Ang pagpamalandong ug ang pagsukod sa atong espirituhanong pagkat-on makatabang kanato nga mas maduol ngadto sa Manluluwas. Kini nga leksiyon makatabang nimo sa paghinumdom ug pagsukod kon sa unsang paagi ang imong mga kasinatian sa Mormon 7–Ether 15 nga nakatabang nimo nga molambo sa espirituhanong paagi.
Tabangi ang mga estudyante sa paggamit sa kaugalingon nga pagsukod sa pagduol ngadto kang Kristo.Ang regular ug makanunayon nga pagsukod makatabang sa mga estudyante nga makakita kon sa unsang paagi sila nahimong mas mahisama sa Manluluwas. Dapita ang mga estudyante nga mainampoong ikonsiderar unsay ilang nahibaloan ug gibati mahitungod ni Jesukristo. Dasiga sila sa kinasingkasing nga pagsukod sa ilang pag-uswag ug sa pagkonsiderar sa mga kausaban nga ilang mahimo samtang sila naningkamot sa pagsunod sa Iyang ebanghelyo.
Pagpangandam sa estudyante: Dapita ang mga estudyante sa pagrebyo sa unsay ilang nakat-onan pinaagi sa paghuman sa mosunod nga pamahayag: “Usa ka leksiyon gikan sa Mormon 7–Ether 15 nga gusto nakong ipakigbahin sa usa ka higala mao ang …”
Mga Posibleng Kalihokan sa Pagkat-on
Niini nga leksiyon adunay mga kahigayonan ang mga estudyante sa pagpasabot sa kamahinungdanon sa Basahon ni Mormon sa Pagpahiuli sa ebanghelyo ug sa pagpamalandong sa ilang mga paningkamot sa pagpakita og hugot nga pagtuo kang Jesukristo. Ang pagtuon sa imong klase sa Mormon 7–Ether 15 mahimong nakahatag ug gibug-aton sa mga kamatuoran gawas niadtong anaa sa mosunod nga mga kalihokan. Kon mao, mahimo nimong ipahiangay ang mga kalihokan aron malakip kadto nga mga kamatuoran.
Mga singsing sa kahoy
Kini nga bahin sa leksiyon gituyo aron sa pag-andam sa mga estudyante sa pagpasabot sa pipila sa ilang nakat-onan ug sa pagsukod sa mga tumong nga mahimo nilang gihimo atol sa ilang pagtuon sa Mormon 7–Ether 15. Kini mahimong maayong panahon sa pagdapit sa mga estudyante sa pagpakigbahin sa ilang mga tubag gikan sa kalihokan sa pagpangandam.
Ipakita ang hulagway sa mga singsing sa kahoy ug hangyoa ang mga estudyante sa pagpakigbahin kon unsay atong makat-onan mahitungod sa usa ka kahoy pinaagi sa pagsusi sa mga singsing niini.
Imahe
tuod sa kahoy nga adunay mga singsing sa kahoy
Si Presidente Dieter F. Uchtdorf, kanhi sa Unang Kapangulohan, mitudlo:
Imahe
Presidente Dieter F. Uchtdorf
Talagsaon kon unsa ka daghan ang atong makat-onan mahitungod sa kinabuhi pinaagi sa pagtuon sa kinaiyahan. Sama pananglit, ang mga sayantipiko mahimong motan-aw sa lingin nga naporma sa punoan sa mga kahoy ug mohimo og gitun-an nga mga panag-an mahitungod sa klima ug sa mga kondisyon sa pagtubo sa gatosan ug gani sa liboan ka mga katuigang milabay. Usa sa mga butang nga atong nakat-unan gikan sa pagtuon sa pagtubo sa mga kahoy mao nga atol sa mga panahon kon ang kondisyon maayo, ang mga kahoy motubo sa normal nga gipaspason. Hinoon, atol sa mga panahon diin ang kondisyon sa pagtubo dili maayo, ang mga kahoy mohinay sa ilang pagtubo ug mogahin sa ilang enerhiya ngadto sa nag-unang mga elemento nga gikinahanglan aron mabuhi. (Dieter F. Uchtdorf, “Kabahin sa mga Butang nga Labing Mahinungdanon,” Liahona, Nob. 2010, 19)
Sama sa mga kahoy, aduna kitay mga panahon sa pagtubo ug mga panahon nga atong bation nga kita naningkamot nga mabuhi. Matag usa kanato nakasinati og pagtubo sa nagkalainlaing mga paagi ug sa nagkalainlaing mga gipaspason. Hunahunaa ang mga panahon diha sa imong kinabuhi nga tingali nakasinati ka og espirituhanong pagtubo.
Unsa ang pipila sa mga kondisyon nga nakatabang kanimo nga motubo sa espirituhanong paagi? Unsa nga matang sa pagtubo ang imong nasinati?
Unsa ang pipila ka mga paagi nga matag karon ug unya atong masukod ang atong espirituhanong pagtubo?
Niini nga leksiyon, makabaton ka og kahigayonan sa pagpasabot sa pipila sa imong nakat-onan ug pagsukod sa mga tumong nga tingali imong gihimo samtang nagtuon sa Mormon 7–Ether 15.
Ipasabot ang kamahinungdanon sa Basahon ni Mormon
Niini nga bahin sa leksiyon, dapiton ang mga estudyante sa pagpasabot sa kamahinongdanon sa Basahon ni Mormon sa Pagpahiuli sa ebanghelyo. Mahimo nilang gamiton ang ilang gitun-an diha sa Mormon 8. Kon gitinguha, mahimo nimong palapdan ang kalihokan aron maapil ang tahas sa Basahon ni Mormon sa pagtabang sa pagpundok sa Israel, nga gamiton ang 3 Nephi 21.
Mahimo nimong ibutang ang mga estudyante diha nga may mga kauban, sama sa mga misyonaryo. Usa ka paagi sa pagbuhat niini mao ang pagsulat og nagkalainlaing mga dapit o mga nasod alang sa usa ka nadistinohan nga misyon diha sa mga ginunting nga papel. Isulat ang matag nadistinohan nga misyon sa duha ka bulag nga ginunting nga papel. Dayon iapod-apod ang mga papel ngadto sa klase. Makapangita ang mga estudyante sa ilang kauban pinaagi sa pagpangita sa tawo nga adunay sama nga nadistinohan nga misyon.
Handurawa nga ikaw usa ka misyonaryo kinsa mipasabot sa kamahinungdanon sa Basahon ni Mormon sa Pagpahiuli sa ebanghelyo. Mohatag na ka og kopya sa Basahon ni Mormon ngadto sa usa ka tawo aron basahon.
Andama unsay imong isulti gamit ang usa o daghan pa nga mga tudling sa kasulatan diha sa Mormon 8. Mahimo usab nimong gamiton ang ulohan nga pahina sa Basahon ni Mormon n. Pangita og mga kahigayonan sa pagpasabot kon sa unsang paagi ang Basahon ni Mormon makatabang kanato nga motuo ni Jesukristo.
Pagtuyok-tuyok sa lawak-klasehanan, tabangi ang mga kauban kon gikinahanglan. Kon nagkinahanglan ang mga estudyante og tabang sa pag-ila sa mga tudling sa kasulatan, mahimo nimo silang idirekta ngadto sa Mormon 8:14–16, 25–26, 34–35. Kon gikinahanglan, pahinumdomi sila nga ang mga bersikulo 16 ug 25 nagpasabot kang Joseph Smith.
Human ang igong panahon, dapita ang mga kauban sa pagdrama-drama sa sitwasyon uban sa laing kauban. Sa pagtugot sa panahon, ang mga managkompanyon mahimong magpraktis sa pagpasabot pag-usab ngadto sa lain nga managkompanyon.
Pamalandongi ang mga plano sa pagpakita og hugot nga pagtuo kang Jesukristo
Kini nga bahin sa leksiyon makatabang sa mga estudyante sa pagpamalandong sa ilang mga paningkamot sa pagpakita og hugot nga pagtuo kang Jesukristo. Mahimong itandi sa mga estudyante ang pagpakita og hugot nga pagtuo kang Jesukristo ngadto sa pagluto og pan.
Kon mahimo, pagdala og usa ka mixing bowl ug ang mga sangkap sa paghimo og usa ka loaf sa pan. Mahimo pa gani nga magdala og usa ka loaf sa pan nga ipakigbahin sa mga estudyante. Dapita ang mga estudyante nga ipasabot sa daklit ang proseso sa paghimo og pan pinaagi sa pagpangutana sama sa mosunod:
Imahe
pan
Unsa ang pipila ka mga sangkap sa usa ka loaf sa pan?
Gawas sa pagsagol sa mga sangkap, unsa pa ang kinahanglan nimong buhaton aron mahimo ang pan?
Ang mga sangkap sa usa ka loaf sa pan mahimong maglakip sa harina, libadura o yist, asin, ug tubig. Tingali kinahanglan usab nimo ang panahon aron motubo ang pan, ug kinahanglan nimo nga lutoon kini.
Ang pagluto og pan mahimong ikatandi sa pagpakita og hugot nga pagtuo kang Jesukristo. Ang mga resulta, saksi, o milagro nga imong gitinguha sama sa naluto nga loaf sa pan. Ang imong mga paningkamot sa pagpakita og hugot nga pagtuo kang Jesukristo mahimong itandi sa mga sangkap, pagtubo sa pan, ug pagluto sa pan. Sa bag-ohay lang nga mga leksiyon, imong gitun-an ang mga asoy sa mga indibidwal kinsa mipakita og hugot nga pagtuo kang Jesukristo (tan-awa sa Ether 3:1–16; 12:6–22). Gitun-an usab nimo ang mga pulong sa mga propeta nga nagdapit kanimo sa pagpakita og hugot nga pagtuo sa Ginoo ug sa pagtinguha og mga milagro (tan-awa sa Mormon 9:15–27; Ether 12:6–9).
Mahimo nimong itandi ang pagpakita og hugot nga pagtuo sa paghimo og pan pinaagi sa paghisgot sa pipila sa mosunod: ang paghulat sa Ginoo sama sa panahon sa pagtubo sa pan (tan-awa sa Isaias 40:31), ang pagtuman sa atong mga pakigsaad sama sa asin (tan-awa sa Doktrina ug mga Pakigsaad 101:39), ug ang gahom sa Manluluwas sama sa tubig (tan-awa sa Juan 4:14).
Basaha ang Mormon 9:19–21; Ether 3:9; 12:6–9 aron pagtabang kanimo sa paghinumdom unsa ang imong gitun-an mahitungod sa hugot nga pagtuo kang Jesukristo ug mga plano nga tingali imong nahimo.
Dapita ang mga estudyante sa paghunahuna mahitungod sa mga resulta, saksi, o milagro nga ilang gitinguha samtang ilang gitubag ang mosunod nga mga pangutana. Mahimo nimong ipakita ang mga pangutana ug dapita ang mga estudyante sa pagtubag diha sa ilang mga journal sa pagtuon.
Unsa ang imong gihimo aron sa pagpakita og hugot nga pagtuo kang Jesukristo?
Kon ang pagpakita og hugot nga pagtuo kang Jesukristo sama sa pagluto og pan, unsa nga bahin na ka sa proseso karon? Nagpundok pa ba ka o nagsagol sa mga sangkap? Naghulat pa ba ka nga kini motubo? Nagpadayon pa ba og luto ang pan? O nakakaon na ba ka sa pan? Ipasabot kon ngano.
Unsa ang pipila ka mga hagit nga imong nasinati o kinahanglan pa nga buntogon? Unsa ang nakatabang o makatabang kanimo sa pagbuntog niini?
Unsay imong gibati nga napanalanginan ka sa mga paningkamot nga imong gihimo sa pagpakita og hugot nga pagtuo kang Jesukristo?
Dapita ang andam nga mga estudyante sa pagpakigbahin sa ilang mga kasinatian sa pagpakita og hugot nga pagtuo kang Jesukristo ug sa epekto niini sa ilang mga kinabuhi. Ikonsiderar ang pagpakigbahin sa imong pagpamatuod kon sa unsang paagi ka napanalanginan pinaagi sa pagpakita og hugot nga pagtuo kang Jesukristo.
