Nakaatubang ka na ba sukad og lisod nga desisyon o problema ug naglibog ka kon unsay imong buhaton? Samtang ang igsoon nga lalaki ni Jared ug ang iyang mga tawo nagtukod og mga barko aron makatabok sa dagat, nakasugat sila og pipila ka dagko nga mga problema. Ang igsoon nga lalaki ni Jared milihok nga adunay hugot nga pagtuo diha sa Ginoo ug mitinguha sa Iyang giya sa matag hagit. Kini nga leksiyon makatabang kanimo nga mahibalo kon unsaon sa pagtinguha og tabang sa Ginoo sa pagsulbad sa imong mga problema.
Hatagi ang mga estudyante og mga kahigayonan sa pagtinguha og personal nga pagpadayag. Si Presidente Dallin H. Oaks sa Unang Kapangulohan mitudlo nga “ang mga kasulatan makatabang kanato sa pagsulbad sa tanan natong personal nga mga pangutana tungod kay pinaagi sa pagbasa niini atong gidapit ug gihimong takos ang atong kaugalingon alang sa inspirasyon sa Espiritu Santo, nga mogiya kanato ngadto sa tanan nga kamatuoran” (“Studying the Scriptures,” BYU–Hawaii debosyonal nga pakigpulong [Mar. 14, 1986], 18–21). Pangita og mga kahigayonan sa pagtabang sa mga estudyante nga magtinguha og tabang sa Ginoo sa ilang personal nga mga problema samtang sila nagtuon sa mga kasulatan.
Pagpangandam sa estudyante: Dapita ang mga estudyante sa pagtambong nga andam mopakigbahin og mga kasinatian diin sila o ang uban nga ilang nailhan nakadawat sa tabang sa Ginoo aron sa pagsulbad sa mga problema.
Mga Posibleng Kalihokan sa Pagkat-on
Mga problema ug mga desisyon
Dapita ang mga estudyante sa pagbuhat nga magtinagsa, magtinagurha, o diha sa gagmay nga mga grupo sa pagbuhat sa mosunod nga kalihokan.
Sa laing paagi, ang mga estudyante mahimong dili magpaila nga mopakigbahin diha sa piraso sa papel sa mga problema ug mga kabalaka nga sila ug ang ilang mga kaedad nakasinati. Kon mapuslanon, ikonsiderar ang paglista diha sa pisara sa labing komon nga mga problema, o hangyoa ang mga estudyante sa paglista kon unsay ilang gibati nga mao ang nag-unang tulo ka mga problema nga ilang giatubang.
Handurawa nga ang usa ka tawo diha sa social media naghimo og lista sa unsay iyang gihunahuna nga mao ang nag-unang tulo ka labing komon nga mga problema ug mga kabalaka nga gi atubang karon sa mga batan-on. Kini nga tawo naglista sa mosunod:
Kabug-at sa pagtarong sa pag-eskwela
Maayo ang relasyon uban sa mga higala
Pagplano alang sa umaabot
Uyon ka ba sa mga kapilian niini nga tawo? Ngano o nganong dili?
Unsa pa nga mga problema o mga kabalaka ang mahimo nimong ilakip sa lista? Ngano man?
Dapita ang mga estudyante sa hilom nga pagpamalandong sa mosunod nga mga pangutana. Mahimong makatabang ang pagbasa og hinay sa mga pangutana.
Unsa ang imong labing dako nga mga kabalaka ug mga problema?
Nagtinguha ka ba og tabang sa Ginoo niini? Sa unsang paagi?
Unsa ka kamasaligon nga pinaagi sa tabang sa Ginoo ikaw makabuntog sa imong mga kabalaka ug mga problema?
Pagpili og usa sa mga problema o mga desisyon nga imong gihunahuna nga gusto nimong matabangan sa Ginoo. Samtang nagtuon ka, pangita og mga kamatuoran nga makagiya kanimo sa pagdawat og tabang gikan sa Langitnong Amahan ug ni Jesukristo sa problema o desisyon nga imong pilion.
Pagpangandam alang sa tabang sa Ginoo
Ang mga Jaredite misunod sa direksiyon sa Ginoo ug mitukod og mga barko sa “[pagtabok] sa daghan nga mga tubig” (Ether 2:6) hangtod nga sila miabot sa mga baybayon sa “dako nga dagat” (Ether 2:13). Dayon ang Ginoo misugo kanila sa pagtukod pag-usab og mga barko “subay sa matang sa mga kasko diin [sila kaniadto nga panahon] nakatukod” (Ether 2:16) sa pagtabok sa “dako nga dagat” paingon sa gisaad nga yuta. Ang igsoon nga lalaki ni Jared nakasugat og daghang seryoso nga mga hagit samtang siya naningkamot sa pagsunod sa mga instruksiyon sa Ginoo alang sa ingon ka taas nga panaw.
Ikonsiderar ang pagdrowing sa mosunod nga tsart diha sa pisara ug dapita ang mga estudyante sa pagkopya niini ngadto sa ilang mga journal sa pagtuon. Mahimong epektibo ang pagbahin sa mga estudyante nga managpares o diha sa gagmay nga mga grupo sa pagbasa sa Ether 2:16–25; 3:1, 4, 6 ug sulatan ang tsart nga magkauban. O ikonsiderar ang pagdapit sa mga estudyante sa pagbasa sa mga tudling ug sa pagsulat sa tsart sa ilang kaugalingon ug dayon itandi ngadto sa usa ka pares o sa gagmay nga grupo.
Unsay gihimo sa igsoon nga lalaki ni Jared ug sa iyang katawhan?
Unsa nga mga pangutana o mga kabalaka ang nabatonan sa igsoon nga lalaki ni Jared?
Giunsa pagtubag sa Ginoo ang iyang mga pangutana?
Sa unsa nga paagi nga kini nga mga bersikulo magamit sa atong mga kinabuhi?
Ikonsiderar ang pagsulat sa mga tubag sa mga estudyante diha sa pisara ug dapita ang mga estudyante sa pagrekord niini diha sa ilang mga journal sa pagtuon.
Usa ka baroganan nga atong makat-onan mao nga samtang kita motawag sa Langitnong Amahan diha sa pag-ampo ug mobuhat sa atong bahin sa pagsulbad sa atong mga problema, makadawat kita sa tabang sa Ginoo.
Unsa ang nagkalain-laing mga paagi sa pagtubag sa Ginoo ngadto sa mga pangutana sa igsoon nga lalaki ni Jared? (Tan-awa sa Ether 2:19–23.)
Sumala ni Presidente Harold B. Lee (1899–1973), ang pangutana sa Ginoo diha sa Ether 2:23, “Unsa ang buot nimo nga Ako kinahanglan mobuhat nga kamo makabaton og kahayag diha sa inyong mga sakayan?,” susama sa pag-ingon sa mosunod:
Imahe
Presidente Harold B. Lee
“Unsay imong ikasugyot nga kinahanglan natong buhaton aron makabaton og kahayag?” …
… Ingon og ang Ginoo miingon ngadto kaniya, “Tan-awa, gihatagan ko ikaw og hunahuna sa paghunahuna, ug gihatagan ko ikaw og kabubut-on sa paggamit niini. Karon buhaton nimo ang kutob sa imong mahimo sa pagtabang sa imong kaugalingon niini nga problema; ug unya, human nimo mabuhat ang tanan nga imong mahimo, ako mosulod aron sa pagtabang kanimo.” …
… Kon gusto kamo sa panalangin, ayaw lamang pagluhod ug pag-ampo mahitungod niini. Andama ang inyong kaugalingon sa tanang mahunahunaan nga paagi aron mahimo kamong takos sa pagdawat sa panalangin nga inyong gipangita. (Harold B. Lee, Stand Ye in Holy Places [1974], 243–44)
Ngano kaha nga ang Ginoo sa pipila ka mga sitwasyon mohatag og piho nga direksiyon samtang sa ubang mga higayon gusto Niya nga kita mosugyot og usa ka solusyon ug magtinguha sa Iyang tabang sa pagsulbad sa atong mga problema?
Ngano kaha nga gusto sa Ginoo ang atong mga hunahuna ug mga paningkamot uban sa atong mga pag-ampo?
Sa unsang mga paagi nga ang tubag sa Ginoo sa atong mga pangutana ug mga kabalaka makatabang kanato nga molambo?
Ikonsiderar kon hain sa mosunod nga mga kalihokan ang labing maayo alang sa mga estudyante, o tugoti sila sa pagpili og usa.
Aron matabangan ka sa pagpamalandong sa unsang paagi kini nga baroganan magamit kanato sa atong panahon, buhata ang usa sa mosunod nga mga kalihokan:
Isulat kon sa unsang paagi ang Ginoo mitubag kanimo o sa usa ka tawo nga imong kaila nga adunay piho nga mga instruksiyon sa pagsulbad sa usa ka problema o sa unsang paagi Siya gusto nga ikaw mosugyot og usa ka solusyon ug magtinguha sa Iyang panalangin. Irekord ang imong nakat-onan gikan sa kasinatian.
Pilia kon unsa sa imong hunahuna ang usa sa labing komon nga mga problema o kabalaka sa kabatan-onan karon. Hunahunaa kon unsay mahimo sa usa ka tawo aron sa pagbuntog niini nga problema ug sa unsang paagi siya mahimong magtinguha sa tabang sa Ginoo.
Kon ang mga estudyante adunay modernong-adlaw nga mga ehemplo niini nga baroganan nga gilihok, dapita sila sa pagpakigbahin. Ikonsiderar usab ang pagpakigbahin og usa ka ehemplo sa imong kaugalingon.
Personal nga paggamit
Ikonsiderar ang problema o desisyon nga imong gipili sa sinugdanan sa leksiyon. Idugang ang mosunod diha sa imong tsart:
Unsa ang akong nabuhat o mahimo nako aron masulbad o mabuntog ang akong problema?
Unsa nga mga pangutana o mga kabalaka ang naa nako nga mahimo nakong dad-on ngadto sa Ginoo?
Sa unsa nga mga paagi nga ang Ginoo motabang o motubag kanako?
Dapita ang mga estudyante sa pagpamalandong o sa pagpakigbahin sa ilang pagpangandam sa klase. Dayon dasiga sila sa pagbuhat sa mosunod.
Tinguhaa ang tabang sa Langitnong Amahan pinaagi sa Espiritu Santo aron mahibalo unsay kinahanglan nimong buhaton. Hinumdomi ang imong nahibaloan mahitungod sa Langitnong Amahan ug ni Jesukristo nga naghatag kanimo og kompiyansa sa pagtinguha sa Ilang tabang.