« អេធើរ ៣ ៖ ‹ សេចក្ដីជំនឿដ៏លើសលប់ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« អេធើរ ៣ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
អេធើរ ៣
« សេចក្ដីជំនឿដ៏លើសលប់ »
តើអ្នកមានធ្លាប់បានគិតឲ្យបានពិតប្រាកដថា សេចក្តីជំនឿលើព្រះយេស៊ូវគ្រីស្ទអាចផ្លាស់ប្តូរជីវិតរបស់យើងបានយ៉ាងណាដែរទេ ? គំរូដ៏អស្ចារ្យមួយ គឺថាបងរបស់យ៉ារេឌ ដែលជាអ្នកបានទៅរកព្រះអម្ចាស់ដោយមានផែនការដើម្បីឲ្យព្រះជួយដោះស្រាយបញ្ហារបស់លោក ហើយលោកបានអធិស្ឋានដ៏រាបទាបដោយ « សេចក្ដីជំនឿដ៏លើសលប់ » ( អេធើរ ៣:៩ ) ថា « វាំងននត្រូវបានបើកចេញពីភ្នែក [ របស់លោក ] » ( អេធើរ ៣:៦ ) ហើយលោកបានឃើញទ្រង់ ហើយសន្ទនាជាមួយព្រះអម្ចាស់ ។ មេរៀននេះមានគោលបំណងជួយអ្នកឲ្យអនុវត្តសេចក្តីជំនឿលើព្រះយេស៊ូវគ្រីស្ទដោយបន្ទាបខ្លួន ។
សូមផ្ដោតលើព្រះយេស៊ូវគ្រីស្ទ នៅពេលដែលអ្នកបង្រៀនបទគម្ពីរ ។ សូមចំណាយពេលជួយសិស្សឲ្យស្គាល់សេចក្តីពិតអំពីព្រះអង្គសង្គ្រោះ និងព្រះចេស្ដានៃការប្រោសលោះរបស់ទ្រង់ ។ សូមចង្អុលបង្ហាញវគ្គបទគម្ពីរដែលអាចបង្កើនសេចក្ដីជំនឿរបស់ពួកគេលើទ្រង់ ។ សូមពិចារណាសួរសំណួរដែលនឹងអញ្ជើញសិស្សឲ្យសញ្ជឹងគិតអំពី របៀបដែលព្រះយេស៊ូវគ្រីស្ទអាចប្រទានពរ ពង្រឹង និងដឹកនាំពួកគេ ។
ការរៀបចំសិស្ស ៖ សូមអញ្ជើញសិស្សឲ្យគិតពីមនុស្សបីនាក់ ដែលពួកគេកោតសរសើរនៅក្នុងប្រវត្តិសាស្រ្តរបស់សាសនាចក្រ ឬបទគម្ពីរ និងរបៀបដែលអ្នកទាំងនេះបានបង្ហាញសេចក្ដីជំនឿទៅលើព្រះយេស៊ូវគ្រីស្ទ ។
សកម្មភាពរៀនសូត្រដែលអាចមាន
តើអ្នកអាចបង្ហាញសេចក្តីជំនឿដោយរបៀបណា ?
ខាងក្រោមនេះនឹងជួយរៀបចំសិស្សនៅក្នុងការសិក្សារៀនសូត្របន្ថែមទៀតអំពីសេចក្ដីជំនឿលើព្រះយេស៊ូវគ្រីស្ទ ។ ជំនួសការឲ្យសិស្សសរសេររាយបញ្ជីឧទាហរណ៍ អ្នកអាចប្តូរបង្ហាញជាវីដេអូមួយ ឬប្រាប់អំពីដំណើររឿងរបស់ ជេន រ៉ូតហូហ្វ នៅនៅចុងបញ្ចប់នៃមេរៀននេះ ។
សូមធ្វើបញ្ជីឈ្មោះមនុស្សបីនាក់ដែលអ្នកកោតសរសើរចេញពីប្រវត្តិសាសនាចក្រ ឬបទគម្ពីរ ។
-
តើអ្នកទាំងបីនាក់នេះបានបង្ហាញសេចក្តីជំនឿលើព្រះយេស៊ូវគ្រីស្ទតាមរបៀបណាខ្លះ ?
-
តើអ្នកអាចដឹងបានយ៉ាងដូចម្ដេចថា អ្នកកំពុងអនុវត្តសេចក្ដីជំនឿលើព្រះយេស៊ូវគ្រីស្ទនៅក្នុងជីវិតរបស់អ្នក ?
-
ហេតុអ្វីបានជាអ្នកចង់អនុវត្តសេចក្តីជំនឿ ?
សូមពិចារណាសរសេរចម្លើយរបស់សិស្សចំពោះសំណួរទីពីរដូចខាងក្រោមដាក់នៅលើក្ដារខៀន ។ សូមអញ្ជើញសិស្សឲ្យសញ្ជឹងគិតអំពីចម្លើយទាំងនេះ ហើយវាយតម្លៃទៅលើសេចក្ដីជំនឿរបស់ពួកគេផ្ទាល់ ។ ប្រសិនបើមានប្រយោជន៍ សូមបន្ថែមសេចក្តីថ្លែងការណ៍អំពីស្វ័យវាយតម្លៃមួយចំនួន ឬទាំងអស់ខាងក្រោមនេះ ហើយអញ្ជើញសិស្សឲ្យបំពេញសេចក្តីថ្លែងការណ៍នេះ ។
ដើម្បីជួយអ្នកសញ្ជឹងគិតអំពីសេចក្តីជំនឿរបស់អ្នកផ្ទាល់ទៅលើព្រះយេស៊ូវគ្រីស្ទ សូមសរសេរថា តើសេចក្តីថ្លែងការណ៍ខាងក្រោមនេះ ពិតកម្រិតណានៅលើរង្វាស់ ១–៥ ( ១ = មិនធ្លាប់សោះ ២ = ពេលខ្លះ ៣ = ជាញឹកញាប់ ៤ = ភាគច្រើនស្ទើរតែរហូត ៥ = ជានិច្ចកាល ) ៖
-
ខ្ញុំជឿលើព្រះគ្រីស្ទ ហើយទទួលយកទ្រង់ជាព្រះអង្គសង្គ្រោះរបស់ខ្ញុំ ។
-
តាមរយៈការអធិស្ឋានដោយស្មោះទៅកាន់ព្រះវរបិតាសួគ៌ ខ្ញុំស្វែងរកជំនួយពីព្រះ និងព្រះយេស៊ូវគ្រីស្ទ ហើយទុកចិត្តលើការណែនាំ និងជំនួយរបស់ទ្រង់ទាំងទ្វេ ។
-
ខ្ញុំអនុវត្តតាម ហើយទុកចិត្តព្រះអម្ចាស់ឲ្យជួយដល់ខ្ញុំ ។
នៅពេលអ្នកសិក្សាមេរៀននេះ សូមខិតខំរៀនបន្ថែមទៀតអំពីរបៀបដែលអ្នកអាចអនុវត្តសេចក្ដីជំនឿនៅលើព្រះយេស៊ូវគ្រីស្ទដោយបន្ទាបខ្លួន និងមូលហេតុដែលអ្នកអាចនឹងចង់ធ្វើ ។
អនុវត្តសេចក្ដីជំនឿ
នៅក្នុងមេរៀនមុននេះ អ្នកបានរៀនថាព្រះអម្ចាស់បានបញ្ជាឲ្យបងរបស់យ៉ារេឌសង់ភេត្រា និងឆ្លងមហាសមុទ្រទៅកាន់ដែនដីសន្យា ប៉ុន្តែភេត្រាមិនមានពន្លឺសម្រាប់បំភ្លឺនោះទេ ។ ព្រះអម្ចាស់បានបង្គាប់ឲ្យបងរបស់យ៉ារេឌស្នើដំណោះស្រាយមួយ ( សូមមើល អេធើរ ២:២៣ ) ។ នៅពេលបងរបស់យ៉ារេឌបានធ្វើតាមដោយសេចក្តីជំនឿលើព្រះយេស៊ូវគ្រីស្ទ ព្រះអម្ចាស់បានជួយដោះស្រាយបញ្ហារបស់លោក ហើយបានប្រទានពរដល់លោកតាមរបៀបលើសពីអ្វីដែលលោកបានទូលសុំទៅទៀត ។
សូមសំណៅមេរៀនខាងក្រោម ហើយអញ្ជើញសិស្សឲ្យបំពេញវារៀងៗខ្លួន ឬជាក្រុមតូចៗ ។
សេចក្ដីជំនឿរបស់បងរបស់យ៉ារេឌ
ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )—« អេធើរ ៣ ៖ ‹ សេចក្ដីជំនឿដ៏លើសលប់ › »
សូមអានខគម្ពីរខាងក្រោមរូបភាពនីមួយៗនៅខាងក្រោម ហើយសរសេរនូវអ្វីដែលបងរបស់យ៉ារេឌបានធ្វើ ឬនិយាយដើម្បីបង្ហាញសេចក្ដីជំនឿ ។ ( ដើម្បីយល់ដឹងអំពី អេធើរ ៣:២–៣ វាមានសារៈសំខាន់ណាស់ក្នុងការយល់ថា ដោយសារការធ្លាក់របស់ អ័ដាម និងអេវ៉ា យើងរស់នៅក្នុងពិភពលោកមួយដែលយើងត្រូវបានញែកចេញពីព្រះ ហើយយើងទាំងអស់គ្នាបានធ្វើបាប ហើយញែកខ្លួនយើងខាងវិញ្ញាណចេញពីព្រះ ) ។
-
តើអ្នកបានរៀនអ្វីខ្លះចេញពីបទពិសោធន៍បងរបស់យ៉ារេឌនោះ ?
សូមអញ្ជើញសិស្សមួយចំនួនឲ្យចែកចាយចម្លើយរបស់ពួកគេ ។ សូមសរសេរគោលការណ៍សេចក្តីពិតដែលពួកគេលើកឡើងនៅលើក្ដារខៀន ។
គោលការណ៍មួយដែលយើងអាចរៀនបាន គឺថា នៅពេលដែលយើងអនុវត្តសេចក្ដីជំនឿនៅលើព្រះអម្ចាស់ដោយបន្ទាបខ្លួន នោះយើងនឹងចូលខិតទៅជិតទ្រង់កាន់តែខ្លាំង ។
ដើម្បីជួយសិស្សឲ្យយល់កាន់តែច្បាស់អំពីសេចក្ដីជំនឿបងរបស់យ៉ារេឌ សូមពិចារណាបែងចែកសិស្សក្នុងថ្នាក់ជាក្រុមតូចៗ ដើម្បីធ្វើសកម្មភាពបួន ដូចខាងក្រោម ។ ជម្រើសមួយទៀត សូមអញ្ជើញសិស្សឲ្យធ្វើការជាក្រុម ដែលមានគ្នាបួននាក់ ដោយឲ្យសិស្សម្នាក់ៗធ្វើសកម្មភាពមួយក្នុងចំណោមសកម្មភាពទាំងនេះ ។ បន្ទាប់មក សិស្សអាចចែកចាយអ្វីដែលពួកគេបានរៀននៅក្នុងក្រុមរបស់ពួកគេ ហើយប្រសិនបើមានប្រយោជន៍ សូមចែកចាយនូវចំណុចសំខាន់ៗទៅសិស្សនៅក្នុងថ្នាក់ ។
-
បងរបស់យ៉ារេឌ « បានរំលាយថ្មមួយទៅជាក្រួស ១៦ ដុំតូច » បានយកក្រួសទាំងនោះទៅ « លើកំពូលភ្នំ ហើយស្រែកទូលអង្វរព្រះអម្ចាស់ទៀត » ( អេធើរ ៣:១ ) ។ សូមសរសេរអំពីមូលហេតុដែលអ្នកមានអារម្មណ៍ថា មានចិត្តចង់អនុវត្តតាម និងធ្វើអ្វីដែលយើងអាចធ្វើបានដើម្បីដោះស្រាយបញ្ហា ដែលជាផ្នែកមួយដ៏សំខាន់នៃជំនឿរបស់យើងទៅលើព្រះអម្ចាស់ ។
-
នៅពេលដែលបងរបស់យ៉ារេឌបានអធិស្ឋាន លោកបាននិយាយអំពី « ភាពទន់ខ្សោយរបស់គាត់នៅចំពោះ [ ព្រះ ] » ( អេធើរ ៣:២ ) ហើយបានទូលសុំជំនួយដោយបន្ទាបខ្លួន ។ សូមសរសេរអំពីរបៀបដែលការដឹងពីភាពទន់ខ្សោយរបស់យើង និងការពឹងផ្អែកទាំងស្រុងរបស់យើងទៅលើព្រះអម្ចាស់អាចជះឥទ្ធិពលលើការអធិស្ឋាន និងសេចក្តីជំនឿរបស់យើងលើទ្រង់ ។
-
នៅពេលបងរបស់យ៉ារេឌបានទូលសុំព្រះអម្ចាស់ឲ្យពាល់ក្រួស ដើម្បីធ្វើឲ្យក្រួសទាំងនោះភ្លឺឡើងនោះ លោកបានថ្លែងទីបន្ទាល់ថា « ឱព្រះអម្ចាស់អើយ ទូលបង្គំដឹងថា ទ្រង់មានអស់ទាំងព្រះចេស្ដា ហើយអាចធ្វើអ្វីក៏ដោយដែលទ្រង់សព្វព្រះហឫទ័យ ដើម្បីជាប្រយោជន៍ដល់មនុស្ស » ( អេធើរ ៣:៤ ) ។ សូមសរសេរអំពីរបៀបដែលអ្នកបានស្គាល់ ឬអាចដឹងថាព្រះអម្ចាស់មានព្រះចេស្ដាដើម្បីជួយយើងពីបញ្ហារបស់យើង ។ អ្នកក៏អាចដាក់បញ្ចូលអំពីរបៀបដែលចំណេះដឹងនោះអាចមានឥទ្ធិពលលើសេចក្តីជំនឿរបស់យើងលើទ្រង់ ។
-
បងរបស់យ៉ារេឌបានសន្យាថា លោកនឹងជឿព្រះបន្ទូលដែលព្រះអម្ចាស់នឹងមានបន្ទូលនៅពេលខាងមុខ ( សូមមើល អេធើរ ៣:១១–១២ ) ។ សូមសរសេរអំពីមូលហេតុដែលអ្នកគិតថា បងរបស់យ៉ារេឌបានទុកចិត្តលើព្រះអម្ចាស់យ៉ាងខ្លាំង ដែលលោកបានយល់ព្រមថានឹងធ្វើការណ៍នេះ ។
ការចូលទៅជិតព្រះអម្ចាស់
-
តើមានរបៀបខុសគ្នាអ្វីខ្លះដែលព្រះអម្ចាស់ប្រទានពរដល់បងរបស់យ៉ារេឌ ដោយសារសេចក្តីជំនឿរបស់លោក ?
-
តើបងរបស់យ៉ារេឌបានចូលទៅជិតព្រះអម្ចាស់តាមរយៈបទពិសោធន៍នេះដោយរបៀបណា ?
វាអាចនឹងមានប្រយោជន៍ក្នុងការគូសចំណាំព្រះបន្ទូលរបស់ព្រះអម្ចាស់ទៅកាន់បងរបស់យ៉ារេឌ ៖ « នោះអ្នកត្រូវបានប្រោសលោះពីការធ្លាក់ ហេតុដូច្នេះហើយ អ្នកត្រូវបាននាំមកឯវត្តមានរបស់យើងវិញ » ( អេធើរ ៣:១៣ ) ។ នៅពេលយើងអនុវត្តសេចក្តីជំនឿលើព្រះអម្ចាស់ជាមួយនឹងបញ្ហាផ្ទាល់ខ្លួនរបស់យើង យើងក៏អាចទទួលបានជំនួយពីទ្រង់ជាមួយនឹងគោលដៅដ៏នៅអស់កល្បជានិច្ចរបស់យើង ដើម្បីយកឈ្នះការបែកចេញរបស់យើងចេញពីទ្រង់ ហើយត្រឡប់ទៅរស់នៅជាមួយទ្រង់វិញ ។
សូមមើល ឬអានឧទាហរណ៍មួយខាងក្រោមអំពីយុវជនដែលអនុវត្តសេចក្ដីជំនឿរបស់ពួកគេ ។
-
សូមមើល « Faith and the Goal » ( ៤:៤០ ) ។ កីឡាករបាល់ទាត់អាជីពវ័យក្មេងម្នាក់ប្រាប់អំពីរបៀប ដែលនាងអនុវត្តសេចក្តីជំនឿលើព្រះអម្ចាស់ ។
-
សូមមើល « Rebuilding My Faith When I Felt Lost » ( ៦:២៥ ) ។ បន្ទាប់ពីការត្រឡប់មកពីបេសកកម្មមុនពេលកំណត់ យុវជនម្នាក់បានស្ថាបនាសេចក្តីជំនឿរបស់គាត់ទៅលើព្រះយេស៊ូវគ្រីស្ទឡើងវិញ ។
-
សូមអានដំណើររឿងរបស់ ជេន រ៉ូតហូហ្វ ដែលជាក្មេងប្រុសម្នាក់រស់នៅប្រទេសហូឡង់ ដែលបានស្វែងរកព្យាការី យ៉ូសែប អេហ្វ ស៊្មីធ ដើម្បីព្យាបាលជំងឺរបស់គាត់ ( Saints: The Story of the Church of Jesus Christ in the Latter Days ភាគ ៣ Boldly, Nobly, and Independent ឆ្នាំ ១៨៩៣–១៩៥៥ [ ឆ្នាំ ២០២២ ] ទំព័រ ១២៣–១២៥ ) ។
សូមអញ្ជើញសិស្សឲ្យចែកចាយអ្វីដែលពួកគេបានរៀនចេញពីវីដេអូ ឬដំណើររឿងនេះ ។
-
តើបទពិសោធន៍អ្វីខ្លះដែលអ្នកមាន ឬអ្នកដែលអ្នកស្គាល់មាន ដែលបានពង្រឹងជំនឿរបស់អ្នកទៅលើព្រះយេស៊ូវគ្រីស្ទ ?
សូមបញ្ចប់ដោយការសរសេររបៀបមួយ ដែលអ្នកចង់អនុវត្តសេចក្តីជំនឿលើព្រះយេស៊ូវគ្រីស្ទបន្ថែមទៀត ហើយមូលហេតុអ្វី ។ ខាងក្រោមនេះ គឺជាគំនិតទូទៅខ្លះៗ ដើម្បីជួយអ្នកបំពេញសកម្មភាពនេះ ។ អ្នកនឹងត្រូវបន្ថែមព័ត៌មានលម្អិតដែលទាក់ទងចំពោះអ្នក ។
-
សូមធ្វើសកម្មភាពជាក់លាក់មួយ ដើម្បីដោះស្រាយបញ្ហា ហើយស្វែងរកជំនួយពីព្រះអម្ចាស់ ។
-
សូមដាក់គោលដៅមួយ ដើម្បីអធិស្ឋានដោយបន្ទាបខ្លួន ហើយទុកចិត្តលើព្រះអម្ចាស់បន្ថែមទៀត ។
-
សូមធ្វើកិច្ចការមួយដោយសកម្មដើម្បីនាំអ្នកកាន់តែចូលទៅជិតព្រះអម្ចាស់ ។
សូមរកមើលរបៀបដែលធ្វើឲ្យអ្នកមានអារម្មណ៍ស្និទ្ធស្នាលជាមួយព្រះអម្ចាស់ នៅពេលដែលអ្នកធ្វើដោយសេចក្តីជំនឿ ។
សិស្សនឹងមានឱកាសចែកចាយអំពីរបៀបដែលពួកគេបានអនុវត្តសេចក្តីជំនឿ និងលទ្ធផលអ្វីដែលបានមកពីការអនុវត្តសេចក្តីជំនឿនោះនៅក្នុងមេរៀនវាយតម្លៃនាពេលខាងមុខ ដែលហៅថា ( « វាយតម្លៃការរៀនសូត្ររបស់អ្នកទី ៩ » ) ។
សូមបញ្ចប់ដោយការថ្លែងទីបន្ទាល់អំពីព្រះអង្គសង្គ្រោះ និងពរជ័យដែលកើតចេញពីការអនុវត្តសេចក្តីជំនឿលើទ្រង់ ។