Nabalaka ka na ba bahin sa usa ka tawo nga imong gihigugma? Naghisgot sa mga tawo sa iyang palibot, si Mormon miingon, “Ako nangulo kanila … ug nahigugma kanila … sa tibuok kong kasingkasing” (Mormon 3:12). Apan si Mormon nabalaka ug nagbangotan alang sa iyang katawhan samtang sila nagpadulong ngadto sa kalaglagan tungod kay sila nagdumili sa pagdangop ngadto sa Dios alang sa panabang. Kini nga leksiyon makatabang kanimo nga mabati ang kamahinungdanon sa pagdangop ngadto sa Langitnong Amahan ug sa Manluluwas sa imong kinabuhi.
Paghatag og usa ka kinatibuk-ang pagpasabot sa mahinungdanon nga mga istorya sa kasulatan. Mas masabtan sa mga estudyante ang konteksto ug ang unod sa mga kasulatan kon makita nila ang tibuok hulagway. Hisgoti ang mahinungdanon nga mga indibidwal, mga panghitabo, ug propetikanhong mga pagtulun-an sa usa ka piho nga istorya. Dasiga ang mga estudyante sa pagkonsiderar kon sa unsang paagi kini nga mga elemento nakaimpluwensiya sa ilang pagsabot sa ebanghelyo sa Ginoo.
Pagpangandam sa estudyante: Dapita ang mga estudyante nga mosulay sa paghinumdom sa usa ka higayon sa dihang gitabangan sila sa Dios latas sa usa ka pakigbisog tungod kay nangayo sila Kaniya og tabang.
Mga Posibleng Kalihokan sa Pagkat-on
Unsa ang imong buhaton?
Si Elder Spencer J. Condie sa Seventy misulti sa istorya sa usa ka tawo nga ginganlan og Murray Ling, kinsa nagmaneho tabok sa usa ka tulay sa gabii sa dihang iyang nakita ang sakyanan sa iyang atubangan kalit nga nawala. Usa ka dako nga bahin sa taytayan sa iyang unahan ang nahugno. Giyatakan ni Murray ang mga preno ug napahunong ang iyang awto sa husto nga oras.
Kung naa ka sa kahimtang ni Murray, unsa ang pipila sa mga una nga butang nga buhaton nimo pagkahuman sa pagpahunong sa imong awto?
Basaha ang mosunod nga asoy sa unsay gipili ni Murray nga buhaton. Mahimo nimong tan-awon ang bidyo nga “Prophets Warning,” anaa sa ChurchofJesusChrist.org, gikan sa time code nga 0:00 hangtod sa 0:58.
Imahe
Elder Spencer J. Condie
Si Murray … misugod sa pagpasidaan sa mga nagsingabot nga mga sakyanan bahin sa katalagman sa unahan. Samtang siya natarantar sa pagwarawara sa iyang mga bukton, sa iyang kalisang, usa ka sakyanan ang “miliko sa iyang luyo ug nahulog sa bung-aw” (Stephen Johnson, “Over the Edge!” Reader ‘s Digest, Nob. 1977, p. 128). Ang ikaduha nga sakyanan hapit dili mohunong sa oras, apan ang ikatulo nga sakyanan wala nagpakita og timailhan sa paghinay ug nabangga sa sakyanan ni Ling sa daplin sa taytayan.
Sa kalit usa ka puno nga bus ang padulong ni Murray, wala panumbalinga ang iyang mga bukton sa pagwarawara. (Spencer J. Condie, “A Mighty Change of Heart,” Ensign, Nob. 1993, 17)
Kon ikaw pa ang anaa sa kahimtang ni Murray, unsay imong bation kon ang mga tawo dili manumbaling kanimo? Moundang ka ba sa pagsulay sa pagluwas kanila? Ngano o nganong dili?
Sama ni Murray Ling, nakita ni Mormon nga ang iyang mga katawhan nagpaingon sa kalaglagan. Isip lider sa mga kasundalohan sa Nephite, ug isip propeta sa Dios, si Mormon mibuhat sa tanan niyang mahimo sa pagpasidaan kanila, pagpanalipod kanila, ug pagtudlo kanila mahitungod sa ilang Manluluwas. Subo lang, kadaghanan sa iyang mga katawhan wala manumbaling o misalikway sa mga paningkamot ni Mormon.
Ang peligro sa unahan sa mga katawhan ni Mormon
Sa Iyang pagkahibalo nang daan sa tanan, ang Dios nagpasidaan sa mga Nephite sa gatosan ka mga tuig mahitungod sa unsay mahitabo kon sila magpadayon sa pagsukol batok Kaniya.
Aron makakita og usa ka ehemplo, basaha ang Helaman 13:8–10, mangita sa usa ka panagna nga gihimo sa Dios pinaagi ni Samuel ang Lamanite sobra sa 300 ka tuig sa wala pa matawo si Mormon. Samtang imong basahon, bantayi kon kanus-a matuman ang panagna. (Tan-awa sa 1 Nephi 12:6, 11–19 ug 3 Nephi 27:30–32 alang sa dugang nga mga ehemplo sa pagkahibalo nang daan ug sa mga pasidaan sa Dios nga matuman sa panahon ni Mormon.)
Ngano sa imong hunahuna nga ang Dios mopahibalo na niining daan sa layo pa?
Dapita ang mga estudyante sa pagbasa sa mosunod nga mga tudling ug sa paghunahuna kon nganong si Mormon naningkamot pag-ayo sa pagtabang sa iyang mga katawhan bisan siya nasayod sa mga panagna sa ilang kalaglagan. Dayon dapita sila sa pagpakigbahin sa ilang mga panglantaw ngadto sa usa ka pares. Ang mga tubag mahimong maglakip sa tinguha ni Mormon sa pagluwas sa daghan nga mga katawhan kutob sa iyang mahimo bisan siya nasayod nga ang nasod sa mga Nephite pagalaglagon.
Moroni 9:3–5, 18–22 (Si Moroni mipakigbahin og usa ka sulat nga gisulat sa iyang amahan, si Mormon.)
Unsa nga mga pagkaparehas ang imong nakita tali sa mga paningkamot ug mga tinguha ni Mormon ug sa mga paningkamot sa Manluluwas?
Pagtawag sa Dios
Ikonsiderar ang pagsulat sa mosunod nga dili kompleto nga kapahayag diha sa pisara ug sa pagdapit sa mga estudyante sa pagduol sa pisara ug sa pagsulat sa blangko sa kasagaran nga mga pakigbisog sa mga tin-edyer.
“Daghang mga tin-edyer karon ang nakigbisog sa .”
Si Mormon mipakigbahin og usa sa mga rason nga ang mga Nephite naglisod sa ilang mga pakigbisog. Basaha ang Mormon 5:2, mangita sa unsay WALA buhata sa mga Nephite samtang sila nakigbisog.
Sa unsang paagi nga ang unsay gipakigbahin ni Mormon diha sa bersikulo 2 magamit ngadto sa daghang mga tawo karon?
Tiwasa ang pamahayag sa pisara aron kini mabasa sama sa mosunod:
“Daghang mga tin-edyer karon ang nakigbisog sa nga walay pagtawag sa Dios alang sa panabang.”
Tabangi ang mga estudyante nga makasabot nga ang Dios dili kanunayng motangtang sa mga butang nga atong gikalisoran apan nga Siya motabang kanato nga mabuntog kini kon kita modangop ngadto Kaniya. Pagdapit og mga boluntaryo sa pagpakigbahin og mga panahon nga sila mitawag sa Dios alang sa panabang sa usa sa mga pakigbisog diha sa pisara ug sa unsang paagi ang Dios mitabang kanila sa pagbuntog niini. Pahimangnoi ang mga estudyante nga dili ipakigbahin ang bisan unsa nga personal ra kaayo sa klase.
Dapita ang mga estudyante sa pagpamalandong kon aduna bay mga pakigbisog sa ilang mga kinabuhi nga wala sila mangayo og tabang sa Dios. Dasiga sila sa pagtinguha sa Iyang tabang sa usa niadtong mga dapita ug sa pagmatikod sa kalainan nga nahimo niini sa paglabay sa panahon.
Ang kalaglagan sa mga Nephite
Ikonsiderar ang pagpakita niini nga hulagway ug pagdapit og usa ka estudyante aron sa pagpakigbahin unsay gihulagway niini. Gamita ang materyal sa mosunod nga parapo kon gikinahanglan.
Imahe
Mormon Bids Farewell to a Once Great Nation [Si Mormon Nanamilit ngadto sa usa ka Kanhi Bantogan nga Nasod], ni Arnold Friberg
Human sa paghigugma, pagtudlo, ug pagpangulo sa mga Nephite nga mga kasundalohan sulod sa mga dekada, si Mormon grabeng nasamdan sa kataposang gubat batok sa mga Lamanite. Gikan sa tumoy sa usa ka bungtod, iyang gisusi kon unsa ang nahibilin sa nasod sa mga Nephite. 24 lamang ka mga sundalo nga Nephite ang naluwas sa pagpamatay, lakip si Mormon ug ang iyang anak nga lalaki nga si Moroni (tan-awa sa Mormon 6:9–15).
Sa Mormon 6, girekord ni Mormon ang “kataposang pakigbisog sa [iyang] mga katawhan” (Mormon 6:6). Basaha ang Mormon 6:7, 10–15, mangita kon unsay nahitabo sa mga Nephite niining kataposang gubat.
Mahimo nimong ipasubay sa mga estudyante kon pila ka mga Nephite ang nagpundok sa sinugdanan sa gubat ug pila ang nahibilin human sa gubat. Mahimong mamatikdan nila nga adunay 23 ka mga komander nga Nephite nga ang matag usa adunay 10,000 ka mga sundalo nga nagsumada og 230,000 ka mga Nephite. 24 lamang ka mga Nephite ang naluwas niining kataposang gubat.
Handurawa nga anaa ka sa posisyon ni Mormon, nga nagbangotan sa pagkawala sa mga tawo nga imong gihigugma apan nasayod nga mahimo ka pa nga magbilin ug mubo nga mensahe alang sa umaabot nga mga henerasyon. Unsay gusto nimong mahibaloan sa mga tawo sa kataposang mga adlaw?
Basaha ang Mormon 5:10–11, 16–18; 6:16–20 aron sa pagtan-aw sa pipila sa mga mensahe nga nadasig si Mormon sa pagkulit alang kanato. Mahimo nimong markahan ang mga hugpong sa mga pulong nga sa imong hunahuna ang mga tawo sa atong panahon labing kinahanglan nga makadungog.
Ikonsiderar ang pagdapit sa mga estudyante sa pagpakigbahin sa mga hugpong sa mga pulong nga ilang napalgan ngadto sa kapares. Samtang ang mga estudyante makaila sa mga kamatuoran, mahimo nimong isulat kini sa pisara. Ang nahibilin niini nga leksiyon nakapunting sa mosunod nga kamatuoran. Mahimong mobati ka og impresyon sa pagtutok sa lahi nga kamatuoran nga nabantayan sa mga estudyante.
Usa ka kamatuoran nga gitudlo ni Mormon mao nga si Jesukristo nagbarog nga bukas ang mga bukton sa pagdawat niadtong kinsa mipili nga maghinulsol ug moduol Kaniya (tan-awa sa Mormon 6:17).
Ikonsiderar ang pagpiyong sa imong mga mata sa makadiyot ug sa paghanduraw ni Jesus nga nagtindog ug nagtan-aw kanimo nga bukas ang mga bukton. Irekord diha sa imong journal ang imong mga hunahuna, mga pagbati, ug mga impresyon mahitungod sa unsay gipasabot diha sa imong kinabuhi nga si Jesus nagbarog nga bukas ang mga bukton aron sa pagdawat kanimo.
Dasiga ang mga estudyante nga mag-amping nga dili mopakigbahin og bisan unsa nga hilabihan ka personal kon imong hisgotan ang mosunod nga mga pangutana ngadto sa klase.
Hain sa mga pagtulun-an ni Mormon ang labing gikinahanglan nimo sa imong kinabuhi? Ngano man?
Unsa ang gusto ni Mormon nga imong masabtan mahitungod sa Langitnong Amahan ug ni Jesukristo?
Sa unsang paagi kaha sa imong hunahuna malahi ang atong kalibotan kon mas daghan ang motuo sa unsay gisulat ni Mormon?
