4 Նեփի

«Դարձի են գալիս առ Տերը»

մի խումբ երջանիկ կանայք՝ եկեղեցական հագուստով

Հազարամյակներ շարունակ անհատները, ընտանիքները և հասարակությունները փնտրել են կատարելություն, այսինքն՝ ներդաշնակություն, խաղաղություն և միասնություն։ Սրանք գուցե անհասանելի թվան, բայց գոյություն ունեն։ 4 Նեփի գրքի պատմությունը դրա օրինակն է։ Որպես այս օրհնություններն ունենալու մի եղանակ պետք է ավելի խորությամբ դարձի գանք դեպի Տերը և մեր սրտերում ունենանք Աստծո սերը։ Այս դասը կարող է օգնել ձեզ ավելի մեծ սեր զգալ Երկնային Հոր և Հիսուս Քրիստոսի հանդեպ, որպեսզի ավելի խորը դարձի գաք դեպի Նրանք։

Պատրաստվեք՝ ուսումնասիրելով Աստծո խոսքը։ Մենք լիցքավորվում ենք, երբ ուսուցանում ենք սուրբ գրությունների ճշմարտությունները և վերջին օրերի մարգարեների ու առաքյալների ուսմունքները։ Աղոթքով ուսումնասիրելով Աստծո խոսքը՝ մենք կարող ենք համահունչ լինել Սուրբ Հոգու հետ և ստանալ գաղափարներ և ուղղորդում։

Ուսանողի նախապատրաստում․ կարող եք ուսանողներին առաջարկել Եկեղեցու աղբյուրներում ուսումնասիրել դարձ բառի իմաստը։ Որպես այլընտրանք կարող եք առաջարկել ուսանողներին, որ իրենց ծանոթներից որևէ մեկին հարցնեն, թե ինչ է նրա համար նշանակում դեպի Քրիստոս դարձի գալը։

Հնարավոր ուսումնական վարժություններ

Երկնային հնարավորություն

Պատկերացրեք, թե ինչպիսին կլիներ կյանքը, եթե դուք և ձեր շրջապատի մարդիկ բոլորդ սիրեիք ու փորձեիք հետևել Հիսուս Քրիստոսին։

Կարող եք ուսանողներին բաժանել փոքր խմբերի և հանձնարարել նրանց կարճ քննարկել հետևյալ հարցերը։

• Ինչպե՞ս կփոխվեր ձեր համայնքը։

• Ինչպե՞ս կփոխվեր ձեր դպրոցը կամ եկեղեցին։

• Ինչպե՞ս կփոխվեր ձեր տունը։

Նեփի 4 գրքում ներկայացվում են այն մարդկանց պատմությունները, որոնք ապրել են Փրկչի՝ Ամերիկա աշխարհամաս կատարած այցից հետո։ Նրանց փորձառություններն ուսումնասիրելիս փնտրեք, թե ինչ ազդեցություն էր ունեցել Հիսուս Քրիստոսը և Նրա ավետարանն այդ մարդկանց վրա։ Մտածեք, թե այդ ուսմունքներն ինչպես կարող են ազդել ձեր ընտրած ապրելակերպի վրա։

Փրկչի ավետարանի ազդեցությունը

Կարդացեք 4 Նեփի 1․1–2 հատվածները և փնտրեք, թե ինչ ազդեցություն ունեցավ Փրկիչը և Նրա ուսմունքները մարդկանց վրա։

• Ի՞նչ նկատեցիք:

Կարող եք հատված 2-ում նշել «ժողովուրդը դարձի էր եկել դեպի Տերը» արտահայտությունը։

Կարող եք նախապատրաստման վարժությունն ավարտած ուսանողներին առաջարկել կիսվել, թե ինչ սովորեցին այն մասին, թե ինչ է նշանակում դարձի գալ առ Տերը։ Կարող եք կիսվել նաև հետևյալ սահմանմամբ։

Դարձի գալ առ Տերը նշանակում է «փոխել համոզմունքները, սիրտը և կյանքը՝ Աստծք կամքն ընդունելու ու Նրա կամքին համապատասխանելու համար … [և] դառնալ Քրիստոսի աշակերտը» (Սուրբ գրքերի ուղեցույց, «Դարձ, դարձի գալ», scriptures.ChurchofJesusChrist.org)։

Դարձի գալու օրհնությունները

Նեփիացիները և լամանացիները անհավանական օրհնություններ ունեցան, քանի որ դարձի էին եկել դեպի Հիսուս Քրիստոսը։ Ձեր օրագրի մի էջի կենտրոնում գրեք «Դարձի գալու օրհնությունները»։

Բացի այն, որ ուսանողներին կհանձնարարեք իրենց օրագրերում գրել վերնագիրը, կարող եք այն գրել նաև գրատախտակին։ Հետևյալ հատվածներն ուսումնասիրելուց հետո ուսանողները կարող են իրենց պատասխանները գրել գրատախտակին։

Կարդացեք 4 Նեփի 1․2–18 հատվածները և նշեք այն բառերն ու արտահայտությունները, որոնք արտահայտում են նրանց ստացած օրհնությունները։ Ձեր թղթի վրա «Դարձի գալու օրհնությունները» վերնագրի շուրջը գրեք այդ բառերը կամ արտահայտությունները (օգտակար կլինի իմանալ հատված 16-ի որոշ բառերի իմաստները։ Խլրտումներ բառը վերաբերում է հասարակական անկարգություններին կամ հուզումներին, պոռնկություններ բառը վերաբերում է սեռական մեղքերին, իսկ հեշտասիրություն նշանակում է ցանկասիրություն և անառակություն)։

Մտածեք, թե այս օրհնություններից որոնք եք ավելի շատ ցանկանում ունենալ ձեր կյանքում։ Կարող եք ձեր օրագրի էջում շրջանի մեջ վերցնել դրանք։

Ուսանողներին առաջարկեք կիսվել, թե ինչ սովորեցին կամ զգացին հատվածներ 2–18-ի ուսումնասիրությունից։ Կարող եք տարբեր ուսանողների առաջարկել կիսվել, թե որ արտահայտությունն է հատկապես կարևոր իրենց համար և բացատրել դրա կարևորությունը։

• Ի՞նչն ամենից շատ տպավորեց ձեզ այդ հատվածներում։ Ինչո՞ւ։

• Այս հատվածներից ձեր սովորածի հիման վրա ինչպե՞ս կարող եք ավարտել հետևյալ նախադասությունը․ «Երբ մենք դարձի ենք գալիս առ Տերը …»։

Ճշմարտություններից մեկը, որ կարող ենք բացահայտել այս հատվածներից, այն է, որ երբ մենք դարձի ենք գալիս առ Տերը՝ որպես Քրիստոսի զավակներ օրհնվում ենք երջանկությամբ և միասնությամբ։

• Ըստ ձեզ՝ Հիսուս Քրիստոսին դարձի գալը և Նրա ավետարանով ապրելն ինչո՞ւ կարող է նման օրհնություններ բերել։

• Այս ճշմարտությունը հասկանալն ինչպե՞ս կարող է ազդել ձեր ամենօրյա գործողությունների վրա։

Աստծո սերը

Տասներկու Առաքյալների Քվորումից երեց Ջեֆրի Ռ. Հոլլանդը կիսվել է հետևյալ դիտարկմամբ այն մասին, թե այս մարդիկ ինչու էին կարողանում երջանկության և միասնության նման վիճակում ապրել։

Երեց Ջեֆրի Ռ. Հոլլանդ

Ո՞րն է նման բավարարված, երջանիկ կյանքի հաջողության բանալին: Այն արտահայտված է գրության մեջ՝ մեկ նախադասությամբ. «Աստծո սերը … բնակվում էր մարդկանց սրտերում» [4 Նեփի 1․15]։ Երբ Աստծո սերը գերիշխում է մեր կյանքում, միմյանց նկատմամբ մեր հարաբերություններում և, ի վերջո, ողջ մարդկության հանդեպ մեր զգացմունքներում, ապա հնի տարբերությունները, սահմանափակող պիտակներն ու արհեստական բաժանումները սկսում են անցնել և խաղաղությունը մեծանում է: Դա հենց այն է, ինչ տեղի ունեցավ Մորմոնի Գրքի մեր օրինակում: Այլևս չկային ո՛չ լամանացիներ, ո՛չ հակոբացիներ, ո՛չ հովսեփացիներ, ո՛չ էլ զորամացիներ։ Ոչ էլ որևէ այլ տեսակի «-ացիներ»։ Ժողովուրդը վերցրել էր ընդամենը մեկ նոր վերացական ինքնություն: Նրանք բոլորը կոչվում էին «Քրիստոսի զավակներ» [4 Նեփի 1․17] (Ջեֆրի Ռ. Հոլլանդ, «Մեծագույն հարստությունը», Լիահոնա, նոյեմբեր 2021 թ., 9):

Կարող եք նշել հատված 15-ի այն արտահայտությունը, որ Աստծո սերը բնակվում էր մարդկանց սրտերում։ Աստծո սերը մեր սրտերում ունենալը կարող է նշանակել զգալ այն սերը, որ Աստված ունի մեր և ուրիշների հանդեպ։ Այն կարող է նշանակել նաև սեր զգալ Երկնային Հոր և Հիսուս Քրիստոսի հանդեպ։

• Ի՞նչ գործողություններ կարող ենք ձեռնարկել, որոնք կօգնեն մեզ ավելի մեծ սեր զգալ Երկնային Հոր և Հիսուս Քրիստոսի հանդեպ։

Նախորդ հարցին մի քանի պատասխաններ մտածեք։ Որպես այս քննարկման մաս օգտակար կլինի խնդրել ուսանողներին բացատրել, թե ինչն է օգնել իրենց ավելի մեծ սեր զգալ Աստծո հանդեպ։ Կարող եք կիսվել նաև ձեր կյանքի օրինակներով։

Որպես Երկնային Հոր և Հիսուս Քրիստոսի հանդեպ ավելի մեծ սեր զգալու մեկ եղանակ՝ կարող ենք սուրբ գրություններից սովորել Նրանց մասին և ճանաչել Նրանց։

Ուսանողները կարող են կատարել հետևյալ վարժությունը անհատապես կամ փոքր խմբով։

Սուրբ գրություններում ուսումնասիրեք Երկնային Հոր և Հիսուս Քրիստոսի մասին այն հատվածները, որոնք կարող են օգնել ձեզ ավելի մեծ սեր զգալ Նրանց հանդեպ։ Սովորելիս ուշադրություն դարձրեք Նրանց հատկանիշներին, ցանկություններին և դերերին։ Կարող եք որոնել, օրինակ, նման բառեր՝ «Երկնային Հայր» կամ «Հիսուս Քրիստոս»՝ օգտագործելով ուսումնասիրության գործիքները, ինչպիսիք են Սուրբ գրքերի ուղեցույցը, Թեմաների ուղեցույցը կամ Gospel Library հավելվածի որոնման գործառույթը։

Ուսանողներին առաջարկեք կիսվել իրենց գտած այն հատվածներով, որոնք հատկապես կարևոր նշանակություն ունեն իրենց համար։ Խնդրեք նրանց բացատրել, թե դրանցում ուսուցանվող ճշմարտություններն ինչպես կարող են օգնել իրենց ավելի մեծ սեր զգալ Երկնային Հոր և Հիսուս Քրիստոսի հանդեպ։

• Երբ ուսանողներն ավարտեն կիսվելը, կարող եք առաջարկել նրանց իրենց օրագրում պատասխանել հետևյալ հարցին։ Հետո վկայեք այսօր քննարկված ճշմարտությունների մասին։

• Ի՞նչ եք ձգտում անել առաջիկա օրերին, որը կարող է օգնել ձեզ ավելի շատ դարձի գալ դեպի Հիսուս Քրիստոսը։

Բացատրական և պատմական տեղեկություններ

Ի՞նչը կարող է օգնել ինձ խորացանել իմ դարձն առ Տերը։

Երիտասարդ կանանց նախկին գերագույն նախագահ քույր Բոննի Լ. Օսկարսոնն ուսուցանել է.

Քույր Բոննի Լ. Օսկարսոն

Դարձի գալը տեղի է ունենում, երբ մենք ջանասեր ենք մեր աղոթքներն ասելիս, սուրբ գրություններն ուսումնասիրելիս, եկեղեցի հաճախելիս և տաճարային արարողություններին մասնակցելու համար արժանի լինելիս: Դարձի գալը տեղի է ունենում, երբ մենք գործում ենք արդարակյաց սկզբունքների վրա հիմնվելով, որոնք սովորում ենք մեր տներում և դասարանում: Դարձի գալը տեղի է ունենում, երբ մենք ապրում ենք ավետարանով, վայելում Սուրբ Հոգու ընկերակցությունը և ապրում մաքուր ու առաքինի կյանքով: Այն գալիս է, երբ մենք հասկանում ենք Հիսուս Քրիստոսի Քավությունը, ընդունում ենք Նրան որպես մեր Փրկիչ և Քավիչ և թույլ ենք տալիս, որ Քավությունը գործի մեր կյանքում: (Բոննի Լ. Օսկարսոն, «Դարձի եկեք», Ensign կամ Լիահոնա, նոյեմբեր 2013 թ․, 77–78)։

Ի՞նչ է լինում, եթե զգում եմ, որ ինձ մոտ դարձ տեղի չի ունենում։

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Երեց Դեյվիդ Ա. Բեդնար

Շատերիս համար դարձը շարունակական գործընթաց է, ոչ թե մեկանգամյա իրադարձություն, և այն զորավոր կամ ազդեցիկ փորձառության հետևանք է: Տող առ տող և ցուցում առ ցուցում, աստիճանաբար և գրեթե աննկատելիորեն մեր մտքերը, խոսքերը և գործերը դառնում են Աստծո կամքին համապատասխան: Դեպի Տերը դարձի գալու համար անհրաժեշտ է՝ և՛ համառություն, և՛ համբերություն: (Դեյվիդ Ա. Բեդնար, «Դարձ դեպի Տերը», Ensign կամ Լիահոնա, նոյեմբեր 2012 թ․, 107–108)։

Աստծո սերը սրտումս ունենալն ինչպե՞ս կարող է օգնել ինձ ավելի մեծ միասնություն ունենալ ուրիշների հետ։

Տասներկու Առաքյալների Քվորումից երեց Դեյլ Գ. Ռենլանդն ուսուցանել է.

Երեց Դեյլ Գ. Ռենլանդ

Միասնությունը ջանքեր է պահանջում։ Այն զարգանում է, երբ մեր սրտերում սեր ենք զարգացնում Աստծո հանդեպ, և կենտրոնանում ենք մեր հավերժական ճակատագրի վրա: Մենք միավորված ենք մեր գլխավոր ընդհանուր ինքնությամբ՝ որպես Աստծո զավակներ և վերականգնված ավետարանի ճշմարտություններին մեր նվիրվածությամբ: Մեր սերն առ Աստված և Հիսուս Քրիստոսի մեր աշակերտությունն առաջացնում են անկեղծ մտահոգություն ուրիշների հանդեպ: (Դեյլ Գ. Ռենլանդ, «Քրիստոսի խաղաղությունը չեզոքացնում է թշնամանքը», Լիահոնա, նոյեմբեր 2021 թ., 84):

Օժանդակ ուսումնական վարժություններ

Դարձի ճանապարհի օրինակ

Կարող եք ցուցադրել «Հզոր փոփոխություն․ դարձ» տեսանյութը (2:47) և փնտրել, թե ինչ արեց Ալեխանդրան՝ ավելի շատ Տիրոջը դարձի գալու և իր օրհնություններն ստանալու համար։

4 Նեփի 1.1–18։ Սիոնի հիմնադրումը

Հիշեցրեք ուսանողներին Ենովքի քաղաքի մասին և ինչու էր Տերն այն «Սիոն» կոչում (տե՛ս Մովսես 7․18)։ Հարցրեք նրանց, թե Մովսես 7․18 հատվածում նկարագրված բնութագրիչներն ինչպես են նկատում 4 Նեփի գրքի մարդկանց մոտ։ Կարող եք առաջարկել ուսանողներին նաև կարդալ 3 Նեփի 26․19 հատվածը՝ այս մարդկանց մեկ այլ նկարագրություն տեսնելու համար, որը կարող է համեմատվել Ենովքի ժողովրդի հետ։

4 Նեփի 1․19–49: Մեղքի կործանիչ էությունը

4 Նեփի 1․19–49 հատվածներում կարդում ենք մարդկանց հոգևոր մերժման մասին։ Սա ներկայացնելու համար կարող եք ցուցադրել Տասներկու Առաքյալների Քվորումից երեց Ջեֆրի Ռ. Հոլլանդի հետևյալ խոսքերը․ «Մի հին ասացվածք ասում է, որ հազարավոր մղոնների ճամփորդությունը սկսվում է մեկ քայլով, այնպես որ հետևեք ձեր քայլին» (Ջեֆրի Ռ. Հոլլանդ «Տեղ չկա իմ հոգու թշնամուն», Ensign կամ Լիահոնա, մայիս 2010 թ․, 45)։

Հանձնարարեք ուսանողներին 4 Նեփի 1․20–35, 38–45 հատվածներում որոնել, թե մարդիկ ինչ տարբեր քայլեր կամ գործողություններ ձեռնարկեցին, որոնք հեռացրին նրանց Հիսուս Քրիստոսից և տարան նրանց դեպի ամբարշտություն ու վիշտ։