Mormon 7–9

Kinatibuk-ang Pagpasabot

Gitapos ni Mormon ang iyang mga sinulat pinaagi sa pagtudlo mahitungod kang Jesukristo ug sa mahangtorong kalipay nga naghulat niadtong kinsa nagsunod Kaniya. Human sa iyang kamatayon, ang iyang anak nga lalaki nga si Moroni midawat sa mga palid ug mibuhat sa tanan niyang mahimo aron sa pagpanalipod niini. Siya sa kataposan milubong niini sa yuta, nagsalig nga kini “gitipigan ngadto sa Ginoo” (ulohan nga pahina sa Basahon ni Mormon), nga pagadad-on sa usa ka adlaw “pinaagi sa kamot sa Ginoo” (Mormon 8:26). Gipakita sa Ginoo kang Moroni ang atong panahon, ug gihulagway ni Moroni ang mga sala ug mga kinaiya nga mahimong komon sa ulahing mga adlaw. Siya midapit kanato sa “[pag]balik … ngadto sa Ginoo” (Mormon 9:6) ug mihatag og laing tambag aron sa pagtabang kanato sa pagsunod ni Jesukristo.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Mormon 7

Katuyoan sa leksiyon: Kini nga leksiyon makatabang sa mga estudyante sa pagsunod ni Jesukristo ug sa pagpangandam sa pagpuyo uban sa Dios diha sa mahangtorong kalipay.

• Pagpangandam sa estudyante: Mahimo nimong dapiton ang mga estudyante sa pagtambong sa klase nga andam sa pagpakigbahin sa unsay makapalipay kanila. Mahimo usab nga makig-istorya ang mga estudyante sa usa ka sakop sa pamilya mahitungod sa unsay makapalipay niana nga sakop sa pamilya.

• Sulod nga ipakita: Ang pasulit mahitungod ni Mormon; ang pagsukod sa kaugalingon sa kataposan sa leksiyon

• Sugyot sa pagtudlo pinaagi sa videoconference: Ikonsiderar ang pagpakita sa dili kompleto nga pamahayag nga “Ako makapuyo uban sa Dios diha sa mahangtorong kalipay kon ako …” ug dapita ang mga estudyante sa pagtapos sa pamahayag diha sa chat feature gamit ang ilang nakit-an diha sa Mormon 7:8–10.

Mormon 8:1–26

Katuyoan sa leksiyon: Kini nga leksiyon makatabang sa mga estudyante nga mobati sa kamahinungdanon sa Basahon ni Mormon sa ilang kinabuhi.

• Pagpangandam sa estudyante: Dapita ang mga estudyante sa pagpamalandong kon sa unsang paagi ang ilang bag-ohay lang nga mga paningkamot sa pagtuon sa Basahon ni Mormon nagpakita kon giunsa nila paghatag og bili ang Basahon ni Mormon.

• Mga Materyal: Usa ka mapa sa bahandi; mga instruksiyon sa mga estasyon aron matabangan ang mga estudyante nga makasabot sa kamahinungdanon sa Basahon ni Mormon

• Sugyot sa pagtudlo pinaagi sa videoconference: Sa higayon nga ang mga estudyante nagtuon aron madiskobrehan ang bili sa Basahon ni Mormon, dapita sila sa pagpakigbahin kon unsay ilang nakat-onan. Ikonsiderar ang paggamit sa chat feature aron tugotan sila sa paglista sa ilang paborito nga mga kasulatan o mga bersikulo, mga pagtulun-an, o mga istorya nga bililhon kaayo ngadto kanila. Dayon paghangyo og pipila ka estudyante sa pagpasabot sa ilang mga napilian.

Mormon 8:27–41; 9:1–6, 27–37

Katuyoan sa leksiyon: Kini nga leksiyon makatabang sa mga estudyante nga makasabot nga ang Basahon ni Mormon gisulat aron sa pagtabang kanato, sa ulahing mga adlaw, sa pagbalik ngadto sa Ginoo.

• Pagpangandam sa estudyante: Ikonsiderar ang pagdapit sa mga estudyante sa pagtambong sa klase nga andam sa pagpakigbahin og kasulatan gikan sa Basahon ni Mormon nga makatabang kanato sa pagtinguha kang Jesukristo.

• Mga Materyal: Usa ka kahon o uban pang butang nga nagrepresentar sa usa ka kapsula sa oras [time capsule]

• Sugyot sa pagtudlo pinaagi sa videoconference: Ikonsiderar ang pagbahin sa mga estudyante ngadto sa mga breakout room aron sa pagpakigbahin og mga tudling gikan sa Basahon ni Mormon nga nagtudlo kanato mahitungod ni Jesukristo ug nagtabang kanato sa pagtuo Kaniya.

Mormon 9:7–27

Katuyoan sa leksiyon: Kini nga leksiyon makatabang sa mga estudyante nga makasabot kon sa unsang paagi ang pagbaton og hugot nga pagtuo sa Dios makatugot Kaniya sa paghimo og mga milagro diha sa ilang mga kinabuhi.

• Pagpangandam sa estudyante: Dapita ang mga estudyante sa pagbasa o sa pagpaminaw sa pakigpulong ni Elder Ronald A. Rasband nga “Tan-awa! Ako Mao ang usa ka Dios sa mga Milagro” ug sa paghunahuna mahitungod sa unsay ilang nakat-onan o unsa nga mga pangutana ang aduna sila mahitungod sa mga milagro. Kini nga pakigpulong anaa sa ChurchofJesusChrist.org.

• Mga materyal alang sa mga estudyante: Papel, mga gamit sa pagsulat, mga litrato, papilit, ug mga gunting alang sa mga estudyante aron makahimo og mga pamphlet

• Mga Bidyo: “Sanctify Yourselves” (4:37); “Pinaagi sa Balaan nga Plano” (14:51; tan-awa gikan sa time code 7:16 hangtod sa 8:19)

• Sugyot sa pagtudlo pinaagi sa videoconference: Sa higayon nga maghisgot og mga milagro sa nangagi, ikonsiderar ang pagpakita og bidyo mahitungod kang Jesukristo nga naghimo og mga milagro. Sa higayon nga maghisgot og mga milagro nga nahitabo karon, mahimo nimong ipakita ang usa sa mga bidyo nga gisugyot diha sa leksiyon.

Rebyo 23 sa Doktrinal nga Kahanas

Katuyoan sa leksiyon: Kini nga leksiyon gituyo aron sa pagtabang sa mga estudyante sa pagsag-ulo og daghan nga mga pakisayran sa kasulatan ug sa mahinungdanon nga mga hugpong sa mga pulong sa kasulatan, o sa tibuok tudling sa doktrinal nga kahanas, gikan sa ikaduhang bahin sa Basahon ni Mormon.

• Pagpangandam sa estudyante: Dapita ang mga estudyante sa pagpili og mahinungdanon nga hugpong sa mga pulong sa kasulatan sa doktrinal nga kahanas ug pakisayran nga sag-ulohon ug sa pagtambong sa klase nga andam sa pagpakigbahin.

• Hulagway: Usa ka hulagway ni Moroni nga nagpakita ngadto ni Joseph Smith

• Sugyot sa pagtudlo pinaagi sa videoconference: Pahibaloa ang mga estudyante nga hangyoon sila sa pagpakigbahin kon unsa nga mga kasulatan ang gusto nilang isag-ulo. Mahimo nimong hatagan sila og panahon sa pagpakigbahin sa usag usa kon unsa ang ilang gibuhat sa pagsag-ulo, o mahimo kang mopili og usa ka pamaagi sa pagsag-ulo aron magamit sa tanan nga mga estudyante.