aron sa pagtudlo mahitungod sa Iyang Anak.
Unsa nga mga asoy ang imong mahunahunaan diin ang Langitnong Amahan mipadala og mga anghel aron sa pagpahayag nga si Jesukristo mao ang Manluluwas sa kalibotan?
Ang ubang mga tubag mahimong maglakip sa mga anghel nga miadto kang Adan ug Eva (Moises 5:6–9), Hari Benjamin (Mosiah 3:1–11), ug ang mga magbalantay (Lucas 2:10–12).
Ang kahulogan sa paglaom
Aron matabangan ka nga maandam sa pagkat-on og dugang mahitungod sa mga pagtulun-an ni Mormon kabahin sa paglaom, basaha kini nga asoy gikan ni Elder Dieter F. Uchtdorf sa Korum sa Napulog Duha ka Apostoles:
Imahe
Elder Dieter F. Uchtdorf
Sa wala pa ko moabot sa akong ika-12 nga adlawng natawhan, ang among pamilya kaduha napugos nga mobiya sa among panimalay ug magsugod na usab diha sa usa ka bag-o nga dapit taliwala sa kagubot, kahadlok, ug kawalay mga kaseguradohan tungod sa gubat ug politikal nga panagbangi. Usa kadto ka makapabalaka nga panahon alang kanako. …
Kini nga panahon sa kawalay paglaom human sa Ikaduhang Gubat sa Kalibotan adunay dako kaayo nga epekto sa kalibotan. Dako kini og epekto kanako.
Kaniadto, sa pag-inusara atol sa akong labing masulub-on nga mga oras, kanunay ko nga mangutana, “Aduna pa bay paglaom nga nahibilin sa kalibotan?” (Dieter F. Uchtdorf, “Ang Dios taliwala Kanato,” Liahona, Mayo 2021, 8)
Unsa ang pipila ka mga rason nga ang mga tawo mobati sa kakulang sa paglaom karon?
Ikonsiderar ang pagsulat sa mga tubag sa mga estudyante diha sa pisara.
Si Elder Uchtdorf nahinumdom nga “samtang ang kalibotan nag-antos sa pagka negatibo, kapait, kasilag, ug kahadlok,” siya nakakaplag og usa ka butang nga “mipuno [kaniya] og paglaom” (“Ang Dios taliwala Kanato,” Liahona, Mayo 2021, 8).
Nagsinati ka ba og kakulang sa paglaom diha sa imong kinabuhi? Hunahunaa kon unsa ang naghatag kanimo og paglaom bisan sa labing lisod nga mga kahimtang. Samtang magpadayon ka sa pagtuon niini nga leksiyon, pangitaa ang mga kamatuoran nga makatabang kanimo nga mapuno sa paglaom.
Mormon nagtudlo mahitungod sa paglaom
Basaha ang Moroni 7:40–44, mangita kon sa unsang paagi ang atong hugot nga pagtuo kang Jesukristo adunay kalabotan sa paglaom.
Isip kabahin niini nga panaghisgotan, mahimo nimong ipasabot nga si Mormon nagtudlo usab nga ang gugma nga putli gikinahanglan aron mahuptan ang tanang maayo nga mga butang nga gikan ni Kristo. Ang gugma nga putli pagahisgotan sa sunod nga leksiyon.
Unsaon nimo pagpamubo ang bersikulo 41 sa imohang kaugalingong mga pulong?
Usa ka kamatuoran gikan sa mga pagtulun-an ni Mormon
Usa ka kamatuoran nga atong makat-onan gikan ni Mormon mao nga kon kita magpakita og hugot nga pagtuo kang Jesukristo, kita makabaton og paglaom pinaagi sa Iyang Pag-ula nga mabanhaw ngadto sa kinabuhing dayon.
Unsa sa imong hunahuna ang gipasabot sa pagbaton og paglaom diha ni Jesukristo?
Samtang motubag ang mga estudyante, tabangi sila nga makasabot nga kini nga matang sa paglaom dili kalibotanon nga pangandoy. Ang paglaom diha ni Jesukristo kinahanglan nga mapuno sa kaseguroan nga kita sa kataposan mahimong takos alang sa kinabuhing dayon.
Ngano kaha nga kita kinahanglan nga magmapainubsanon, o “magmaaghop, ug magmapainubsanon sa kasingkasing” (Moroni 7:43), aron sa pagpakita og hugot nga pagtuo kang Jesukristo ug pagbaton og paglaom?
Aron makakita og ehemplo sa usa ka tawo kinsa nakakaplag og paglaom pinaagi sa hugot nga pagtuo kang Jesukristo, rebyoha ang usa sa mosunod nga mga asoy. Samtang imong buhaton, pangitaa kon sa unsang paagi ang tawo nakasinati og paglaom pinaagi ni Jesukristo.
Pagpili og usa sa mosunod nga mga asoy nga ipakigbahin sa klase, o iandam ang tanang mga asoy ug tugoti ang mga estudyante sa pagpili kon unsa nga asoy ang gusto nilang basahon o tan-awon.
Basaha ang Alma 22:12–18, ang istorya sa amahan ni Hari Lamoni.
Tan-awa ang “Ang Gamhanan nga Tig-ayo,” anaa sa ChurchofJesusChrist.org, gikan sa time code 8:49 hangtod sa 11:53.
Dapita ang mga estudyante sa pagpakigbahin og usa ka higayon sa dihang nakasinati sila og paglaom pinaagi sa pagpakita og hugot nga pagtuo kang Jesukristo ug sa unsang paagi mahimong lahi ang sitwasyon kon wala kana nga paglaom.
Mahinungdanon nga timan-an nga bisan kon kita magpakita og hugot nga pagtuo kang Jesukristo ug adunay paglaom alang sa mga panalangin nga Iyang gitanyag, kita mahimo gihapon nga adunay lisod ug mahagiton nga mga higayon sa atong mga kinabuhi. Apan samtang kita magpadayon sa pagpakita og hugot nga pagtuo sa Manluluwas ug magatutok Kaniya ug sa kinabuhing dayon nga Iyang gihimo nga posible nga atong maangkon , kita makabaton sa paglaom nga atong gitinguha.
Alang sa mosunod nga kalihokan, ikonsiderar ang pagdapit sa mga estudyante nga magtinabangay diha sa gagmay nga mga grupo aron makakompleto sa handout.
Pagkaplag og Paglaom diha kang Jesukristo
Manwal sa Magtutudlo sa Basahon ni Mormon (2024)—“Moroni 7:20–43: Pagkaplag og Paglaom diha kang Kristo”
Aron matabangan ka sa paghunahuna kon sa unsang paagi ang pagbaton og paglaom tungod ni Kristo makaapekto sa atong mga kinabuhi sa nagkalainlaing mga kahimtang, pagpili og usa sa mosunod nga mga sitwasyon (o paghimo og usa sa imong kaugalingon):
Si James mibalik na usab sa makasasala nga mga batasan nga iyang gituohan nga iyaha nang nabiyaan.
Ang amahan ni Becca mihunong sa pagsimba ug mipahayag nga wala na siya motuo sa Dios.
Naglisod si Analise sa pagtuman sa tanan niyang obligasyon sa eskwelahan, trabaho, ug panimalay.
Kompletoha kining duha ka mga hugpong sa mga pulong, nagpahayag sa unsa nga paagi ang tawo mahimong motan-aw sa iyang sitwasyon sa lahi nga paagi:
Walay paglaom diha kang Jesukristo,
Adunay paglaom diha kang Jesukristo,
Hisgoti ang mosunod nga mga pangutana:
Sa unsang paagi kini nga tawo makapakita og hugot nga pagtuo kang Jesukristo? Tan-awa kon makakita ka ba og kasulatan nga ilakip sa imong tubag.
Sa unsang paagi nga ang pagpakita og hugot nga pagtuo niining paagiha makatabang niini nga tawo nga makabaton og dugang nga paglaom pinaagi ni Jesukristo?
Unsa kaha ang imong isulti niini nga tawo kon mangutana siya kanimo kon nganong aduna kay paglaom diha ni Jesukristo? (Tan-awa sa 1 Pedro 3:15.)
Human makompleto sa mga grupo ang kalihokan, dapita sila nga ipakigbahin pinaagi sa usa ka tigpamaba ang usa sa mga butang nga ilang gihisgotan nga ilang gihunahuna nga labing makatabang.
Ipakigbahin ang imong pagpamatuod mahitungod sa pagbaton og paglaom diha sa Manluluwas. Hinumdomi nga ang pipila sa imong mga estudyante tingali nangita og dugang nga paglaom sa ilang mga kinabuhi. Ang imong pagpamatuod ug ang mga pagpamatuod sa ilang mga kaedad mahimong usa ka dako nga panalangin ngadto kanila ug makadasig kanila og dugang nga paglaom.
