Samtang naningkamot ka sa pagsunod ni Kristo, usahay tingale makamatikod ka nga lahi ang imong kinaiya kay sa mga tawo sa imong palibot. Tingali naghunahuna ka, “Unsaon nako nga mahimong lig-on nga mosunod ni Kristo kon ang uban daw wala mosunod Kaniya?” Ang propeta nga si Mormon nakasinati og susama nga mga kahimtang sa dihang batan-on pa siya. Kini nga leksiyon makatabang kanimo nga makasabot gikan sa ehemplo ni Mormon kon unsaon sa pagsunod kang Kristo bisan unsa pa ang pilion nga buhaton sa uban.
Tudloi ang mga estudyante sa pagpangita og mga hiyas sa Manluluwas diha sa kinabuhi sa uban.Ang mga kasulatan naglangkob og daghang asoy sa matinud-anong mga lalaki ug mga babaye kinsa nagpakita sa mga hiyas ni Jesukristo. Tabangi ang mga estudyante nga makakat-on mahitungod sa Manluluwas pinaagi sa pagsusi sa kinabuhi niadtong naningkamot sa pagsundog Kaniya.
Pagpangandam sa estudyante: Dapita ang mga estudyante sa pagtambong nga andam mopakigbahin og mga kasinatian sa higayon diin sila mipili nga mahimong lahi sa uban aron mosunod kang Jesukristo ug kon nganong takos lang kini.
Mga Posibleng Kalihokan sa Pagkat-on
Mobarog isip usa ka tinun-an ni Jesukristo
Imahe
usa ka kolor ube nga duwaang itik nga goma diha sa grupo sa dalag nga duwaaang itik nga goma
Ikonsiderar ang pagpakita og hulagway nga sama niini nga nagpakita og usa ka butang nga klaro nga lahi sa mga butang sa palibot niini. Dayon ipangutana ang mosunod nga mga pangutana:
Unsa nga mga pagkompara ang imong mabuhat tali niini nga hulagway ug sa usa ka tawo nga naningkamot sa pagsunod kang Kristo sa kalibotan karon?
Unsa ang pipila ka sitwasyon diin ang kabatan-onan kinahanglang mopili tali sa pagbuhat kon unsay husto ug sa pagsunod sa unsay gibuhat sa uban sa ilang palibot?
Samtang sugdan nimo ang imong pagtuon sa kinabuhi ug mga pagtulon-an ni propeta Mormon, pangita og mga panglantaw nga makatabang kanimo sa pagsunod sa Manluluwas kon ang uban sa imong palibot mahimong mopili sa lahi.
Ang Propeta nga si Mormon
Ikonsiderar ang pagpakita sa mosunod nga hulagway ni Mormon. Paghangyo og usa ka boluntaryo sa pagpasabot kon unsa ang mga palid nga metal nga iyang gitrabaho. Kon gikinahanglan, ipakigbahin ang impormasyon gikan sa mosunod nga parapo.
Imahe
Mormon uban sa bulawan nga mga palid
Si Mormon gipili sa Dios aron sa pagtipig ug sa pagpanalipod sa sagrado nga mga talaan sa iyang mga katawhan ug sa pagdugang sa iyang kaugalingong kasaysayan ug mga kasinatian ngadto niini. Ang pipila sa mga rekord nga iyang gisulat, gipamubo, ug gitipigan sa kaulahian gihubad ni Propeta Joseph Smith isip Basahon ni Mormon.
Alang sa mas may inter-aksiyon nga kasinatian, mahimo nimong buhaton ang mosunod: Dapita ang mga estudyante sa paghanduraw nga naghimo sila og profile sa social media alang kang Mormon o nangandam sa pagpaila kaniya ngadto sa usa ka grupo sa mga katawhan. Hunong human sa matag hugpong sa mga bersikulo ug dapita ang mga estudyante sa pagdugang og usa ka butang nga ilang nakat-onan sa profile o pasiuna.
Basaha ang mosunod nga mga tudling sa kasulatan aron makat-on og pipila ka mga butang mahitungod ni Mormon:
Unsay mipatigbabaw diha kanimo gikan sa mga paghulagway kang Mormon?
Bisan isip usa ka batan-ong lalaki, si Mormon kinahanglang modesisyon kon mosunod ba siya sa unsay gibuhat sa kadaghanan sa iyang palibot o kon siya andam nga mobarog isip usa ka tinun-an ni Jesukristo.
Mahimong nakahinumdom ka nga nagkat-on mahitungod sa matarong nga sibilisasyon nga natukod human sa pagbisita sa Manluluwas ngadto sa Amerika. Subo lang, human sa halos 200 ka tuig nga matarong nga pagpuyo, ang mga Nephite ug ang mga Lamanite misugod sa pagkamapahitas-on. Sa kataposan, nahimo silang daotan kaayo ug mabingkilon (tan-awa sa 4 Nephi 1:24–49).
Basaha ang Mormon 1:13–14, 16; 2:18–19, mangita sa paghulagway ni Mormon sa katilingban nga iyang nadak-an.
Unsa ang imong makat-onan gikan sa ehemplo ni Mormon?
Usa ka kamatuoran nga mahimong mailhan sa mga estudyante mao nga makapili kita sa pagsunod sa Manluluwas, bisan kon ang uban sa atong palibot wala magsunod. Mahimo nimong isulat kini nga kamatuoran diha sa pisara.
Tungod sa pagkamatarong ni Mormon, nakadawat siya og talagsaong mga panalangin gikan sa Dios, bisan sa iyang pagka tin-edyer. Basaha ang Mormon 1:15, mangita og usa niini nga mga panalangin.
Unsa ang mga paagi nga ang usa ka tin-edyer karon mahimong mapanalanginan nga“[makatagamtam] ug [masayod] sa kaayo ni Jesus”?
Ang posible nga mga tubag niini nga pangutana naglakip sa napasaylo sa mga sala o nakasinati og kalinaw sa panahon sa kasamok. Mahimo usab nga hisgotan sa mga estudyante ang mga higayon nga gibati nila ang kalig-on ni Jesus nga nakatabang kanila sa pagbuhat sa usa ka butang nga gibati nila nga dili sila kuwalipikado sa pagbuhat o dili makahimo.
Sa unsang paagi ang Langitnong Amahan mipanalangin kanimo sa pagsunod sa ehemplo ni Jesukristo bisan kon ang uban wala?
Kon ang mga estudyante nag-andam sa pagpaila-ila ni Mormon o nag-andam og profile sa social media alang kaniya, dapita sila sa pagpakigbahin kon unsay ilang giandam ngadto gagmay nga grupo.
Ang ehemplo ni Mormon
Ang ehemplo ni Mormon makatabang kanimo sa pag-ila sa pipila ka piho nga mga paagi nga mahimo nimong sundon si Kristo bisan kon ang uban sa imong palibot wala. Ang mosunod nga mga kalihokan makatabang kanimo sa pagpalawom sa imong pagsabot sa mga hiyas ni Mormon ug sa pag-ila sa mga paagi sa paggamit niini diha sa pagsunod ni Kristo.
Ikonsiderar ang pagbahin sa klase ngadto sa gagmay nga mga grupo. Sangoni ang matag grupo og usa sa mosunod nga mga hiyas nga tun-an, ug hatagi sila sa katugbang nga mga handouts. Dayon dapita ang mga estudyante sa pagreport unsay ilang nakat-onan ngadto sa usa ka grupo nga nagtuon sa laing hiyas.
Kalihokan 1
Pagkamaligdong
Manwal sa Magtutudlo sa Basahon ni Mormon (2024)—“Mormon 1–2: Ang Propeta nga si Mormon”
Basaha ang Mormon 1:2, 15, ug ikonsiderar ang pagmarka sa pulong nga “maligdong.” (Mahimo nimong irekord diha sa imong mga kasulatan nga ang maligdong mahimong magkahulogan og adunay balaang pagtahod, seryoso, ug mahunahunaon.)
Basaha ang mosunod nga pamahayag ni Presidente Boyd K. Packer (1924–2015) sa Korum sa Napulog Duha ka Apostoles:
Imahe
Presidente Boyd K. Packer
Nakakita kita og mga sumbanan sa balaan nga pagtahod ug sa pagkawalay balaan nga pagtahod diha sa Simbahan. Samtang daghan ang angayang dayegon pag-ayo, kita nagkaanam sa pagkawalay balaang pagtahod. Kita adunay rason nga mabalaka pag-ayo. …
Ang kawalay balaang pagtahod nagdala kanato paduol sa mga katuyoan sa kaaway pinaagi sa pagpugong sa malumo nga mga agianan sa pagpadayag diha sa hunahuna ug espiritu. (Boyd K. Packer, “Reverence Invites Revelation,” Ensign, Nob. 1991 22)
Unsa ang pipila ka mga butang nga kinahanglan nga itratar nga adunay balaan nga pagtahod ug pagkaseryoso nga gitratar sa uban nga walay balaang pagtahod?
Unsa ang pipila ka mga paagi nga ang Manluluwas nagpakita sa pagkamaligdong (may balaang pagtahod, seryoso, ug mahunahunaon)?
Manwal sa Magtutudlo sa Basahon ni Mormon (2024)—“Mormon 1–2: Ang Propeta nga si Mormon”
Basaha ang Mormon 1:2 ug ikonsiderar ang pagmarka sa hugpong sa mga pulong nga “dali sa pagpaniid.”
Basaha ang mosunod nga pamahayag ni Elder David A. Bednar sa Korum sa Napulog Duha ka mga Apostoles:
Imahe
Elder David A. Bednar
Kon kita dali nga makaobserbar, dali kitang makakita o makabantay ug motuman. Kining duha ka sukaranang mga elemento––pagpangita ug pagtuman––mahinungdanon sa pagkahimong dali ra nga makaobserbar. Ug si propeta Mormon usa ka makapadasig nga ehemplo niining gasa nga makita sa buhat. (David A. Bednar, “Dali nga Makaobserbar,” Liahona, Dis. 2006, 16)
Unsa nga mga pagtulun-an ang imong nakaplagan nga makatabang nga mahimong dali nga makamatikod ug mosunod? Ngano man?
Unsa nga tambag ang imong ihatag ngadto sa usa ka higala kinsa mibati nga ang pagkamasulondon ngadto sa Ginoo makahulat hangtod sa ulahing bahin sa kinabuhi?
Sa unsang mga paagi gipakita ni Jesukristo ang pagkadali sa pagpaniid?
Ikonsiderar ang pagbahin sa mga estudyante ngadto sa gagmay nga mga grupo aron kompletohon ang mosunod nga kalihokan. Dayon dapita sila sa pagpakigbahin sa ilang mga tubag ngadto sa klase.
Aron matabangan ka nga makahibalo og mga paagi sa paggamit niini nga Kristohanong mga hiyas sa imong kaugalingong kinabuhi, paglista og labing menos duha ka mga hagit nga giatubang sa kabatan-onan nga nagpuyo sa kalibotan karon. Dayon isulat kon sa unsang paagi ang usa o ang duha sa mga hiyas nga imong gitun-an makatabang sa kabatan-onan nga makadawat og tabang ug kusog gikan sa Langitnong Amahan ug ni Jesukristo.
Ikonsiderar ang pagpakigbahin sa mga panalangin nga imong nadawat pinaagi sa pagsunod kang Kristo. Dayon dasiga ang mga estudyante sa paghimo og plano sa pagbuhat sa unsay ilang nakat-onan ug gibati karon.