Սեմինարիա
3 Նեփի 2–5․ «Պատրաստ էին … Տիրոջ ուժով»

«3 Նեփի 2–5․ «Պատրաստ էին … Տիրոջ ուժով»», Մորմոնի Գիրքը. Ուսուցչի ձեռնարկ (2024)

«3 Նեփի 2–5», Մորմոնի Գիրքը. Ուսուցչի ձեռնարկ

3 Նեփի 2–5

«Պատրաստ էին … Տիրոջ ուժով»

Նկար
Նեփիացիներն իրենց բոլոր մարդկանց, ունեցվածքը և ոչխարներին հավաքում են մեկ վայրում՝ առաջիկա պատերազմին պատրաստվելու համար

Միներվա Թեյչերտ (1888–1976), Լաքոնիուսի պատասխանը, 1949–1951, յուղանկար մասոնետի վրա, 36 x 48 դյույմ։ Բրիգամ Յանգի համալսարանի Արվեստի թանգարան։

Ճիշտ այնպես, ինչպես մենք ենք դժվարությունների հանդիպում Փրկչի վերադարձից առաջ, այնպես էլ նեփիացները դժվարությունների էին հանդիպել նախքան Նրա գալուստը։ Գադիանթոնի ավազակները սպառնում էին կործանել նեփիացիներին։ Սակայն նեփիացիները «պատրաստ էին հանդիպել նրանց … Տիրոջ ուժով» (3 Նեփի 4.10)։ Նեփիացիների նման մենք էլ կարող ենք հաղթահարել դժվարությունները, եթե պատրաստված լինենք։ Այս դասը կարող է օգնել ձեզ ստանալ Տիրոջ ուժը՝ լինելով պատրաստված հոգևոր և աշխարհիկ առումով։

Առաջարկեք ուսանողներին արդյունավետ և արդար քայլեր կատարել։ Օգնեք նրանց սուրբ գրություններն ուսումնասիրելիս հասկանալ պատմություններում հիշատակվող ընտրությունների ու գործողությունների հետևանքները։ Խրախուսեք ուսանողներին այդ դասերը կապել իրենց կյանքի հետ և մտածել, թե ինչպես կարող են հավատարմորեն հետևել Փրկչին։

Ուսանողի նախապատրաստում․ ուսանողներին առաջարկեք ընտանիքի անդամների կամ Եկեղեցու ղեկավարների հետ քննարկել, թե ինչ օրհնություններ են գալիս աշխարհիկ կամ հոգևոր առումով պատրաստված լինելու արդյունքում։

Հնարավոր ուսումնական վարժություններ

Եղեք պատրաստված

Այս վարժության նպատակն է օգնել ուսանողներին տեսնել պատրաստված լինելու կարևորությունը։ Օգնեք ուսանողներին մտածել, թե որ հանգամանքներին է անհրաժեշտ պատրաստվել։ Կարող եք կիսվել, թե երբ եք օրհնվել պատրաստված լինելու համար, կամ երբ եք տառապանքի մեջ ընկել, որովհետև պատրաստված չեք եղել։

Մտածեք, թե ձեր կյանքում երբ եք զգացել, որ պատրաստված եք, և երբ եք զգացել, որ պատրաստված չեք։

  • Ի՞նչ իրավիճակ էր, և ինչո՞ւ էիք ձեզ պատրաստ կամ անպատրաստ զգում։

  • Եթե ձեզ անպատրաստ էիք զգում, ի՞նչ եք արել՝ ապագայում ավելի լավ պատրաստվելու համար։

  • Ի՞նչ եք արել, որ ձեր ներկայի կամ ապագայի դժվարություններին հոգևոր տեսանկյունից պատրաստվեք։

3 Նեփի 2–5 գլուխներն ուսումնասիրելիս փնտրեք Հոգու ուղղորդումը՝ իմանալու, թե ինչ կարող եք անել՝ ձեզ աշխարհիկ և հոգևոր առումով ապագային պատրաստելու համար։

Լաքոնիուսի պատրաստությունները

Մարգարե Սամուելը մարգարեացել էր, որ որպես Հիսուս Քրիստոսի ծննդյան նշան կլինի գիշեր առանց խավարի։ Երբ այս մարգարեությունն իրագործվեց (տե՛ս 3 Նեփի 1.15–19), «ժողովրդի մեծ մասը հավատաց և դարձի եկավ առ Տերը» (3 Նեփի 1.22)։ Սակայն մի քանի տարի անց ոմանք սկսեցին չհավատալ։

Ստորև ներկայացվող վարժության համար դասարանը կարող եք բաժանել երկու մասի կամ զույգերի։ Ուսանողների կեսը կարող է կարդալ հետևյալ հատվածներից մեկը և դասարանին կամ դասընկերոջը ներկայացնել, թե ինչ գտավ։

Կարդացեք 3 Նեփի 1.27–30 և 3 Նեփի 2.1–3 հատվածները և փնտրեք, թե ինչ պատճառներով որոշ մարդիկ հեռացան Տիրոջից։

  • Ի՞նչ դասեր կարող ենք քաղել այդ հատվածներից, որոնք կարող են օգնել մեզ հավատարիմ մնալ Տիրոջը մեր օրերում։

Գադիանթոնի ավազակները քանակապես շատացան և պայքարում էին նեփիացիների դեմ։ Ի պատասխան՝ «լամանացիները, ովքեր դարձի էին եկել դեպի Տերը, միացան իրենց եղբայրներին՝ նեփիացիներին» (3 Նեփի 2.12)։ Գադիանթոնի ավազակների առաջնորդ Գեդդիանին նամակ գրեց Լաքոնիուսին՝ նեփիացիների գլխավոր դատավորին։ Նամակում նա սպառնում էր չհանձնվելու դեպքում կործանել նեփիացիներին (տե՛ս 3 Նեփի 3.1–10)։

Կարդացեք 3 Նեփի 3.11–12 հատվածները և փնտրեք, թե ինչպես էր պատասխանել Լաքոնիուսը։

  • Տիրոջ հանդեպ Լաքոնիուսի հավատքի ի՞նչ ապացույց եք տեսնում։

Գրատախտակին գրեք Նեփիացիների պատրաստությունները։ Կարող եք ստորև ներկայացվող հատվածները դասարանի տարբեր անդամներին կամ խմբերին հանձնարարել։ Ուսանողներին առաջարկեք գրատախտակին թվել, թե ինչ արեցին մարդիկ աշխարհիկ և հոգևոր պատրաստություն ունենալու համար։

Որպեսզի օգնեք ուսանողներին հասկանալ աշխարհիկ պատրաստությունները, կարող եք մատնանշել, թե ինչպես էին նեփիացիները պաշտպանիչ ամրություններ կառուցում, պահակներ դնում և պարագաներ ու սնունդ հավաքում։ Հոգևոր պատրաստությունների մասին կարող եք նշել, թե ինչպես էին նրանք ապաշխարում և աղոթում ազատման համար։

  • Ըստ ձեզ՝ ո՞ր պատրաստություններն ամենաշատը օգնեցին։ Ինչո՞ւ։

  • Ըստ ձեզ՝ այդ պատրաստություններն ինչպե՞ս օգնեցին նրանց ապավինել Տիրոջը։

Կարդացեք 3 Նեփի 4.7–12 հատվածները և փնտրեք, թե նեփիացիներն ինչպես օրհնվեցին իրենց հոգևոր և աշխարհիկ պատրաստությունների համար։

  • Մենք ի՞նչ սկզբունքներ կարող ենք սովորել այս պատմությունից (տե՛ս 3 Նեփի 4.10)։

Մեկ սկզբունք, որ սովորում ենք այս պատմությունից, այն է, որ երբ հոգևոր և աշխարհիկ առումով պատրաստվենք, Տերը ուժ կտա մեզ հաղթահարելու կամ դիմակայելու դժվարություններին։

Պատրաստությունները մեր օրերում

Գրատախտակին գրեք Ժամանակակից զուգահեռներ և օգնեք ուսանողներին կազմել պատրաստությունների ցանկ, որոնք կարող ենք կատարել մեր օրերում։ Այդ պատրաստությունները կարող են նման լինել նեփիացիների պատրաստություններին կամ այլ պատրաստությունների, որոնք մարգարեները խորհուրդ են տվել մեզ անել։ Քննարկեք որոշակի դժվարություններ, որոնց հանդիպում ենք մեր օրերում, և ինչպես կարող են այդ պատրաստություններն օգնել մեզ պատրաստ լինել Տիրոջ ուժով։ Օգնեք ուսանողներին մտածել գաղափարներ՝ ցուցադրելով «Temporal Preparedness Resources» տեսանյութը (3:09), որը հասանելի է ChurchofJesusChrist.org կայքում։

  • Ձեր ցուցակից ընտրեք մեկ կամ մի քանի պատրաստություն։ Այն ինչպե՞ս կարող է օգնել մեզ հաղթահարել մեր օրերում մեզ հանդիպող կոնկրետ դժվարությունները։

  • Ըստ ձեզ՝ մեր պատրաստվածությունն ինչպե՞ս կարող է թույլ տալ Տիրոջը զորացնել մեզ։

Գադիանթոնի ավազակները պաշարեցին նեփիացիներին, սակայն հաջողություն չունեցան, քանի որ նեփիացիների պատրաստվածությունը աստվածային օգնություն էր պարունակում։ Ի վերջո Գադիանթոնի ավազակները հետ քաշվեցին։ Նրանք շրջապատվեցին նեփիացի զորքերի կողմից և հանձնվեցին որպես գերիներ կամ սպանվեցին (տե՛ս 3 Նեփի 4.16–27)։

Կարդացեք 3 Նեփի 4.30–33, 5.1–4 հատվածները և փնտրեք, թե մարդիկ ինչպես արձագանքեցին Տիրոջ կողմից զորացվելուն։

  • Նրանց գործողություններն ինչպե՞ս էին ցուցադրում իրենց հավատքն առ Աստված:

Որպես մտածելու նյութ կարող եք ցուցադրել հետևյալ հրավերը, ինչպես նաև նախագահ Նելսոնի խոսքերը, որպեսզի ուսանողները խորհեն դրա շուրջ։

Մտածեք, թե երբ եք աշխարհիկ և հոգևոր պատրաստության արդյունքում զգացել Տիրոջն ուժը։

Նախագահ Ռասսել Մ. Նելսոնը վկայել է պատրաստված լինելու օրհնությունների մասին․

Նկար
Նախագահ Ռասսել Մ. Նելսոն

Հակառակորդը երբեք չի դադարում հարձակվել: Այսպիսով, մենք չենք դադարի պատրաստվել։ Որքան ավելի շատ նյութապես, հուզական առումով և հոգևորապես ինքնապահով լինենք, այնքան ավելի պատրաստ կլինենք տապալել սատանայի անողոք հարձակումները: …

Ես չեմ ասում, որ առաջիկա օրերը հեշտ կլինեն, բայց ես խոստանում եմ ձեզ, որ ապագան փառավոր կլինի նրանց համար, ովքեր պատրաստ են և շարունակում են պատրաստվել, որպեսզի գործիքներ դառնան Տիրոջ ձեռքում: (Ռասսել Մ. Նելսոն, «Հավատքով ընդունենք ապագան», Ensign կամ Լիահոնա, նոյեմբեր 2020 թ․, 75–76)։

Ըստ անհրաժեշտության ներկայացրեք օրինակներ, թե ուսանողներին ինչ կարող է հարկավոր լինել պատրաստվելու համար, օրինակ՝ միսիոներական ծառայություն, կրթական հնարավորություններ, կարիերա, բնական աղետներ կամ Փրկչի գալուստը։

Մտածեք որևէ դժվարության, իրավիճակի կամ իրադարձության մասին, որին պետք է պատրաստվեք։ Մտածեք, թե որքանով եք պատրաստ զգում ձեզ այսօր։ Այս հարցերին պատասխանելիս փնտրեք Հոգու առաջնորդությունը։

  • Ի՞նչ հատուկ գործողություններ կարող եք կատարել պատրաստվելու համար։

  • Ինչպե՞ս կարող եք Տիրոջը ներառել ձեր պատրաստություններում։

Վկայեք այն օրհնությունների մասին, որոնք գալիս են պատրաստված լինելուց։ Խրախուսեք ուսանողներին ընտանիքի հետ խոսել իրենց հանդիպող դժվարությունների և այն մասին, թե ինչպես պատրաստվեն աշխարհիկ և հոգևոր առումներով։