Mormon 8:27–41; 9:1–6, 27–37

Gisulat alang sa Atong Panahon

Moroni nagsulat diha sa mga palid

Handurawa nga nabuhi ka gatosan ka tuig ang milabay apan nahibaloan na nimo kon unsa ang kahimtang sa pagkinabuhi sa atong panahon. Si Moroni nakasinati niini; ang Ginoo mipakita kaniya sa atong panahon. Gihulagway ni Moroni ang mga sala ug mga kinaiya nga mahimong komon sa ulahing mga adlaw. Siya midapit kanato sa “[pag]balik … ngadto sa Ginoo” (Mormon 9:6) ug mihatag og laing tambag aron sa pagtabang kanato sa pagsunod ni Jesukristo. Kini nga leksiyon makatabang kanimo nga makasabot nga ang Basahon ni Mormon gisulat aron sa pagtabang kanato, sa ulahing mga adlaw, sa pagbalik ngadto sa Ginoo.

Makaila kang Jesukristo pinaagi sa pagtuon sa Iyang pulong.Ang pagtuon sa mga kasulatan makatabang kanato nga mas mapaduol ngadto ni Jesukristo. Tabangi ang mga estudyante sa pagbansay sa pagpangita ni Jesukristo samtang sila nagtuon. Samtang buhaton nila kini, mapalig-on nila ang ilang relasyon Kaniya ug makatagamtam sa mga panalangin sa ebanghelyo.

Pagpangandam sa estudyante: Ikonsiderar ang pagdapit sa mga estudyante sa pagtambong sa klase nga andam sa pagpakigbahin og kasulatan gikan sa Basahon ni Mormon nga makatabang kanato sa pagtinguha kang Jesukristo.

Mga Posibleng Kalihokan sa Pagkat-on

Misulat si Moroni kanato

Pagdala og usa ka kahon nga nagrepresentar sa usa ka kapsula sa oras.

Hunahunaa nga nabuhi ka sa dugay na nga panahon ug gihangyo nga magsulat og usa ka mensahe nga ibutang sa usa ka kapsula sa oras nga ablihan sa atong panahon.

Hatagi ang mga estudyante og gagmay nga piraso papel aron isulat ang ilang mga tubag sa mosunod nga pangutana. Hangyoa ang mga estudyante sa pagbutang sa ilang mga papel diha sa kapsula sa oras, dayon basaha ang pipila ngadto sa klase.

• Unsa nga pasidaan, tambag, o pagdasig ang imong ihatag aron sa pagtabang sa usa ka tawo sa pagnabigar sa mga hagit karon?

Sa wala pa mamatay si Mormon, iyang gitugyanan ang iyang anak nga si Moroni sa bulawan nga mga palid (tan-awa sa Mormon 8:1). Si Moroni mihulagway og usa ka paagi nga ang Ginoo mitabang kaniya nga masayod unsay isulat ngadto sa mga katawhan sa atong panahon. Basaha ang Mormon 8:34–35; 9:30, mangita sa mga paagi nga ang Ginoo mipanalangin kang Moroni sa iyang sagrado nga responsibilidad.

• Unsa ang gipakita sa Ginoo kang Moroni?

• Unsa nga mga kamatuoran ang atong makat-onan gikan niini?

Usa ka kamatuoran nga atong makat-onan mao nga si Jesukristo midasig sa mga propeta sa Basahon ni Mormon sa pagsulat nga naghunahuna sa atong panahon.

• Sa unsang paagi nga ang pagkahibalo nga ang mga propeta sa Basahon ni Mormon nakakita sa atong panahon nakaimpluwensiya sa paagi sa atong pagbasa sa Basahon ni Mormon?

Basaha ang mosunod nga pamahayag ni Presidente Ezra Taft Benson (1899–1994) mahitungod sa mga propeta sa Basahon ni Mormon:

Presidente Ezra Taft Benson

Kon ilang nakita ang atong panahon ug mipili niadtong mga butang nga labing bililhon kaayo alang kanato, dili ba ingon niana unsaon nato ang atong pagtuon sa Basahon ni Mormon? Kinahanglan nga kanunay natong pangutan-on ang atong kaugalingon, “Ngano nga ang Ginoo nagdasig ni Mormon (o Moroni o Alma) sa paglakip niana sa iyang rekord? Unsa nga leksiyon ang akong makat-onan gikan niana nga makatabang kanako sa pagpuyo niining panahona?” (Ezra Taft Benson, “Mga Pagtulun-an sa mga Presidente sa Simbahan , 168)

Ang pagpangutana sama niadtong gisugyot ni Presidente Benson usa ka epektibo nga kahanas sa pagtuon sa kasulatan nga makatabang sa mga estudyante nga makakita og dugang nga kahulugan ug kalabotan sa ilang pagtuon sa Basahon ni Mormon. Ang mga estudyante mahimong mosuwat og mubo nga mga sulat niini nga mga pangutana nga ilang matan-aw sa ilang pagtuon karon ug sa ilang umaabot nga personal nga pagtuon.

• Sa imong hunahuna sa unsang paagi ang pagpangutana niini nga mga pangutana makapauswag sa imong pagtuon sa kasulatan?

Ikonsiderar ang pagbahin sa klase sa katunga o pagpares-pares sa mga estudyante, nga ang matag usa gitahasan sa pagbasa sa usa sa mosunod nga mga tudling. Dapita ang mga estudyante sa pagsulat diha sa pisara sa ilang nakit-an ubos sa ulohan nga sama sa Espirituhanong mga Problema sa Atong Panahon. Kon gikinahanglan, tabangi ang mga estudyante nga makasabot sa kahulogan sa mga pulong diha sa mga paghulagway ni Moroni.

Ang pamahayag ni Sister Oscarson diha sa seksiyon nga “Komentaryo ug Background nga Impormasyon” makatabang sa mga estudyante nga makasabot niini nga mga bersikulo.

Basaha ang Mormon 8:27–33 o Mormon 8:36–41, mangita kon giunsa paghulagway ni Moroni ang espirituhanong kahimtang sa mga katawhan sa atong panahon.

• Hain sa mga kondisyon nga gihulagway ni Moroni ang imong nakita sa atong katilingban?

• Sa unsang paagi kini nga mga kinaiya ug mga pamatasan makaapekto sa atong pagtuo kang Jesukristo?

Espirituhanong mga solusyon sa atong panahon

Dapita ang mga estudyante sa pagsulat diha sa pisara sa ilang nakit-an diha sa mosunod nga mga bersikulo diha sa pisara ubos sa ulohan sama sa Espirituhanong mga Solusyon sa Atong Panahon. Tabangi ang mga estudyante sa paghisgot kon sa unsang paagi ang piho nga mga solusyon makatabang kanato sa pagbuntog sa piho nga espirituhanong mga problema. Seguroha nga ang mga estudyante maghisgot kon sa unsang paagi si Moroni mitudlo kanato ngadto ni Jesukristo.

Ang Mormon 9:7–26 pagatun-an sa sunod nga leksiyon.

Basaha ang Mormon 9:6, 27–31, mangita sa unsay gidasig sa Ginoo ni Moroni nga isulat aron sa pagtabang kanato sa pagbuntog sa negatibo nga espirituhanong mga kahimtang.

• Unsa ang gitudlo ni Moroni nga makatabang kanato sa pagbuntog sa mga sala ug mga kinaiya nga komon sa atong panahon?

• Hain niini nga mga pagtulon-an ang labing makatabang sa kabatan-onan niini nga henerasyon nga mas mosalig ni Jesukristo?

• Ang sunod nga pangutana gituyo alang sa personal nga pagpamalandong, dili sa diskusyon sa klase.

  Sa imong hunahuna, hain niining mga pagtulun-an ang labing makatabang kanimo karon? Ngano man?

Mga Pagtulon-an sa Basahon ni Mormon

Ang Basahon ni Mormon gisulat aron sa pagtabang kanato nga motuo ug modangop ngadto ni Jesukristo (tan-awa sa 1 Nephi 6:4; Mormon 7:5; Moroni 10:30, 32).

Dapita ang pipila ka mga estudyante sa pagpangita ug sa pagpakigbahin sa mga tudling sa Basahon ni Mormon nga makatabang kanato sa pagdangop kang Jesukristo. Mahimong gamiton sa mga estudyante ang ilang pagpangandam sa klase. Mahimong mopakigbahin ang mga estudyante sa lainlaing mga paagi—sama pananglit, pinaagi sa pagsulat sa mga pakisayran sa kasulatan diha sa pisara o sa usa ka papel nga ipasapasa sa klase.

Dapita ang mga estudyante sa pagpakigbahin kon nganong ang mga tudling makahuloganon kanila. Mahimo usab nimong hisgotan kon sa unsang paagi ang mga tudling makatabang kanato sa pagtuo kang Jesukristo ug pagbalik ngadto Kaniya (tan-awa sa Mormon 9:6).

Mahimo usab nimong dapiton ang mga estudyante sa pagbutang og mubo nga sulat diha sa kapsula sa oras nga adunay kasulatan ug mensahe mahitungod sa Manluluwas. Mahimo nimong basahon kini nga mga mensahe sa umaabot nga sesyon sa klase.

Ipakigbahin ang imong pagpamatuod kang Jesukristo. Dapita ang mga estudyante sa pagpangutana sa mga pangutana nga gidasig ni Presidente Benson.

Komentaryo ug Background nga Impormasyon

Alang kang kinsa gisulat ang Basahon ni Mormon?

Si Elder Gary E. Stevenson sa Korum sa Napulog Duha ka Apostoles mipakigbahin sa mosunod:

Elder Gary E. Stevenson

Nakaamgo ba kamo nga ang Basahon ni Mormon gisulat alang kaninyo—ug sa inyong panahon? Kini nga basahon maoy usa sa mga panalangin sa pagpuyo sa unsay atong gitawag nga dispensasyon sa kahingpitan sa panahon. Bisan og ang Basahon ni Mormon gisulat sa dinasig, karaan nga mga tigsulat—nga kadaghanan mga propeta—sila ug ang mga tawo sa ilang panahon wala makaangkon sa benepisyo nga makahupot sa tibuok basahon. Karon dali na lang kaayo ninyong makab-ot ang sagradong rekord nga gibahandi, gihangup, ug gipreserbar sa mga propeta, mga pari, ug mga hari! Aduna kamoy benepisyo nga mahuptan sa inyong mga kamot ang kompleto nga Basahon ni Mormon. Sa makapainteres nga paagi, usa sa mga propeta sa Basahon ni Mormon, si Moroni, nakakita sa atong panahon—inyong panahon. Nakakita pa gani siya kaninyo, sa panan-awon, gatosan ka tuig ang milabay! (Gary E. Stevenson, “Tan-awa ang Basahon, Tan-awa ang Ginoo,” Liahona, Nob. 2016, 46)

Sa unsang paagi gihulagway ni Moroni ang kataposang mga adlaw?

Si Sister Bonnie L. Oscarson, kanhi Kinatibuk-ang Presidente sa Young Women, mitudlo:

Presidente Bonnie L. Oscarson

Nag-ingon si Moroni nga iyang nakita ang atong panahon, ug kini naglakip sa mga gubat ug mga hungihong sa gubat, dagkong mga kahugawan, mga pagbuno, pagpanulis, ug mga tawo kinsa magsulti kanato nga walay husto o sayop diha sa mata sa Dios. Naghulagway siya og mga tawo kinsa puno sa garbo, madasigon sa pagsul-ob og mahalon nga panapot, ug kinsa nagbugal-bugal sa relihiyon. Nakakita siya og mga tawo kinsa nalinga sa kalibotanong mga butang nga sila nagtugot “sa mga timawa, ug sa mga hubo, ug sa mga masakiton ug sa mga sinakit nga molabay” [Mormon 8:39] nga wala mahimatnguni.

Nangutana si Moroni og tinuoray nga sukna sa atong kaugalingon—kita kinsa buhi niining panahona. Nag-ingon siya, “Ngano nga kamo maulaw sa pagdala diha kaninyo sa ngalan ni Kristo?” [Mormon 8:38]. Kini nga sumbong tukma nga naghulagway sa nagkadaghan nga sekular nga kahimtang sa atong kalibotan. (Bonnie L. Oscarson, “Barog diha sa Kalig-on, mga Kaigsoonang Babaye sa Zion,” Liahona, Nob. 2016, 12-13)

Unsa nga pinulongan gisulat ang Basahon ni Mormon?

Si Moroni mipahayag nga siya adunay abilidad sa pagsulat sa labing menos duha ka mga pinulongan: Hebreohanon ug inusab nga Ehiptohanon. Siya mihisgot nga kon ang “mga palid igo lang kadako,” mosulat unta siya sa Hebreohanon; bisan pa niana, kadto kinsa naghupot sa rekord migamit sa “inusab nga Ehiptohanon” tungod sa kakulang sa espasyo (Mormon 9:32–33). Kaniadto sa Basahon ni Mormon, si Nephi ug si Hari Benjamin miila sa ilang paggamit sa Ehiptohanon. Si Nephi mipahayag nga siya misulat sa “pinulongan sa mga Ehiptohanon” sa dihang iyang gikulit ang gagmay nga mga palid (1 Nephi 1:2).

Bisan pa niana, si Moroni miangkon nga siya misulat gamit ang “inusab nga Ehiptohanon” nga “gitugyan ug giusab …, sumala sa matang sa [ilang] pinulongan” (Mormon 9:32), nagpakita nga ang pipila ka mga pagpahiangay sa pinulongan nahitabo sulod sa liboan ka tuig sukad sa panahon ni Lehi. Kini makapasabot kon nganong si Moroni mitapos uban sa komentaryo nga “walay lain nga mga katawhan nga nasayod sa among pinulongan” apan ang Dios “nag-andam og mga paagi” nga sa kataposan ang rekord mapasabot ug mahubad (Mormon 9:34).

Dugang nga mga Kalihokan sa Pagkat-on

Mormon 8:33–41. Ang Dios magahimo kanato nga responsable sa paagi sa atong pagtratar sa mga kabos ug sa mga nanginahanglan

Aniay usa ka paagi sa pagtuon og dugang nga baroganan diha sa Mormon 8. Mahimong magsulat ang mga estudyante og usa ka pamahayag aron sa pagpamubo sa ilang nakat-onan sa Mormon 8:33–41 mahitungod sa atong responsibilidad sa pag-atiman sa mga kabos ug niadtong nanginahanglan. Ang mga estudyante mahimong makaila nga ang Dios magahimo kanato nga responsable sa paagi sa atong pagtratar sa mga kabos ug niadtong mga nanginahanglan.

Hisgoti ang nagkalainlaing matang sa mga panginahanglan nga anaa sa mga tawo ug sa unsang paagi nga ang mga tin-edyer makatabang sa pagtubag niadto nga mga panginahanglan. Mahimo usab nimong hisgotan kon sa unsang paagi ang Manluluwas nag-atiman niadtong nanginahanglan.

Hangyoa ang mga estudyante sa pagpakigbahin sa ilang mga kasinatian sa dihang nakatabang sa usa ka tawo nga nanginahanglan o natabangan sa panahon sa panginahanglan.

Mormon 8:34–35. Gisulat alang sa atong panahon

Ikonsiderar ang paggamit sa mga tudling sa kasulatan sa doktrinal nga kahanas aron matabangan ang mga estudyante nga makasabot kon sa unsang paagi ang Basahon ni Mormon gisulat alang sa atong panahon. Ang mga estudyante mahimong i-assign o mopili og usa o daghan pa nga mga tudling sa doktrinal nga kahanas diha sa Basahon ni Mormon. Dapita ang mga estudyante sa pagbasa sa tudling ug sa pagpangutana: Ngano kaha nga ang usa ka propeta sa Basahon ni Mormon milakip niana sa iyang rekord? Unsa nga leksiyon ang akong makat-onan gikan niana nga makatabang kanako sa pagpuyo niining panahona?

Pagdapit og pipila ka mga estudyante sa pagpakigbahin sa ilang mga hunahuna.

Usa ka paagi sa pag-analisar sa mga kasulatan

Ang mosunod makatabang sa mga estudyante sa pag-analisar sa teksto diha sa Mormon 8–9.

Usa ka paagi sa pag-analisar sa pipila ka mga tudling sa kasulatan mao ang pagbasa niini ingon og ikaw usa ka doktor nga nagdayagnos sa usa ka sakit ug nagreseta og pagtambal.

Sama pananglit, kon basahon sa mga estudyante ang Mormon 8:27–33 o Mormon 8:36–41, mahimo silang mangita sa espirituhanong mga sakit nga nagkinahanglan og pagtambal. Dayon sila makapangita og mga pagtambal diha sa Mormon 9:6, 27–29.