Doktrinal nga Kahanas: Moroni 7:45–48

“Ang Gugma nga Putli mao ang Tiunay nga Gugma ni Kristo”

duha ka babaye nga nagginaksanay

Sa imong pagtuon sa Moroni 7:44–48, imong nakat-onan unsaon pagtinguha sa pagpalambo sa gugma nga putli, ang tiunay nga gugma ni Jesukristo. Kini nga leksiyon makatabang kanimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan sa Moroni 7:45–48, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

Dasiga ang kanunay nga pagsubli sa pagsulti sa doktrinal nga kahanas.Dasiga ang mga estudyante sa pagpadayon sa pagpakahanas ug sa paggamit sa mga tudling sa doktrinal nga kahanas. Pahinumdomi sila nga ang paggamit sa mahangtorong doktrina nga ilang nakat-onan gikan niini nga mga tudling makahatag og espirituhanong direksiyon ug giya sa tibuok nilang kinabuhi.

Pagpangandam sa estudyante: Dapita ang mga estudyante sa paghunahuna og mga sitwasyon nga ilang nasinati o nasaksihan diin sila makapraktis og gugma nga putli.

Mga Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “Moroni 7:44–48,” nga mao ang pangkonteksto nga leksiyon alang sa tudling sa doktrinal nga kahanas sa Moroni 7:45–48. Kon kini nga leksiyon sa tudling sa doktrinal nga kahanas kinahanglang ibalhin ngadto sa laing semana, seguroha usab nga itudlo ang katugbang nga pangkonteksto nga leksiyon nianang semanaha.

Ipasabot ug isag-ulo

Ikonsiderar ang pagdapit sa mga estudyante sa pagtinabangay uban sa usa ka pares aron makompleto ang mosunod nga kalihokan. Dapita ang pipila ka paresan sa mga estudyante sa pagpakigbahin sa ilang mga tubag ngadto sa klase.

Handurawa nga atol sa usa ka Dali, Sunod Kanako nga diskusyon uban sa imong pamilya, samtang naghisgot bahin sa kahulogan sa gugma nga putli, ang imong manghod nga lalaki misulti sama sa, “Dili ba ang gugma nga putli naghimo lang og maayo nga mga butang alang sa mga tawo?” Imong gisultihan ang imong igsoon nga lalaki nga ang pagkamabination usa ka bahin sa gugma nga putli apan mas makakat-on ka bahin niini sa seminary.

• Unsa pa nga mga detalye bahin sa gugma nga putli ang imong isulti sa imong igsoong lalaki?

Tabangi ang mga estudyante sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan alang sa Moroni 7:45–48. Ikonsiderar ang pagkopya sa mosunod nga hulagway ngadto sa pisara ug pagdapit og usa ka estudyante sa pagtarong sa pakisayran sa kasulatan ug sa mahinungdanon nga hugpong sa mga pulong sa kasulatan pinaagi sa pagsulat niini og sakto sulod sa kasingkasing. Papasa ang sulod sa kasingkasing, ug dapita ang laing estudyante sa pagkompleto sa kalihokan. Dasiga ang matag estudyante sa pagdrowing og kasingkasing diha sa ilang journal sa pagtuon nga adunay pakisayran sa kasulatan ug mahinungdanon nga hugpong sa mga pulong sa kasulatan nga gisulat og sakto sa sulod niini. Dapita ang tibuok klase sa pagsaysay niini og dungan sa makusog.

linya nga drowing sa kasingkasing nga adunay pakisayran sa kasulatan ug mahinungdanon nga hugpong sa mga pulong sa kasulatan sa Moroni 7:45–48 nga nagpalibot sa kasingkasing sa sinulagma nga pagkahan-ay

Pagbansay sa paggamit

Aron matabangan ang mga estudyante sa pagrebyo sa mga baroganan sa pag-angkon og espirituhanong kahibalo, ikonsiderar ang pagsagol sa mga pulong sa tulo ka mga baroganan sa pag-angkon og espirituhanong kahibalo, sama sa gipakita sa ubos. Isulat diha sa pisara ang nagkasagol nga mga bersiyon ug dapita ang mga estudyante sa pagkorehir sa matag baroganan sa ilang kaugalingon gikan sa panumdoman. Kon gikinahanglan, mahimong irebyo sa mga estudyante ang mga parapo 5–12 diha sa Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023). Human ang igong panahon, pagdapit og tulo ka estudyante sa pagduol sa pisara ug ang matag usa mosulat og usa sa mga baroganan sa saktong paagi.

1. Susihon inubanan sa hugot nga pagtuo.

2. Tinguhaa ang dugang nga panabot pinaagi sa balaanong gitudlo nga panglantaw.

3. Lihukon ang mga konsepto ug mga pangutana inubanan sa mahangtorong tinubdan.

Dapita ang mga estudyante sa paghunahuna og mga sitwasyon nga ilang nasaksihan o nasinati diin ang mga batan-on makapraktis og gugma nga putli, o mogamit sa pipila sa mosunod nga mga senaryo.

• Si Oskar dali nga masuko sa iyang mga manghod. Kanunay silang maghangyo kang Oskar nga makigdula kanila o tabangan sila sa ilang buluhaton sa balay [homework]. Gusto lang ni Oskar nga pasagdan siya sa iyang mga igsoon aron mahimo niya ang iyang gusto.

• Nasayran ni Jessa nga ang laing babaye sa iyang klase sa Young Women ang nagpakaylap og mga hungihong mahitungod kaniya. Naglibog si Jessa ug nasakitan niini ug dili segurado kon unsaon pagtubag.

• Gusto ni Danny nga mahimong sikat sa eskwelahan ug magpakita nga walay kahadlok atubangan sa iyang mga higala. Kanunay niyang tamayon ang ubang mga klasmeyt ug kuhaon ang ilang mga butang nga walay pananghid.

Usa niini nga mga senaryo mahimong hisgotan isip usa ka klase, o mahimong bahinon ang mga estudyante ngadto sa gagmay nga mga grupo ug mag-assign og usa ka senaryo nga hisgotan. Dasiga sila sa pagdesisyon kon hain sa mga baroganan sa pag-angkon og espirituhanong kahibalo ang labing makatabang sa ilang senaryo ug ngano. Dapita ang matag grupo sa pagpakigbahin sa uban sa tibuok klase kon unsay ilang gihisgotan. Pipila sa mosunod nga mga pangutana makagiya sa mga estudyante niini nga panaghisgotan.

Tinguhaa ang dugang nga panabot pinaagi sa balaanong gitudlo nga mga tinubdan

• Unsa kaha ang imong ipakigbahin gikan sa Moroni 7:45–48 nga makadasig niini nga tawo sa pagtubag uban sa dugang nga gugma nga putli sa iyang sitwasyon?

• Unsa ang ubang mga kasulatan o mga pamahayag sa mga lider sa Simbahan nga tingali makatabang?

Lihokon inubanan sa hugot nga pagtuo

• Unsa nga mga hagit ang mahimong atubangon niini nga tawo samtang siya maningkamot sa paggamit sa unsay imong gipakigbahin kaniya?

• Sa unsang paagi sila makalihok diha sa hugot nga pagtuo bisan niini nga mga hagit?

Susihon ang mga konsepto ug mga pangutana inubanan sa mahangtorong panglantaw

• Sa unsang paagi nga ang pagtan-aw sa sitwasyon uban sa mahangtorong panglantaw makatabang kaniya nga mobati og dugang nga gugma nga putli alang sa uban?

• Sa unsang paagi nga ang pagsusi sa pamaagi sa pagtratar ni Jesukristo sa uban makatabang niini nga tawo nga mahimong mas mahigugmaon?

Human ang panaghisgotan sa klase o sa grupo, ikonsiderar ang pagpangutana sa mga estudyante kon aduna bay laing mga aspeto sa mga baroganan sa pag-angkon og espirituhanong kahibalo nga mahimong makatabang usab sa mga senaryo.

Rebyo sa doktrinal nga kahanas

Atol sa umaabot nga leksiyon, pagdrowing og dako nga kasingkasing diha sa pisara ug dapita ang mga estudyante sa paghinumdom kon unsa nga pakisayran sa doktrinal nga kahanas ug mahinungdanon nga hugpong sa mga pulong sa kasulatan ang may kalabotan sa drowing. Dasiga ang matag estudyante sa pagsulat sa pakisayran (Moroni 7:45–48) ug sa mahinundanon nga hugpong sa mga pulong sa kasulatan (“Ang gugma nga putli mao ang tiunay nga gugma ni Kristo”) gikan sa panumdoman sa pipila ka mga higayon diha sa ilang mga journal sa pagtuon.