Ether 3

“Hilabihan nga ka Hugot nga Pagtuo”

ang igsoon nga lalaki ni Jared nakakita sa tudlo sa Ginoo

Tinuod ba gayod nimong nakonsiderar ang kalainan nga mahimo sa hugot nga pagtuo ni Jesukristo sa atong kinabuhi? Usa ka dako nga ehemplo mao ang igsoon nga lalaki ni Jared, kinsa miduol sa Ginoo nga adunay plano sa pagsulbad sa iyang mga problema ug mapainubsanong nag-ampo uban sa “hilabihan nga ka hugot nga pagtuo” (Ether 3:9) nga “ang tabil gikuha gikan sa [iyang] mga mata” (Ether 3:6) ug siya nakakita ug nakigsulti uban sa Ginoo. Kini nga leksiyon gituyo aron sa pagtabang kanimo nga mapainubsanong maghupot og hugot nga pagtuo kang Jesukristo.

Magpunting kang Jesukristo samtang ikaw nagtudlo sa mga kasulatan.Paggahin og panahon sa pagtabang sa mga estudyante sa pag-ila sa mga kamatuoran mahitungod sa Manluluwas ug sa Iyang matubsanong gahom. Pagpakita og mga tudling sa kasulatan nga makadugang sa ilang hugot nga pagtuo ngadto Kaniya. Ikonsiderar ang pagpangutana og mga pangutana nga makadapit sa mga estudyante sa pagpamalandong kon sa unsang paagi si Jesukristo makapanalangin, makapalig-on, ug makagiya kanila.

Pagpangandam sa estudyante: Dapita ang mga estudyante nga maghunahuna og tulo ka tawo nga ilang gidayeg gikan sa kasaysayan sa Simbahan o sa mga kasulatan ug sa unsang paagi kini nga mga tawo nagpakita og hugot nga pagtuo kang Jesukristo.

Mga Posibleng Kalihokan sa Pagkat-on

Unsaon nimo sa pagpakita og hugot nga pagtuo?

Ang mosunod makatabang sa pag-andam sa mga estudyante sa pagkat-on og dugang mahitungod sa hugot nga pagtuo diha ni Jesukristo. Imbes nga ipalista sa mga estudyante ang mga ehemplo, mahimo kang modangop sa kataposan sa leksiyon aron ipakita ang usa sa mga bidyo o isulti ang istorya ni Jan Roothoff.

Paghimo og lista sa tulo ka tawo nga imong gidayeg gikan sa kasaysayan sa Simbahan o sa mga kasulatan.

• Unsa ang pipila ka mga paagi nga kini nga mga tawo nagpakita og hugot nga pagtuo kang Jesukristo?

• Sa unsang paagi nimo mahibaloan kon ikaw naghupot og hugot nga pagtuo diha ni Jesukristo sa imong kinabuhi?

• Nganong gusto man nimong maghupot og hugot nga pagtuo?

Ikonsiderar ang pagsulat sa mga tubag sa mga estudyante diha sa pisara sa ikaduhang pangutana. Dapita ang mga estudyante sa pagpamalandong niini nga mga tubag ug sa pagsusi sa ilang kaugalingong hugot nga pagtuo. Kon makatabang, pagdugang og pipila o ang tanan sa mosunod nga mga pamahayag sa pagsukod sa kaugalingon ug dapita ang mga estudyante sa pagkompleto niini.

Aron matabangan ka sa pagpamalandong sa imong kaugalingong hugot nga pagtuo kang Jesukristo, isulat kon unsa ka tinuod ang mosunod nga mga pamahayag sa sukdanan nga 1–5 (1 = dili gayod; 2 = usahay; 3 = sa kasagaran; 4 = hapit kanunay; 5 = kanunay):

• Ako nagtuo kang Kristo ug midawat Kaniya isip akong Manluluwas.

• Pinaagi sa sinsero nga pag-ampo ngadto sa Langitnong Amahan, nangayo ko og tabang gikan sa Dios ug ni Jesukristo sa akong mga problema ug nagsalig sa Ilang direksiyon ug tabang.

• Molihok ko ug mosalig sa Ginoo nga motabang nako.

Samtang magtuon ka niini nga leksiyon, tinguhaa ang pagkat-on og dugang pa mahitungod kon unsaon nimo nga mapainubsanong maghupot og hugot nga pagtuo kang Jesukristo ug nganong tinguhaon nimo kini.

Paghupot og hugot nga pagtuo

Sa miaging leksiyon, imong nakat-onan nga ang Ginoo misugo sa igsoon nga lalaki ni Jared sa pagtukod og mga barko ug pagtabok sa dagat ngadto sa gisaad nga yuta; bisan pa niana, ang mga barko walay kahayag. Ang Ginoo nangayo sa igsoon nga lalaki ni Jared sa pagsugyot og usa ka solusyon (tan-awa sa Ether 2:23). Samtang ang igsoon nga lalaki ni Jared milihok diha sa hugot nga pagtuo kang Jesukristo, ang Ginoo mitabang sa pagsulbad sa iyang problema ug mipanalangin kaniya sa mga paagi nga labaw pa sa iyang gipangayo.

Ihatag ang mosunod nga handout, ug dapita ang mga estudyante sa pagsulat niini nga magtinagsa o sa ginagmayng mga grupo.

Ang Hugot nga Pagtuo sa Igsoong Lalaki ni Jared

Manwal sa Magtutudlo sa Basahon ni Mormon (2024)—“Ether 3: ‘Hilabihan nga ka Hugot nga Pagtuo’”

Basaha ang mga bersikulo sa ubos sa matag usa sa mosunod nga mga hulagway ug isulat kon unsay gibuhat o giingon sa igsoon nga lalaki ni Jared sa pagpakita og hugot nga pagtuo. (Aron masabtan ang Ether 3:2–3, importante nga masabtan nga tungod sa Pagkapukan ni Adan ug Eva, nagpuyo kita sa kalibotan diin pisikal kitang nahimulag sa Dios ug kitang tanan nakasala ug mibulag sa espirituhanong paagi gikan sa Dios.)

Ether 3:1

ang igsoon nga lalaki ni Jared mitungas sa usa ka bukid

Ether 3:2–5

ang igsoon nga lalaki ni Jared nag-ampo didto sa bukid

Ether 3:6–10

ang igsoon nga lalaki ni Jared nakakita sa tudlo sa Ginoo

Ether 3:11–16, 19–20

ang igsoon nga lalaki ni Jarednakigsulti sa Ginoo

• Unsay imong nakat-onan gikan sa kasinatian sa igsoon nga lalaki ni Jared?

Pagdapit og pipila ka mga estudyante sa pagpakigbahin sa ilang mga tubag. Isulat diha sa pisara ang tinuod nga mga baroganan nga ilang gisulti.

Usa ka baroganan nga atong makat-onan mao nga samtang kita mapainubsanong maghupot og hugot nga pagtuo sa Ginoo, mas maduol kita Kaniya.

Aron matabangan ang mga estudyante nga mas masabtan ang hugot nga pagtuo sa igsoon nga lalaki ni Jared, ikonsiderar ang pagbahin sa klase ngadto sa ginagmay nga mga grupo aron sa pagbuhat sa mosunod nga upat ka mga kalihokan. Sa laing paagi, dapita ang mga estudyante sa pagtinabangay diha sa mga grupo sa tinag-upat, nga ang matag estudyante naghimo og usa sa mga kalihokan. Dayon ang mga estudyante mahimong mopakigbahin sa unsay ilang nakat-onan diha sa ilang mga grupo ug, kon mapuslanon, pagpakigbahin og mga highlight isip usa ka klase.

1. Ang igsoon nga lalaki ni Jared “mitunaw gikan sa usa ka bato og napulo ug unom ka gagmay nga mga bato,” midala niini ngadto sa “tumoy sa bungtod, ug nangamuyo pag-usab ngadto sa Ginoo,” (Ether 3:1). Isulat kon nganong paminaw nimo ang pagkaandam nga molihok ug mobuhat kon unsay atong mahimo aron masulbad ang problema usa ka importante nga bahin sa atong hugot nga pagtuo sa Ginoo.

2. Samtang ang igsoon nga lalaki ni Jared nag-ampo, siya namulong mahitungod sa “iyang kahuyang … sa atubangan [sa Dios]” (Ether 3:2) ug mapainubsanong nangayo og tabang. Isulat kon sa unsang paagi ang pagsabot sa atong kaugalingong kahuyang ug sa atong hingpit nga pagsalig sa Ginoo makaapekto sa atong mga pag-ampo ug sa atong hugot nga pagtuo diha Kaniya.

3. Samtang ang igsoon nga lalaki ni Jared mihangyo sa Ginoo sa paghikap sa mga bato aron kini mohayag, siya mipamatuod, “Ako nasayod, O Ginoo, nga ikaw nagbaton sa tanan nga gahom, ug makahimo bisan unsa nga ikaw buot alang sa kaayohan sa tawo” (Ether 3:4). Isulat kon sa unsang paagi nimo nahibaloan o mahibaloan nga ang Ginoo adunay gahom sa pagtabang kanato sa atong mga problema. Mahimo nimong ilakip kon sa unsang paagi kana nga kahibalo makaapekto sa atong hugot nga pagtuo diha Kaniya.

4. Ang igsoon nga lalaki ni Jared misaad nga siya motuo sa mga pulong nga isulti sa Ginoo sa umaabot (tan-awa sa Ether 3:11–12). Isulat kon nganong sa imong hunahuna ang igsoon nga lalaki ni Jared misalig pag-ayo sa Ginoo nga siya miuyon niini.

Pagpaduol ngadto sa Ginoo

• Unsa ang lain-laing mga paagi nga gipanalanginan sa Ginoo ang igsoon nga lalaki ni Jared tungod sa iyang hugot nga pagtuo?

• Sa unsang mga paagi nga ang igsoon nga lalaki ni Jared mas napaduol ngadto sa Ginoo pinaagi niini nga kasinatian?

Mahimong makatabang ang pagmarka sa mga pulong sa Ginoo ngadto sa igsoon nga lalaki ni Jared: “Ikaw natubos gikan sa pagkapukan; busa ikaw gidala pagbalik ngari sa akong atubangan” (Ether 3:13). Samtang maghupot kita og hugot nga pagtuo diha sa Ginoo sa atong indibidwal nga mga problema, makadawat usab kita sa Iyang tabang sa atong mahangtorong tumong sa pagbuntog sa atong panagbulag gikan Kaniya ug sa pagbalik sa pagpuyo uban Kaniya.

Tan-awa o basaha ang usa sa mosunod nga mga ehemplo sa kabatan-onan nga naghupot sa ilang hugot nga pagtuo.

• Tan-awa ang “Faith and the Goal” (4:40). Usa ka batan-ong propesyonal nga magdudula sa soccer nagsulti kon giunsa niya paghupot ang hugot nga pagtuo sa Ginoo.

• Tan-awa ang “Rebuilding My Faith When I Felt Lost” (6:25). Human makabalik og sayo gikan sa usa ka misyon, usa ka batan-ong lalaki mipalig-on pag-usab sa iyang pagtuo ni Jesukristo.

• Basaha ang asoy ni Jan Roothoff, usa ka batan-ong lalaki sa Netherlands kinsa nagtinguha kang propeta Joseph F. Smith sa pag-ayo sa iyang masakiton nga mga mata (Mga Santos: Ang Istorya sa Simbahan ni Jesukristo sa Ulahing mga Adlaw, vol. 3, Maisugon, Halangdon, ug Gawasnon, 1893-1955 [2022], 155–58).

Dapita ang mga estudyante sa pagpakigbahin sa unsay ilang nakat-onan gikan sa bidyo o istorya.

• Unsa nga mga kasinatian nimo o niadtong imong nailhan nga nakapalig-on sa imong hugot nga pagtuo diha ni Jesukristo?

Pagtapos pinaagi sa pagsulat og usa ka paagi nga imong tinguhaon ang paghupot og dugang nga hugot nga pagtuo kang Jesukristo ug ngano. Ang mosunod mao ang pipila ka kinatibuk-ang mga ideya aron matabangan ka nga makompleto kini nga kalihokan. Kinahanglan kang magdugang og mga detalye nga magamit nimo.

• Paghimo og piho nga aksiyon aron pagsulbad sa usa ka problema ug pagtinguha og tabang sa Ginoo.

• Paghimo og tumong nga mag-ampo nga mas mapainubsanon ug mosalig sa Ginoo.

• Aktibo nga magbuhat og usa ka butang nga mas makapaduol kanimo ngadto sa Ginoo.

Pangita og mga paagi nga imong bation nga mas duol ngadto sa Ginoo samtang ikaw molihok inubanan sa hugot nga pagtuo.

Ang mga estudyante adunay kahigayonan sa pagpakigbahin kon giunsa nila paghupot og hugot nga pagtuo ug unsa ang mga resulta gikan niini sa umaabot nga pagsukod sa leksiyon (“Sukda ang Imong Pagkat-on 9”).

Taposa pinaagi sa paghatag og pagpamatuod sa Manluluwas ug sa mga panalangin nga moabot gumikan sa paghupot og hugot nga pagtuo diha Kaniya.

Komentaryo ug Background nga Impormasyon

Ether 3:7, 9. Nganong ang Ginoo mangutana kanato bisan kon Siya nasayod sa mga tubag?

Si Elder Jeffrey R. Holland sa Korum sa Napulog Duha ka Apostoles mitudlo:

Elder Jeffrey R. Holland

Ang Dios “nasayod sa tanan nga mga butang, ug walay butang nga siya wala mahibalo.” [2 Nephi 9:20]. … Bisan pa niana, ang Dios kanunay nga nangutana og mga pangutana sa mga mortal, kasagaran isip usa ka paagi sa pagsulay sa ilang hugot nga pagtuo, pagsukod sa ilang pagkamatinud-anon, o pagpalambo sa ilang kahibalo. (Jeffrey R. Holland, Christ and the New Covenant: The Messianic Message of the Book of Mormon [1997], 19–20)

Ether 3:15. Wala pa ba gayod gipakita sa Ginoo ang Iyang Kaugalingon ngadto ni bisan kinsa una pa Siya nagpakita sa igsoon nga lalaki ni Jared?

Ang bersikulo 15 usa ka malisod nga tudling, ikonsiderar ang kamatuoran nga kita nasayod nga ang Dios mipakita ngadto ni Adan (tan-awa sa Doktrina ug mga Pakigsaad 107:53–55), Enoch (tan-awa sa Moises 7:4), ug Noe (tan-awa sa Genesis 6:8–9), ang tanan kinsa una pang nabuhi sa igsoon nga lalaki ni Jared. Si Elder Jeffrey R. Holland sa Korum sa Napulog Duha ka Apostoles mitanyag og pipila ka posibleng mga kahulogan: (1) ang Ginoo nagpasabot nga siya wala pa gayod magpakita ngadto sa usa ka Jaredite kaniadto; (2) ang paggamit sa pulong nga “tawo” mahimong magpasabot nga ang Ginoo wala gayod mopadayag sa iyang kaugalingon ngadto sa dili matubos o dili balaan nga mga tawo; (3) wala pa gayod mapadayag sa Ginoo ang Iyang kaugalingon sa ingon ka bug-os ug kompleto nga paagi sama sa iyang gihimo sa igsoon nga lalaki ni Jared; (4) kini tingali mao ang unang higayon nga ang Ginoo mipakita ug nagpaila sa Iyang kaugalingon isip si Jesukristo, ang Anak sa Dios; ug (5) wala lamang ang igsoon nga lalaki ni Jared makakita sa tudlo sa Ginoo, apan usab “pipila ka tataw nga mas nagpadayag nga aspeto sa lawas ni Kristo nga unod, dugo, bukog” (Tan-awa Christ and the New Covenant: The Messianic Message of the Book of Mormon [1997], 21–22).

Dugang nga mga Kalihokan sa Pagkat-on

Ether 3:11. Pagtuo sa unsay “isulti sa Ginoo”

Kon kini mapuslanon sa paghisgot sa Ether 3:11–12 sa mas detalyado, ikonsiderar ang pagpakigbahin sa mosunod: “Ang matubsanon nga hugot nga pagtuo kinahanglan nga kanunay nga gamiton ngadto sa mga kasinatian sa umaabot[.] … Ang hugot nga pagtuo mao ang pag-uyon nga walay kondisyon—ug pag-uyon nang daan—sa bisan unsang mga kondisyon nga mahimong gikinahanglan sa Dios sa duol ug sa layo nga umaabot” (Jeffrey R. Holland, Christ and the New Covenant: The Messianic Message of the Book of Mormon [1997], 18–19).

Dapita ang mga estudyante sa paghisgot og mga senaryo diin importante ang pagpili daan nga motuo sa mga pulong nga isulti sa Ginoo kanato, sama sa pagpangandam sa pagdawat og patriyarkal nga panalangin o paghulat og tawag sa misyon.

Kamatuoran mahitungod sa Ginoong Jesukristo

Kon mapuslanon alang sa mga estudyante nga makasabot og dugang nga mga kamatuoran mahitungod ni Jesukristo, dapita sila sa pagbasa sa Ether 3:14–20, mangita sa mga kamatuoran nga personal nga nakat-onan sa igsoon nga lalaki ni Jared mahitungod sa Ginoo tungod sa iyang hugot nga pagtuo. Ang pipila ka mga kamatuoran nga mahimo nilang maila mao si Jesukristo giandam gikan sa katukoran sa kalibotan aron sa pagtubos kanato (tan-awa sa Ether 3:14); gilalang kita sa Dios sa Iyang kaugalingong hitsura (tan-awa sa Ether 3:15); si Jesukristo mipakita sa Iyang Kaugalingon diha sa espiritu sa wala pa Siya matawo diha sa unod (tan-awa sa Ether 3:16); ang pisikal nga lawas ni Jesukristo sama diha sa panagway sa Iyang espiritu nga lawas (tan-awa sa Ether 3:16–17); ug si Jesukristo nangalagad ngadto sa mga tawo aron sa pagtabang kanila nga masayod nga Siya mao ang Dios (tan-awa sa Ether 3:18).

Ikonsiderar ang pagdapit sa mga estudyante sa pagpakigbahin hain niining mga kamatuoran ang labing makahuloganon kanila ug ngano. Mahimo usab silang mopakigbahin sa unsay ilang nakat-onan mahitungod sa Ginoo samtang sila naghupot og hugot nga pagtuo diha Kaniya.

ang hugot nga pagtuo sa igsoon nga lalaki ni Jared nga handout