“Alma 56: 2,000 nga mga Batan-on nga Kasundalohan,” Manwal sa Magtutudlo sa Basahon ni Mormon (2024)
“Alma 56,” Manwal sa Magtutudlo sa Basahon ni Mormon
Alma 56
2,000 nga mga Batan-on nga Kasundalohan
Makakat-on kita og mahinungdanong mga leksiyon gikan sa matinud-anong ehemplo sa kabatan-onan sa Simbahan sa Ginoo. Atol sa panahon sa dakong gubat, si Helaman nangulo sa 2,000 ka maisog nga batan-ong mga lalaki ngadto sa mga kadaogan nga nakaluwas og daghang kinabuhi. Kini nga leksiyon gituyo aron sa pagtabang kanimo nga makasabot nga samtang ikaw maisogon nga mogamit og hugot nga pagtuo kang Jesukristo, ang Ginoo mopanalangin kanimo sa Iyang gahom.
Hibaloi nga ang imong mga estudyante adunay balaanong potensiyal. Hinumdomi nga ang matag estudyante anak sa Dios. Kon nahibaloan sa mga estudyante nga nagtuo ka sa ilang abilidad nga mahimong mas mahisama ni Jesukristo, molambo ang ilang pagsalig sa ilang potensiyal. Dayga kon ang mga estudyante maningkamot nga mahimong mas masulundon, motagad nga mabination sa uban, ug molihok nga may hugot nga pagtuo.
Pagpangandam sa estudyante: Ikonsiderar ang pagdapit sa mga estudyante sa paghunahuna og ehemplo sa usa ka batan-on o grupo sa kabatan-onan kinsa mipakita og dakong hugot nga pagtuo sa Ginoo bisan pa sa lisod nga mga hagit.
Mga Posibleng Kalihokan sa Pagkat-on
Pagbaton og kaisog
Ikonsiderar ang pagsulat diha sa pisara sa mosunod nga mga buluhaton nga mahimong makahahadlok o lisod. Mahimo nimong dugangan o usbon ang mga buluhaton aron mahimong mas may kalabotan sa imong mga estudyante. Ang dugang nga mga ehemplo sa mga buluhaton naglakip sa mosunod: ipakigbahin ang inyong pagpamatuod, ipakigbahin ang ebanghelyo sa usa ka higala, ug maghinulsol.
Handurawa kon unsay imong bation, ug ngano, kon hangyoon ka sa pagbuhat sa mosunod:
-
Pag-alagad og full-time nga misyon
-
Tumanon ang mga sugo bisan kon kini dili popular
-
Maghatag og pakigpulong sa simbahan o pagtudlo og leksiyon
Dapita ang pipila ka estudyante sa pagpili og usa sa mga buluhaton ug sa pagpakigbahin kon unsay ilang bation ug kon ngano.
-
Unsa nga mga pagduha-duha ang paminaw nimo makatental niini nga mga sitwasyon?
Aron maandam ang mga estudyante nga makasabot sa kamahinungdanon sa unsay ilang tun-an, dapita sila nga mainampingon nga buhaton ang mosunod:
Sa imong journal sa pagtuon, pagsulat og usa ka butang nga gusto sa Ginoo nga imong buhaton karon o sa umaabot nga mahimong makahahadlok o malisod alang kanimo. Mahimo usab nimo nga irekord ang bisan unsang mga pagduha-duha o kabalaka nga mahimong aduna ka. (Ikaw mobalik niini nga entry sa ulahi sa leksiyon.)
Pamalandongi kon unsa ang kinahanglan nimong masayran o masabtan aron maatubang kini nga buluhaton uban ang pagsalig. Samtang magtuon ka, tinguhaa ang giya sa Ginoo aron matabangan ka nga makakita ug makasabot sa mga kamatuoran nga makatabang nimo.
Ang sulat [epistle] ni Helaman ngadto kang Moroni
Ang Alma 56–58 mao ang usa ka sulat nga gisulat ni Helaman ngadto kang Kapitan Moroni atol sa gubat. Si Helaman misulat mahitungod sa usa ka grupo sa mga batan-ong lalaki gikan sa mga Anti-Nephi-Lehi nga nailhan isip ang 2,000 nga mga batan-on nga kasundalohan. Kining batan-ong mga lalaki nga gipangulohan ni Helaman miapil sa kasundalohan nga gipangulohan ni Antipus ug nangandam sa pagpanalipod sa ilang yuta ug mga pamilya batok sa mga Lamanite (tan-awa sa Alma 56:9–12).
Tabangi ang mga estudyante nga makasabot kon unsa ang nahitabo diha sa Alma 56:30–44. Pipila ka mga paagi nga mahimo nimo kini naglakip sa mosunod:
-
Isulat diha sa pisara ang mosunod nga kalihokan sa pagpares, o hatagi ang mga estudyante og kopya sa handout. Ang mga tubag sa kalihokan sa pagpares kay 1-a, 2-c, 3-d, 4-b.
-
Ipasul-ob sa tulo ka mga estudyante diha sa atubangan sa lawak [room] ang mga name tag nga magpaila sa matag usa kanila isip usa sa tulo ka mga kasundalohan (Ang 2,000 nga mga Batan-on nga Kasundalohan, Kasundalohan ni Antipus, Kasundalohan sa Lamanite). Ang mga estudyante sa atubangan sa lawak mahimong mo-arte sa mga lihok sa mga kasundalohan samtang magbasa ang mga estudyante sa mga bersikulo.
Ang Sitwasyon nga Giatubang sa 2,000 nga mga Batan-on nga Kasundalohan
Manwal sa Magtutudlo sa Basahon ni Mormon (2024)––”Alma 56: 2,000 nga mga Batan-on nga Kasundalohan
Aron makahibalo mahitungod sa makahahadlok ug malisod nga sitwasyon nga giatubang sa mga anak nga lalaki ni Helaman, basaha ang mosunod nga mga bersikulo ug ipares kini sa sakto nga gipamubo nga mga pamahayag.
|
1.___Alma 56:30–33 |
a. Mimando si Antipus kang Helaman ug sa iyang 2,000 nga mga kasundalohan sa pag-agi sa Antiparah sa pagsulay sa pagbira sa mga Lamanite pagawas sa dakbayan. |
|
2.___Alma 56:34–38 |
b. Human sa tulo ka adlaw, ang 2,000 nga mga kasundalohan wala na makakita sa mga Lamanite sa ilang luyo. Wala sila masayod kon ang kasundalohan ni Antipus nakaapas ba sa mga Lamanite o kon ang mga Lamanite misulay ba sa pagdani kanila ngadto sa usa ka lit-ag. Si Helaman nangutana sa iyang batan-on nga mga sundalo kon andam ba sila nga moadto sa gubat. |
|
3.___Alma 56:39–42 |
c. Sa dihang ang mga Lamanite mibiya sa siyudad aron sa pag-atake sa 2,000 nga mga kasundalohan, ang kasundalohan ni Antipus misunod sa mga Lamanite. |
|
4.___Alma 56:43–44 |
d. Imbes nga moliko aron makig-away kang Antipus, ang mga Lamanite mipaspas, naglaom nga mapatay ang kasundalohan ni Helaman sa dili pa makasulong si Antipus gikan sa luyo. |
© 2024 by Intellectual Reserve, Inc. All rights reserved.
Pagdesisyon kon makig-away ba
Handurawa nga uban ka sa batan-on nga mga kasundalohan ug gipangutana kon andam ka ba nga moadto sa gubat. Unsaon kaha nimo sa pagtubag? Unsay makaapekto sa imong desisyon?
Basaha ang Alma 56:45–48, mangita unsay desisyon niining batan-on nga mga lalaki nga buhaton ug ngano.
Dapita ang mga estudyante sa pagpakigbahin sa unsay ilang nakaplagan. Kon dili nila natural nga ipakigbahin ang mga tubag sa mosunod nga mga pangutana, ikonsiderar ang pagpangutana kanila sa mga pangutana.
-
Sumala sa bersikulo 46, unsay nahibaloan niining batan-on nga mga lalaki?
Ikonsiderar ang pagdasig sa mga estudyante sa pagbadlis sa tubag niini nga pangutana diha sa ilang mga kasulatan.
-
Kinsa ang nagtudlo kanila niini nga kamatuoran? (Tan-awa sa Alma 56:47–48.)
-
Sa unsang paagi nga kini nga kamatuoran nakahatag kanila og kaisog sa pag-adto sa gubat?
Handurawa kon unsa tingali ang gibati sa Dios samtang kining batan-on nga mga lalaki hingpit nga misalig Kaniya samtang anaa sa usa ka makahahadlok ug mahagiton nga sitwasyon.
Panalipod sa gubat
Basaha ang Alma 56:49–56, ug pangitaa unsa ang nahitabo samtang ang mga batan-on nga kasundalohan maisogon nga “[wala] magduha-duha” (Alma 56:47), o sa lain pagkasulti, migamit sa ilang hugot nga pagtuo sa Dios.
-
Unsa ang imong nakat-onan gikan niini nga mga bersikulo?
Usa sa mga baroganan nga atong makat-onan gikan sa mga batan-on nga kasundalohan mao nga samtang kita adunay kaisog sa paglihok inubanan sa hugot nga pagtuo, kita makadawat og kalig-on gikan sa Dios.
Importante kini nga mahibaloan nga samtang giluwas sa Dios ang tanang kasundalohan ni Helaman, dili Niya sa kanunay pisikal nga pagaluwason ang mga matinud-anon. Apan Siya sa kanunay mopanalangin kanila sa mga paagi nga Iyang nahibaloan nga makaayo sa ilang mga kalag (tan-awa sa Alma 60:12–13).
-
Unsa ang gitudlo niini nga asoy kanimo mahitungod sa Dios ug sa Iyang kusog?
Dapita ang mga estudyante sa pagpili ug sa pagkompleto sa usa sa mosunod nga mga kalihokan aron sa pagtabang kanila sa pagpahisama sa asoy sa kasundalohan ni Helaman ngadto sa ilang kaugalingon ug sa ilang mga kahimtang. Mahimong makatabang ang pagpakita sa mga opsiyon aron ang mga estudyante makatan-aw niini samtang sila mopili ug mokompleto niini. Pahibaloa ang mga estudyante nga makabaton sila og kahigayonan sa pagpakigbahin sa ilang mga nadiskobrehan ngadto sa ilang mga klasmeyt.
Opsiyon A. Mga kahimtang sa tinuod nga kinabuhi
Pag-ila og sitwasyon diin ang mga batan-on karon kinahanglan nga mopili nga maisogon nga molihok nga may hugot nga pagtuo sama sa matinud-anon nga mga batan-on nga mga sundalo ni Helaman. Paglista og pipila ka mga pagduha-duha nga tingale aduna ang mga batan-on niana nga sitwasyon. Dayon paglista og usa o duha ka mga paagi nga ang kabatan-onan makapakita og hugot nga pagtuo sa Dios bisan pa adunay mga pagduha-duha. Pagpakigbahin og mga paagi nga ang Langitnong Amahan mahimong makapanalangin kanila og kalig-on samtang sila molihok nga may hugot nga pagtuo.
Opsiyon B. Gitudloan sila sa ilang mga inahan
Pagsulat mahitungod sa imong inahan o laing babaye sa imong kinabuhi kinsa, sama sa mga inahan sa mga batan-on nga kasundalohan, mitudlo kanimo sa pagbaton og hugot nga pagtuo sa Dios ug ni Jesukristo. Paggahin og kadiyot sa pagrekord unsa ang iyang gitudlo kanimo sa pulong ug sa ehemplo ug sa unsang paagi siya nakaimpluwensiya kanimo. Mahimo nimong ilakip ang mga paagi nga imong gisunod ang iyang ehemplo sa pagpakita og hugot nga pagtuo sa Ginoo ug pagsinati sa Iyang kalig-on.
Dapita ang mga estudyante sa pagreport sa unsay ilang nakat-onan ngadto sa klase. Mahimong makatabang una ang pagdapit kanila sa pagpakigbahin ngadto sa usa ka klasmeyt kinsa mipili og lahi nga opsiyon kaysa ilaha.
Paghunahuna og usa ka butang nga tingali gusto sa Ginoo nga imong buhaton karon o sa dili madugay nga mahimong makahahadlok o malisod alang kanimo. Mahimo usab nimong hinumdoman ang bisan unsang mga pagduha-duha o mga kabalaka nga tingali aduna ka. Sa imong journal sa pagtuon, isulat unsay imong nahibaloan mahitungod sa Dios ug unsay imong nakat-onan mahitungod Kaniya gikan sa asoy sa mga batan-on nga kasundalohan nga mahimong makatabang kanimo niini nga sitwasyon. Mahimo nimong ilakip ang mga paagi nga imong gibati nga nadasig sa pagpakita og hugot nga pagtuo diha Kaniya ug sa unsang paagi Siya makapalig-on kanimo.