Alma 57

Pagpaningkamot sa Pagsunod sa mga Sugo sa Kanunay

samdan nga mga batan-on nga kasundalohan

Unsa ang imong kinaiya sa pagsunod sa mga sugo? Nganong mahinungdanon man ang imong kinaiya? Samtang nakig-away sa laing makuyaw nga gubat, ang mga batan-on nga kasundalohan misunod sa “matag pulong sa sugo nga walay pagkasayop niini,” nagbutang sa “ilang pagsalig diha sa Dios sa kanunay” (Alma 57:21, 27). Kini nga leksiyon gidesinyo aron sa pagtabang kanimo nga maningkamot sa pagsunod sa mga sugo sa Dios sa kanunay.

Tabangi ang mga estudyante nga magbansay sa paggamit sa mga kahanas sa pagtuon sa tibuok tuig. Makapakita ang mga magtutudlo sa mga estudyante kon unsaon paggamit ang daghang nagkalainlaing mga kahanas sa pagtuon sa kasulatan ug mga paagi sa pagkat-on diha sa klase. Mahimo kang mohunong ug sa makadiyot hisgotan kon sa unsang paagi ang usa ka pamaaagi o kahanas magamit ug dayon bansayon kini atol sa leksiyon. Dasiga ang mga estudyante sa paggamit usab sa kahanas diha sa ilang personal nga pagtuon.

Pagpangandam sa estudyante: Dapita ang mga estudyante sa paghunahuna og mga ehemplo sa pagkamasulundon sa Manluluwas ngadto sa Langitnong Amahan ug sa pagpamalandong kon unsay ilang makat-onan gikan niadtong mga ehemplo.

Mga Posibleng Kalihokan sa Pagkat-on

Mga kinaiya ngadto sa mga sugo

Aron matabangan ang mga estudyante nga maandam sa pagkat-on mahitungod sa pagsunod sa mga sugo, ikonsiderar ang pagdapit kanila sa pagbuhat sa mosunod nga kalihokan. Dasiga ang mga estudyante nga himuon ang ilang mga paghulagway nga tinud-anay ug may kalabotan.

Ihulagway ang tulo ka nagkalainlaing mga kinaiya nga tingali anaa ang usa ka tawo sa pagsunod sa mga sugo sa Dios ug ngano.

Samtang mopakigbahin ang mga estudyante, ikonsiderar ang pagsulat sa mga kinaiya diha sa pisara. Dasiga ang mga estudyante sa pagpakigbahin og tinud-anay nga mga rason nganong ang usa ka tawo tingali anaa niini nga kinaiya.

Paggahin og kadiyot sa pagsulat sa mga tubag sa mosunod nga mga pangutana diha sa imong journal sa pagtuon:

• Unsa ang imong kinaiya sa pagsunod sa mga sugo sa Dios? Nganong mahinungdanon man ang imong kinaiya?

• Kon wala ka maningkamot karon sa pagtuman sa mga sugo kutob sa imong mahimo, unsay nakapapugong kanimo sa pagbuhat sa ingon?

Samtang magtuon ka karon, pangitaa ang mga baroganan mahitungod sa pagkamasulondon nga mahimong magdasig ug maghatag kanimo og motibo sa pagbuhat ug motabang kanimo sa bisan unsang mga pangutana o kabalaka. Pamalandongi kon sa unsang paagi kini magamit ug makapanalangin sa imong kinabuhi.

Mga batan-on nga kasundalohan

Sa miaging leksiyon, imong nakat-onan kon sa unsang paagi ang 2,000 nga mga batan-on nga kasundalohan mitabang kang Antipus ug sa iyang mga tawo sa pagpildi sa “labing lig-on” ug “labing daghan” nga kasundalohan sa Lamanite niana nga bahin sa yuta (tan-awa sa Alma 56:34). Sa Alma 57, si Helaman mipadayon sa iyang sulat ngadto ni Kapitan Moroni. Kan-uman pa ka anak nga mga lalaki sa katawhan ni Ammon ang miapil sa iyang kasundalohan (tan-awa sa Alma 57:6), ug ang 2,060 nga mga batan-on nga kasundalohan nag-atubang og laing hulga. Misulong ang mga Lamanite sa mga Nephite ug hapit na unta sila mabuntog nila sa dihang si Helaman ug ang iyang mga tawo giubanan sa usa ka grupo sa mga sundalo kinsa kaniadto nagdala sa mga binilanggo nga Lamanite (tan-awa sa Alma 57:1–18).

Duha ka mga kahanas sa pagtuon sa kasulatan nga makapalawom sa imong pagtuon niini nga asoy ug makatabang kanimo sa paggamit niini nga mga leksiyon diha sa imong kinabuhi mao ang pag-ila ug pagpamalandong sa mahinungdanon nga mga pulong o mga hugpong sa mga pulong.

Basaha ang Alma 57:19–23 aron makita kon unsay nahitabo. Ikonsiderar ang pagmarka sa mga pulong ug mga hugpong sa mga pulong nga naghulagway sa mga batan-on nga kasundalohan ni Helaman.

Aron sa pagpakita og ehemplo niini nga kahanas, ikonsiderar ang dungan nga pagtuon sa Alma 57:19–20 ug itudlo ang mga pulong ug mga hugpong sa mga pulong sama sa “lig-on” ug “walay kahadlok.” Ikonsiderar ang pagdasig sa mga estudyante sa pagpangita sa mga kahulogan niini nga mga pulong ug sa pagpakigbahin kon sa unsang paagi ang mga kahulogan makaapekto sa ilang pagsabot. Dayon dapita ang mga estudyante sa pagpangita og laing mahinungdanon nga mga pulong ug mga hugpong sa mga pulong diha sa Alma 57:21–23 ug sa pagpakigbahin sa ilang mga hunahuna mahitungod niini.

Sa bersikulo 21, ikonsiderar ang pagmarka kon giunsa paghulagway ni Helaman ang pagkamasulondon niini nga mga batan-on nga lalaki. Basaha ang Alma 58:40, mangita sa kinaiya sa mga kasundalohan ngadto sa Dios ug sa Iyang mga sugo human sa sunod nga hulga sa militar.

• Unsa sa imong hunahuna ang gipasabot sa “pagbuhat sa matag pulong sa sugo nga walay pagkasayop niini” (Alma 57:21) ug “naninguha sa paghupot … sa iyang mga sugo sa kanunay” (Alma 58:40)?

• Sa unsang paagi nga ang atong hugot nga pagtuo ug paghinumdom ni Jesukristo makaimpluwensiya sa atong tinguha ug abilidad sa pagsunod sa mga sugo sa Dios?

Basaha ang Alma 57:24–27, mangita sa mga pulong o mga hugpong sa mga pulong nga nagpakita kon sa unsang paagi ang mga anak nga lalaki ni Helaman napanalanginan sa ilang ikaduhang gubat tungod sa ilang hugot nga pagtuo ug pagkamasulondon ngadto sa Dios.

Dapita ang mga estudyante sa pagpakigbahin unsa nga mga hugpong sa mga pulong ang mipatigbabaw ngadto kanila ug nganong sa ilang hunahuna mahinungdanon kadto nga mga hugpong sa mga pulong.

• Unsa ang imong nakat-onan gikan niini nga asoy nga mahimong makonektar sa imong kinabuhi karon?

Dasiga ang mga estudyante sa pagpakigbahin og nagkalainlaing mga baroganan. Ikonsiderar ang pagsulat sa mga tubag diha sa pisara.

Usa ka baroganan nga atong makat-onan mao nga kon atong ibutang ang atong pagsalig sa Dios ug maningkamot sa pagtuman sa Iyang mga sugo sa kanunay, diha Siya mopanalangin kanato pinaagi sa Iyang kahibulongan nga gahom.

• Sa unsang paagi nga ang pagkahibalo nga adunay “makiangayon nga Dios” kinsa adunay “milagroso” ug “kahibulongan nga gahom” (Alma 57:26) makaapekto sa atong kinaiya sa pagsunod Kaniya?

• Unsa nga kinaiya sa imong hunahuna ang tingali gusto sa Ginoo nga atong mabatonan kon kita maningkamot sa pagtuman sa Iyang mga sugo apan napakyas sa hingpit nga pagkamasulundon? Sa unsang paagi ang imong pagsabot sa Pag-ula ni Jesukristo makatabang sa pagtubag niini nga pangutana?

Importante nga masabtan nga samtang kita masulundon sa Iyang mga sugo, ang Dios mopanalangin kanato sa Iyang kaugalingong paagi ug panahon. Sa ilang duha ka mga pakig-away, ang mga batan-on nga kasundalohan napanalanginan nga naluwas ang ilang mga kinabuhi bisan pa sa makuyaw nga panagsangka ug mga pagkaangol.

Hatagi ang mga estudyante og pipila ka minuto sa pagbuhat og labing menos duha sa mosunod.

1. Basaha ang dili mominos duha sa mosunod nga mga tudling aron madugangan ang imong pagsabot sa mga katuyoan sa mga sugo sa Dios ug sa unsa nga paagi Siya mopanalangin kanimo tungod sa imong pagkamasulundon: Abraham 3:25; Juan 14:15; Mosiah 2:41; Alma 9:13.

2. Paghunahuna og mga ehemplo sa pagkamasulundon sa Manluluwas ngadto sa Langitnong Amahan, ug pamalandongi unsay imong nakat-onan gikan sa Iyang ehemplo. Si Elder Robert D. Hales (1932–2017) sa Korum sa Napulog Duha ka Apostoles mitudlo nga “ang atong gugma sa Manluluwas mao ang yawe sa pagkamasulundon sama sa Manluluwas” (“Kon Nahigugma Kamo Kanako, Inyong Pagatumanon ang Akong mga Sugo,” Liahona, Mayo 2014, 37). Hunahunaa ang pipila ka mga rason nga imong gihigugma ang Manluluwas ug sa unsang paagi kana nga gugma makaapekto sa imong kinaiya sa pagsunod sa mga sugo.

3. Pamalandongi ang mga paagi nga nagmasulundon ka sa mga sugo sa Dios ug ang mga panalangin nga Iyang gihatag kanimo tungod sa imong pagkamasulundon.

Kon mahuman na ang mga estudyante, dapita sila sa pagbuhat sa ilang labing maayo sa pagsunod niini nga mga instruksiyon: Tindog. Pangita og tawo diha sa lawak [room], ug ipakigbahin unsa ang inyong nakat-onan gikan sa usa sa mga buluhaton. Pangita og laing tawo diha sa lawak ug ipakigbahin kaniya unsa ang inyong nakat-onan gikan sa usa sa ubang mga buluhaton. Balik sa inyong lingkoranan.

Kon mahuman na ang mga estudyante, dapita sila sa pagpakigbahin sa klase og butang nga ilang nakat-onan pinaagi sa ilang kaugalingong pagtuon o usa ka butang nga makahuluganon nga gipakigbahin sa usa ka klasmeyt.

Hunahunaa ang usa sa mga sugo sa Dios. Ihulagway kon sama sa unsa kaha kini tinud-anay nga makita, nga ang usa ka tin-edyer karon maningkamot sa paghinumdom sa Ginoo ug sa pagsunod niini nga sugo sa kanunay. Dayon ihulagway kon unsa kaha nga mga panalangin ang madawat sa usa ka tin-edyer kinsa mosunod niini nga paagi.

• Unsa ang pipila ka mga rason nga kita tingali mobati nga matental sa dili pagbuhat sa atong labing maayo sa pagsunod sa usa ka sugo? Sa unsang paagi kaha nato mabuntog kini nga mga tentasyon?

• Sa unsang paagi nga ang pagpaningkamot sa pagsunod sa mga sugo sa kanunay nagkinahanglan nga kita mosalig sa Manluluwas nga si Jesukristo?

Sa pagtapos niini nga leksiyon, paghimo og tumong diha sa imong journal sa pagtuon kon unsaon nimo sa “paghinumdom sa Ginoo nga [imong] Dios adlaw-adlaw; [ug] … [sa pagpaninguha] sa paghupot … sa iyang mga sugo sa kanunay” (Alma 58:40). Mahimo kang mopili og usa ka piho nga sugo nga gusto pa nimong mas sundon. Isip kabahin sa imong tumong, ikonsiderar ang paghatag sa imong kaugalingon og usa ka yugto sa panahon—pananglitan, “Maningkamot ko nga kinasingkasing nga mag-ampo buntag ug gabii sulod sa lima ka adlaw” o “Moadto ko sa sa adlaw nga Igpapahulay sulod sa upat ka semana.”

Mahimong makatabang ang pagkahibalo nga adunay kahigayonan sa leksiyon nga “Sukda ang Imong Nakat-onan 7” alang sa mga estudyante aron sa pagsukod sa ilang pag-uswag.

Komentaryo ug Background nga Impormasyon

Unsa nga mga panalangin ang moabot gikan sa pagsunod sa tanang mga sugo sa Dios?

Si Presidente Russell M. Nelson mitudlo og laing paagi nga kita makapaningkamot sa pagsunod nga walay pagkasayop niini:

Presidente Russell M. Nelson

Makasugat [kamo] og mga tawo nga pilion lang ang mga sugo nga ilang tumanon ug mobaliwala sa uban nga ilang gipiling supakon. Gitawag ko kini nga pangkarinderya nga pagkamasulundon. Kini nga binuhatan sa pagpili-pili dili magsilbi. Mopadulong kini ngadto sa kauyamot. Aron andam nga mosugat sa Dios, kita motuman sa tanan Niyang mga sugo. …

… Ang pagkamasulundon sa mga sugo sa Dios makahatag og pisikal ug espirituhanong panalipod. (Russell M. Nelson, “Atubanga ang Umaabot uban sa Hugot nga Pagtuo,” Liahona, Mayo 2011, 35)

Ngano nga ang Ginoo naghatag kanato og mga sugo?

Si Elder Dale G. Renlund sa Korum sa Napulog Duha ka Apostoles mitudlo:

Elder Dale G. Renlund

Ang tumong sa atong Langitnong Amahan sa pagkaginikanan dili ang pagbuhat sa Iyang mga anak sa unsay matarong; kini ang pagpili sa Iyang mga anak sa pagbuhat sa matarong ug sa kataposan mahimong sama Kaniya. Kon gusto lang Niya nga magmasulundon kita, mogamit Siya og diha-diha dayon nga mga ganti ug mga silot aron sa pag-impluwensiya sa atong mga kinaiya.

Apan dili interesado ang Dios nga ang Iyang mga anak mahimo lang nga disiplinado ug masulundon nga mga “binuhi.” …

Miestablisar ang Dios og plano diin mamahimo kitang mga manununod sa Iyang gingharian, usa ka dalan sa pakigsaad nga moggiya kanato nga mahimong sama Kaniya, makabaton sa matang sa Iyang kinabuhi, ug mopuyo sa kahangtoran diha sa Iyang presensiya. Ang personal nga pagpili kaniadto—ug karon—mahinungdanon niini nga plano, nga atong nakat-onan didto sa atong premortal nga kinabuhi. (Dale G. Renlund, “Magpili Kamo Niining Adlawa,” Liahona, Nob. 2018, 104)

Unsa pa ang gitudlo sa Kinatibuk-ang mga Awtoridad ug mga lider sa Simbahan mahitungod sa pagkamasulundon?

Dugang nga mga Kalihokan sa Pagkat-on

Usa ka alternatibo nga pagsugod

Ikonsiderar ang pagsugod sa leksiyon pinaagi sa pagpakita og lista sa mga buluhaton diha sa pisara. Ania ang pipila ka mga pananglitan: Dayga ang usang ka tawo. Basaha og kusog ang usa ka tudling sa doktrinal nga kahanas. Pagsulat og usa ka sugo nga imong gipasalamatan diha sa pisara.

Hangyoa ang klase sa pagbuhat sa daghan niini sa eksaktong pagkasunod-sunod kutob sa mahimo. Kon mahuman na sila, hangyoa sila sa pagpamalandong kon sila misulay ba sa pagbuhat sa mga hagit sa tukma gayod. Dapita sila sa pagpakigbahin unsa nga mga benepisyo ang mahimong moabot gikan sa pagsulay sa pagbuhat sa mga buluhaton sa tukma gayod.

Alma 58. Dangop ngadto sa Dios sa mga panahon sa kalisdanan

Aron matabangan ang mga estudyante sa pagtuon og dugang nga asoy kabahin sa mga batan-on nga kasundalohan, ipasabot nga ang mga Nephite nagtinguha nga mabawi ang siyudad sa Manti. Tungod kay hilabihan sila kagamay sa gidaghanon mihukom sila nga maghulat alang sa mga dugang nga tabang ug mga suplay gikan sa Zarahemla.

Basaha ang Alma 58:6–12, mangita kon unsay gibuhat sa mga Nephite samtang nag-atubang sila niining lisod nga sitwasyon ug sa unsang paagi mitubag ang Ginoo. Tabangi ang mga estudyante sa pag-ila sa baroganan nga kon kita modangop sa Dios sa panahon sa kalisdanan, makadawat kita og kalinaw nga makahatag kanato og paglaom. Dapita ang mga estudyante sa pagsulat sa kasagaran nga mga kalisdanan nga mahimong atubangon sa usa ka tin-edyer, dayon dapita sila sa pagdugang og pipila ka mga paagi nga kita makadangop sa Dios nianang mga panahona. Hangyoa ang mga estudyante sa pagpakigbahin kon sa unsang paagi sila gipanalanginan sa Dios sa ilang malisod nga mga panahon. Basaha ang Alma 58:39–40, mangita kon sa unsang paagi ang mga batan-on nga kasundalohan mipili sa pagdangop sa Dios sa panahon sa ilang mga kalisdanan.